সঙ্খ্যাকণ্ড

অথ সঙ্খ্যাসদ্দা ৰুচ্চন্তে. একাদযো অট্ঠারসন্তা সঙ্খ্যেয্যৰচনা. ৰীসতিআদযো ‘‘ভিক্খূনং ৰীসতী’’তিআদীসু সঙ্খ্যাৰচনা, ‘‘ৰীসতি ভিক্খৰো’’তিআদীসু সঙ্খ্যেয্যৰচনা. একসদ্দো সব্বাদীসু ৰুত্তোৰ. দ্ৰাদযো অট্ঠারসন্তা বহুৰচনন্থাৰ.

২১৯. যোম্হি দ্ৰিন্নং দুৰে+দ্ৰে

যোম্হি দ্ৰিস্স সৰিভত্তিস্স দুৰে+দ্ৰে হোন্তি পচ্চেকং. দুৰে দ্ৰে, দুৰে দ্ৰে, দ্ৰীহি দ্ৰীভি.

২২০. দুৰিন্নং নংম্হি ৰা

নংম্হি দ্ৰিস্স সৰিভত্তিস্স দুৰিন্নং হোতি ৰা. দুৰিন্নং, অঞ্ঞত্র –

৪৭. নংম্হি নুক দ্ৰাদীনং সত্তরসন্নং

দ্ৰাদীনং সত্তরসন্নং সঙ্খ্যানং নুক হোতি নংম্হি ৰিভত্তিম্হি. উকারো উচ্চারণত্থো, ককারো অন্তাৰযৰত্থো. এত্থ নাগমো ৰিভত্তিস্স আদ্যাৰযৰো চে, ‘‘আগমা তগ্গুণীভূতা তগ্গহণেন গয্হন্তে’’তি ঞাযা নাগমোপি তংগহণেন গয্হতীতি ‘‘সুনংহিসূ’’তি দীঘপ্পসঙ্গে পকতিযা অন্তাৰযৰভূতে সরন্ততা নত্থীতি ন দীঘো. দ্ৰিন্নং, দ্ৰীসু.

২০৭. পুমে তযো+চত্তারো

যোম্হি সৰিভত্তীনং তি+চতুন্নং তযো+চত্তারো হোন্তি যথাক্কমং পুল্লিঙ্গে. তযো, তযো, তীহি তীভি.

৪৯. ণ্ণং+ণ্ণন্নং তিতো ঝা

ঝসঞ্ঞিতো তিতো নংৰচনস্স ণ্ণং+ণ্ণন্নং হোন্তি. তিণ্ণং তিণ্ণন্নং, তীসু.

ইত্থিযং –

২০৫. তিস্সো চতস্সো যোম্হি সৰিভত্তীনং

ৰিভত্তিসহিতানং তিচতুন্নং যোম্হি তিস্সো+চতস্সো হোন্তি ইত্থিযং যথাক্কমং. তিস্সো, তিস্সো, তীহি তীভি.

২০৪. নংম্হি তিচতুন্ন+মিত্থিযং তিস্স+চতস্সা

নংম্হি তিচতুন্নং তিস্স+চতস্সা হোন্তি+ত্থিযং যথাক্কমং. নংম্হীতি চতুত্থীছট্ঠীনং সামঞ্ঞৰচনং, নো চে নংসূতি ৰদতি, যথাক্কমংতি সদ্দদ্ৰযাপেক্খং. এৰ+মীদিস+মঞ্ঞম্পি. তিস্সন্নং তীসু.

২০৬. তীণি+চত্তারি নপুংসকে

যোম্হি সৰিভত্তীনং তিচতুন্নং যথাক্কমং তীণি+চত্তারি হোন্তি নপুংসকে. তীণি, তীণি, তীহি ইচ্চাদি পুল্লিঙ্গেৰ.

চতু যো,

২০৮. চতুরো ৰা চতুস্স

চতুস্স সৰিভত্তিস্স যোম্হি চতুরো হোতি ৰা পুল্লিঙ্গে. চতুরো চত্তারো. কথং ‘‘চতুরো নিমিত্তে নাদ্দসাসি’’ন্তি, লিঙ্গৰিপল্লাসেন সিদ্ধং, চত্তারি নিমিত্তানীতি অত্থো. ৰিপল্লাসো তিৰিধো লিঙ্গৰিপল্লাসো ৰচনৰিপল্লাসো ৰিভত্তিৰিপল্লাসোতি. চতূহি চতূভি. চতুন্নং, চতূসু.

ইত্থিযং চতস্সো. চতস্সো. চতূহি চতূভি. চতস্সন্নং. চতস্সন্নং. চতূসু.

নপুংসকে চত্তারি. চত্তারি. চতূহি চতূভি. ইচ্চাদি পুমেৰ.

১৬৯. ট পঞ্চাদীহি চুদ্দসহি

‘‘সুত্তে লিঙ্গৰচনমত্ত’’ন্তি ঞাযা ট-ইতি ৰুত্তং. পঞ্চাদীহি চুদ্দসহি সঙ্খ্যাহি যোনং ট হোতি. পঞ্চ. পঞ্চ. যোনং টা+টেনিৰত্থনত্থং ট-ৰিধানং.

