৯১. য্ৰাদো ন্তুস্স

যোআদীসু ন্তুস্স অ হোতি. গুণৰন্তইতি অকারন্তা টা+টেআদেসা হোন্তি, গুণৰন্তা. ‘‘টটাঅং গে’’তি টাদযো, ভো গুণৰ গুণৰা গুণৰং, গুণৰন্তো গুণৰন্তা. ‘‘ন্তস্স চ ট ৰং+সে’’তি অংসেসু ন্তস্স টো ৰা, গুণৰং গুণৰন্তং, গুণৰন্তে. ‘‘তো+তা+তি+তা স+স্মা+স্মিং+নাসূ’’তি তাআদযো হোন্তি, গুণৰতা গুণৰন্তেন, গুণৰন্তেহি গুণৰন্তেভি. ‘‘লক্খণিকপটিপদোত্তেসু পটিপদোত্তস্সেৰ গহণং, ন লক্খণিকস্সা’’তি ঞাযা ‘‘ন লক্খণিকস্সা’’তি ৰুত্তব্যত্তিপক্খ+মনপেক্খিত্ৰা ‘‘অতো’’তি রস্সাকারজাতিযা পেক্খিতত্তা গুণৰন্তেনাতি ‘‘অতেনা’’ ত্য+নেন সিজ্ঝতি. জাতি=সামঞ্ঞং, ব্যত্তি=ৰিসেসো. গুণৰতো গুণৰস্স গুণৰন্তস্স, ‘‘তং নংম্হি’’তি নংম্হী তং ৰা, গুণৰতং গুণৰন্তানং. গুণৰতা গুণৰন্তা গুণৰন্তম্হা গুণৰন্তস্মা. গুণৰতি গুণৰন্তে গুণৰন্তম্হি গুণৰন্তস্মিং, গুণৰন্তেসু. ‘‘ন্তস্স চ ট ৰা’’তি যোগৰিভাগা যোসু চ ন্তুস্স ৰা টাদেসে কতে যোস্স টা, ‘‘চক্খুমা অন্ধিতা হোন্তি’’, ‘‘ৰগ্গুমুদাতীরিযা ভিক্খু ৰণ্ণৰা’’ ইচ্চাদী হোন্তি.

এৰং গণৰা কুলৰা ফলৰা যসৰা ধনৰা সুতৰা ভগৰা হিমৰা বলৰা সীলৰা পঞ্ঞৰা ইচ্চাদী.