৩. কারককণ্ড
অথ ৰিভত্তীনমত্থভেদা ৰুচ্চন্তে.
তত্থ একম্পি অত্থং কম্মাদিৰসেন, একত্তাদিৰসেন চ ৰিভজন্তীতি ৰিভত্তিযো, স্যাদযো. তা পন পঠমাদিভেদেন সত্তৰিধা.
তত্থ কস্মিং অত্থে পঠমা?
২৮৩. লিঙ্গত্থে পঠমা.
লিঙ্গত্থাভিধানমত্তে পঠমাৰিভত্তি হোতি.
লিঙ্গস্স অত্থো লিঙ্গত্থো. এত্থ চ লীনং অঙ্গন্তি লিঙ্গং, অপাকটো অৰযৰো, পুরিসোতিআদীনঞ্হি পকতিপ্পচ্চযাদিৰিভাগকপ্পনায নিপ্ফাদিতানং সদ্দপ্পতিরূপকানং নামিকপদানং পঠমং ঠপেতব্বং পকতিরূপং অপাকটত্তা, অৰযৰত্তা চ লিঙ্গন্তি ৰুচ্চতি. অথ ৰা ৰিসদাৰিসদোভযরহিতাকারৰোহারসঙ্খাতেন তিৰিধলিঙ্গেন সহিতত্থস্স, তব্বিনিমুত্তস্সুপসগ্গাদীনমত্থস্স চ লীনস্স গমনতো, লিঙ্গনতো ৰা লিঙ্গন্তি অন্ৰত্থনামৰসেন ৰা ‘‘ধাতুপ্পচ্চযৰিভত্তিৰজ্জিতমত্থৰং লিঙ্গ’’ন্তি ৰচনতো পরসমঞ্ঞাৰসেন ৰা লিঙ্গন্তি ইধ পাটিপদিকাপরনামধেয্যং স্যাদিৰিভত্যন্তপদপকতিরূপমেৰ ৰুচ্চতীতি দট্ঠব্বং.
লিঙ্গস্সত্থো নাম পবন্ধৰিসেসাকারেন পৰত্তমানে রূপাদযো উপাদায পঞ্ঞাপীযমানো তদঞ্ঞানঞ্ঞভাৰেন অনিব্বচনীযো সমূহসন্তানাদিভেদো উপাদাপঞ্ঞত্তিসঙ্খাতো ঘটপটাদিৰোহারত্থো চ পথৰীধাতুফস্সাদীনং সভাৰধম্মানং কালদেসাদিভেদভিন্নানং ৰিজাতিযৰিনিৰত্তো সজাতিযসাধারণো যথাসঙ্কেতমারোপসিদ্ধো তজ্জাপঞ্ঞত্তিসঙ্খাতো কক্খল়ত্তফুসনাদিসামঞ্ঞাকারো চ.
সো পন কম্মাদিসংসট্ঠো, সুদ্ধো চাতি দুৰিধো. তত্থ কম্মাদীসু দুতিযাদীনং ৰিধীযমানত্তা কম্মাদিসংসগ্গরহিতো লিঙ্গসঙ্খ্যাপরিমাণযুত্তো, তব্বিনিমুত্তুপসগ্গাদিপদত্থভূতো চ সুদ্ধো সদ্দত্থো ইধ লিঙ্গত্থো নাম.
যো পন আখ্যাতকিতকতদ্ধিতসমাসেহি ৰুত্তো কম্মাদিসংসট্ঠো অত্থো, সোপি দুতিযাদীনং পুন অত্তনা ৰত্তব্বস্স অত্থৰিসেসস্সাভাৰেন অৰিসযত্তা, লিঙ্গত্থমত্তস্স সম্ভৰতো চ পঠমাযেৰ ৰিসযো.
হোতি চেত্থ –
পঠমাৰুপসগ্গত্থে, কেসঞ্চত্থে নিপাতসদ্দানং;
লিঙ্গাদিকে চ সুদ্ধে-ভিহিতে কম্মাদিঅত্থেপি.
সলিঙ্গে তাৰ – এসো পুরিসো, এতে পুরিসা, এসা কঞ্ঞা, এতা কঞ্ঞাযো, এতং চিত্তং, এতানি চিত্তানি.
সসঙ্খ্যে – একো দ্ৰে.
সপরিমাণে – দোণো খারী আল়্হকং.
