নিদানৰগ্গপাল়ি
নিদানসংযুত্ত
পটিচ্চসমুপ্পাদসুত্ত
পুচ্ছা – তেনাৰুসো ভগৰতা…পে… সম্মাসম্বুদ্ধেন নিদানৰগ্গসংযুত্তে পঠমং সংগীতং পটিচ্চসমুপ্পাদসুত্তং কত্থ তং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – সাৰত্থিযং ভন্তে পঞ্চসতে জনপদৰাসিনো ভিক্খূ আরব্ভ ভাসিতং. পঞ্চসতা ভন্তে জনপদৰাসিনো ভিক্খূ সব্বে উগ্ঘাটিতঞ্ঞুনো ধুতঙ্গধরা আরদ্ধৰীরিযা যুত্তযোগা ৰিপস্সকা সণ্হং সুখুমং সুঞ্ঞতং পচ্চযাকারধম্মদেসনং পত্থযমানা ভগৰন্তং অভিৰাদেত্ৰা ভগৰন্তং পরিৰারেত্ৰা নিসীদিংসু. তস্মিং ৰত্থুস্মিং ‘‘পটিচ্চসমুপ্পাদং ৰো ভিক্খৰে দেসেস্সামি, তং সুণাথ সাধুকং মনসি করোথ, ভাসিস্সামী’’তি এৰমাদিনা ভন্তে ভগৰতা ভাসিতং.
কতমো চ ভিক্খৰে পটিচ্চসমুপ্পাদো. অৰিজ্জাপচ্চযা ভিক্খৰে সঙ্খারা, সঙ্খারপচ্চযা ৰিঞ্ঞাণং (পেয্যাল) জাতিপচ্চযা জরামরণং সোকপরিদেৰদুক্খদোমনস্সুপাসা সম্ভৰন্তি, এৰমেতস্স কেৰলস্স দুক্খন্ধস্স সমুদযো হোতি. অযং ৰুচ্চতি ভিক্খৰে পটিচ্চসমুপ্পাদো.
অৰিজ্জায ত্ৰেৰ অসেসৰিরাগনিরোধো সঙ্খারনিরোধো (পেয্যাল) জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি, এৰমেতস্স কেৰলস্স দুক্খক্খন্ধস্স নিরোধো হোতি –
ৰিভঙ্গসুত্ত
পুচ্ছা – তত্থাৰুসো দুতিযং সংগীতং ৰিভঙ্গসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – সাৰত্থিযং ভন্তে পঞ্চসতে জনপদৰাসিনো ৰিপঞ্চিতঞ্ঞুনো ভিক্খূ আরব্ভ ভাসিতং. পঞ্চসতা ভন্তে জনপদৰাসিকা ভিক্খূ ৰিপঞ্চিতঞ্ঞুনো ধুতঙ্গধরা আরদ্ধৰীরিযা যুত্তযোগা ৰিস্সকা সণ্হং সুখুমং সুঞ্ঞতপটিসংযুত্তং পচ্চযাকারধম্মদেসনং পত্থযমানা ভগৰন্তং পরিৰারেত্ৰা নিসীদিংসু. তস্মিং ৰত্থুস্মিং ‘‘পটিচ্চ সমুপ্পাদং ৰো ভিক্খৰে দেদেস্সামি ৰিভজিস্সামি, তং সুণাথ সাধুকং মনসিকরোথ, ভাসিস্সামী’’তি এৰমাদিনা ভন্তে ভগৰতা ভাসিতং.
পঞ্চৰেরভযসুত্ত
পুচ্ছা – পঞ্চৰেরভযসুত্তং পনাৰুসো ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে অনাথপিণ্ডিকং গহপতিং আরব্ভ ‘‘যতো খো গহপতি অরিযসাৰকস্স পঞ্চ ভযানি ৰেরানি ৰূপসন্তানি হোন্তি, চতূহি চ সোতাপত্তিযঙ্গেহি সমন্নাগতো হোতি, অরিযো চস্স ঞাযো পঞ্ঞায সুদিট্ঠো হোতি সুপ্পটিৰিদ্ধো, সো আকঙ্খমানো অত্তনাৰ অত্তানং ব্যাকরেয্য খীণনিরযোমি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযনো’’তি এৰং খো ভন্তে ভগৰতা ভাসিতং.
পুচ্ছা – কথঞ্চাৰুসোতত্থ ভগৰতা অরিযসাৰকস্স পঞ্চন্নং ভযানং ৰেরানং ৰূপসন্ততা পকাসিতা.
ৰিস্সজ্জনা – ‘‘কতমানি পঞ্চ ভযানি ৰেরানি ৰূপসন্তানি হোন্তি. যং গহপতি পাণাতিপাতী পাণাতিপাতপচ্চযা দিট্ঠধম্মিকম্পি ভযং ৰেরং পসৰতি, সম্পরাযিকম্পি ভযং ৰেরং পসৰতি, চেতসিকম্পি দুক্খং দোমনস্সং পটিসংৰেদযতি. পাণাতিপাতা টিৰিরতস্স এৰং তং ভযং ৰেরং ৰূপসন্তং হোতী’’তি এৰমাদিনা ভন্তে তত্থ ভগৰতা অরিযসাৰকস্স পঞ্চন্নং ভযানং ৰেরানং ৰূপসন্ততা পকাসিতা.
পুচ্ছা – কথঞ্চাৰুসো তত্থ ভগৰতা অরিযসাৰকস্স চতূহি সোতাপত্তিযঙ্গেহি সমন্নাগততা পকাসিতা.
