৭. কিব্বিধানকণ্ড

তেকালিক

কিচ্চপ্পচ্চযন্তনয

অথ ধাতূহিযেৰ ভাৰকম্মকত্তুকরণাদিসাধনসহিতং কিব্বিধানমারভীযতে.

তত্থ কিচ্চকিতকৰসেন দুৰিধা হি পচ্চযা, তেসু কিচ্চসঞ্ঞায পঠমং ৰুত্তত্তা, কিচ্চানমপ্পকত্তা চ কিচ্চপ্পচ্চযা তাৰ ৰুচ্চন্তে.

ভূ সত্তাযং, ‘‘ভূযতে, অভৰিত্থ, ভৰিস্সতে ৰা দেৰদত্তেনা’’তি ৰিগ্গহে –

‘‘ধাতুযা কম্মাদিম্হি ণো’’তি ইতো ‘‘ধাতুযা’’তি সব্বত্থ পচ্চযাদিৰিধানে ৰত্ততে, ‘‘পরা, পচ্চযা’’তি চ অধিকারো.

৫৪৫. ভাৰকম্মেসু তব্বানীযা.

ভাৰকম্মইচ্চেতেস্ৰত্থেসু সব্বধাতূহি তব্ব অনীযইচ্চেতে পচ্চযা পরা হোন্তি. যোগৰিভাগেন অঞ্ঞত্থাপি.

তত্থ –

অকম্মকেহি ধাতূহি, ভাৰে কিচ্চা ভৰন্তি তে;

সকম্মকেহি কম্মত্থে, অরহসক্কত্থদীপকা.

তে চ –

৫৪৬. ণাদযো তেকালিকা.

তিকালে নিযুত্তা তেকালিকা, যে ইধ ততিযে ধাত্ৰাধিকারে ৰিহিতা অনিদ্দিট্ঠকালা ণাদযো পচ্চযা, তে তেকালিকা হোন্তীতি পরিভাসতো কালত্তযেপি হোন্তি.

সীহগতিযা ‘‘ক্ৰচী’’তি ৰত্ততে.

৫৪৭. যথাগমমিকারো.

যথাগমং যথাপযোগং জিনৰচনানুপরোধেন ধাতূহি পরো ইকারাগমো হোতি ক্ৰচি ব্যঞ্জনাদিকেসু কিচ্চকিতকপ্পচ্চযেসু, ‘‘অঞ্ঞেসু চা’’তি ৰুদ্ধি, ‘‘ও অৰ সরে’’তি অৰাদেসো, ‘‘নযে পরং যুত্তে’’তি পরং নেতব্বং.

৫৪৮. তে কিচ্চা.

যে ইধ ৰুত্তা তব্বানীযণ্য তেয্য রিচ্চপ্পচ্চযা, তে কিচ্চসঞ্ঞা হোন্তীতি ৰেদিতব্বা. ততো ‘‘অঞ্ঞে কিতি’’তি ৰচনতো কিচ্চপ্পচ্চযানমকিতকত্তা নামব্যপদেসে অসম্পত্তে ‘‘তদ্ধিতসমাসকিতকা নামংৰাতৰেতুনাদীসু চা’’তি এত্থ চগ্গহণেন নামব্যপদেসো, ততো স্যাদ্যুপ্পত্তি. ভাৰে ভাৰস্সেকত্তা একৰচনমেৰ, ‘‘সি’’ন্তি অমাদেসো. ভৰিতব্বং ভৰতা পঞ্ঞেন, ভৰনীযং.

ইধ ব্যঞ্জনাদিত্তাভাৰা অনুৰত্তিতক্ৰচিগ্গহণেন ইকারাগমাভাৰো. ভাৰে কিচ্চপ্পচ্চযন্তা নপুংসকা. কম্মে তিলিঙ্গা.

কম্মনি অভিপুব্বো, অভিভূযতে, অভিভূযিত্থ, অভিভূযিস্সতেতি অভিভৰিতব্বো কোধো পণ্ডিতেন, অভিভৰিতব্বা তণ্হা, অভিভৰিতব্বং দুক্খং, এৰং অভিভৰনীযো, অভিভৰনীযা, অভিভৰনীযং, পুরিস কঞ্ঞা চিত্তসদ্দনযেন নেতব্বং, এৰং সব্বত্থ.

এত্থ হি –

তব্বাদীহেৰ কম্মস্স, ৰুত্তত্তাৰ পুনত্তনা;

ৰত্তব্বস্স অভাৰা ন, দুতিযা পঠমা ততো.

আস উপৰেসনে, আসীযিত্থ, আসীযতে, আসীযিস্সতেতি আসিতব্বং তযা, আসনীযং. কম্মে উপাসিতব্বো গরু, উপাসনীযো.

সী সযে, অসীযিত্থ, সীযতে, সীযিস্সতেতি সযিতব্বং ভৰতা, সযনীযং, ‘‘এ অযা’’তি অযাদেসো, অতিসযিতব্বো পরো, অতিসযনীযো.

