৬. রাজকণ্ডো

১১২. একযামং সযে রাজা,

দ্ৰিযামঞ্ঞেৰ পণ্ডিতো;

ঘরাৰাসো তিযামংৰ,

চতুযামং তু যাচকো.

১১৩. ধনৰা সুতৰা রাজা,

নদী ৰেজ্জো চিমেপঞ্চ;

যত্থ দেসে ন ৰিজ্জন্তি,

ন তত্থ দিৰসং ৰসে.

১১৪. যস্মিং পদেসে ন মানো,

ন পেমং নচ বন্ধৰা;

নচ ৰিজ্জাগমো কোচি,

ন তত্থ দিৰসং ৰসে.

১১৫. অপুত্তকং ঘরং সুঞ্ঞং,

রট্ঠং সুঞ্ঞং অরাজকং;

অ সিপ্পস্স মুখং সুঞ্ঞং,

সব্ব সুঞ্ঞং দলিদ্দকা.

১১৬. ধনমিচ্ছেয্য ৰাণিজ্জো,

ৰিজ্জমিচ্ছে ভজেসুতং;

পুত্তমিচ্ছে তরুণিত্থিং,

রাজামচ্চং ৰসং গমে.

১১৭. নট্ঠোযতি অসন্তুট্ঠো,

সন্তুট্ঠো চ মহীপতি;

লজ্জা চ গণিকা নট্ঠা,

নিল্লজ্জা কুলধীতিকা.

১১৮. পক্খীনং বলমাকাসো,

মচ্ছানমুদকং বলং;

দুব্বলস্স বলং রাজা,

কুমারানং রুদং বলং.

১১৯. খমা জাগরিযুট্ঠানং,

সংৰিভাগো দযিক্খণা;

নাযকস্স গুণা এতে,

ইচ্ছিতব্বা সতং গুণা.

১২০. সকিং ৰদন্তি রাজানো,

সকিং সমণব্রাহ্মণা;

সকিং সপ্পুরিসা লোকে,

এস ধম্মো সনন্তনো.

১২১. অলসো গিহী কামভোগী ন সাধু,

অসঞ্ঞতো পব্বজিতো ন সাধু;

রাজা অনিসম্মকারী ন সাধু,

পণ্ডিতো কোধনো তংপি ন সাধু.

১২২. বহৰো যত্থ নেত্তারো,

সব্বে পণ্ডিতমানিনো;

সব্বে মহত্তমিচ্ছন্তি,

তেসং কম্মং ৰিনস্সতি.

১২৩. আযং খযং সযং জঞ্ঞা,

রাজা সযং কতাকতং;

নিগ্গহে নিগ্গহেতব্বং,

পগ্গহে পগ্গহারহং.

১২৪. পিট্ঠিতোক্কং নিসেৰেয্য,

কুচ্ছিনাৰ হুতাসনং;

সামিকং সব্বভাগেন,

পরলোকং অমোহৰা.

১২৫. অগ্গি আপো ইত্থিমূল়্হো,

সপ্পো রাজ-কুলানিচ;

অপযন্তেন গন্তব্বা,

অচ্চেক-পাণহারকা.

১২৬. পদুট্ঠ-ভরিয-সংৰাসো,

পদুট্ঠ চিত্ত দাসকো;

স-সপ্পে চ ঘরে ৰাসো,

মচ্চু এৰ ন সংসযো.

১২৭. মূল়্হ সিস্সো পদেসেন,

কুনারী ভরণেন চ;

অসতা সম্পযোগেন,

পণ্ডিতোপ্পৰসীদতি.

১২৮. মাতা পুত্তকরং পাপং,

সিস্সপাপং গুরুকতা;

রাজা রট্ঠকরং পাপং,

রাজপাপং পুরোহিতো.

১২৯. অকোধেন জিনে কোধং,

অসাধুং সাধুনা জিনে;

জিনে মচ্ছরিং দানেন,

সচ্চেনালীকৰাদিনং;

১৩০. অদন্তং দমনং দানং,

দানং সব্বত্থ সাধকং;

দানেন পিয ৰাচায,

উন্নমন্তি নমন্তি চ;

১৩১. দানং সিনেহভেসজ্জং,

মচ্ছেরং দোসনোসধং;

দানং যসস্সী ভেসজ্জং,

মচ্ছেরং কপণোসধং.

১৩২. বহূনমপ্পসারানং,

সামগ্গিযা জযং জযে;

তিণেহি ৰত্ততে যোত্তং,

তেন নাগোপি বজ্ঝতে.

১৩৩. সহাযো অসমত্থোপি,

তেজসা কিংকরিস্সতি;

নিৰাতে জলিতো অগ্গি,

সযমে ৰূপসম্পতি.

১৩৪. ন রঞ্ঞা সমকং ভুঞ্জে,

কামভোগং কুদাচনং;

আকপ্পং রস ভুত্তিংৰা,

মালা গন্ধ ৰিলেপনং;

ৰত্থং সব্বঅলঙ্কারং,

ন রঞ্ঞা সদিসং করে.

১৩৫. ন মে রাজা সখা হোতি,

ন রাজা হোতি মেথুনো;

এসো সামিকো ময্হন্তি,

চিত্তে নিট্ঠং সুথাপযে.

১৩৬. নাতিদূরে ভজে রঞ্ঞো,

নাচ্চাসন্নোপৰাতকে;

উজুকে নাতিনিন্নে চ,

ন ভজে উচ্চমাসনে.

ছদোসে ৰজ্জে সেৰকো,

তিট্ঠে অগ্গিংৰ সংযতো.

১৩৭. গুণী সব্বঞ্ঞু তুল্যোপি,

নসোভতি অনিস্সযো;

অনগ্ঘমোপি মণিসেট্ঠো,

হেমং নিস্সায সোভতি.

রাজকণ্ডো নিট্ঠিতো.