৯০. পঞ্চাদীনং চুদ্দসন্ন+ম

পঞ্চাদীনং চুদ্দসন্নং সুনংহিস্ৰ হোতি. এত্ত+দীঘাপৰাদো+যং. অপৰাদতি বাধেতীতি অপৰাদো. তস্মা ‘‘পকপ্যাপৰাদৰিসযমুস্সগ্গা অভিনিৰিসন্তে’’তি ঞাযা ‘‘সুহিস্ৰ+স্সে’’ ‘‘সুনংহিসু’’তি চ উস্সগ্গা ‘‘পঞ্চাদীনং চুদ্দসন্ন+ম’’ ইতি অপৰাদৰিসযং ন পৰিসন্তি, সামঞ্ঞত্তা. এৰ+মুপরিপি ‘‘পঞ্চমিযং পরস্স’’ ‘‘আদিস্সা’’তি. পঞ্চহি পঞ্চভি পঞ্চন্নং. পঞ্চন্নং. পঞ্চসু. এৰং ছাদযো অট্ঠারসন্তা.

‘‘চত্থে’’তি একো চ দস চাতি চত্তসমাসে ‘‘অমাদী’’তি একেন অধিকা দসাতি ততিযাসমাসে ৰা কতে ‘‘একত্থতায’’ন্তি ৰিভত্তিলোপো. এৰ+মুপরি চ.

৩,১০২. একট্ঠান+মা

একঅট্ঠানং আ হোতি দসে পরে.

৩,১০৩. র সংখ্যাতো ৰা

সংখ্যাতো পরস্স দসস্স র হোতি ৰিভাসা. স চ ‘‘পঞ্চমিযং পরস্সা’’তি ৰত্তমানে ‘‘আদিস্সা’’তি দকারস্সেৰ হোতি. একারস একাদস. একারসহি একাদসহি. একারসন্নং একাদসন্নং. একারসসু একাদসসু. এৰ+মেকাদসইচ্চাদিপি.

৩,৯৪. আ সংখ্যাযা সতাদো নাঞ্ঞত্থে

সংখ্যায+মুত্তরপদে দ্ৰিস্সা হোতি অসতাদো নাঞ্ঞত্থে.

আৰিট্ঠলিঙ্গত্তা সংখ্যাযং উত্তরপদে সলিঙ্গেনেৰ ৰিসেসনং ভৰতি.

সুদ্ধং মিস্সঞ্চ সংকিণ্ণং, উপসজ্জনমেৰ চ;

আৰিট্ঠ+মথ ৰা+ব্যত্তং, ছধা লিঙ্গং ৰিৰংযতে.

এত্থ যথাক্কমং রুক্খো লতা পণ্ণংতি সুদ্ধং. ঘটো ঘটী, ৰজিরো ৰজিরং, ৰেদনা ৰেদনংতি মিস্সং. তটো তটী তটংতি সংকিণ্ণং. সুক্কো পটো, সুক্কা পটি, সুক্কং ৰত্থংতি উপসজ্জনং. রাজা সরণং, গুণো পমাণংতি আৰিট্ঠং. তুৰং অহং কতি পঞ্চাতি অব্যত্তং. ইতি লিঙ্গং ৰেদিতব্বং. দ্ৰাদস.

৩,৯৮. বা চত্তালীসা দো

দ্ৰিস্স বা ৰা হোতি চত্তালীসা দো নাঞ্ঞত্থে. রাদে সে বারস.

৩,৯৫. তিস্সে

সংখ্যায+মুত্তরপদে তিস্স এ হোত+সতাদো না+ঞ্ঞত্থে.

৩,১০৪. ছতীহি ল়ো চ

ছতীহি পরস্স দসস্স ল়ো হোতি রো চ. তেল়স তেরস.

৩,১০০. চতুস্স চুচো দসে

চতুস্স চু+চো হোন্তি ৰা দসে পরে. দ্ৰিত্তে চুদ্দস চোদ্দস চতুদ্দস.

৩,৯৯. ৰীসতিদসেসু পঞ্চস্স পণ্ণ+পন্না

ৰীসতি সেসু পরেসু পঞ্চস্স পণ্ণ+পন্না হোন্তি যথাক্কমং. পন্নরস পঞ্চদস.

৩,১০১. ছস্স সো

ছস্স সো-ইচ্চ+য+মাদেসো হোতি সে পরে. সোল়স সোরস. সত্তরস সত্তদস. ‘‘একট্ঠান+মা’’তি আ, অট্ঠারস অট্ঠাদস.

ঊনা চ সা ৰীসতি চাতি ‘‘ৰিসেসন+মেকত্থেনে’’তি ৰিসেসনসমাসে ‘‘ইত্থিযং ভাসিতপুমি+ত্থী পুমে+ৰেকত্থে’’তি পুমত্তে চ কতে একেন ঊনা ৰীসতীতি ততিযাসমাসে একূনৰীসতি.

ৰীসতিআদযো আনৰুতিযা ইত্থিলিঙ্গে+কৰচনা. ভো একূনৰীসতি. একূনৰীসতিং. একূনৰীসত্যা একূনৰীসতিযা. একূনৰীসত্যং একূনৰীসতিযং একূনৰীসত্যা একূনৰীসতিযা. মতিসমং.

এৰং ৰীসতি, একৰীসতি, দ্ৰাৰীসতি বাৰীসতি, তেৰীসতি চতুৰীসতিপ্পভুতযো. পণ্ণআদেসে পণ্ণৰীসতি পঞ্চৰীসতি. এৰং ছব্বীসতি, সত্তৰীসতি, অট্ঠৰীসতি.