ৰিস্সজ্জনা – কতমেহি চতূহি সোতাপত্তিযঙ্গেহি সমন্নাগতো হোতি. ইধ গহপতি অরিযসাৰকো বুদ্ধে অৰেচ্চপ্পসাদেন সমন্নাগতো হোতি ‘‘ইতিপিসো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরোপুরিসদম্মসারথি সত্থাদেৰমনুস্সানং বুদ্ধো ভগৰা’’তি এৰমাদিনা ভন্তে তত্থ ভগৰতা অরিযসাৰকস্স চতূহি সোতাপত্তিযঙ্গেহি সমন্নাগততা পকাসিতা.
পুচ্ছা – কথঞ্চাৰুসো তত্থ ভগৰতা অরিযসাৰকেন অরিযস্স ঞাযস্স পঞ্ঞায সুদিট্ঠতা সুপ্পটিৰিদ্ধতা পকাসিতা.
ৰিস্সজ্জনা – কতমো চস্স অরিযো ঞাযো পঞ্ঞায সুদিট্ঠো হোতি সুপ্পটিৰিদ্ধো. ইধ গহপতি অরিযসাৰকো পটিচ্চসমুপ্পাদঞ্ঞেৰ সাধুকং যোনিসো মনসি করোতি ‘‘ইতি ইমস্মিং সতি ইদং হোতি, ইমস্মিং অসতি ইদং ন হোতি, ইমস্সুপ্পাদা ইদং উপ্পজ্জতি, ইমস্স নিরোধা ইদং নিরুজ্ঝতি, যদিদং অৰিজ্জাপচ্চযা (পেয্যাল) এৰমেতস্স কেৰলস্স দুক্খক্খন্ধস্স নিরোধো হোতী’’তি, এৰং খো ভন্তে ভগৰতা তত্থ অরিযসাৰকেন অরিযস্স ঞাযস্স পঞ্ঞায সুদিট্ঠতা সুপ্পটিৰিদ্ধতা পকাসিতা.
যতো খো গহপতি অরিযসাৰকস্স ইমানি পঞ্চ ভযানি ৰেরানি ৰূপসন্তানি হোন্তি. ইমেহি চতূহি সোতাপত্তিযঙ্গেহি সমন্নাগতো হোতি. অযঞ্চস্স অরিযো ঞাযো পঞ্ঞায সুদিট্ঠো হোতি সুপ্পটিৰিদ্ধো–
দুক্খসুত্ত
পুচ্ছা – দুক্খসুত্তং পনাৰুসো ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘দুক্খস্স ভিক্খৰে সমুদযঞ্চ অত্থঙ্গমঞ্চ দেসেস্সামী’’তি এৰমাদিনা ভগৰতা ভাসিতং.
পুচ্ছা – কথঞ্চাৰুসো তত্থ ভগৰতা দুক্খসমুদযো পকাসিতো.
ৰিস্সজ্জনা – কতমো চ ভিক্খৰে দুক্খস্স সমুদযো. চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং, তিণ্ণং সঙ্গতি ফস্সো, ফস্সপচ্চযা ৰেদনা, ৰেদনাপচ্চযা তণ্হা. অযং খো ভিক্খৰে দুক্খস্স সমুদযো. সোতঞ্চ পটিচ্চ সদ্দে চ উপ্পজ্জতি সোতৰিঞ্ঞাণং…পে… ঘানঞ্চ পটিচ্চ গন্ধে চ…পে… জিৰ্হঞ্চ পটিচ্চ রসে চ…পে… কাযঞ্চ পটিচ্চ ফোট্ঠব্বে চ…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং, তিণ্ণং সঙ্গতি ফস্সো, ফস্সপচ্চযা ৰেদনা, ৰেদনাপচ্চযা তণ্হা. অযং খো ভিক্খৰে দুক্খস্স সমুদযোতি এৰংখো ভন্তে তত্থ ভগৰতা দুক্খস্স সমুদযো পকাসিতো.
পুচ্ছা – কথঞ্চাৰুসো তত্থ ভগৰতা দুক্খস্স অত্থঙ্গমো পকাসিতো.
ৰিস্সজ্জনা – কতমো চ ভিক্খৰে দুক্খস্স অত্থঙ্গমো. চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং, তিণ্ণং সঙ্গতি ফস্সো, ফস্সপচ্চযা ৰেদনা, ৰেদনাপচ্চযা তণ্হা, তস্সাযেৰ তণ্হায অসেসৰিরাগনিরোধা উপাদাননিরোধো উপাদাননিরোধা ভৰনিরোধো, ভৰনিরোধা জাতিনিরোধো, জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতীতি এৰমাদিনা ভন্তে তত্থ ভগৰতা দুক্খস্স অত্থঙ্গমো পকাসিতো.
পুত্তমংসূপমসুত্ত
পুচ্ছা – পুত্তমংসূপমসুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে অধুনা পব্বজিতে ভিক্খূ আরব্ভ ভাসিতং. ভগৰতো চ ভন্তে ভিক্খুসঙ্ঘস্স চ মহালাভসক্কারো উদপাদি, একচ্চে চ ভন্তে ভিক্খূ নৰা অচিরপব্বজিতা কুলপুত্তা আহারং অপচ্চৰেক্খিত্ৰা পরিভুঞ্জিংসু. তস্মিং ভন্তে ৰত্থুস্মিং ‘‘চত্তারোমে ভিক্খৰে আহারা ভূতানং ৰা সত্তানং ঠিতিযা সম্ভৰেসীনং ৰা অনুগ্গহায. কতমে চত্তারো কবল়ীকারো আহারো ওল়ারিকো ৰা সুখুমো ৰা ফস্সো দুতিযো মনোসঞ্চেতনা ততিযা ৰিঞ্ঞাণং চতুত্থ’’ন্তি এৰং খো ভন্তে ভগৰতা ভাসিতং.
