ৰেদনাসংযুত্ত

দট্ঠব্বসুত্ত

পুচ্ছা – তেনাৰুসো ভগৰতা…পে… সম্মাসম্বুদ্ধেন ৰেদনাসংযুত্তে পঞ্চমং দট্ঠব্বসুত্তং কত্থ কং আরব্ভ কথঞ্চ ভাসিতং.

ৰিস্সজ্জনা – সক্কেসু ভন্তে কপিলৰত্থুস্মিং নিগ্রোধারামে সম্বহুলে ভিক্খূ আরব্ভ ‘‘তিস্সো ইমা ভিক্খৰে ৰেদনা. কতমা তিস্সো, সুখা ৰেদনা দুক্খাৰেদনা অদুক্খমসুখা ৰেদনা. সুখা ভিক্খৰে ৰেদনা দুক্খতো দট্ঠব্বা, দুক্খা ৰেদনা সল্লতো দট্ঠব্বা, অদুক্খমসুখা ৰেদনা অনিচ্চতো দট্ঠব্বা’’তি এৰমাদিনা ভগৰতা ভাসিতং.

সুখা ভিক্খৰে ৰেদনা দুক্খতো দট্ঠব্বা.

যো সুখং দুক্খতো অদ্দস, দুক্খমদ্দক্খি সল্লতো;

অদুক্খমসুখং সন্তং, অদ্দক্খিনং অনিচ্চতো.

স ৰে সম্মদ্দসো ভিক্খু, পরিজানাতি ৰেদনা;

সো ৰেদনা পরিঞ্ঞায, দিট্ঠে ধম্মে অনাসৰো;

কাযস্স ভেদা ধম্মট্ঠো, সঙ্খ্যং নোপেতি ৰেদগূ.

সল্লসুত্ত

পুচ্ছা – তত্থেৰ আৰুসো ছট্ঠং সল্লসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সক্কেসু ভন্তে কপিলৰত্থুস্মিং নিগ্রোধারামে সম্বহুলে ভিক্খূ আরব্ভ ‘‘অস্সুতৰা ভিক্খৰে পুথুজ্জনো সুখম্পি ৰেদনং ৰেদযতি, দুক্খম্পি ৰেদনং ৰেদযতি, অদুক্খমসুখম্পি ৰেদনং ৰেদযতি. সুতৰা ভিক্খৰে অরিযসাৰকো সুখম্পি ৰেদনং ৰেদযতি, দুক্খম্পি ৰেদনং ৰেদযতি, অদুক্খমসুখম্পি ৰেদনং ৰেদযতি. তত্র ভিক্খৰে কো ৰিসেসো, কো অধিপ্পযাসো, কিং নানাকরণং সুতৰতো অরিযভাৰকস্স অস্সুতৰতা পুথুজ্জনেনা’’তি এৰমাদিনা ভগৰতা ভাসিতং.