৪৭. তদমিনাদীনি

তদমিনাদীনি নিপ্পজ্জন্তি. ‘‘য+দলক্খণিকং, তং নিপাতনা’’তি ঞাযা লক্খণন্তরেন অৰিহিতা দেস+লোপা+গম+ৰিপল্লাসা, সব্বত্থ ইমিনাৰ দট্ঠব্বা. ইদঞ্চ পরেসং পিসোদরাদিমিৰ দট্ঠব্বং. ফুসিতং=জলবিন্দু, ফুসিত+মুদর+মস্স পিসোদরং. ইস্স অকারে তং ইমিনা=তদমিনা, সকিং আগামী=সকদাগামী, ধস্স দকারে একং ইধ অহং=এক+মিদা+হং, ৰিধস্স ৰিদাদেসো সংৰিধায অৰহারো=সংৰিদাৰহারো, ৰারিসদ্দস্স ৰকারে, হস্স লকারে চ কতে ৰারিৰাহকো=ৰলাহকো, জীৰনস্স জীআদেসো, জীৰনস্স মুতো=জীমূতো. ছৰস্স সুআদেসে, সযনস্স সানাদেসে চ কতে ছৰস্স সযনং=সুসানং. উদ্ধস্স উদুআদেসে, খস্স খলআদেসে চ ‘‘সরম্হা দ্ৰে’’তি দ্ৰিত্তাদিম্হি চ কতে উদ্ধং খং অস্স উদুক্খলং. পিসিতস্স পিআদেসে, অসস্স সাচাদেসে চ কতে পিসিতাসো=পিসাচো.

মহীসদ্দস্স মযূআদেসে, রৰতিস্স রাদেসে চ কতে মহিযং রৰতীতি মযূরো. এৰ+মঞ্ঞেপি পযোগতো+নুগন্তব্বা. এত্থ চ –

ৰণ্ণাগমো ৰণ্ণৰিপরিযাযো,

দ্ৰে চা+পরে ৰণ্ণৰিকার+নাসা;

ধাতুস্স অত্থাতিসযেন যোগো,

ত+দুচ্চতে পঞ্চৰিধং নিরুত্তংতি.

যথা দ্ৰারে নিযুত্তো=দোৰারিকোতি ওকআগমো. হিংসসদ্দস্স সীহোতি ৰিপল্লাসো. নিজকো=নিযকোতি ৰিকারো. মেহনস্স খস্স মালা মেখলাতি ৰণ্ণলোপো, হ+ন+মকারানং লোপো. মযূরোতি অত্থে রৰতিস্স অতিস্সযযোগোতি.

যথরিৰ তথরিৰেতি নিপাতাৰ. ‘‘জরগ্গৰা ৰিচিন্তেসুং, ৰর+ম্হাকং ভুসামিৰে’’তি এত্থ ইৰসদ্দো এৰকারত্থো. নিগ্গহীতসন্ধি.

সন্ধিস্সরানং পটিসেধসন্ধি,

অথো ব্যঞ্জন+সরব্যঞ্জনানং;

সন্ধি চ+থো নিগ্গহীতস্স সন্ধি,

ভৰন্তি সন্ধি পন পঞ্চধা ৰে.

ইতি পযোগসিদ্ধিযং সন্ধিকণ্ডো পঠমো.