পুচ্ছা – কথঞ্চাৰুসো তত্থ কবল়ীকারস্স আহারস্স দট্ঠব্বাকারো ভগৰতা পকাসিতো.
ৰিস্সজ্জনা – সেয্যথাপি ভিক্খৰে দ্ৰে জাযম্পতিকা পরিত্তং সম্বলং আদায কন্তারমগ্গং পটিপজ্জেয্যুং. তেসমস্স একপুত্তকো পিযো মনাপোতি এৰমাদিনা ভন্তে তত্থ ভগৰতা কবল়ীকারস্স আহারস্স দট্ঠব্বাকারো পকাসিতো.
পুচ্ছা – কথঞ্চাৰুসো তত্থ ভগৰতা ফস্সাহারস্স দট্ঠব্বাকারো পকাসিতো.
ৰিস্সজ্জনা – সেয্যথাপি ভিক্খৰে গাৰী নিচ্চম্মা কুট্টং চে নিস্সায তিট্ঠেয্য, যে কুট্টনিস্সিতা পাণা, তে নং খাদেয্যুং. রুক্খং চে নিস্সায তিট্ঠেয্য. উদকং চে নিস্সায তিট্ঠেয্য. আকাসং চে নিস্সায তিট্ঠেয্য, যে আকাসনিস্সিতা পাণা, তে নং খাদেয্যুন্তি এৰমাদিনা ভন্তে তত্থ ভগৰতা ফস্সস্স আহারস্স দট্ঠব্বাকারো ৰিত্থারেত্ৰা পকাসিতো.
এৰমেৰ খ্ৰাহং ভিক্খৰে ফস্সাহারো দট্ঠব্বোতি ৰদামি.
পুচ্ছা – কথঞ্চাৰুসো তত্থ ভগৰতা মনোসঞ্চেতনাহারস্স দট্ঠব্বাকারো পকাসিতো.
ৰিস্সজ্জনা – সেয্যথাপি ভিক্খৰে অঙ্গারকাসু সাধিকপোরিসা পুণ্ণা অঙ্গারানং ৰীতচ্চিকানং ৰীতধূমানং. অথ পুরিসো আগচ্ছেয্য জীৰিতুকামো অমরিতুকামো সুখ কামো দুক্খপ্পটিকূলোতি এৰমাদিনা ভন্তে তত্থ ভগৰতা মনোসঞ্চেতনাহারস্স দট্ঠব্বাকারো ৰিত্থারেন পকাসিতো.
পুচ্ছা – কথঞ্চাৰুসো তত্থ ভগৰতা ৰিঞ্ঞাণাহারস্স দট্ঠব্বাকারো পকাসিতো.
ৰিস্সজ্জনা – সেয্যথাপি ভিক্খৰে চোরং আগুচারিং গহেত্ৰা রঞ্ঞো দস্সেয্যুং ‘‘অযং তে দেৰচোরো আগুচারী, ইমস্স যং ইচ্ছসি, তং দণ্ডং পণেহী’’তি এৰমাদিনা ভন্তে তত্থ ভগৰতা ৰিঞ্ঞাণাহারস্স দট্ঠব্বাকারো পকাসিতো.
সুসিমপরিব্বাজকসুত্ত
পুচ্ছা – তেনাৰুসো ভগৰতা…পে… সম্মাসম্বুদ্ধেন সুসিমপরিব্বাজক সুত্তং কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – রাজগহে ভন্তে আযস্মন্তং সুসিমং আরব্ভ ভাসিতং. আযস্মা ভন্তে সুসিমো যাৰতকো ভিক্খূহি সদ্ধিং অহোসি কথাসল্লাপো, তং সব্বং ভগৰতো আরোচেসি. তস্মিং ৰত্থুস্মিং ‘‘পুব্বে খো সুসিম ধম্মট্ঠিতিঞাণং, পচ্ছা নিব্বানে ঞাণ’’ন্তি এৰমাদিনা ভন্তে ভগৰতা ভাসিতং.
পুচ্ছা – কথঞ্চাৰুসো তত্থ ভগৰা আযস্মতো সুসিমত্থেরস্স সম্পতিঅরহত্তপত্তস্স অনুযোগৰসেন পটিপুচ্ছিত্ৰা পটিপুচ্ছিত্ৰা উত্তরি ধম্মদেসনং ৰিত্থারেত্ৰা দেসেসি.
ৰিস্সজ্জনা – জাতিপচ্চযা জরামরণন্তি সুসিম পস্সসীতি. এৰং ভন্তে. ভৰপচ্চযা জাতীতি সুসিম পস্সসীতি. এৰং ভন্তেতি এৰমাদিনা ভন্তে ভগৰা তত্থ আযস্মতো সুসিমস্স সম্পতিঅরহত্তপত্তস্স উত্তরিপি অনুযোগৰসেন পটিপুচ্ছিত্ৰা পটিপুচ্ছিত্ৰা ৰিত্থারতো ধম্মং দেসেসি.
তস্স মে ভন্তে ভগৰা অচ্চযং অচ্চযতো পটিগ্গণ্হাতু আযতিংসংৰরায–
অভিসমযসংযুত্ত
নখসিখাসুত্ত
পুচ্ছা – অভিসমযসংযুত্তে পনাৰুসো পঠমং সংগীতং নখসিখাসুত্তং ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘তং কিং মঞ্ঞথ ভিক্খৰে, কতমং নু খো বহুতরং, যো ৰাযং মযা পরিত্তো নখসিখাযং পংসুআরোপিতো, অযং ৰা মহাপথৰী’’তি এৰমাদিনা ভগৰতা ভাসিতং.