লিঙ্গাদিৰিনিমুত্তে সত্তামত্তে – চ ৰা হ অহং অত্থি সক্কালব্ভা ইচ্চাদি.
‘‘লিঙ্গত্থে পঠমা’’তি অধিকিচ্চ ‘‘আলপনে চা’’তি আলপনত্থে চ পঠমা, অভিমুখং কত্ৰা লপনং আলপনং, আমন্তনং অৰ্হানন্তি অত্থো.
এত্থ চ আমন্তনং নাম পগেৰ লদ্ধসরূপস্স সদ্দেন অভিমুখীকরণং, কতাভিমুখো পন ‘‘গচ্ছা’’তিআদিনা নযেন ক্রিযায যোজীযতি, তস্মা আমন্তনসমযে ক্রিযাযোগাভাৰতো ইদং কারকৰোহারং ন লভতি.
ৰুত্তঞ্চ
‘‘সদ্দেনাভিমুখীকারো, ৰিজ্জমানস্স ৰত্থুনো;
আমন্তনং ৰিধাতব্বে, নত্থি ‘রাজা ভৰে’তিদ’’ন্তি.
ভো পুরিস এহি, ভো পুরিসা ৰা, ভৰন্তো পুরিসা এথ.
কস্মিং অত্থে দুতিযা?
২৮৪. কম্মত্থে দুতিযা.
কম্মত্থে লিঙ্গম্হা দুতিযাৰিভত্তি হোতি.
অনভিহিতে এৰাযং, ‘‘কম্মনি দুতিযাযং ত্তো’’তি ৰচনঞ্চেত্থ ঞাপকং.
কিং কম্মং?
‘‘যেন ৰা কযিরতে তং করণ’’ন্তি ইতো ‘‘ৰা’’তি ৰত্ততে.
২৮৫. যং করোতি তং কম্মং.
যং ৰা করোতি, যং ৰা ৰিকরোতি, যং ৰা পাপুণাতি, তং কারকং কম্মসঞ্ঞং হোতি.
ইধ লিঙ্গকালৰচনমতন্তং. করীযতীতি কম্মং. তত্থ কারকং, সাধকং ক্রিযানিপ্ফত্তিযা কারণমুচ্চতে, তং পন কারকং ছব্বিধং কম্মং কত্তা করণং সম্পদানমপাদানমোকাসো চাতি. তত্থ সভাৰতো, পরিকপ্পতো ৰা কম্মাদিম্হি সতিযেৰ ক্রিযাভাৰতো কম্মাদীনং ছন্নম্পি কারকৰোহারো সিদ্ধোৰ হোতি.
তং পন কম্মং তিৰিধং নিব্বত্তনীযং ৰিকরণীযং পাপণীযঞ্চাতি. যথা – মাতা পুত্তং ৰিজাযতি, আহারো সুখং জনযতি. ঘটং করোতি দেৰদত্তো, কট্ঠমঙ্গারং করোতি, সুৰণ্ণং কেযূরং, কটকং ৰা করোতি, ৰীহযো লুনাতি. দেৰদত্তো নিৰেসনং পৰিসতি, আদিচ্চং পস্সতি, ধম্মং সুণাতি, পণ্ডিতে পযিরুপাসতি.
ৰুত্তঞ্চ
‘‘নিব্বত্তিৰিকতিপ্পত্তি-ভেদেন তিৰিধং মতং;
কত্তু ক্রিযাভিগম্মং তং, সুখঙ্গারং নিৰেসন’’ন্তি.
এত্থ চ ইচ্ছিতানিচ্ছিতকথিতাকথিতাদিভেদমনপেক্খিত্ৰা সব্বসঙ্গাহকৰসেন ‘‘যং করোতি তং কম্ম’’ন্তি ৰুত্তত্তা, অত্থন্তরৰিকপ্পনৰাধিকারতো চ সব্বত্থ ইমিনাৰ কম্মসঞ্ঞা হোতি.
তত্থ অনিচ্ছিতকম্মং যথা – কণ্টকং মদ্দতি, ৰিসং গিলতি, গামং গচ্ছন্তো রুক্খমূলং উপগচ্ছতি.