পদ গতিম্হি, উপ্পজ্জিত্থ, উপ্পজ্জতে, উপ্পজ্জিস্সতেতি উপ্পজ্জিতব্বং তেন, উপ্পজ্জনীযং, এত্থ চ ‘‘কত্তরী’’তি অধিকারং ৰিনা ‘‘দিৰাদিতো যো’’তি ৰিনাধিকারযোগৰিভাগেন যপ্পচ্চযো, ‘‘তস্স চৰগ্গযকার’’ইচ্চাদিনা চৰগ্গো, ‘‘পরদ্ৰেভাৰো ঠানে’’তি দ্ৰিভাৰো, পটিপজ্জিতব্বো মগ্গো, পটিপজ্জনীযো.

বুধ অৰগমনে, অবুজ্ঝিত্থ, বুজ্ঝতে, বুজ্ঝিস্সতেতি বুজ্ঝিতব্বো ধম্মো, বুজ্ঝনীযো.

সু সৰণে, অসূযিত্থ, সূযতে, সূযিস্সতেতি সোতব্বো ধম্মো, ইধ যথাগমগ্গহণেন ইকারাগমাভাৰো, সুণিতব্বো, ‘‘স্ৰাদিতো ণু ণা উণা চা’’তি ৰিনাধিকারযোগৰিভাগেন ণাপচ্চযো, সৰণীযো.

কর করণে, করীযিত্থ, করীযতি, করীযিস্সতীতি অত্থে তব্বা’নীযা.

‘‘অন্তস্স, করস্স, চ, তত্ত’’ন্তি চ ৰত্ততে.

৫৪৯. তুং তু ন তব্বেসু ৰা.

করইচ্চেতস্স ধাতুস্স অন্তভূতস্স রকারস্স তকারত্তং হোতি ৰা তুং তু ন তব্বইচ্চেতেসু পচ্চযেসু পরেসু. কত্তব্বো ভৰতা ধম্মো, কত্তব্বা পূজা, কত্তব্বং কুসলং, তত্তাভাৰে ‘‘করোতিস্সা’’তি ৰত্তমানে ‘‘তৰেতুনাদীসু কা’’তি এত্থ আদিসদ্দেন তব্বেপি কাদেসো, কাতব্বং হিতং.

৫৫০. রহাদিতো ণ.

রকার হহারাদ্যন্তেহি ধাতূহি পরস্স অনানীযাদিনকারস্স ণকারো হোতি. আদিসদ্দেন রমু অপঞাতাদিতোপি.

রহাদিতো পরস্সেত্থ, নকারস্স অসম্ভৰা;

অনানীযাদিনস্সেৰ, সামথ্যাযং ণকারতা.

করণীযো ধম্মো, করণারহোতি অত্থো, করণীযা, করণীযং.

ভর ভরণে, ভরীযতীতি ভরিতব্বো, ভরণীযো.

গহ উপাদানে, অগয্হিত্থ, গয্হতি, গয্হিস্সতীতি গহেতব্বো, ‘‘তেসু ৰুদ্ধী’’তিআদিনা ইকারস্সেকারো, সঙ্গণ্হিতব্বো, ‘‘গহাদিতো প্পণ্হা’’তি ৰিনাধিকারযোগৰিভাগেন ণ্হাপচ্চযো, হলোপসরলোপাদি, সঙ্গণ্হণীযো, গহণীযো.

আদিগ্গহণেন রমু কীল়াযং, রমীযিত্থ, রমীযতি, রমীযিস্সতীতি রমিতব্বো, রমণীযো ৰিহারো.

অপ পাপুণনে, উণাপচ্চযো, পাপীযতীতি পাপুণিতব্বো, ‘‘গুপাদীনঞ্চা’’তি ধাত্ৰন্তস্স লোপো, দ্ৰিত্তঞ্চ, পত্তব্বো, পত্তেয্যো, পাপুণণীযো, পাপণীযো.

‘‘অন্তস্স, ৰা’’তি চ ৰত্ততে.

৫৫১. গম খন হনাদীনং তুংতব্বাদীসু ন.

গম খন হনইচ্চেৰমাদীনং মকার নকারন্তানং ধাতূনমন্তস্স নকারো হোতি ৰা তুং তব্ব তৰে তুন ত্ৰানত্ৰাইচ্চেৰমাদীসু তকারাদিপ্পচ্চযেসু পরেসু. অগচ্ছীযিত্থ, গচ্ছীযতি, গচ্ছীযিস্সতীতি গন্তব্বো মগ্গো, গমিতব্বং, গমনীযং.

খনু অৰদারণে, অখঞ্ঞিত্থ, খঞ্ঞতি, খঞ্ঞিস্সতীতি খন্তব্বং আৰাটং, খনিতব্বং, ‘‘ক্ৰচি ধাতূ’’তিআদিনা খনন্তস্স ণত্তঞ্চ, খণিতব্বং, খণণীযং, খননীযং ৰা.