একেন ঊনা তিংসতি তিংসা ৰাতি একূনতিংসতি একূনতিংসা ৰা. করণে একূনতিংসায. একূনতিংসায, একূনতিংসায, একূনতিংসায, একূনতিংসাযং. এৰং তিংসতিণিংসাৰভুতযো. তিংসাসদ্দস্স পন সিলোপে ‘‘দীঘস্সো’’তি যোগৰিভাগা রস্সো, তিংস. নিগ্গহীতাগমো, তিংসং. ভোতিংসে+চ্চাদি পুমেৰ.

চত্তালীসাদীসুপি যথাসম্ভৰং এৰমেৰ. দ্ৰিত্তে একত্তিংসতি একত্তিংসা. রস্সদ্ৰিত্তে দ্ৰত্তিংসতি দ্ৰত্তিংস. এৰং তেত্তিংসতি তেত্তিংসাদযো যাৰ একূনচত্তালীসতি একূনচত্তালীসা. চত্তালীসায সিম্হি চত্তারীসা চত্তালীসা চত্তালীসং, ভো চত্তালীসে+চ্চাদি হোতি. এৰং একচত্তারীসা.

৩,৯৭. দ্ৰীস্সা চ

অসতাদো নাঞ্ঞত্থে চত্তালীসাদো দ্ৰিস্স এ ৰা হোতি আ চ. দ্ৰেচত্তালীসা দ্ৰেচত্তালীস দ্ৰেচত্তালীসং, এৰং দ্ৰাচত্তালীস-ইচ্চাদি. দ্ৰেচত্তারীসা দ্ৰেচত্তারীস দ্ৰেচত্তারীসং, এৰং দ্ৰাচত্তারীসা দ্ৰাচত্তারীস ইচ্চাদি. চত্তালীসতি একচত্তালীসতি দ্ৰেচত্তালীসতি দ্ৰাচত্তালীসতি ইচ্চাদি একূনৰীসতিসমং.

৩,৯৮. চত্তালীসাদো ৰা

অসতাদো নাঞ্ঞত্থে চত্তালীসাদো তিস্সে হোতি ৰা. তেচত্তালীসা তেচত্তালীস তেচত্তালীসং. ভো তেচত্তালীসে ইচ্চাদি হোতি. এৰং তিচত্তালীসা তেচত্তারীসা তিচত্তারীসা ইচ্চাদি, তেচত্তালীসতি তিচত্তালীসতি ইচ্চাদি পুব্বেৰ.

এৰং চতুচত্তালীসা পঞ্চচত্তালীসা চতুচত্তালীসতি পঞ্চচত্তালীসতি ইচ্চাদি যাৰ একূনপঞ্ঞাসা.

পঞ্ঞাসা পঞ্ঞাস পঞ্ঞাসং ইচ্চাদি হোতি. এৰং দ্ৰেপঞ্ঞাসা দ্ৰাপঞ্ঞাসা দ্ৰিপঞ্ঞাসা দ্ৰেপণ্ণাসা দ্ৰাপণ্ণাসা দ্ৰিপণ্ণাসা. তেপঞ্ঞাসা তিপঞ্ঞাসা তিপঞ্ঞাসং তেপণ্ণাসা তিপণ্ণাসা. চতুপণ্ণাসা পঞ্চপণ্ণাসা ইচ্চাদি যাৰ একূনসট্ঠি.

এৰং সট্ঠি, একসট্ঠি, দ্ৰেসট্ঠি দ্ৰাসট্ঠি দ্ৰিসট্ঠি, তেসট্ঠি তিসট্ঠি, চতুসট্ঠি পঞ্চসট্ঠি ইচ্চাদি যাৰ একূনসত্ততি.

সত্ততি, একসত্ততি, দ্ৰেসত্ততি দ্ৰাসত্ততি দ্ৰিসত্ততি, তেসত্ততি তিসত্ততি. দ্ৰেসত্তরি দ্ৰাসত্তরি দ্ৰিসত্তরি, চতুসত্ততি, পঞ্চসত্ততি, চতুসত্তরি, পঞ্চসত্তরীতি যাৰ একূনাসীতি.

অসীতি, একাসীতি, দ্ৰাসীতি, যাগমে দ্ৰিযাসীতি, তেঅসীতি তিযাসীতি, চতুরাসীতি, পঞ্চাসীতি ইচ্চাদি যাৰ একূননৰুতি.

নৰুতি, একনৰুতি, দ্ৰেনৰুতি দ্ৰানৰুতি দ্ৰিনৰুতি, তেনৰুতি তিনৰুতি, চতুনৰুতি, পঞ্চনৰুতি ইচ্চাদি যাৰ একূনসতং, এতং নপুংসকলিঙ্গ+মেকৰচনন্তং.

সতং, ভো সত সতা, সতং, সতং. সতেন, করণে সতেন. সতস্স, সতা সতম্হা সতস্মা, সতস্স, সতে সতম্হি সতস্মিং. এৰং একসততো পভুতি যাৰ সহস্সং.

কোটি পকোটি কোটিপ্পকোটি অক্খোভিণিযো ইত্থিলিঙ্গে+কৰচনন্তা. ৰগ্গভেদে তু সব্বাসম্পি সংখ্যানং বহুৰচনোপি হোতেৰ ‘‘দ্ৰেৰীসতিযো জিনদন্তা’’ ‘‘তিস্সো ৰীসতিযো দিনঘটিকা’’ ইচ্চাদি.