অকথিতকম্মং যথা – যঞ্ঞদত্তং কম্বলং যাচতে ব্রাহ্মণো. এত্থ হি ‘‘কম্বল’’মিতি কথিতকম্মং দ্ৰিকম্মিকায যাচনক্রিযায পত্তুমিচ্ছিততরত্তা. ‘‘যঞ্ঞদত্ত’’মিতি অপ্পধানত্তা অকথিতকম্মং. তথা সমিদ্ধং ধনং ভিক্খতে, অজং গামং নযতি, পরাভৰন্তং পুরিসং, মযং পুচ্ছাম গোতমং, ভগৰা ভিক্খূ এতদৰোচ ইচ্চাদি.
অভিহিতকম্মে পন ন হোতি, যথা – কটো করীযতে দেৰদত্তেন, সুগতেন দেসিতো ধম্মো, যঞ্ঞদত্তো কম্বলং যাচীযতে ব্রাহ্মণেন ইচ্চাদি.
‘‘দুতিযা’’তি অধিকারো.
২৮৬. গতি বুদ্ধি ভুজ পঠ হর কর সযাদীনং কারিতে ৰা.
গমু সপ্প গতিম্হি, বুধ বোধনে, বুধ অৰগমনে ৰা, ভুজ পালনব্যৰহরণেসু, পঠ ব্যত্তিযং ৰাচাযং, হর হরণে, কর করণে, সি সযে ইচ্চেৰমাদীনং ধাতূনং পযোগে কারিতে সতি পযোজ্জককত্তুভূতে কম্মনি লিঙ্গম্হা দুতিযাৰিভত্তি হোতি ৰা. নিচ্চসম্পত্তে ৰিকপ্পত্থোযং, তেন তস্স পক্খে ততিযা হোতি.
যো কোচি পুরিসো গামং গচ্ছতি, তমঞ্ঞো পযোজযতি. পুরিসো পুরিসং গামং গমযতি, পুরিসেন ৰা গামং গমযতি. এৰং সিস্সং ধম্মং বোধেতি আচরিযো, মাতা পুত্তং ভোজনং ভোজযতি, সিস্সং ধম্মং পাঠেতি আচরিযো, পুরিসো পুরিসং ভারং হারেতি, তথা পুরিসো পুরিসং কম্মং কারযতি, পুরিসেন ৰা কম্মং কারাপযতি, পুরিসো পুরিসং সযাপযতি. এৰং সব্বত্থ কারিতে কত্তুকম্মনি দুতিযা.
কারিতেতি কিং? পুরিসো গামং গচ্ছতি.
অভিহিতে ন ভৰতি, পুরিসেন পুরিসো গামং গমীযতে, সিস্সো ধম্মং বোধীযতে ইচ্চাদি.
২৮৭. কালদ্ধানমচ্চন্তসংযোগে.
অচ্চন্তং নিরন্তরং সংযোগোঅচ্চন্তসংযোগো. কালদ্ধানং দব্বগুণক্রিযাহি অচ্চন্তসংযোগে তেহি কালদ্ধানৰাচীহি লিঙ্গেহি দুতিযাৰিভত্তি হোতি.
কালে তাৰ – সত্তাহং গৰপানং, মাসং মংসোদনং, সরদং রমণীযা নদী, সব্বকালং রমণীযং নন্দনং, মাসং সজ্ঝাযতি, তযো মাসে অভিধম্মং দেসেসি.
অদ্ধানে – যোজনং ৰনরাজি, যোজনং দীঘো পব্বতো, কোসং সজ্ঝাযতি.
অচ্চন্তসংযোগেতি কিং? মাসে মাসে ভুঞ্জতি, যোজনে যোজনে ৰিহারং পতিট্ঠাপেসি.
২৮৮. কম্মপ্পৰচনীযযুত্তে.
কম্মপ্পৰচনীযেহি নিপাতোপসগ্গেহি যুত্তে যোগে সতি লিঙ্গম্হা দুতিযাৰিভত্তি হোতি.
কম্মং পৰচনীযং যেসং তে কম্মপ্পৰচনীযা, পরসমঞ্ঞাৰসেন ৰা অন্ৰাদযো কম্মপ্পৰচনীযা.
তত্থ অনুসদ্দস্স লক্খণে, সহত্থে, হীনে চ কম্মপ্পৰচনীযসঞ্ঞা ৰুত্তা. যথা – পব্বজিতমনু পব্বজিংসু, নদিমন্ৰৰসিতা বারাণসী, নদিযা সহ অৰবদ্ধাতি অত্থো, অনু সারিপুত্তং পঞ্ঞৰা.