ধাতুসংযুত্ত
চঙ্কমসুত্ত
পুচ্ছা – ধাতুসংযুত্তে পনাৰুসো চঙ্কমসুত্তং ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – রাজগহে ভন্তে সম্বহুলে ভিক্খূ আরব্ভ ‘‘ধাতুসোৰ ভিক্খৰে সত্তা সংসন্দন্তি সমেন্তি, হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি, কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তী’’তি এৰমাদিনা ভগৰতা ভাসিতং.
অস্সদ্ধসংসন্দনসুত্ত
পুচ্ছা – অস্সদ্ধসংসন্দনসুত্তং পনাৰুসো ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘ধাতুসোৰ ভিক্খৰে সত্তা সংসন্দন্তি সমেন্তি, অস্সদ্ধা অস্সদ্ধেহি সদ্ধিং সংসন্দন্তি সমেন্তি, অহিরিকা অহিরিকেহি সদ্ধিং সংসন্দন্তি সমেন্তি, অনোত্তপ্পিনো. অপ্পস্সুতা. কুসীতা. মুট্ঠস্সতিনো. দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তী’’তি এৰমাদিনা ভগৰতা ভাসিতং.
অনমতগ্গসংযুত্ত
পথৰীসুত্ত
পুচ্ছা – অনমতগ্গসংযুত্তে আৰুসো দুতিযং সংগীতং পথৰীসুত্তং কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘অনমতগ্গোযং ভিক্খৰে সংসারো, পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. সেয্যথাপি ভিক্খৰে পুরিসো ইমং মহাপথৰিং কোলট্ঠিমত্তং কোলট্ঠিমত্তং মত্তিকাগুল়িকং করিত্ৰা নিক্খিপেয্য ‘অযং মে পিযা, তস্স মে পিতু অযং পিতা’তি. অপরিযাদিন্নাৰ ভিক্খৰে তস্স পুরিসস্স পিতুপিতরো অস্সু. অথাযং মহাপথৰী পরিক্খযং পরিযাদানং গচ্ছেয্য. তং কিস্সহেতু, অনমতগ্গোযং ভিক্খৰে সংসারো, পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হা সংযোজনানং সন্ধাৰতং সংসরতং’’ এৰমাদিনা ভগৰতা ভাসিতং.
এৰং দীঘরত্তং ৰো ভিক্খৰে দুক্খং পচ্চনুভূতং তিব্বং পচ্চনুভূতং ব্যসনং পচ্চনুভূতং কটসী ৰড্ঢিতা.
অলমেৰ সব্বসঙ্খারেসু নিব্বিন্দিতুং,
অলং ৰিরজ্জিতুং, অলং ৰিমুচ্চিতুং,
অস্সুসুত্ত
পুচ্ছা – তত্থাৰুসো ততিযং সংগীতং অস্সুসুত্তং ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলেযেৰ ভিক্খূ আরব্ভ ‘‘তং কিং মঞ্ঞথ ভিক্খৰে, কতমং নু খো বহুতরং, যং ৰা ৰো ইমিনা দীঘেন অদ্ধুনা সন্ধাৰতং সংসরতং অমনাপসম্পযোগা মনাপৰিপ্পযোগা কন্দন্তানং রোদন্তানং অস্সু পস্সন্নং পগ্ঘরিতং, যং ৰা চতূসু মহাসমুদ্দেসু উদক’’ন্তি এৰমাদিনা ভগৰতা ভাসিতং.
সাসপসুত্ত
পুচ্ছা – তত্থাৰুসো ছট্ঠং সংগীতং সাসপসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – সাৰত্থিযং ভন্তে অঞ্ঞতরং ভিক্খুং আরব্ভ ভাসিতং. অঞ্ঞতরো ভন্তে ভিক্খু ভগৰন্তং এতদৰোচ ‘‘কীৰদীঘো নু খো ভন্তে কপ্পো’’তি. তস্মিং ভন্তে ৰত্থুস্মিং ‘‘দীঘো খো ভিক্খু কপ্পো, সো ন সুকরো সঙ্খাতুং এত্তকানি ৰস্সানি ইতিৰা, (পেয্যাল) এত্তকানি ৰস্সসতসহস্সানি ইতিৰাতি এৰমাদিনা ভগৰতা ভাসিতং.
গঙ্গাসুত্ত
পুচ্ছা – তেনাৰুসো…পে… সম্মাসম্বুদ্ধেন অনমতগ্গসংযুত্তে গঙ্গাসুত্তং কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – রাজগহে ভন্তে অঞ্ঞতরং ব্রাহ্মণং আরব্ভ ভাসিতং. অঞ্ঞতরো ভন্তে ব্রাহ্মণো ভগৰন্তং এতদৰোচ ‘‘কীৰ-
বহুকা নু খো ভো গোতম কপ্পা অব্ভতীতা অতিক্কন্তা’’তি. তস্মিং ভন্তে ৰত্থুস্মিং ‘‘বহুকা খো ব্রাহ্মণ কপ্পা অব্ভতীতা অতিক্কন্তা, তে ন সুকরা সঙ্খাতুং ‘এত্তকা কপ্পা’ ইতি ৰা ‘এত্তকানি কপ্পসতানি’ ইতি ৰা ‘এত্তকানি কপ্পসহস্সানি’ ইতিৰা ‘এত্তকানি কপ্পসতসহস্সানি’ ইতি ৰা’’তি এৰ মাদিনা ভগৰতা ভাসিতং.