দসদসকং সতং নাম, দসসতং সহস্সং নাম, দসসহস্সং নহুতং, দসনহুতং লক্খং, সতসহস্সন্তিপি ৰুচ্চতি.

লক্খসতং কোটি, কোটিলক্খসতং পকোটি, পকোটিলক্খসতং কোটিপ্পকোটি, এৰং নহুতং, নিন্নহুতং, অক্খোভিণী, বিন্দু, অব্বুদং, নিরব্বুদং, অহহং, অববং, অটটং, সোগণ্ডিকং, উপ্পলং, কুমুদং, পুণ্ডরীকং, পদুমং, কথানং, মহাকথানং, অসঙ্খ্যেয্যন্তি যথাক্কমং সতলক্খগুণং ৰেদিতব্বং.

ইচ্চেৰং ঠানতো ঠানং, সতলক্খগুণং মতং;

কোটিপ্পভুতীনং ৰীস-সঙ্খ্যানঞ্চ যথাক্কমন্তি.

অথা+সংখ্যা ৰুচ্চতে, অব্যযন্তি চ ৰুচ্চতে. তং পাদি চাদি, উপসগ্গনিপাতাতি চ দুৰিধং.

প পরা অপ সং অনু অৰ ও নি দু ৰি অধি অপি অতি সু উ অভি পতি পরি উপ আ ইমে ৰীসতি পাদযো. পাদযো হি জোতকা, ন ৰাচকা.

তত্থ প-সদ্দো পকারা+দিকম্ম, পধান+ন্তোভাৰ, ৰিযোগ, তপ্পর, ভুসত্থ, সম্ভৰ, তিত্তি, অনাৰিল, পত্থনাদীসু. যথা পকারে-পঞ্ঞা. আদিকম্মে-ৰিপ্পকতং, পধানে-পণীতং, অন্তোভাৰে-পক্খিত্তং, খিত্তন্তি পেরণং, পক্খিত্তন্তি অন্তোকরণং, ধাত্ৰত্থস্স বাধিতত্তা. ৰুত্থঞ্হি –

ধাত্ৰত্থং বাধতে কোচি, কোচি তং অনুৰত্ততে;

তমেৰ+ঞ্ঞো ৰিসেসেতি, উপসগ্গগতী তিধাতি.

এত্থ চ ‘‘অনুরুদ্ধকা মে সঙ্গামযুদ্ধে’’তি চ ইমে উপসগ্গা ধাত্ৰত্থং ৰিসেসেন্তি নাম. ৰিযোগে-পৰাসী, তপ্পরে-পাচরিযো, ভুসত্থে-পৰুদ্ধকাযো, সম্ভৰে-হিমৰন্তা গঙ্গা পভৰতি, তিত্তিযং-পহূত+মন্নং, অনাৰিলে-পসন্ন+মুদকং, পত্থনে-পণিহিতং.

পরাইতি পরিহানি, পরাজয, গতি, ৰিক্কমা+মসনাদীসু. যথা পরিহানিযং-পরাভৰো. পরাজযে-পরাজিতো, গতিযং-পরাযনং, ৰিক্কমে-পরক্কমতি, আমসনে-অঙ্গস্স পরামসনং.

অপইতি অপগত, গরহ, ৰজ্জন, পূজা, পদুস্সনাদীসু. যথা অপগতে-অপমানো অপেতো, গরহে-অপগব্ভো, ৰজ্জনে-অপসালায আযন্তি ৰাণিজা, পূজাযং-ৰুদ্ধাপচাযী, পদুস্সনে-অপরজ্ঝন্তি.

সংইতি সমোধান, সম্মাসম, সমন্তভাৰ, সংগত, সংখেপ, ভুসত্থ, সহ+প্পত্থ, পভৰা+ভিমুখভাৰ, ৰিধান, পুনপ্পুন, করণ, সমিদ্ধাদীসু. যথা সমোধানে-সন্ধি, সম্মাসমে-সমাধি, সম্পযুত্তো, সমন্তভাৰে-সংকিণ্ণং, সমুল্লপনা, সংগতে-সঙ্গমো, সংখেপে-সমাসো, ভুসত্থে-সারত্থো, সহত্থে-সংৰাসো, অপ্পত্থে-সমগ্ঘো, পভৰে-সম্ভৰো, অভিমুখভাৰে-সম্মুখং. সংগতে-সংগণ্হাতি, ৰিধানে-সংৰুতং, পুনপ্পুনকরণে-সন্ধাৰতি, সমিদ্ধিযং-সম্পন্নো.

অনুইতি অনুগতা+নুপচ্ছিন্ন, পচ্ছাত্থ, ভুসত্থ, সাদিস্স, হীন, ততিযত্থ, লক্খণি+ত্থম্ভূতক্খান, ভাগ, ৰিচ্ছাদীসু. অনুগতে-অন্ৰেতি, অনুপচ্ছিন্নে-অনুসযো, পচ্ছাত্থে-অনুরথং, ভুসত্থে-অনুরত্তো, সাদিস্সে-অনুরূপং, হীনে-অনুসারিপুত্তং পঞ্ঞৰন্তো, ততিযত্থে-নদি+মন্ৰৰসিতা সেনা, লক্খণেরুক্খ+মনুৰিজ্জোততে ৰিজ্জু, ইত্থম্ভূতখ্যানে-সাধু দেৰদত্তো মাতর+মনু, ভাগে-য+দেত্থ মং অনু সিযা, তং দীযতু, ৰিচ্ছাযং-রুক্খং রুক্খং অনু ৰিজ্জোততে চন্দো.