লক্খণাদীসু ‘‘লক্খণি’ত্থম্ভূতক্খানভাগ ৰিচ্ছাসু পতি পরি অনৰো’’তি পতি পরি অনূনং কম্মপ্পৰচনীযসঞ্ঞা ৰুত্তা.
লক্খণে সূরিযুগ্গমনং পতি দিব্বা ভক্খা পাতুভৰেয্যুং, রুক্খং পতি ৰিজ্জোততে চন্দো, রুক্খং পরি, রুক্খং অনু.
ইত্থম্ভূতক্খানে সাধু দেৰদত্তো মাতরং পতি, মাতরং পরি, মাতরং অনু.
ভাগে যদেত্থ মং পতি সিযা, মং পরি, মং অনু, তং দীযতু.
ৰিচ্ছাযোগে অত্থমত্থং পতি সদ্দো নিৰিসতি, রুক্খং রুক্খং পতি ৰিজ্জোততে চন্দো, রুক্খং রুক্খং পরি, রুক্খং রুক্খং অনু.
‘‘অভিরভাগে’’তি অভিস্স ভাগৰজ্জিতেসু লক্খণাদীসু কম্মপ্পৰচনীযসঞ্ঞা ৰুত্তা. তং খো পন ভৰন্তং গোতমং এৰং কল্যাণো কিত্তিসদ্দো অব্ভুগ্গতো, সাধু দেৰদত্তো মাতরং অভি.
নিপাতে ধি ব্রাহ্মণস্স হন্তার মিচ্চেৰমাদি.
২৮৯. ক্ৰচি দুতিযা ছট্ঠীনমত্থে.
ছট্ঠীনং অত্থে ক্ৰচি দুতিযাৰিভত্তি হোতি. অন্তরাঅভিতো পরিতো পতি পটিভাতিযোগে অযং. অন্তরা চ রাজগহং অন্তরা চ নাল়ন্দং অদ্ধানমগ্গপ্পটিপন্নো, রাজগহস্স চ নাল়ন্দায চ মজ্ঝেতি অত্থো. অভিতো গামং ৰসতি, পরিতো গামং ৰসতি, নদিং নেরঞ্জরং পতি, নেরঞ্জরায নদিযা সমীপেতি অত্থো. পটিভন্তু তং চুন্দ বোজ্ঝঙ্গা, উপমা মং পটিভাতি, উপমা ময্হং উপট্ঠহতীতি অত্থো.
‘‘ক্ৰচি দুতিযা, অত্থে’’তি চ ৰত্ততে.
২৯০. ততিযাসত্তমীনঞ্চ.
ততিযাসত্তমীনমত্থে চ ক্ৰচি লিঙ্গম্হা দুতিযাৰিভত্তি হোতি.
ততিযত্থে সচে মং নালপিস্সতি, ত্ৰঞ্চ মং নাভিভাসসি, ৰিনা সদ্ধম্মং কুতো সুখং, উপাযমন্তরেন ন অত্থসিদ্ধি.
সত্তমিযত্থে – কালে, উপান্ৰজ্ঝাৰসস্স পযোগে, অধিসিট্ঠাৰসানং পযোগে, তপ্পানচারে চ দুতিযা.
কালে তাৰ – পুব্বণ্হসমযং নিৰাসেত্ৰা, একং সমযং ভগৰা. ইমং রত্তিং চত্তারো মহারাজানো.
উপাদিপুব্বস্স ৰসধাতুস্স পযোগে – গামং উপৰসতি, গামং অনুৰসতি, ৰিহারং অধিৰসতি, গামং আৰসতি, অগারং অজ্ঝাৰসতি. তথা পথৰিং অধিসেস্সতি, গামং অধিতিট্ঠতি, গামং অজ্ঝাৰসতি.
তপ্পানচারেসু – নদিং পিৰতি, গামং চরতি ইচ্চাদি.
কস্মিং অত্থে ততিযা?
২৯১. করণে ততিযা.
করণকারকে ততিযাৰিভত্তি হোতি.
কিং করণং?
২৯২. যেন ৰা কযিরতে তং করণং.
যেন ৰা কত্তা উপকরণভূতেন ৰত্থুনা ক্রিযং অব্যৰধানেন করোতি, যেন ৰা ৰিকরোতি, যেন ৰা পাপুণাতি, তং কারকং করণসঞ্ঞং হোতি.