পুগ্গলসুত্ত
পুচ্ছা – পুগ্গলসুত্তং পনাৰুসো ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – রাজগহে ভন্তে সম্বহুলে ভিক্খূ আরব্ভ ‘‘অনমতগ্গোযং ভিক্খৰে সংসারো, পুব্বাকোটি ন পঞ্ঞাযতি অৰিজ্জা নীৰরণানং সত্তানং তণ্হাসংযোজনানং সন্ধাৰতং সংসরতং. একপুগ্গলস্স ভিক্খৰে কপ্পং সন্ধাৰতো সংসরতো সিযা এৰং মহা অট্ঠিকঙ্কলো অট্ঠিপুঞ্জো অট্ঠিরাসি, যথা যং ৰেপুল্লো পব্বতো. সচে সংহারকো অস্স, সম্ভতঞ্চ ন ৰিনস্সেত্যা’’তি এৰমাদিনা ভগৰতা ভাসিতং.
দুগ্গতসুত্ত, সুখিতসুত্ত
পুচ্ছা – তত্থাৰুসো দুগ্গতসুত্তঞ্চ সুখিতসুত্তঞ্চ ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘অনমতগ্গোযং ভিক্খৰে সংসারো, পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. যং ভিক্খৰে পস্সেয্যাথ দুগ্গতং দুরূপেতং, নিট্ঠমেত্থ গন্তব্বং ‘অম্হেহিপি এৰরূপং পচ্চনুভূতং ইমিনা দীঘেন অদ্ধুনা’তি, যং ভিক্খৰে পস্সেয্যাথ সুখিতং সুসজ্জিতং,
নিট্ঠমেত্থ গন্তব্বং, ‘‘অম্হেহিপি পচ্চনুভূতং ইমিনা দীঘেন অদ্ধুনা’’তি এৰমাদিনা ভগৰতা ভাসিতং.
তিংসমত্তসুত্ত
পুচ্ছা – তিংসমত্তসুত্তং পনাৰুসো ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – রাজগহে ভন্তে তিংসমত্তে পাৰেয্যকে ভিক্খূ আরব্ভ ‘‘অনমতগ্গোযং ভিক্খৰে সংসারো, পুব্বাকোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. তং কিং মঞ্ঞথ ভিক্খৰে, কতমং নু খো বহুতরং, যং ৰা ৰো ইমিনা দীঘেন অদ্ধুনা সন্ধাৰতং সংসরতং সীসচ্ছিন্নানং লোহিতং পস্সন্নং পগ্ঘরিতং, যং ৰা চতূসু মহাসমুদ্দেসু উদক’’ন্তি এৰমাদিনা ভৰগতা ভাসিতং.
মাতুসুত্ত
পুচ্ছা – মাতুসুত্তাদীনি পনাৰুসো ছসুত্তানি ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘অনমতগ্গোযং ভিক্খৰে সংসারো, পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. ন সো ভিক্খৰে সত্তো সুলভরূপো, যো ন মাতাভূতপুব্বো ইমিনা দীঘেন অদ্ধুনা. যো ন পিতাভূতপুব্বো. যো ন ভাতাভূতপুব্বো. যো ন ভগিনিভূতপুব্বো. যো ন পুত্তভূতপুব্বো. যো ন ধীতাভূতপুব্বো ইমিনা দীঘেন অদ্ধুনা’’তি এৰমাদিনা ভন্তে ভগৰতা ভাসিতং.
কস্সপসংযুত্ত
চন্দূপমসুত্ত
পুচ্ছা – কস্সপসংযুত্তে পনাৰুসো চন্দূপমসুত্তং ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘চন্দূপমা ভিক্খৰে কুলানি উপসঙ্কমথ অপকস্সেৰ কাযং অপকস্স চিত্তং নিচ্চনৰকা কুলেসু অপ্পগব্ভা. সেয্যথাপি ভিক্খৰে পুরিসো জরুদপানং ৰা ওলোকেয্য পব্বতৰিসমং ৰা নদীৰিদুগ্গং ৰা অপকস্সেৰ কাযং অপকস্স চিত্তং. এৰমেৰ খো ভিক্খৰে চন্দূপমা কুলানি উপসঙ্কমথ অপকস্সেৰ কাযং অপকস্স চিত্তং নিচ্চনৰকা কুলেসু অপ্পগব্ভা’’তি এৰমাদিনা ভগৰতা ভাসিতং.
তং কিং মঞ্ঞথ ভিক্খৰে, কথং রূপা ভিক্খু অরহতি কুলানি উপসঙ্কমিতুং.
পুচ্ছা – কথঞ্চাৰুসো তত্থ ভগৰতা পরিসুদ্ধাপরিসুদ্ধ ধম্মদেসনং দস্সেত্ৰা ভিক্খূনং ওৰাদো দিন্নো.
ৰিস্সজ্জনা – ‘‘তং কিং মঞ্ঞথ ভিক্খৰে, কথং রূপস্স ভিক্খুনো অপরিসুদ্ধা ধম্মদেসনা হোতি, কথং রূপস্স ভিক্খুনো পরিসুদ্ধা ধম্মদেসনা হোতী’’তি এৰমাদিনা পরিসুদ্ধাপরিসুদ্ধধম্মদেসনা ৰিত্থারতো দস্সেত্ৰা ‘‘কস্সপেন ৰা হি ৰো ভিক্খৰে ওৰদিস্সামি যো ৰা পনস্স কস্সপসদিসো, ওৰদিতেহি চ পন ৰো তথত্তায পটিপজ্জিতব্ব’’ন্তি. এৰং খো ভন্তে ভগৰতো ভিক্খূনং ওৰাদো দিন্নো.