হন হিংসা গতীসু, অহঞ্ঞিত্থ, হঞ্ঞতে, হঞ্ঞিস্সতেতি হন্তব্বং, হনিতব্বং, হননীযং.

মন ঞাণে, অমঞ্ঞিত্থ, মঞ্ঞতে, মঞ্ঞিস্সতেতি মন্তব্বো, মনিতব্বো, যপ্পচ্চযে চৰগ্গাদি, মঞ্ঞিতব্বং, মঞ্ঞনীযং.

পূজ পূজাযং, অপূজীযিত্থ, পূজীযতি, পূজীযিস্সতীতি অত্থে তব্বানীযা. ‘‘চুরাদিতো ণে ণযা’’তি অকত্তরিপি ণেণযা, ইকারাগমানীযেসু ‘‘সরলোপো’’তিআদিনা কারিতসরস্স লোপো, পূজেতব্বো, পূজযিতব্বো, পূজনীযো ভগৰা.

‘‘তব্বানীযা’’তি যোগৰিভাগেন কত্তুকরণেসুপি, যা পাপুণনে, নিয্যাতীতি নিয্যানীকো মগ্গো. গচ্ছন্তীতি গমনীযা ভোগা. নহ সোচে, নহাযতি এতেনাতি নহানীযং চুণ্ণং.

‘‘ভাৰকম্মেসূ’’তি অধিকারো.

৫৫২. ণ্যো চ.

ভাৰকম্মেসু সব্বধাতূহি ণ্যপ্পচ্চযো হোতি, চগ্গহণেন ‘‘ঞাতেয্য’’ন্তিআদীসু তেয্যপ্পচ্চযো চ.

৫৫৩. কারিতং ৰিয ণানুবন্ধো.

অনুবন্ধো অপ্পযোগী, ণকারানুবন্ধো পচ্চযো কারিতং ৰিয দট্ঠব্বোতি কারিতব্যপদেসো, ‘‘কারিতানং ণো লোপ’’ন্তি ণলোপো, ‘‘অসংযোগন্তস্স ৰুদ্ধি কারিতে’’তি ৰুদ্ধি, ইকারাগমো, কত্তব্বং কারিযং.

হর হরণে, অহরীযিত্থ, হরীযতি, হরীযিস্সতীতি ৰা হরিতব্বং হারিযং.

ভর ভরণে, ভরিতব্বং ভারিযং.

লভ লাভে, লভিতব্বং লব্ভং, ‘‘যৰতং তলন’’ইচ্চাদিসুত্তে কারগ্গহণেন যৰতো ভকারস্স ভকারো, দ্ৰিত্তং.

সাস অনুসিট্ঠিম্হি, সাসিতব্বো সিস্সো, ‘‘ক্ৰচি ধাতূ’’তিআদিনা আকারস্সিকারো.

ৰচ ৰিযত্তিযং ৰাচাযং, ণ্যপ্পচ্চযাদিম্হি কতে ‘‘অন্তানং, ণানুবন্ধে’’তি চ ৰত্ততে.

৫৫৪. কগা চজানং.

চজইচ্চেতেসং ধাত্ৰন্তানং ককার গকারাদেসা হোন্তি ণকারানুবন্ধে পচ্চযে পরেতি চস্স কাদেসো. ৰচনীযং ৰাক্যং.

ভজ সেৰাযং, ভজনীযং ভাগ্যং, জস্স গাদেসো.

চি চযে, অচীযিত্থ, চীযতি, চীযিস্সতীতি চেতব্বং চেয্যং, ইকারস্সেকারো ৰুদ্ধি, যকারস্স দ্ৰিত্তং, ৰিনিপুব্বো ‘‘দো ধস্স চা’’তি সুত্তে চগ্গহণেন চকারস্স ছকারো, ৰিনিচ্ছেয্যং, ৰিনিচ্ছিতব্বং, ৰিনিচ্ছনীযং. ‘‘কিযাদিতো না’’তি ৰিনাধিকারযোগৰিভাগেন তব্বানীয তুং তুনা দীসু চ নাপচ্চযো, ৰিনিচ্ছিনিতব্বং, ৰিনিচ্ছিননীযং.

নী পাপুণনে, অনীযিত্থ, নীযতি, নীযিস্সতীতি নেয্যো, নেয্যা, নেয্যং. নেতব্বং.

ণ্যগ্গহণং ছট্ঠীযন্তৰসেনানুৰত্ততে, মণ্ডূকগতিযা অন্তগ্গহণঞ্চ ততিযন্তৰসেন.

৫৫৫. ভূতোব্ব.

ভূ ইচ্চেতস্মা পরস্স ণ্যপ্পচ্চযস্স সহ ধাত্ৰন্তেন অব্বাদেসো হোতি. ভৰিতব্বো ভব্বো, ভব্বা, ভব্বং.

‘‘ণ্যস্স, অন্তেনা’’তি চ ৰত্ততে.

৫৫৬. ৰদ মদ গমু যুজ গরহাকারাদীহি জ্জম্মগ্গয্হেয্যাগারো ৰা.