করীযতে অনেনাতি করণং, এত্থ চ সতিপি সব্বকারকানং ক্রিযাসাধকত্তে ‘‘যেন ৰা কযিরতে’’তি ৰিসেসেত্ৰা ৰচনং কত্তূপকরণভূতেসু কারকেসু সাধকতমস্সেৰ গহণত্থং.
ৰুত্তঞ্চ
‘‘যস্স সব্বৰিসেসেন, ক্রিযাসংসিদ্ধিহেতুতা;
সম্ভাৰীযতি তং ৰুত্তং, করণং নাম কারক’’ন্তি.
তং পন দুৰিধং অজ্ঝত্তিক বাহিরৰসেন.
যথা – হত্থেন কম্মং করোতি, চক্খুনা রূপং পস্সতি, মনসা ধম্মং ৰিঞ্ঞায. দত্তেন ৰীহযো লুনাতি, অগ্গিনা কুটিং ঝাপেতি.
‘‘ততিযা’’তি অধিকারো.
২৯৩. কত্তরি চ.
কত্তরি চ কারকে লিঙ্গম্হা ততিযাৰিভত্তি হোতি. চগ্গহণেন ইত্থম্ভূতলক্খণে, ক্রিযাপৰগ্গে, পুব্বসদিসসমূনত্থ কলহ নিপুণ মিস্সক সখিলত্থাদিযোগে, কালদ্ধানেসু, পচ্চত্তকম্মত্থপঞ্চমিযত্থাদীসু চ ততিযা.
কো চ কত্তা?
২৯৪. যো করোতি স কত্তা.
যো ক্রিযং অত্তপ্পধানো হুত্ৰা করোতি, সো কত্তুসঞ্ঞো হোতি.
সো তিৰিধো সুদ্ধকত্তা হেতুকত্তা কম্মকত্তাতি. তত্থ যো সযমেৰ ক্রিযং করোতি, সো সুদ্ধকত্তা. যো অঞ্ঞং কাতুং সমত্থং অকরোন্তং কম্মং নিযোজেতি, সো হেতুকত্তা, যথা – গন্তুং সমত্থো দেৰদত্তো, তমঞ্ঞো পযোজেতি ‘‘গমযতি দেৰদত্ত’’ন্তি.
যং পন তত্থ তত্থ গচ্ছতি দেৰদত্তো, তমঞ্ঞো পযোজযতি ‘‘গমযতি দেৰদত্ত’’ন্তি হেত্ৰত্থনিদস্সনং, তম্পি সামত্থিযদস্সনৰসেন ৰুত্তন্তি গহেতব্বং. অঞ্ঞথা যদি সযমেৰ গচ্ছতি, কিং তত্থ পযোজকব্যাপারেন অকরোন্তং বলেন কারযতি, পাসাণং উট্ঠাপযতীতিআদিকঞ্চ ন সিজ্ঝেয্য.
এত্থ পন
‘‘কত্তা’’তি ৰত্ততে.
২৯৩. যো কারেতি স হেতু.
যো কত্তারং কারেতি, সো হেতুসঞ্ঞো হোতি, কত্তা চাতি হেতুকত্তুসঞ্ঞা.
যো পন পরস্স ক্রিযং পটিচ্চ কম্মভূতোপি সুকরত্তা সযমেৰ সিজ্ঝন্তো ৰিয হোতি, সো কম্মকত্তা নাম, যথা – সযং করীযতে কটো, সযমেৰ পচ্চতে ওদনোতি.
ৰুত্তঞ্চ
‘‘অত্তপ্পধানো কিরিযং, যো নিব্বত্তেতি কারকো;
অপ্পযুত্তো পযুত্তো ৰা, স কত্তাতি পৰুচ্চতি.
হেতুকত্তাতি কথিতো,
কত্তুনো যো পযোজকো;
কম্মকত্তাতি সুকরো,
কম্মভূতো কথীযতে’’তি.