যো হি কোচি ভিক্খৰে ভিক্খু এৰংচিত্তো পরেসং ধম্মং দেসেতি ‘‘অহো ৰত মে ধম্মং সুণেয্যুং, সুত্ৰা চ পন ধম্মং পসীদেয্যুং, পসন্না চ মে পসন্নাকারং করেয্যুং–
স্ৰাক্খাতো ভগৰতা ধম্মো সন্দিট্ঠিকো অকালিকো এহি পস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহি–
কস্সপেন ৰা হি ৰো ভিক্খৰে ওৰদিস্সামি যো ৰা পনস্স কস্সপসদিসো, ওৰদিতেহি চ পন ৰো তথত্তায পটিপজ্জিতব্বং–
কুলূপকসুত্ত
পুচ্ছা – তেনাৰুসো ভগৰতা…পে… সম্মাসম্বুদ্ধেন কস্সপসংযুত্তে চতুত্থং কুলূপকসুত্তং কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘তং কিং মঞ্ঞথ ভিক্খৰে, কথং রূপো ভিক্খু অরহতি কুলূপকো হোতুং, কথং রূপো ভিক্খু ন অরহতি কুলূপকো হোতু’’ন্তি এৰমাদিনা ভগৰতা ভাসিতং.
কস্সপেন ৰা হি ৰো ভিক্খৰে ওৰদিস্সামি যো ৰা পনস্স কস্সপসদিসো, ওৰদিতেহি চ পন ৰো তথত্তায পটিপজ্জিতব্বং.
দুতিয ওৰাদসুত্ত
পুচ্ছা – তত্থেৰাৰুসো ভগৰতা দুতিয ওৰাদসুত্তং কত্থ কেন সদ্ধিং কথঞ্চ ভাসিতং.
ৰিস্সজ্জনা – রাজগহে ভন্তে আযস্মতা মহাকস্সপেন সদ্ধিং ‘‘ওৰদ কস্সপ ভিক্খূ, করোহি কস্সপ ভিক্খূনং ধম্মিং কথং, অহং ৰা কস্সপ ভিক্খূ ওৰদেয্যং ত্ৰং ৰা, অহং ৰা ভিক্খূনং ধম্মিং কথং করেয্যং ত্ৰং ৰা’’তি এৰমাদিনা ভগৰতা ভাসিতং.
যস্স কস্সচি ভন্তে সদ্ধা নত্থি কুসলেসু ধম্মেসু, হিরী নত্থি. ওত্তপ্পং নত্থি. ৰীরিযং নত্থি. পঞ্ঞা নত্থি কুসলেসু ধম্মেসু.
ততিয ওৰাদসুত্ত
পুচ্ছা – তত্থেৰাৰুসো ভগৰতা ততিযওৰাদসুত্তং কত্থ কেন সদ্ধিং কথঞ্চ ভাসিতং.
ৰিস্সজ্জনা – রাজগহে ভন্তে আযস্মতাযেৰ মহাকস্সপেন সদ্ধিং ‘‘ওৰদ কস্সপ ভিক্খূ. করোহি কস্সপ ভিক্খূনং ধম্মিং কথং, অহং ৰা কস্সপ ভিক্খূ ওৰদেয্যং ত্ৰং ৰা. অহং ৰা ভিক্খূনং ধম্মং কথং করেয্যং ত্ৰং ৰা’’তি এৰমাদিনা ভগৰতা ভাসিতং.
দুব্বচা খো ভন্তে এতরহি ভিক্খূ দোৰচস্সকরণেহি ধম্মেহি সমন্নাগতা অক্খমা অপ্পদক্খিণগ্গাহিনো অনুসাসনিং–
সদ্ধম্মপ্পতিরূপকসুত্ত
পুচ্ছা – তত্থেৰাৰুসো ভগৰতা পরিযোসানং সদ্ধম্মপ্পতিরূপকসুত্তং কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – সাৰত্থিযং ভন্তে আযস্মন্তংযেৰ মহাকস্সপং আরব্ভ ভাসিতং. আযস্মা ভন্তে মহাকস্সপো ভগৰন্তং এতদেৰোচ ‘‘কো নু খো ভন্তে হেতু কো পচ্চযো, যেন পুব্বে অপ্পতরানি চেৰ সিক্খাপদানি অহেসুং, বহুতরা চ ভিক্খূ অঞ্ঞায সণ্ঠহিংসু. কো পন ভন্তে হেতু কো পচ্চযো, যেনেতরহি বহুতরানি চেৰ সক্খাপদানি অপ্পতরা চ ভিক্খূ অঞ্ঞায সণ্ঠহন্তী’’তি. তস্মিং ভন্তে ৰত্থুস্মিং ‘‘এৰঞ্চেতং কস্সপ হোতি সত্তেসু হাযমানেসু সদ্ধম্মে অন্তরধাযমানে বহুতরানিচেৰ সিক্খাপদানি হোন্তি, অপ্পতরাচ ভিক্খূ অঞ্ঞায সণ্ঠহন্তী’’তি এৰমাদিনা ভগৰতা ভাসিতং.