ৰদ মদ গমু যুজ গরহইচ্চেৰমাদীহি ধাতূহি, আকারন্তেহি চ পরস্স ণ্যপ্পচ্চযস্স ধাত্ৰন্তেন সহ যথাক্কমং জ্জ ম্ম গ্গ য্হ এ য্যইচ্চেতে আদেসা হোন্তি ৰা, গরস্স চ গারাদেসো, গরহস্স গরস্সেৰাযং গারো. ৰৰত্থিতৰিভাসত্থোযং ৰাসদ্দো.

ৰদ ৰিযত্তিযং ৰাচাযং, অৰজ্জিত্থ, ৰজ্জতি, ৰজ্জিস্সতীতি ৰা ৰজ্জং ৰদনীযং, রস্সত্তং. ৰজ্জং দোসো.

মদ উম্মাদে, অমজ্জিত্থ, মজ্জতে, মজ্জিস্সতি এতেনাতি মজ্জং মদনীযং. মদগ্গহণেন করণেপি ণ্যপ্পচ্চযো. গমু সপ্প গতিম্হি, গন্তব্বং গম্মং.

যুজ যোগে, অযুজ্জিত্থ, যুজ্জতে, যুজ্জিস্সতীতি যোগ্গং, নিযোজ্জো ৰা.

গরহ নিন্দাযং, অগরয্হিত্থ, গরহীযতি, গরহীযিস্সতীতি অত্থে ণ্যপ্পচ্চযো, তস্সিমিনা ধাত্ৰন্তেন সহ য্হাদেসো, গরস্স গারাদেসো চ, গারয্হো, গারয্হা, গারয্হং, গরহণীযং.

আদিসদ্দেন অঞ্ঞেপি দমজহন্তা গয্হন্তে. গদ ৰিযত্তিযং ৰাচাযং, গজ্জতে, গদনীযং ৰা গজ্জং. পদ গতিম্হি, পজ্জনীযং পজ্জং গাথা. খাদ ভক্খণে, খজ্জতেতি খজ্জং খাদনীযং. দমু দমনে, অদম্মিত্থ, দম্মতে, দমীযিস্সতীতি দম্মো দমনীযো. ভুজ পালনব্যৰহরণেসু, অভুজ্জিত্থ, ভুজ্জতি, ভুজ্জিস্সতীতি ভোগ্গং, ভোজ্জং ৰা, কারগ্গহণেন যস্স জকারো. গহেতব্বং গয্হমিচ্চাদি.

আকারন্ততো পন দা দানে, অদীযিত্থ, দীযতি, দীযিস্সতীতি অত্থে ণ্যপ্পচ্চযো, তস্সিমিনা ধাত্ৰন্তেন আকারেন সহ এয্যাদেসো, দেয্যং, দাতব্বং. অনীযে ‘‘সরলোপো’’তিআদিনা পুব্বসরস্স লোপে সম্পত্তে তত্থেৰ তুগ্গহণেন নিসেধেত্ৰা ‘‘সরা সরে লোপ’’ন্তি আকারে লুত্তে পরসরস্স দীঘো, দানীযং.

পা পানে, অপীযিত্থ, পীযতি, পীযিস্সতীতি পেয্যং, পাতব্বং, পানীযং. হা চাগে, অহীযিত্থ, হীযতি, হীযিস্সতীতি হেয্যং, হাতব্বং, হানীযং. মা মানে, অমীযিত্থ, মীযতি, মীযিস্সতীতি মেয্যং, মাতব্বং, মিনিতব্বং, মেতব্বং ৰা. ঞা অৰবোধনে, অঞ্ঞাযিত্থ, ঞাযতি, ঞাযিস্সতীতি ঞেয্যং, ঞাতব্বং, ঞাতেয্যং. ‘‘ঞাস্স জা জং না’’তি জাদেসে ‘‘কিযাদিতো না’’তি ৰিনাধিকারযোগৰিভাগেন নাপচ্চযো, ইকারাগমো চ, জানিতব্বং, ৰিজাননীযং. খ্যাপকথনে, সঙ্খ্যাতব্বং, সঙ্খ্যেয্যং ইচ্চাদি.

৫৫৭. করম্হা রিচ্চ.

করধাতুতো রিচ্চপ্পচ্চযো হোতি ভাৰকম্মেসু.

৫৫৮. রম্হি রন্তো রাদি নো.

রকারানুবন্ধে পচ্চযে পরে সব্বো ধাত্ৰন্তো রাদি পচ্চযরকারমরিযাদো নো হোতি, লোপমাপজ্জতেতি অত্থো. রন্তোতি এত্থ রকারো সন্ধিজো, কত্তব্বং কিচ্চং. ‘‘রিচ্চা’’তি যোগৰিভাগেন ভরাদিতোপি রিচ্চপ্পচ্চযো, যথা, ভরীযতীতি ভচ্চো, সরলোপো. ই গতিম্হি, পতি এতব্বো পটিচ্চো.

