লক্খণসংযুত্ত

অট্ঠিসুত্ত

পুচ্ছা – লক্খণসংযুত্তে পনাৰুসো পোরাণকেহি ধম্মসংগাহকত্থেরেহি পঠমং সংগীতং অট্ঠিসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – রাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আরব্ভ ভাসিতং. আযস্মা ভন্তে লক্খণো ভগৰতা সম্মুখে আযস্মন্তং মহামোগ্গল্লানং এতদৰোচ ‘‘ইধাযস্মা মহামোগ্গল্লানো গিজ্ঝকূটা পব্বতা ওরোহন্তো অঞ্ঞতরস্মিং পদেসে সিতং পাত্ৰাকাসি, কো নু খো আৰুসো মোগ্গল্লান হেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানো ‘‘ইধাহং আৰুসো গিজ্ঝকূটা পব্বতা ওরোহন্তো অদ্দসং অট্ঠিকসঙ্খলিকং ৰেহাসং গচ্ছন্তিং’’তি এৰমাদিনা আরোচেসি. তস্মিং ভন্তে ৰত্থুস্মিং ‘‘চক্খুভূতা ৰত ভিক্খৰে সাৰকা ৰিহরন্তি, ঞাণভূতা ৰত ভিক্খৰে সাৰকা ৰিহরন্তি, যত্রহি নাম সাৰকো এৰরূপং ঞস্সতি ৰা দক্খতি ৰা সক্খিং ৰা করিস্সতী’’তি এৰমাদিনা ভগৰতা ভাসিতং.

অচ্ছরিযং ৰত ভো, অব্ভুতং ৰত ভো;

এৰরূপোপি নাম সত্তো ভৰিস্সতি.

পিণ্ডসুত্ত

পুচ্ছা – তেনাৰুসো জানতা…পে… সম্মাসম্বুদ্ধেন লক্খণসংযুত্তে ততিযং সংগীতং পিণ্ডসুত্তং কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – রাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আরব্ভ ভাসিতং. আযস্মা ভন্তে লক্খণো ভগ্গৰতো সম্মুখে আযস্মন্তং মহামোগ্গল্লানং এতদৰোচ ‘‘ইধাযস্মা মহামোগ্গল্লানো গিজ্ঝকূটা পব্বতা ওরোহন্তো অঞ্ঞতরস্মিং পদেসে সিতং পাত্ৰাকাসি, কো নুখো আৰুসো মোগ্গল্লানহেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানো ‘‘ইধাহং আৰুসো গিজ্ঝকূটা পব্বতা ওরোহন্তো অদ্দসং মংসপিণ্ডং ৰেহাসং গচ্ছন্তং, তমেনং গিজ্ঝাপি কাকাপি কুললাপি অনুপতিত্ৰা অনুপতিত্ৰা ৰিতচ্ছেন্তি ৰিরাজেন্তি. সা সুদং অট্টস্সরং করোতী’’তি এৰমাদিনা আরোচেসি. তস্মিং ভন্তে ৰত্থুস্মিং ‘‘চক্খুভূতা ৰত ভিক্খৰে সাৰকা ৰিহরন্তি, ঞাণভূতা ৰত ভিক্খৰে সাৰকা ৰিহরন্তি, যত্রহি নাম সাৰকো এৰরূপং ঞস্সতি ৰা দক্খতি ৰা সক্খিং ৰা করিস্সতী’’তি এৰমাদিনা ভগৰতা ভাসিতং.

অসিলোমসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকেহি মহাথেরেহি সংগীতং অসিলোমসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – রাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আরব্ভ ভাসিতং. আযস্মা ভন্তে লক্খণো ভগৰতো সম্মুখে আযস্মন্তং মহামোগ্গল্লানং এতদৰোচ ‘‘কো নু খো আৰুসো মোগ্গল্লান হেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানত্থেরো ‘‘ইধাহং আৰুসো গিজ্ঝকূটা পব্বতা ওরোহন্তো অদ্দসং অসিলোমং ৰেহাসং গচ্ছন্তং’’তি এৰমাদিনা আরোচেসি. তস্মিং ভন্তে ৰত্থুস্মিং চক্খুভূতা ৰত ভিক্খৰে সাৰকা ৰিহরন্তি, ঞাণভূতা ৰত ভিক্খৰে সাৰকা ৰিহরন্তি. (পেয্যাল) এসো ভিক্খৰে সত্তো ইমস্মিংযেৰ রাজগহে সূকরিকো অহোসী’’তি এৰমাদিনা ভগৰতা ভাসিতং.

সূচিলোমসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি সংগীতং সূচিলোমসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.

ৰিস্সজ্জনা – তত্থেৰ ভন্তে রাজগহে আযস্মন্তঞ্চ লক্খণং আযস্মন্তঞ্চ মহামোগ্গল্লানং আরব্ভ ভাসিতং. আযস্মা ভন্তে লক্খণো ভগৰতো সম্মুখে তথেৰ অৰোচ.

আযস্মা চ ভন্তে মহামোগ্গল্লানো তথেৰ আরোচেসি. তস্মিং ভন্তে ৰত্থুস্মিং ‘‘চক্খুভূতা ৰত ভিক্খৰে সাৰকা ৰিহরন্তি, ঞাণভূতা ৰত ভিক্খৰে সাৰকা ৰিহরন্তি, (পেয্যাল) এসো ভিক্খৰে সত্তো ইমস্মিংযেৰ রাজগহে সূতো অহোসী’’তি এৰমাদিনা ভগৰতা ভাসিতা.

পাপভিক্খুসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি সংগীতানি পাপভিক্খুসুত্তাদীনি পঞ্চসুত্তানি ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতানি.

ৰিস্সজ্জনা – রাজগহে আযস্মন্তঞ্চ লক্খণং আযস্মন্তঞ্চ মহামোগ্গল্লানং আরব্ভ ভাসিতানি. আযস্মা ভন্তে লক্খণো ভগৰতো সম্মুখে পুব্বে ৰুত্তনযেনেৰ আরোচেসি. আযস্মা চ ভন্তে মহামোগ্গল্লানো ‘‘ইধাহং আৰুসো গিজ্ঝকূটা পব্বতা ওরোহন্তো অদ্দসং ভিক্খুং ৰেহাসং গচ্ছন্তং. অদ্দসং ভিক্খুনিং ৰেহাসং গচ্ছন্তিং. অদ্দসং সিক্খমানং ৰেহাসং গচ্ছন্তিং. অদ্দসং সামণেরং ৰেহাসং গচ্ছন্তং. অদ্দসং সামণেরিং ৰেহাসং গচ্ছন্তিং. তস্সা সঙ্ঘাটিপি আদিত্তা সম্পজ্জলিতা সজোতিভূতা, পত্তোপি আদিত্তো সম্পজ্জলিতো সজোতিভূতো, কাযবন্ধনম্পি আদিত্তং সম্পজ্জলিতং সজোতিভূতং, কাযোপি আদিত্তো সম্পজ্জলিতো সজোতিভূতো, সা সুদং অট্টস্সরং করোতী’’তি এৰমাদিনা আরোচেসি. তস্মিং ভন্তে ৰত্থুস্মিং ‘‘চক্খুভূতা ৰত ভিক্খৰে সাৰকা ৰিহরন্তি ঞাণভূতা ৰত ভিক্খৰে সাৰকা ৰিহরন্তি. (পেয্যাল). এসো ভিক্খৰে ভিক্খু কস্সপস্সসম্মাসম্বুদ্ধস্স পাৰচনে পাপভিক্খু অহোসি. এসা ভিক্খৰে ভিক্খুনী কস্সপস্স সম্মাসম্বুদ্ধস্স পাৰচনে পাপভিক্খুনী অহোসি. এসা ভিক্খৰে সিক্খমানা কস্সপস্স সম্মাসম্বুদ্ধস্স পাৰচনে পাপসিক্খমানা অহোসি. এসো ভিক্খৰে সামণেরো কস্সপস্সসম্মাসম্বুদ্ধস্স পাৰচনে পাপসামণেরো অহোসি. এসা ভিক্খৰে সামণেরী কস্সপস্স সম্মাসম্বুদ্ধস্স পাৰচনে পাপসামণেরী অহোসী’’তি এৰমাদিনা ভগৰতা ভাসিতানি.