অৰইতি অধোভাগ, ৰিযোগ, পরিভৰ, জানন, [সুদ্ধি] নিচ্ছয, দেস, থেয্যাদীসু. অধোভাগে-অৰক্খিত্তচক্খু, ৰিযোগে-অৰকোকিলং ৰনং, পরিভৰে-অৰজাননং, অৰমঞ্ঞতি, জাননে-অৰগচ্ছতি. [সুদ্ধিযং–ৰোদানং (রূপসিদ্ধি)], নিচ্ছযে-অৰধারণং, দেসে-অৰকাসো, থেয্যে-অৰহারো.

ওইতি ওরোহরণ, নীহরণ, সুদ্ধিআদীসু দিস্সতি. ওরোহণে-পাসাদা ওরোহতি, নীহরণে-ওমুক্কুপাহনো, সুদ্ধিযং-ওদাতং.

নিইতি, নিস্সেস, নিগ্গত, নীহরণ,+ন্তোপৰেসনা+ভাৰ, নিসেধন, নিক্খন্ত, পাতুভাৰা+ৰধারণ, ৰিভজন, উপমু+পধারণা+ৰসান, ছেক, নীহরণা+ৰরণাদীসু. নিস্সেসে-নিরুত্তি, নিগ্গতে-নিক্কিলেসো, নিয্যাতি, নীহরণে-নিদ্ধারণং, অন্তোপৰেসনে-নিখাতো, অভাৰে-নিম্মক্খিকং, নিসেধে-নিৰারেতি, নিক্খন্তে-নিব্বানং, পাতুভাৰে-নিম্মিতং, অৰধারণে-নিচ্ছযো, ৰিভজনে-নিদ্দেসো. উপমাযং-নিদস্সনং, উপধারণে-নিসামনং, অৰসানে-নিট্ঠিতং, ছেকে-নিপুণো, নীহরণে-নীহরতি, ইস্স দীঘো. আৰরণে-নীৰরণং.

দুইতি অসোভণা+ভাৰ, কুচ্ছিতা+সমিদ্ধি, কিচ্ছ, ৰিরূপতাদীসু. অসোভণে-দুগ্গন্ধো, অভাৰে-দুব্ভিক্খং, কুচ্ছিতে – দুক্কটং. অসমিদ্ধিযং-দুস্সস্সং, কিচ্ছে-দুক্করং, ৰিরূপতাযং-দুব্বণ্ণো দুম্মুখো.

ৰিইতি ৰিসেস, ৰিৰিধ, ৰিরুদ্ধ, ৰিগত, ৰিযোগ, ৰিরূপতাদীসু. ৰিসেসে-ৰিমুত্তি, ৰিসিট্ঠো, ৰিৰিধে-ৰিমতি, ৰিরুদ্ধে-ৰিৰাদো, ৰিগতে-ৰিমলং, ৰিযোগে-ৰিপ্পযুত্তো, ৰিরূপতাযং-ৰিরূপো.

অধিইতি অধিকি+স্সরূ+পরিভাৰা+ধিভৰন+জ্ঝাযা+ধিট্ঠান, নিচ্ছয, পাপুণনাদীসু. অধিকে-অধিসীলং, ইস্সরে-অধিপতি, অধি ব্রহ্মদত্তে পঞ্চালা, উপরিভাৰে-অধিরোহতি, পথৰিং অধিসেস্সতি, অধিভৰনে-অধিভৰতি, অজ্ঝাযনে-ব্যাকরণ+মধীতে, অধিট্ঠানে-ভূমিকম্পাদিং অধিট্ঠাতি, নিচ্ছযে-অধিমোক্খো, পাপুণনে-ভোগক্খন্ধং অধিগচ্ছতি.

অপিইতি সম্ভাৰনা+পেক্খা, সমুচ্চয, গরহ, পঞ্হাদীসু. সম্ভাৰনাযং-অপি দিব্বেসু কামেসু, মেরুম্পি ৰিনিৰিজ্ঝিত্ৰা গচ্ছেয্য, অপেক্খাযং-অযম্পি ধম্মো অনিযতো, সমুচ্চযে-ইতিপি অরহং, অন্তম্পি অন্তগুণম্পি আদায, গরহে-অপি অম্হাকং পণ্ডিতক, পঞ্হে-অপি ভন্তে ভিক্খং লভিত্থ.

অতিইতি অতিক্কমনা+তিক্কন্তা+তিসয, ভুসত্থাদীসু. অতিক্কমে-অতিরোচতি অম্হেহি, অতীতো, অতিক্কন্তে-অচ্চন্তং, অতিসযে-অতিকুসলো, ভুসত্থে-অতিকোধো, অতিৰুদ্ধি.

সুইতি সোভণ, সুট্ঠু, সম্মা, সমিদ্ধি, সুখত্থাদীসু. সোভণে-সুগন্ধো, সুট্ঠু+সম্মাদত্থেসু-সুট্ঠু গতো সুগতো, সম্মা গতোতিপি সুগতো, সমিদ্ধিযং-সুভিক্খং, সুখত্থে-সুকরো.