৫৫৯. পেসাতিসগ্গপত্তকালেসু কিচ্চা.

পেস অতিসগ্গ পত্তকালইচ্চেতেস্ৰত্থেসু কিচ্চপ্পচ্চযা হোন্তি. পেসনং নাম ‘‘কত্তব্বমিদং ভৰতা’’তি আণাপনং, অজ্ঝেসনঞ্চ. অতিসগ্গোনাম ‘‘কিমিদং মযা কত্তব্ব’’ন্তি পুট্ঠস্স ৰা ‘‘পাণো ন হন্তব্বো’’তিআদিনা পটিপত্তিদস্সনমুখেন ৰা কত্তব্বস্স অনুঞ্ঞা. পত্তকালো নাম সম্পত্তসমযো যো অত্তনো কিচ্চকরণসমযমনুপপরিক্খিত্ৰা ন করোতি, তস্স সমযারোচনং, ন তত্থ অজ্ঝেসনমত্থীতি. তে চ ‘‘ভাৰকম্মেসু কিচ্চত্তক্খত্থা’’তি ৰুত্তত্তা ভাৰকম্মেস্ৰেৰ ভৰন্তি.

পেসনে তাৰ – করীযতু ভৰতা কম্মন্তি অত্থে ইমিনা তব্বানীযা, সেসং ৰুত্তনযমেৰ, কত্তব্বং কম্মং ভৰতা, করণীযং কিচ্চং ভৰতা.

অতিসগ্গে ভুজ্জতু ভৰতাতি অত্থে তব্বাদি, ‘‘অঞ্ঞেসু চা’’তি ৰুদ্ধি.

‘‘তস্সা’’তি ৰত্ততে.

৫৬০. ভুজাদীনমন্তো নো দ্ৰি চ.

ভুজইচ্চেৰমাদীনং জকারাদিঅন্তানং ধাতূনমন্তো নো হোতি, পরস্স কিচ্চকিতকপ্পচ্চযতকারস্স চ দ্ৰেভাৰো হোতি. ভোত্তব্বং ভোজনং ভৰতা, ভোজনীযং ভোজ্জং ভৰতা.

ইকারাগমযুত্ততকারে পন – ‘‘নমকরানমন্তানং নিযুত্ততম্হী’’তি এত্থ ‘‘অন্তানং নিযুত্ততম্হী’’তি যোগৰিভাগেন ধাত্ৰন্তলোপাদিনিসেধো, ‘‘রুধাদিতো নিগ্গহীতপুব্ব’’ন্তি ৰিনাধিকারযোগৰিভাগেন, ‘‘নিগ্গহীতঞ্চা’’তি ৰা নিগ্গহীতাগমো, ভুঞ্জিতব্বং তযা, যুঞ্জিতব্বং.

সমযারোচনে পন – ই অজ্ঝযনে অধিপুব্বো, অধীযতং ভৰতাতি অত্থে তব্বানীযাদি, ইকারাগমৰুদ্ধিঅযাদেসঅজ্ঝাদেসা চ, ণ্যপ্পচ্চযে তু ৰুদ্ধি, যকারস্স দ্ৰিত্তঞ্চ, অজ্ঝযিতব্বং, অজ্ঝেয্যং ভৰতা, অজ্ঝযনীযং ভৰতা, অৰস্সং কত্তব্বন্তি ৰাক্যে পন ‘‘কিচ্চা’’তি অধিকিচ্চ ‘‘অৰস্সকাধমিণেসু ণী চা’’তি অৰস্সকাধমিণত্থে চ তব্বাদযো, কত্তব্বং মে ভৰতা গেহং, করণীযং, কারিযং. এৰং দাতব্বং মে ভৰতা সতং, দানীযং, দেয্যং.

ধর ধারণে, চুরাদিত্তা ণেণযা, ৰুদ্ধি, ইকারাগমো চ, ধারেতব্বং, ধারযিতব্বং ইচ্চাদি.

‘‘নুদাদীহি যুণ্ৰূনমনাননাকাননকা সকারিতেহি চা’’তি সকারিতেহিপি যুণ্ৰূনমাদেসৰিধানতোযেৰ ধাতুপ্পচ্চযন্ততোপি কিচ্চকিতকপ্পচ্চযা ভৰন্তীতি দট্ঠব্বো. তেন তিতিক্খাপীযতীতি তিতিক্খাপেতব্বো. এৰং তিকিচ্ছাপেতব্বো তিকিচ্ছাপনীযো. অভাৰীযিত্থ, ভাৰীযতি, ভাৰীযিস্সতীতি ভাৰেতব্বো মগ্গো. ভাৰযিতব্বো, ভাৰনীযো, ভাৰনীযং, ভাৰনীযা, অকারীযিত্থ, কারীযতি, কারীযিস্সতীতি কারেতব্বং, কারযিতব্বং, কারাপেতব্বং, কারাপযিতব্বং, কারাপনীযমিচ্চাদি চ সিদ্ধং ভৰতি.

