সমুদ্দৰগ্গ

বাল়িসিকোপমসুত্ত

পুচ্ছা – সমুদ্দৰগ্গে পনাৰুসো ততিযং বাল়িসিকোপমসুত্তং ভগৰতা কত্থ কং আরব্ভ ভাসিতং.

ৰিস্সজ্জনা – রাজগহে ভন্তে জীৰকম্বৰনে সম্বহুলে ভিক্খূ আরব্ভ ‘‘সেয্যথাপি ভিক্খৰে বাল়িসিকো আমিসগতবল়িসং গম্ভীরে উদকরহদে পক্খিপেয্যা’’তি এৰমাদিনা ভগৰতা ভাসিতং.

আদিত্তপরিযাযসুত্ত

পুচ্ছা – সল়াযতনৰগ্গসংযুত্তে সমুদ্দৰগ্গে পনাৰুসো পোরাণকেহি ধম্মসংগাহকমহাথেরেহি সংগীতং অট্ঠমং আদিত্তপরিযাযসুত্তং ভগৰতা কং আরব্ভ কথঞ্চ ভাসিতং.

ৰিস্সজ্জনা – সম্বহুলে ভন্তে ভিক্খূ আরব্ভ ‘‘আদিত্তপরিযাযং ৰো ভিক্খৰে ধম্মপরিযাযং দেসেস্সামি, তং সুণাথ. কতমো চ ভিক্খৰে আদিত্তপরিযাযো ধম্মপরিযাযো. ৰরং ভিক্খৰে তত্তায অযোসলাকায আদিত্তায সম্পজ্জলিতায সজোতিভূতায চক্খুন্দ্রিযং সম্পলিমট্ঠং, নত্ৰেৰ চক্খুৰিঞ্ঞেয্যেসু রূপেসু অনুব্যঞ্জনসো নিমিত্তগ্গাহো’’তিআদিনা ভগৰতা ভাসিতং.