উইতি উগ্গতু+দ্ধকম্ম, পধান, ৰিযোগ, সম্ভৰ, অত্তলাভ, সত্তি, সরূপকথনাদীসু. উগ্গতে-উগ্গচ্ছতি, উদ্ধকম্মে-আসনা উট্ঠিতো, উক্খেপো, পধানে-উত্তমো, লোকুত্তরো, ৰিযোগে-উব্ভাসিতো, সম্ভৰে-উব্ভুতো, অত্তলাভে-উপ্পন্নং ঞাণং, সত্তিযং-উস্সহতি গন্তুং, সরূপকথনে-উদ্দিসতি সুত্তং.

অভিইতি অভিমুখভাৰ, ৰিসিট্ঠা+ধিকু+দ্ধকম্ম, কুল, সারুপ্প, ৰন্দন, লক্খণি+ত্থম্ভূতক্খান, ৰিচ্ছাদীসু. অভিমুখভাৰে-অভিমুখো, অভিক্কমতি, ৰিসিট্ঠে-অভিধম্মো, অধিকে-অভিৰসতি, উদ্ধকম্মে-অভিরুহতি. কুলে-অভিজাতো, সারুপ্পে-অভিরূপো, ৰন্দনে-অভিৰাদেতি, লক্খণাদীসু পুরিমসমং.

পতিইতি পটিগত, পটিলোম, পটিনিধি, পটিদান, নিসেধ, নিৰত্তন, সাদিস্স, পটিকরণা+দান, পটিবোধ, পটিচ্চ, লক্খণিত্থম্ভূতক্খান, ভাগ, ৰিচ্ছাদীসু. পটিগতে-পচ্চক্খং, পটিলোমে-পটিসোতং, পটিনিধিম্হি-আচরিযতো পতি সিস্সো, পটিদানে-তেলত্থিকস্স ঘতং পটিদদাতি, নিসেধে-পটিসেধেতি, নিৰত্তনে-পটিক্কমতি, সাদিস্সে-পটিরূপকং, পটিকরণে-পটিকারো, আদানে-পটিগ্গণ্হাতি, পটিবোধে-পটিৰেধো, পটিচ্চে-পচ্চযো, লক্খণাদীসু পুরিমসমং.

পরিইতি সমন্ততোভাৰ, পরিচ্ছেদ, ৰজ্জনা+লিঙ্গন, নিৰসন, পূজা, ভোজনা+ৰজানন, দোসক্খান, লক্খণাদীসু. সমন্থ- তোভাৰে-পরিৰুতো, পরিচ্ছেদে-পরিঞ্ঞেয্যং, ৰজ্জনে-পরিহরতি, আলিঙ্গনে-পরিস্সজতি, নিৰসনে-যো ৰত্থং পরিদহেস্সতি, পূজাযং-পরিচরিযা, ভোজনে-ভিক্খুং পরিৰিসতি, অৰজাননে-পরিভৰতি. দোসক্খানে-পরিভাসতি, লক্খণাদীসু-রুক্খং পরি ৰিজ্জোততে ৰিজ্জু ইচ্চাদি.

উপইতি উপগমন, সমীপূ+পপত্তি, সাদিস্সা+ধিকু+পরিভাৰা+নসন, দোসক্খান, সঞ্ঞা, পুব্বকম্ম, পূজা, গয্হাকার, ভুসত্থাদীসু. উপগমনে-নিসিন্নং ৰা উপনিসীদেয্য, সমীপে-উপনগরং, উপপত্তিযং-সগ্গং লোকং উপপজ্জতি, অথ ৰা উপপত্তি=যুত্তি, যথা উপপত্তিতো ইক্খতীতি উপেক্খা, সাদিস্সে-উপমানং, উপমা, অধিকে-উপখারিযং দোণো, উপরিভাৰে-উপসম্পন্নো, অনসনে-উপৰাসো, দোসক্খানে-পরং উপৰদতি, সঞ্ঞাযং-উপধা, উপসগ্গো, পুব্বকম্মে-উপক্কমো, উপকারো, পূজাযং-বুদ্ধুপট্ঠাকো, মাতুপট্ঠানং, গয্হাকারে-সোচেয্যপচ্চুপট্ঠানং, ভুসত্থে-উপাদানং, উপাযাসো, উপনিস্সযোতি.

আইতি অভিমুখভাৰু+দ্ধকম্ম+মরিযাদা+ভিৰিধি, পত্তি+চ্ছা, পরিস্সজন, আদিকম্ম, গহণ, নিৰাসন, সমীপ, আৰ্হানাদীসু. অভিমুখভাৰে-আগচ্ছন্তি, উদ্ধকম্মে-আরোহতি, মরিযাদাযং-আপব্বতা খেত্তং, অভিৰিধিম্হি-আকুমারং যসো কচ্চাযনস্স, পত্তিযং-আপত্তিং আপন্নো, ইচ্ছাযং-আকঙ্খা, পরিস্সজনে-আলিঙ্গনং, আদিকম্মে-আরম্ভো, গহণে-আদীযতি, আলিঙ্গতি, (আলিম্পতি, রূ), নিৰাসে-আৰসথো, আৰাসো, সমীপে-আসন্নং, আৰ্হানে-আমন্তেতি.

প পরা+প স+মন্ৰ+ৰ, ও নি দু রভি ব্যা+ধিসু;

অতি নি প্পতি পরি অপযো, উপ আ ইতি ৰীসতি;

এস হি ভো উপসগ্গ-ৰিধি+ক্কমতো কথিতো.