ননু চ ‘‘সংযোগো জাযতে’’তিআদীসু কথং পুরে অসতো জননক্রিযায কত্তুভাৰোসিযাতি? ৰুচ্চতে – লোকসঙ্কেতসিদ্ধো হি সদ্দপ্পযোগো, অৰিজ্জমানম্পি হি লোকো সদ্দাভিধেয্যতায ৰিজ্জমানং ৰিয গহেত্ৰা ৰোহরতি, ৰিকপ্পবুদ্ধিগহিতাকারোযেৰ হি সদ্দেনাভিধীযতে, ন তু ৰত্থুসভাৰো, অঞ্ঞথা সুতমযঞাণেনপি পচ্চক্খেন ৰিয ৰত্থুসভাৰসচ্ছিকরণপ্পসঙ্গো চ মুসাৰাদ কুদিট্ঠিৰাদাদীনমভাৰপ্পসঙ্গো চ সিযা, তস্মা বুদ্ধিপরিকপ্পিতপঞ্ঞত্তিৰসেনপি সদ্দপ্পৰত্তি হোতীতি অসতো সংযোগাদিস্সপি হোতেৰ জননক্রিযায কত্তুকারকতাতি.
যথাহ
‘‘ৰোহারৰিসযো সদ্দো, নেকন্তপরমত্থিকো;
বুদ্ধিসঙ্কপ্পিতো অত্থো, তস্সত্থোতি পৰুচ্চতি.
বুদ্ধিযা গহিতত্তা হি, সংযোগো জাযতে ইতি;
সংযোগো ৰিজ্জমানোৰ, কত্তা ভৰতি জাতিযা’’তি.
তত্র ততিযা জিনেন দেসিতো ধম্মো, বুদ্ধেন জিতো মারো, অহিনা দট্ঠো নরো, বুদ্ধেন বোধিতো লোকো, সদ্ধেহি কারিতো ৰিহারো.
অভিহিতে ন ভৰতি. কটং করোতি দেৰদত্তো, কারেতি ৰা.
ইত্থম্ভূতস্স লক্খণে – সা ভিন্নেন সীসেন পগ্ঘরন্তেন লোহিতেন পটিৰিস্সকানং উজ্ঝাপেসি, ঊনপঞ্চবন্ধনেন পত্তেন অঞ্ঞং নৰং পত্তং চেতাপেয্য, তিদণ্ডকেন পরিব্বাজকমদ্দক্খি.
অপৰগ্গে – একাহেনেৰ বারাণসিং পাযাসি, নৰহি মাসেহি ৰিহারং নিট্ঠাপেসি, যোজনেন অধীতং ব্যাকরণং, ক্রিযাপৰগ্গোতি ক্রিযায আসুং পরিনিট্ঠাপনং.
পুব্বাদিযোগে – মাসেন পুব্বো, পিতরা সদিসো, মাতরা সমো, কহাপণেন ঊনো, ধনেন ৰিকলো, অসিনা কলহো, আচারেন নিপুণো, ৰাচায নিপুণো, গুল়েন মিস্সকং, তিলেন মিস্সকং, ৰাচায সখিলো, মণিনা অত্থো, ধনেন অত্থো, পিতরা তুল্যো.
কালদ্ধানেসু – মাসেন ভুঞ্জতি, যোজনেন গচ্ছতি.
পচ্চত্তে – অত্তনাৰ অত্তানং সম্মন্নতি.
কম্মত্থে – তিলেহি খেত্তে ৰপতি.
পঞ্চমিযত্থে – সুমুত্তা মযং তেন মহাসমণেন.
২৯৬. সহাদিযোগে চ.
সহ সদ্ধিং সমং নানা ৰিনা অলং কিমিচ্চেৰমাদীহি যোগে লিঙ্গম্হা ততিযাৰিভত্তি হোতি, চসদ্দেন সহত্থেপি.
তত্থ সহসদ্দেন যোগো ক্রিযা গুণ দব্ব সমৰাযে সম্ভৰতি. যথা – ৰিতক্কেন সহ ৰত্ততি, পুত্তেন সহ থূলো, অন্তেৰাসিকসদ্ধিৰিহারিকেহি সহ আচরিযুপজ্ঝাযানং লাভো, নিসীদি ভগৰা সদ্ধিং ভিক্খুসঙ্ঘেন, সহস্সেন সমং মিতা, সব্বেহি মে পিযেহি মনাপেহি নানাভাৰো ৰিনাভাৰো, সঙ্ঘো ৰিনাপি গগ্গেন উপোসথং করেয্য, অলং তে ইধ ৰাসেন, কিং মে একেন তিণ্ণেন, পুরিসেন থামদস্সিনা, কিং তে জটাহি দুম্মেধ, কিং তে অজিনসাটিযা.