লাভসক্কারসংযুত্ত
মীল়্হকসুত্ত
পুচ্ছা – তেনাৰুসো…পে… সম্মাসম্বুদ্ধেন লাভসক্কারংযুত্তে পঞ্চমং সংগীতং মীল়্হকসুত্তং কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘দারুণো ভিক্খৰে লাভসক্কারসিলোকো ফরুসো অন্তরাযিকো অনুত্তরস্স যোগক্খেমস্স অধিগমায. সেয্যথাপি ভিক্খৰে মীল়্হকা গূথাদী গূথপূরা পুণ্ণা গূথস্স, পুরতো চস্স মহাগূথপুঞ্জো, সা তেন অঞ্ঞা মীল়্হকা অতিমঞ্ঞেয্য ‘‘অহম্হি গূথাদী গূথপূরা পুণ্ণা গূথস্স, পুরতো চ ম্যাযং মহাগূথপুঞ্জো’’তি এৰমাদিনা ভগৰতা ভাসিতং.
তং হি তস্স ভিক্খৰে মোঘপুরিসস্স হোতি দীঘরত্তং অহিতায দুক্খায.
এৰং দারুণো খো ভিক্খৰে লাভসক্কারসিলোকো.
তস্মাতিহ ভিক্খৰে এৰং সিক্খিতব্বং, ‘‘উপ্পন্নং লাভসক্কারসি লোকং পজহিস্সাম, ন চ নো উপ্পন্নো লাভসক্কারসিলোকো চিত্তং পরিযাদায ঠস্সভী’’তি, এৰঞ্হি খো ভিক্খৰে সিক্খিতব্বং.
একপুত্তকসুত্ত
পুচ্ছা – তত্থো আৰুসো পোরাণকেহি ধম্মসংগাহকেহি সংগীতং একপুত্তকসুত্তং কত্থ কং আরব্ভং কথঞ্চ ভাসিতং.
ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘দারুণো ভিক্খৰে লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায, সদ্ধা ভিক্খৰে উপাসিকা একপুত্তকং পিযং মনাপং এৰং সম্মাআযাচমানা আযাচেয্য তাদিসো তাত ভৰাহি, যাদিসো চিত্তো চ গহপতি হত্থকো চ আল়ৰকো’’তি এৰমাদিনা ভগৰতা ভাসিতং.
এসা ভিক্খৰে তুলা এতং পমাণং মম সাৰকানং উপাসকানং যদিদং চিত্তো চ গহপতি হত্থকো চ আল়ৰকো.
সচে খো ত্ৰং তাত অগারস্মা অনগারিযং পব্বজসি, তাদিসো তাত ভৰাহি, যাদিসা সারিপুত্তমোগ্গল্লানা.
মা চ খো ত্ৰং তাত সেখং অপ্পত্তমানসং লাভসক্কারসিলোকো অনুপাপুণাতু–
এৰং দারুণো ভিক্খৰে লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায.
একৰীতুসুত্ত
পুচ্ছা – তত্থেৰ আৰুসো পোরাণকেহি ধম্মসংগাযকেহি সংগীতং একধীতুসুত্তং ভগৰতা কত্থ কং আরব্ভ কথঞ্চ ভাসিতং.
ৰিস্সজ্জনা – সাৰত্থিযংযেৰ ভন্তে সম্বহুলে ভিক্খূ আরব্ভ ‘‘দারুণো ভিক্খৰে লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায. সদ্ধা ভিক্খৰে উপাসিকা একং ধীতরং পিযং মনাপং এৰং সম্মা আযাচমানা আযাচেয্য ‘তাদিসা অয্যে ভৰাহি, যাদিসা খুজ্জুত্তরা চ উপাসিকা ৰেল়ুকণ্ডকিযা চ নন্দমাতা’তি. এসা ভিক্খৰে তুলা এতং পমাণং মম সাৰিকানং উপাসিকানং, যদিদং খুজ্জুত্তরা চ উপাসিকা ৰেল়ুকণ্ডকিযা চ নন্দমাতা’’তি এৰমাদিনা ভন্তে ভগৰতা ভাসিতং.
সচে খো ত্ৰং অয্যে অগারস্মা অনগারিযং পব্বজসি, ভাদিসা অয্যে ভৰাহি, যাদিসা খেমা চ ভিক্খুনী উপ্পলৰণ্ণা চ–
তস্মাতিহ ভিক্খৰে এৰং সিক্খিতব্বং.
রাহুলসংযুত্ত
পুচ্ছা – রাহুলসংযুত্তং পনাৰুসো ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – সাৰত্থিযং ভন্তে আযস্মন্তং রাহুলং আরব্ভ ভাসিতং. আযস্মা ভন্তে রাহুলো ভগৰন্তং এতদৰোচ ‘‘সাধু মে ভন্তে ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি, তস্মিং ভন্তে ৰত্থুস্মিং ‘‘তং কিং মঞ্ঞসি রাহুল, চক্খুনিচ্চং ৰা অনিচ্চং ৰাতি. অনিচ্চং ভন্তে. যং পনানিচ্চং, দুক্খং ৰা তং সুখং ৰাতি. দুক্খং ভন্তে. যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং ‘এতং মম, এসো হমস্মি, এসো মে অত্তা’তি. নো হেতং ভন্তে’’তি এৰমাদিনা ভন্তে ভগৰতা ভাসিতং.