এত্থ চ –

উপসগ্গ+নিপাতা চ, পচ্চযা চ ইমে তযো;

নেকে+নেকত্থৰাচকা, ইতি নেরুত্তিকা+ব্রৰুং.

১১৮. অসংখ্যেহি সব্বাসং

অৰিজ্জমানসংখ্যেহি পরাসং সব্বাসং ৰিভত্তীনং লোপো হোতি. ন সন্তি একৰচনাদিসংখ্যা এতেসন্তি অসংখ্যা, তেসং অসংখ্যানং ৰিভত্তীনং ভেদে অসতিপি স্যাদিৰিধানং ‘‘মা নো অজ্জ ৰিকন্তিংসূ’’তিআদো ৰিভত্যন্তত্তা পদত্তসিদ্ধীতি ৰো+নোআদীনং সিদ্ধিযা চ তেসং পঠমাদিঅত্থে দস্সনতো চ হোতি. পহারো পরাভৰো অপহারো সংহারো অৰহারো ওহারো ইচ্চাদি হোতি.

উপেচ্চ+ত্থং সজন্তীতি, উপসগ্গা হি পাদযো;

চাদী পদাদিমজ্ঝন্তে, নিপাতা নিপতন্তীতি.

ওপসগ্গিকপদং.

সমুচ্চয+ৰিকপ্পন+পটিসেধ+পূরণাদিঅত্থং অসত্তৰাচিকং নেপাতিকং.

চ-ইতি সমুচ্চযা+ন্ৰাচয+ইতরেতরযোগ+সমাহারা+ৰধারণাদীসু. ৰা-ইতি ৰিকপ্পনু+পমান+সমুচ্চয+ৰৰত্থিতৰিভাসাদীসু. ন, নো, মা, অ, অলং, হলং ইচ্চেতে পটিসেধে. ‘‘দ্ৰে পটিসেধা পকতিঅত্থং গমযন্তী’’তি ঞাযা ‘‘ন তেসং পন রূপানং পচ্চযা ন চ হোন্তী’’তি এত্থ ন চ ন হোন্তি-হোন্তেৰাতি পকতিঅত্থং গমযতি. অলং পরিযত্তি+ভূসনেসু চ.

পূরণত্থং দুৰিধং অত্তপূরণং পদপূরণঞ্চ, তত্থ অথ, খলু, ৰত, অথো, অস্সু, যগ্ঘে, হি, চরহি, নং, তং, চ, তু, ৰা, ৰো, পন, হৰে, কীৰ, হ, ততো, যথা, সুদং, খো, ৰে, হং, এনং, (এৰং, রূ) সেয্যথিদং ইচ্চেৰমাদি পদপূরণে. তত্থ অথ-ইতি পঞ্হা+নন্তরিযা+ধিকারাদীসু চ. খলু-ইতি পটিসেধা+ৰধারণ, পসিদ্ধীসু চ. ৰত+ইতি একংস, খেদা+নুকম্প, সংকপ্পেসু চ. অথো-ইতি অন্ৰাদেসে চ. হি-ইতি হেতু, অৰধারণেসু চ. তু-ইতি ৰিসেস, হেতু, নিৰত্তনাদীসু চ. পন-ইতি ৰিসেসেপি. হৰে+ৰে ইচ্চেতে একংসত্থেপি. হং-ৰিসাদ, ৰিম্হেসুপি. (ৰিসাদ, সম্ভৰেসু, রূ). সেয্যথিদংতি তং কতমংতি অত্থেপি.

অত্থপূরণং দুৰিধং ৰিভত্তিযুত্তং অৰিভত্তিযুত্তঞ্চ. অত্থি, সক্কা, লব্ভা ইচ্চেতে পঠমাযং. আৰুসো অম্ভো হম্ভো অরে হরে রে জে ইচ্চেতে আমন্তণে. দিৰা ভিয্যো (নমো, রূ) ইচ্চেতে পঠমাদুতিযাসু. সযং সামং সং সম্মা কিন্তি ইচ্চেতে ততিযত্থে. সো+তো+ধাপচ্চযন্তা চ সুত্তসো পদসো অনিচ্চতো দুক্খতো একধা দ্ৰিধা ইচ্চাদি. তৰে+তুং পচ্চযন্তা চতুত্থিযাৰ, কাতৰে দাতৰে, কাতুং কারেতুং, (দাতুং, রূ) দাপেতুং ইচ্চাদি. সো+তোপচ্চযন্তা পঞ্চমিযত্থে, দীঘসো ওরসো রাজতো ৰা চোরতো ৰা ইচ্চাদি. তো সত্ত- ম্যত্থেপি ত্র+ত্থাদিপচ্চযন্তা চ, একতো পুরতো পচ্ছতো পস্সতো পিট্ঠিতো পাদতো সীসতো অগ্গতো মূলতো, যত্র যত্থ যহিং তত্র তত্থ তহিং ইচ্চাদি. সমন্তা সামন্তা পরিতো অভিতো সমন্ততো একজ্ঝং একমন্তং হেট্ঠা উপরি উদ্ধং অধো তিরিযং সম্মুখা পরমুখা আৰি রহো তিরো উচ্চং নীচং অন্তো অন্তরা অন্তরং অজ্ঝত্তং বহিদ্ধা বাহিরা বাহিরং বহি ওরং পারং আরা আরকা পচ্ছা পুরে হুরং পেচ্চ ইচ্চেতে সত্তমিযা. সম্পতি আযতি অজ্জ অপরজ্ঝ সুৰে স্ৰে উত্তরসুৰে (কিসু, রূ) হিয্যো পরে (পরসুৰে, রূ) সজ্জু সাযং পাতো কালং কল্লং দিৰা রত্তং নিচ্চং সততং অভিণ্হং অভিক্খণং মুহুং মুহুত্তং ভূতপুব্বং পুরা যদা তদা (কদা, রূ) ইচ্চাদযো কালসত্তমিযং. ইতি ৰিভত্তিযুত্তানি.

