আসীৰিসৰগ্গ

পঠমদারুক্খন্ধোপমসুত্ত

পুচ্ছা – আসীৰিসৰগ্গে আৰুসো পোরাণকেহি ধম্মসংগাহকমহাথেরেহি চতুত্থং সংগীতং পঠমদারুক্খন্ধোপমসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – কোসম্বিযং ভন্তে গঙ্গায নদিযা তীরে সম্বহুলে ভিক্খূ আরব্ভ ‘‘পস্সথ নো তুম্হে ভিক্খৰে অম্হং মহন্তং দারুক্খন্ধং গঙ্গায নদিযা সোতেন ৰুয্হমান’’ন্তি এৰমাদিনা ভগৰতা ভাসিতা.

উপচারৰচনং

পুচ্ছা – কথঞ্চাৰুসো তত্থ ভগৰতা ওরিমতীরাদীনং উপচারৰচনানং অত্থো ৰিত্থারেন ৰিভজিত্ৰা পকাসিতো.

ৰিস্সজ্জনা – ওরিমং তীরন্তি খো ভিক্খু ছন্নেতং অজ্ঝত্তিকানং আযতনানং অধিৰচনং. পারিমং তীরন্তি খো ভিক্খু ছন্নেতং বাহিরানং আযতনানং অধিৰচনং. মজ্ঝে সংসীদোতি খো ভিক্খু নন্দিরাগস্সেতং অধিৰচনং. থলে উস্সাদোতি খো ভিক্খু অস্মিমানস্সেতং অধিৰচনন্তি এৰমাদিনা ভন্তে ভগৰতা তত্থ ওরিমতীরাদীনং উপচারৰচনানং অত্থো ৰিত্থারেন ৰিভজিত্ৰা পকাসিতো.

পুচ্ছা – ইমস্মিং খো পন আৰুসো সুত্তে ভগৰতা ভাসিতে ৰিসেসতো কস্স কীদিসো অত্থো কথঞ্চ পটিলদ্ধো.

ৰিস্সজ্জনা – ইমস্মিং ভন্তে সুত্তে ভগৰতা ভাসিতে ৰিসেসতো নন্দস্স গোপালকস্স পব্বজ্জা চ উপসম্পদা চ যাৰ অরহত্তাচ ৰিসেসতো অত্থো অধিগতো.

লভেয্যাহং ভন্তে ভগৰতো সন্তিকে পব্বজ্জং, লভেয্যং উপসম্পদং.

তেন হি ত্ৰং নন্দ সামিকানং গাৰো নিয্যাতেহি.

গমিস্সন্তি ভন্তে গাৰো ৰচ্ছগিদ্ধিনিযো.

কিংসুকোপমসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি অট্ঠমং সংগীতং কিংসুকোপমসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – সক্কেসু ভন্তে কপিলৰত্থুস্মিং নিগ্রোধারামে অঞ্ঞতরং কারকং ভিক্খুং আরব্ভ ভাসিতং. অঞ্ঞতরো ভন্তে কারকো ভিক্খু চত্তারো খাণাসৰে ভিক্খূ ঞাণদস্সনৰিসুদ্ধং পুচ্ছিত্ৰা অসন্তুট্ঠো তেসং ভিক্খূনং পঞ্হাৰেয্যাকরণেন যেন ভগৰা তেনুপসঙ্কমি. উপসঙ্কমিত্ৰা ভগৰন্তং এতদৰোচ ‘‘কিত্তাৰতা নু খো ভন্তে ভিক্খুনো দস্সনং সুৰিসুদ্ধং হোতী’’তি. তস্মিং ৰত্থুস্মিং ‘‘সেয্যথাপি ভিক্খু পুরিসস্স কিংসুকো অদিট্ঠপুব্বো অস্স, সো যেনঞ্ঞতরো পুরিসো কিংসুকস্স দস্সাৰী তেনুপসঙ্কমেয্যা’’তি এৰমাদিনা ভন্তে ভগৰতা ভাসিতং.

ছপ্পাণকোপমসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি দসমং সংগীতং ছপ্পাণকোপমসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সক্কেসুযেৰ ভন্তে সম্বহুলে ভিক্খূ আরব্ভ ‘‘সেয্যথাপি, ভিক্খৰে পুরিসো অরুগত্তো পক্কগত্তো সরৰনং পৰিসেয্যা’তি এৰমাদিনা ভগৰতা ভাসিতং.

পুচ্ছা – কথঞ্চাৰুসো তত্থ ভগৰতা অসংৰরো ৰিত্থারেন ৰিভজিত্ৰা দেসিতো.

ৰিস্সজ্জনা – কথঞ্চ ভিক্খৰে অসংৰরো হোতি, ইধ ভিক্খৰে ভিক্খু চক্খুনা রূপং দিস্ৰা পিযরূপে রূপে অধিমুচ্চতি, অপ্পিযরূপে রূপে ব্যাপজ্জতি, অনুপট্ঠিতকাযস্সতি চ ৰিহরতি পরিত্তচেতসো. তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি, যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তীতি এৰমাদিনা ভন্তে ভগৰতা তত্থ অসংৰরো ৰিত্থারেন ৰিভজিত্ৰা দেসিতো.

পুচ্ছা – কথঞ্চাৰুসো তত্থ ভগৰতা সংৰরো ৰিভজিত্ৰা ৰিত্থারেন দেসিতো.

ৰিস্সজ্জনা – কথঞ্চ ভিক্খৰে সংৰরো হোতি, ইধ ভিক্খৰে ভিক্খু চক্খুনা রূপং দিস্ৰা পিযরূপে রূপে নাধিমুচ্চতি, অপ্পিযরূপে রূপে ন ব্যাপজ্জতীতি, এৰমাদিনা ভন্তে ভগৰতা তত্থ সংৰরো ৰিভজিত্ৰা ৰিত্থারেন দেসিতো.