ওপম্মসংযুত্ত

নখসিখসুত্ত

পুচ্ছা – ওপম্মসংযুত্তে আৰুসো পোরাণকেহি ধম্মসংগাহকমহাথেরেহি সংগীতং নখসিখসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সাৰত্থিযং ভন্তে সম্বহুলে ভিক্খূ আরব্ভ ‘‘তং কিং মঞ্ঞথ ভিক্খৰে, কতমং নু খো বহুতরং, যো চাযং মযা পরিত্তো নখসিখাযং পংসু আরোপিতো, যা চাযং মহাপথৰী’’তি এৰমাদিনা ভগৰতা ভাসিতং.

তং কিং মঞ্ঞথ ভিক্খৰে, কতমং নু খো বহুতরং.

তস্মাতিহ ভিক্খৰে এৰং সিক্খিতব্বং.

আণিসুত্ত

পুচ্ছা – তত্থেৰ আৰুসো পোরাণকেহি ধম্মসংগাহকমহাথেরেহি সংগীতং আণিসুত্তং ভগৰতা কত্থ কং আরব্ভ কথঞ্চ ভাসিতং.

ৰিস্সজ্জনা – সাৰত্থিযংযেৰ ভন্তে সম্বহুলে ভিক্খূ আরব্ভ ‘‘ভূতপুব্বং ভিক্খৰে দসারহানং আনকো নাম মুদিঙ্গো অহোসি, তস্স দসারহা আনকে ঘটিতে অঞ্ঞং আণিং ওদহিংসু, অহু খো সো ভিক্খৰে সমযো যং আনকস্স মুদিঙ্গস্স পোরাণং পোক্খরফলকং অন্তরধাযি, আণিসঙ্ঘাটোৰ অৰসিস্সী’’তি এৰমাদিনা ভগৰতা ভাসিতং.