লক্খণসংযুত্ত
অট্ঠিসুত্ত
পুচ্ছা – লক্খণসংযুত্তে পনাৰুসো পোরাণকেহি ধম্মসংগাহকত্থেরেহি পঠমং সংগীতং অট্ঠিসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – রাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আরব্ভ ভাসিতং. আযস্মা ভন্তে লক্খণো ভগৰতা সম্মুখে আযস্মন্তং মহামোগ্গল্লানং এতদৰোচ ‘‘ইধাযস্মা মহামোগ্গল্লানো গিজ্ঝকূটা পব্বতা ওরোহন্তো অঞ্ঞতরস্মিং পদেসে সিতং পাত্ৰাকাসি, কো নু খো আৰুসো মোগ্গল্লান হেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানো ‘‘ইধাহং আৰুসো গিজ্ঝকূটা পব্বতা ওরোহন্তো অদ্দসং অট্ঠিকসঙ্খলিকং ৰেহাসং গচ্ছন্তিং’’তি এৰমাদিনা আরোচেসি. তস্মিং ভন্তে ৰত্থুস্মিং ‘‘চক্খুভূতা ৰত ভিক্খৰে সাৰকা ৰিহরন্তি, ঞাণভূতা ৰত ভিক্খৰে সাৰকা ৰিহরন্তি, যত্রহি নাম সাৰকো এৰরূপং ঞস্সতি ৰা দক্খতি ৰা সক্খিং ৰা করিস্সতী’’তি এৰমাদিনা ভগৰতা ভাসিতং.
অচ্ছরিযং ৰত ভো, অব্ভুতং ৰত ভো;
এৰরূপোপি নাম সত্তো ভৰিস্সতি.
পিণ্ডসুত্ত
পুচ্ছা – তেনাৰুসো জানতা…পে… সম্মাসম্বুদ্ধেন লক্খণসংযুত্তে ততিযং সংগীতং পিণ্ডসুত্তং কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – রাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আরব্ভ ভাসিতং. আযস্মা ভন্তে লক্খণো ভগ্গৰতো সম্মুখে আযস্মন্তং মহামোগ্গল্লানং এতদৰোচ ‘‘ইধাযস্মা মহামোগ্গল্লানো গিজ্ঝকূটা পব্বতা ওরোহন্তো অঞ্ঞতরস্মিং পদেসে সিতং পাত্ৰাকাসি, কো নুখো আৰুসো মোগ্গল্লানহেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানো ‘‘ইধাহং আৰুসো গিজ্ঝকূটা পব্বতা ওরোহন্তো অদ্দসং মংসপিণ্ডং ৰেহাসং গচ্ছন্তং, তমেনং গিজ্ঝাপি কাকাপি কুললাপি অনুপতিত্ৰা অনুপতিত্ৰা ৰিতচ্ছেন্তি ৰিরাজেন্তি. সা সুদং অট্টস্সরং করোতী’’তি এৰমাদিনা আরোচেসি. তস্মিং ভন্তে ৰত্থুস্মিং ‘‘চক্খুভূতা ৰত ভিক্খৰে সাৰকা ৰিহরন্তি, ঞাণভূতা ৰত ভিক্খৰে সাৰকা ৰিহরন্তি, যত্রহি নাম সাৰকো এৰরূপং ঞস্সতি ৰা দক্খতি ৰা সক্খিং ৰা করিস্সতী’’তি এৰমাদিনা ভগৰতা ভাসিতং.
অসিলোমসুত্ত
পুচ্ছা – তত্থেৰ আৰুসো পোরাণকেহি ধম্মসংগাহকেহি মহাথেরেহি সংগীতং অসিলোমসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – রাজগহে ভন্তে আযস্মন্তঞ্চ লক্খণং আযস্মন্তঞ্চ মহামোগ্গল্লানং আরব্ভ ভাসিতং. আযস্মা ভন্তে লক্খণো ভগৰতো সম্মুখে আযস্মন্তং মহামোগ্গল্লানং এতদৰোচ ‘‘কো নু খো আৰুসো মোগ্গল্লান হেতু, কো পচ্চযো সিতস্স পাতুকম্মাযা’’তি. আযস্মা চ ভন্তে মহামোগ্গল্লানত্থেরো ‘‘ইধাহং আৰুসো গিজ্ঝকূটা পব্বতা ওরোহন্তো অদ্দসং অসিলোমং ৰেহাসং গচ্ছন্তং’’তি এৰমাদিনা আরোচেসি. তস্মিং ভন্তে ৰত্থুস্মিং চক্খুভূতা ৰত ভিক্খৰে সাৰকা ৰিহরন্তি, ঞাণভূতা ৰত ভিক্খৰে সাৰকা ৰিহরন্তি. (পেয্যাল) এসো ভিক্খৰে সত্তো ইমস্মিংযেৰ রাজগহে সূকরিকো অহোসী’’তি এৰমাদিনা ভগৰতা ভাসিতং.
সূচিলোমসুত্ত
পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি সংগীতং সূচিলোমসুত্তং ভগৰতা কত্থ কং আরব্ভ কিস্মিং ৰত্থুস্মিং কথঞ্চ ভাসিতং.
ৰিস্সজ্জনা – তত্থেৰ ভন্তে রাজগহে আযস্মন্তঞ্চ লক্খণং আযস্মন্তঞ্চ মহামোগ্গল্লানং আরব্ভ ভাসিতং. আযস্মা ভন্তে লক্খণো ভগৰতো সম্মুখে তথেৰ অৰোচ.
আযস্মা চ ভন্তে মহামোগ্গল্লানো তথেৰ আরোচেসি. তস্মিং ভন্তে ৰত্থুস্মিং ‘‘চক্খুভূতা ৰত ভিক্খৰে সাৰকা ৰিহরন্তি, ঞাণভূতা ৰত ভিক্খৰে সাৰকা ৰিহরন্তি, (পেয্যাল) এসো ভিক্খৰে সত্তো ইমস্মিংযেৰ রাজগহে সূতো অহোসী’’তি এৰমাদিনা ভগৰতা ভাসিতা.