৬৯. সব্বাদযো ৰুত্তিমত্তেতি

ইত্থিৰাচকা সব্বাদযো ৰুত্তিমত্তে পুমেৰ হোন্তি. এৰং পুব্বুত্তরা, অপরদক্খিণা, পচ্ছিমুত্তরা. পুব্বা চ সা দক্খিণা চেতি ৰা.

৯. ব্যতিহারলক্খণো যথা – ‘‘তত্থ গহেত্ৰা তেন পহরিত্ৰা যুদ্ধে সরূপং’’তি সুত্তেন সমাসে কতে কেসেসু চ কেসেসু চ গহেত্ৰা যুদ্ধং পৰত্তং কেসাকেসী, দণ্ডেহি চ দণ্ডেহি চ পহরিত্ৰা যুদ্ধং পৰত্তং দণ্ডাদণ্ডীতি হোতি. এত্থ চ ‘‘চী ৰীতিহারে’’তি চীপচ্চযে ‘‘চিস্মিং’’তি আকারো, এৰং মুট্ঠামুট্ঠী.

সোভণো গন্ধো সুগন্ধো, সো অস্স অত্থীতি সুগন্ধীহি অত্থিঅত্থে ঈপচ্চযেন সিদ্ধং. যস্মা চ ভদ্দায কাপিলানিযা অপদানে ‘‘পুনো পত্তং গহেত্ৰান, সোধযিত্ৰা সুগন্ধিনা’’তি ৰুত্তং, তস্মা ৰুত্তিযং ইকারন্তস্স অভাৰদীপনত্থং ‘‘সুগন্ধি দুগ্গন্ধীতি পযোগা ন দিস্সতী’’তি ৰুত্তং. সুগন্ধিনাতি একৰচনে রস্সো.