কত্তব্বং করণীযঞ্চ, কারিযং কিচ্চমিচ্চপি;

কারেতব্বং তথা কারা-পেতব্বং কিচ্চসঙ্গহো.

কিচ্চপ্পচ্চযন্তনযো.

তেকালিক

কিতকপ্পচ্চযন্তনয

ইদানি কিতকপ্পচ্চযা ৰুচ্চন্তে.

কর করণে, পুরে ৰিয ধাতুসঞ্ঞাদি.

কুম্ভইচ্চুপপদং, ততো দুতিযা.

‘‘কুম্ভং করোতি, অকাসি, করিস্সতী’’তি ৰা ৰিগ্গহে –

‘‘পরা, পচ্চযা’’তি চ ৰত্ততে.

৫৬১. ধাতুযা কম্মাদিম্হি ণো.

কম্মস্মিং আদিম্হি সতি ধাতুযা পরো ণপ্পচ্চযো হোতি.

সো চ –

৫৬২. অঞ্ঞে কিত.

ততিযে ধাত্ৰাধিকারে ৰিহিতা কিচ্চেহি অঞ্ঞে পচ্চযা কিতিচ্চেৰ সঞ্ঞা হোন্তীতি কিতসঞ্ঞা কতা.

৫৬৩. কত্তরি কিত.

কত্তরি কারকে কিতপচ্চযো হোতীতি নিযমতো কত্তরি ভৰতি, সো চ ‘‘ণাদযো তেকালিকা’’তি ৰুত্তত্তা কালত্তযে চ হোতি. পুরে ৰিয কারিতব্যপদেসণলোপৰুদ্ধিযো, পচ্চযন্তস্সালিঙ্গত্তা স্যাদিম্হি অসম্পত্তে ‘‘তদ্ধিতসমাসকিতকা নামংৰাতৰেতুনাদীসু চা’’তি কিতকন্তত্তা নামংৰ কতে স্যাদ্যুপ্পত্তি, ততো কুম্ভং করোতীতি অত্থে ‘‘অমাদযো পরপদেভী’’তি দুতিযাতপ্পুরিসসমাসো, ‘‘নামান’’ন্তিআদিনা সমাসসঞ্ঞা, ‘‘তেসং ৰিভত্তিযো লোপা চা’’তি ৰিভত্তিলোপো, ‘‘পকতি চস্স সরন্তস্সা’’তি পকতিভাৰো, পুন সমাসত্তা নামমিৰ কতে স্যাদ্যুপ্পত্তি.

সো কুম্ভকারো, তে কুম্ভকারা ইচ্চাদি. ইত্থিযং কুম্ভকারী, কুম্ভকারিযো ইচ্চাদি, তথা কম্মং করোতীতি কম্মকারো. এৰং মালাকারো, কট্ঠকারো, রথকারো, সুৰণ্ণকারো, সুত্তকারো, ৰুত্তিকারো, টীকাকারো.

গহ উপাদানে, পত্তং অগণ্হি, গণ্হাতি, গণ্হিস্সতীতি ৰা পত্তগ্গাহো. এৰং রস্মিগ্গাহো, রজ্জুগ্গাহো.

ৰে তন্তসন্তানে, তন্তং অৰাযি, ৰাযতি, ৰাযিস্সতীতি ৰা তন্তৰাযো, ‘‘তে আৰাযা কারিতে’’তি আযাদেসো, ৰাক্যে পনেত্থ ‘‘তে আৰাযা’’তি যোগৰিভাগেন আযাদেসো. এৰং তুন্নৰাযো.

মা পরিমাণে, ধঞ্ঞং অমিনি, মিনাতি, মিনিস্সতীতি ৰা অত্থে ণপ্পচ্চযে কতে –

‘‘ণম্হী’’তি ৰত্ততে.

৫৬৪. আকারন্তানমাযো.

আকারন্তানং ধাতূনং অন্তস্স আযাদেসো হোতি ণকারানুবন্ধে পচ্চযে পরে, সরলোপাদি. ধঞ্ঞমাযো. এৰং দানং দদাতীতি দানদাযো.

কমু কন্তিম্হি, ধম্মং অকামযি, কামযতি, কামযিস্সতীতি ৰা ধম্মকামো পুরিসো, ধম্মকামা কঞ্ঞা, ধম্মকামং চিত্তং. এৰং অত্থকামো, হিতকামো, সুখকামো, ধম্মং পালেতীতি ধম্মপালো ইচ্চাদি.

দমু দমনে, ‘‘অরিং অদমি, দমেতি, দমিস্সতী’’তি ৰিগ্গহে ‘‘ধাতুযা’’তি অধিকারো, ‘‘কম্মাদিম্হী’’তি চ ৰত্ততে.

৫৬৫. সঞ্ঞাযমনু.