অৰিভত্তিযুত্তেসু অপ্পেৰ অপ্পেৰনাম নু ইচ্চেতে সংসযত্থে. অদ্ধা অঞ্ঞদত্থু তগ্ঘ জাতু কামং সসক্কং ইচ্চেতে একংসত্থে. এৰং ইতি অৰধারণে. কচ্চি নু ননু কথং (কিংসু, রূ) কিং ইচ্চেতে পুচ্ছনত্থে. এৰং ইতি ইত্থং ইচ্চেতে নিদস্সনত্থে. ইতি হেতু+ৰাক্যপরিসমত্তীসু চ. যাৰ তাৰ যাৰতা তাৰতা কিত্তাৰতা এত্তাৰতা কীৰ ইচ্চেতে পরিচ্ছেদনত্থে. এৰং সাহু লহু ওপাযিকং পটিরূপং আম সাধু ইচ্চেতে সম্পটিচ্ছনত্থে. তথা যথা যথেৰ তথেৰ এৰং এৰমেৰ এৰম্পি যথাপি সেয্যথাপি সেয্যথাপিনাম ৰিয ইৰ যথরিৰ তথরিৰ যথানাম তথানাম যথাহি তথাহি যথাচ তথাচ ইচ্চেতে পটিভাগত্থে. যথাইতি যোগ্গতা+ৰিচ্ছা+পদত্থানতিৰত্তি+নিদস্সনেসু চ. এৰংইতি উপদেস+পঞ্হাদীসু চ. কিঞ্চাপিইতি অনুগ্গহত্থে. ধিইতি গরহে. অহোইতি গরহ+পসংসন+পত্থনেসু. নামইতি গরহ+পসংসন+সঞ্ঞা+পঞ্হেসু. সাধূতি পসংসন+যাচনেসু. ইঙ্ঘ হন্দ ইচ্চেতে চোদনত্থে. সাধু সুট্ঠু এৰমেতংতি অনুমোদনে. কিরইতি অনুস্সৰন+অসদ্ধেয্যেসু. নুনইতি অনুমানা+নুস্সরণ+পরিৰিতক্কেসু. কস্মাতি কারণপুচ্ছনে. যস্মা তস্মা তথা হি তেন ইচ্চেতে কারণচ্ছেদনত্থে. সহ সদ্ধিং অমা (সমং, রূ) ইতি সমক্রিযাযং. ৰিনা রিতে ৰিপ্পযোগে. নানা পুথু বহুপকারে. পুথু ৰিসুং অসঙ্ঘাতে চ. দুট্ঠু কু কুচ্ছাযং (জিগুচ্ছাযং, রূ). পুন অপ্পঠমে. কথং চিকিচ্ছত্থে. ধা ক্খত্তুং সো কিঞ্চইতি সংখ্যাৰিভাগে. ঈসকং অপ্পমানেসু (অপ্পমত্তে, রূ). সণিকং মন্দত্থে. খিপ্পং অরং লহুং আসু তুণ্হং অচিরং সীঘত্থে. চিরং চিরস্সং দীঘকালে. চে যদি সংকা+ৰট্ঠানে. ধুরং থিরা+ৰধারণেসু (ধুৰং থিরা+ৰধারণেসু, রূ). হা ৰিসাদে. তুণ্হী অভাসনে. সচ্ছি পচ্চক্খে. মুসা মিচ্ছাঅলিকং অসচ্চে. সুৰত্থি আসিট্ঠে ইচ্চাদি.

তুন+ক্ত্ৰান+ক্ত্ৰাপচ্চযন্তা উস্সুক্কনত্থে ভৰন্তি. যথা পস্সিতুন পস্সিয পস্সিত্ৰান পস্সিত্ৰা, দিস্ৰা দিস্ৰান দস্সেত্ৰা দাতুন দত্ৰান দত্ৰা উপাদায দাপেত্ৰা ৰিঞ্ঞায ৰিচেয্য ৰিনেয্য সমেচ্চ নিহচ্চ উপেচ্চ আরব্ভ আগম্ম ইচ্চাদি.

ৰিভত্তিযা কতো ভেদো, সলিঙ্গানং ভৰে তথা;

তুম্হাদীনং ত্ৰ+লিঙ্গেসু, নেৰ+ত্থি পাদি+চাদিনং.

এৰং নামাখ্যাতোপসগ্গেহি ৰিনিমুত্তং এতং নিপাতপদং ৰেদিতব্বং.

নেপাতিকপদং.

পুল্লিঙ্গং ইত্থিলিঙ্গঞ্চ, নপুংসক+মথা+পরং;

তিলিঙ্গঞ্চ অলিঙ্গঞ্চ, নামিকং পঞ্চধা ঠিতং.

ইতি পযোগসিদ্ধিযং নামকণ্ডো দুতিযো.