সহত্থে – দেৰদত্তো রাজগহং পাৰিসি কোকালিকেন পচ্ছাসমণেন, দুক্খো বালেহি সংৰাসো.
২৯৭. হেত্ৰত্থে চ.
যোগগ্গহণমিহানুৰত্ততে, হেত্ৰত্থে, হেত্ৰত্থপ্পযোগে চ লিঙ্গম্হা ততিযাৰিভত্তি হোতি.
কিস্মিঞ্চি ফলে দিট্ঠসামত্থিযং কারণং হেতু, সোযেৰ অত্থো, তস্মিং হেত্ৰত্থে, অন্নেন ৰসতি, ধম্মেন ৰসতি, ৰিজ্জায ৰসতি.
ন জচ্চাৰসলো হোতি,
ন জচ্চা হোতি ব্রাহ্মণো;
কম্মুনা ৰসলো হোতি,
কম্মুনা হোতি ব্রাহ্মণো.
দানেন ভোগৰা, আচারেন কুলী.
কেন পাণি কামদদো, কেন পাণি মধুস্সৰো;
কেন তে ব্রহ্মচরিযেন, পুঞ্ঞং পাণিম্হি ইজ্ঝতি.
হেত্ৰত্থপ্পযোগে – কেন নিমিত্তেন, কেন পযোজনেন, কেনট্ঠেন, কেন হেতুনা ৰসতি.
২৯৮. সত্তম্যত্থে চ.
সত্তম্যত্থে চ লিঙ্গম্হা ততিযাৰিভত্তি হোতি.
কালদ্ধানদিসাদেসাদীসু চাযং. তেন সমযেন, তেন কালেন, কালেন ধম্মস্সৰণং, সো ৰো মমচ্চযেন সত্থা, মাসেন ভুঞ্জতি, যোজনেন ধাৰতি. পুরত্থিমেন ধতরট্ঠো, দক্খিণেন ৰিরূল়্হকো, পচ্ছিমেন ৰিরূপক্খো, উত্তরেন কসিৰন্তো জনোঘমপরেন চ, যেন ভগৰা তেনুপসঙ্কমি ইচ্চাদি.
২৯৯. যেনঙ্গৰিকারো.
যেন ব্যাধিমতা অঙ্গেন অঙ্গিনো ৰিকারো লক্খীযতে, তত্থ ততিযাৰিভত্তি হোতি. এত্থ চ অঙ্গমস্স অত্থীতি অঙ্গং, সরীরং. অক্খিনা কাণো, হত্থেন কুণী, পাদেন খঞ্জো, পিট্ঠিযা খুজ্জো.
৩০০. ৰিসেসনে চ.
ৰিসেসীযতি ৰিসেসিতব্বং অনেনাতি ৰিসেসনং, গোত্তাদি. তস্মিং গোত্তনামজাতিসিপ্পৰযোগুণসঙ্খাতে ৰিসেসনত্থে ততিযাৰিভত্তি হোতি, চসদ্দেন পকতিআদীহি চ. গোত্তেন গোতমো নাথো.
সারিপুত্তোতি নামেন, ৰিস্সুতো পঞ্ঞৰা চ সো;
জাতিযা খত্তিযো বুদ্ধো, লোকে অপ্পটিপুগ্গলো.
তদহু পব্বজিতো সন্তো, জাতিযা সত্তৰস্সিকো;
সোপি মং অনুসাসেয্য, সম্পটিচ্ছামি মত্থকে.
সিপ্পেন নল়কারো সো, একূনতিংসো ৰযসা, ৰিজ্জায সাধু, পঞ্ঞায সাধু, তপসা উত্তমো, সুৰণ্ণেন অভিরূপো.
পকতিআদীসু – পকতিযা অভিরূপো, যেভুয্যেন মত্তিকা, সমেন ধাৰতি, ৰিসমেন ধাৰতি, দ্ৰিদোণেন ধঞ্ঞং কিণাতি, সহস্সেন অস্সকে কিণাতি ইচ্চাদি.
কস্মিং অত্থে চতুত্থী?
৩০১. সম্পদানে চতুত্থী.
সম্পদানকারকে লিঙ্গম্হা চতুত্থীৰিভত্তি হোতি.