কম্মূপপদে আদিম্হি সতি সঞ্ঞাযং গম্যমানাযং ধাতুযা অপ্পচ্চযো হোতি, উপপদন্তে নুকারাগমো চ. এত্থ চ ‘‘নু নিগ্গহীতং পদন্তে’’তি সুত্তে ‘‘পদন্তে’’তি ৰচনতো উপপদন্তেযেৰ নুকারাগমো হোতীতি দট্ঠব্বং. ‘‘তেসু ৰুদ্ধী’’তিআদিনা উকারলোপো. অযং পন ন্ৰাগমো সমাসং কত্ৰা উপপদৰিভত্তিলোপে কতেযেৰ হোতীতি ৰেদিতব্বং.

৫৬৬. নু নিগ্গহীতং পদন্তে.

উপপদভূতনামপদন্তে ৰত্তমানো নুকারাগমো নিগ্গহীতমাপজ্জতে, নিগ্গহীতস্স ৰগ্গন্তত্তং, সেসং সমং, ৰুদ্ধাভাৰোৰ ৰিসেসো, অরিন্দমো রাজা.

তথা তর তরণে, ৰেস্সং তরতীতি ৰেস্সন্তরো, তণ্হং করোতি হিংসতীতি তণ্হঙ্করো ভগৰা. এৰং মেধঙ্করো, সরণঙ্করো, দীপঙ্করো.

‘‘আদিম্হি, অ’’ইতি চ ৰত্ততে.

৫৬৭. পুরে দদা চ ইং.

পুরসদ্দে আদিম্হি সতি ‘‘দদ দানে’’ইচ্চেতায ধাতুযা অপ্পচ্চযো হোতি, পুরসদ্দে অকারস্স ইঞ্চ হোতি. এত্থ চ ‘‘তদনুপরোধেনা’’তি পরিভাসতো পুরসদ্দন্তস্সেৰ ইং হোতীতি দট্ঠব্বং. ণাদীনং তেকালিকত্তেপি উপপদত্থৰিসেসেন অতীতেযেৰাযমপ্পচ্চযো হোতীতি দট্ঠব্বং. পুরে দানং অদদীতি পুরিন্দদো সক্কো. ইধাপি ৰিভত্তিলোপে কতেযেৰ ইংআদেসো.

‘‘কম্মাদিম্হি, অ’’ইতি চ ৰত্ততে.

৫৬৮. সব্বতো ণ্ৰু ত্ৰাৰী ৰা.

সব্বতো ধাতুতো কম্মাদিম্হি ৰা অকম্মাদিম্হি ৰা সতি অ ণ্ৰু তু আৰী ইচ্চেতে চত্তারো পচ্চযা হোন্তি. ৰাগ্গহণং ‘‘অকম্মাদিম্হি ৰা’’তি ৰিকপ্পনত্থং.

অপ্পচ্চযে তাৰ – ধর ধারণে, ধম্মং অধরি, ধরতি, ধরিস্সতীতি ৰা ধম্মধরো. এৰং ৰিনযধরো. তথা তং করোতীতি তক্করো, দ্ৰিত্তং. এৰং হিতকরো, দিৰসকরো, দিনকরো, দিৰাকরো, নিসাকরো, ধনুং গণ্হাতীতি ধনুগ্গহো. এৰং কটগ্গহো, সব্বকামং দদাতীতি সব্বকামদদো, সব্বদদো.

আতো পন – অন্নং অদাসি, দদাতি, দদিস্সতীতি অন্নদো. এৰং ধনদো, সচ্চং সন্দহতীতি সচ্চসন্ধো. পা পানে, মজ্জং পিৰতীতি মজ্জপো. তা পালনে, গৰং সদ্দং তাযতীতি গোত্তং. এৰং কত্তরি.

অকম্মাদিম্হি পন ‘‘যস্মা দপেতী’’তি সুত্তে ভযগ্গহণেন সেসসাধনেপি অপ্পচ্চযো.

নী পাপুণনে ৰিপুব্বো, ৰিনেসি, ৰিনেতি, ৰিনেস্সতি এতেন, এত্থাতি ৰা ৰিনযো, ‘‘অঞ্ঞেসু চা’’তি ৰুদ্ধি, অযাদেসো চ, নযনং নযো. সি সেৰাযং নিপুব্বো, নিস্সীযিত্থ, নিস্সীযতি, নিস্সীযিস্সতীতি ৰা নিস্সযো. সি সযে, অনুসযি, অনুসেতি, অনুসেস্সতীতি ৰা অনুসযো.

ই গতিম্হি পতিপুব্বো, পটিচ্চ একস্মা ফলমেতীতি পচ্চযো, সমুদযো. চি চযে, ৰিনিচ্ছীযতে অনেন, ৰিনিচ্ছযনং ৰা ৰিনিচ্ছযো, উচ্চযনং উচ্চযো, সঞ্চযো, ধম্মং ৰিচিনাতীতি ধম্মৰিচযো. খী খযে, খযনং খযো. জি জযে, ৰিজযনং ৰিজযো, জযো. কী দব্বৰিনিমযে, ৰিক্কযনং ৰিক্কযো, কযো. লী সিলেসনে, অল্লীযতি এত্থাতি আলযো, লযো. এৰং ইৰণ্ণন্ততো.

আসুণন্তীতি অস্সৰা, অৰাদেসো, পটিস্সৰনং পটিস্সৰো. সু গতিম্হি, আভৰগ্গা সৰন্তীতি আসৰা. রু সদ্দে, রৰতীতি রৰো. ভৰতীতি ভৰো. পভৰতি এতস্মাতি পভৰো. লূ ছেদনে, লৰনং লৰো. এৰং উৰণ্ণন্ততো.

নিগ্গণ্হাতি, নিগ্গহণং ৰা নিগ্গহো, পগ্গহো, সঙ্গণ্হাতি তেন, সঙ্গহণং ৰা সঙ্গহো. ৰর ৰরণে, সংৰরণং সংৰরো. দর আদরে, আদরণং আদরো. আগচ্ছতি, আগমনন্তি ৰা আগমো, আগমীযন্তি এত্থ, এতেন ৰা অত্থাতি আগমো পরিযত্তি. সপ্পতীতি সপ্পো. দিব্বতীতি দেৰো. কমু পদৰিক্খেপে, পক্কমনং, পক্কমতীতি ৰা পক্কমো. এৰং ৰিক্কমো.

চর চরণে, ৰনে চরতীতি ৰনচরো, কামো অৰচরতি এত্থাতি কামাৰচরো লোকো, কামাৰচরা সঞ্ঞা, কামাৰচরং চিত্তং. গাৰো চরন্তি এত্থাতি গোচরো, ছট্ঠীতপ্পুরিসো.

পাদেন পিৰতীতি পাদপো. এৰং কচ্ছপো, ততিযাতপ্পুরিসো.

রুহ জননে, সিরস্মিং রুহতীতি সিরোরুহো, গুহাযং সযতীতি গুহাসযং চিত্তং. এৰং কুচ্ছিসযা ৰাতা. ঠা গতিনিৰত্তিম্হি, পব্বতে অট্ঠাসি, তিট্ঠতি, ঠস্সতীতি ৰা পব্বতট্ঠো পুরিসো, পব্বতট্ঠা নদী, পব্বতট্ঠং ওসধং. এৰং থলট্ঠং, জলট্ঠং, সত্তমীতপ্পুরিসো.

৫৬৯. গহস্সুপধস্সে ৰা.

গহইচ্চেতস্স ধাতুস্স উপধস্স এত্তং হোতি ৰা, উপধাতি অন্তক্খরতো পুব্বক্খরস্স পরসমঞ্ঞা, গয্হতীতি গেহং, গহং ৰা.

ণ্ৰুপ্পচ্চযে রথং করোতীতি অত্থে ণ্ৰুপ্পচ্চযো, সো চ ‘‘অঞ্ঞে কিত’’তি কিতসঞ্ঞত্তা ‘‘কত্তরি কিত’’তি কত্তরিযেৰ ভৰতি, ততো কারিতব্যপদেস ণলোপৰুদ্ধিযো.

৫৭০. অনকা যুণ্ৰূনং.

যুণ্ৰুইচ্চেতেসং পচ্চযানং অন অকইচ্চেতে আদেসা হোন্তীতি অকাদেসো. সেসং কুম্ভকারসদ্দসমং, রথকারকো. তথা অন্নং দদাতীতি অন্নদাযকো, ‘‘আকারন্তানমাযো’’তি আযাদেসো, ‘‘ইত্থিযমতো আপচ্চযো’’তি আপচ্চযো, ‘‘তেসু ৰুদ্ধী’’তিআদিনা অকারস্স ইকারো, অন্নদাযিকা কঞ্ঞা, অন্নদাযকং কুলং. লোকং নেতীতি লোকনাযকো, ৰিনেতি সত্তেতি ৰিনাযকো, ‘‘তে আৰাযা কারিতে’’তি আযাদেসো.

অকম্মূপপদে করোতীতি কারকো, কারিকা, কারকং. দদাতীতি দাযকো, দাযিকা, দাযকং. নেতীতি নাযকো, নাযিকা, নাযকং. ভগৰতো ওৰাদানুসাসনিং অসুণি, সুণাতি, সুণিস্সতীতি ৰা সাৰকো, সাৰিকা, আৰাদেসো. লুনাতীতি লাৰকো. পু পৰনে, পুনাতীতি পাৰকো, ভৰতীতি ভাৰকো, উপাসতীতি উপাসকো, উপাসিকা. গণ্হাতীতি গাহকো.

পচতীতি পাচকো. অযজি, যজতি, যজিস্সতীতি ৰা যাজকো. এত্থ হি ‘‘কগা চজান’’ন্তি চজানং কগত্তে সম্পত্তে –

৫৭১. ন কগত্তং চজা ণ্ৰুম্হি.

ধাত্ৰন্তভূতা চকারজকারা ককার গকারত্তং নাপজ্জন্তে ণ্ৰুপ্পচ্চযে পরেতি পটিসিদ্ধত্তা ন ভৰতি.