৭. পকিণ্ণককণ্ডো

১৩৮. ইত্থিমিস্সে কুতোসীলং,

মংস ভক্খে কুতোদযা;

সুরা পানে কুতোসচ্চং,

মহালোভে কুতোহিরী;

মহাতন্দে কুতোসিপ্পং,

মহা কোধে কুতোধনং.

১৩৯. সুরা যোগো ৰিকালো চ,

সমজ্জ চরণালসং;

খিড্ডাধুত্তো পাপমিত্তো,

ভোগনাসমুখা ইমে.

১৪০. দিৰা নাদিক্খা ৰত্তব্বং,

রত্তো নাৰচনেন চ;

সঞ্চরেয্য ভযা ভীতো,

ৰনে ৰনচরী যথা.

১৪১. জীৰন্তাপি মতাপঞ্চ,

ব্যাসেন পরিকিত্তিতা;

দুক্খিতো ব্যাধিতোমূল়্হো,

ইণৰা নিত্যসেৰকো.

১৪২. অনাগতং ভযং দিস্ৰা,

দূরতো পরিৰজ্জযে;

আগতঞ্চ ভযং দিস্ৰা,

অ ভীতো হোতি পণ্ডিতো.

১৪৩. নিদ্দালুকো পমত্তোচ,

সুখত্তো রোগৰালসো;

মহিচ্ছো কম্মারামোচ,

সত্তে তে সত্থৰজ্জিতা.

১৪৪. দুগ্গতং গচ্ছ হে লাভ,

লাভী লাভেন পূরতি;

থলে পৰস্স পজ্জুন্ন,

সিন্ধু আপেন পূরতি;

নত্থিদং কম্মপ্পধানকং.

১৪৫. ন হি কোচি কতে কিচ্চে,

কত্তারং সমুপেক্খতে;

তস্মা সব্বানি কিচ্চানি,

সাৰ সেসেন কারযে.

১৪৬. তূলং সল্লহুকং লোকে,

ততো চাপল্ল-জাতিকো;

ততো ৰুড্ঢ মনোৰাদো,

পমত্তো বুদ্ধসাসনে.

১৪৭. পাসাণছত্তং গরুকং,

ততো দেৰানচিক্খণং;

ততো ৰুড্ঢানমোৰাদো,

ততো বুদ্ধস্স সাসনং.

১৪৮. কাযস্স দক্খিণ হত্থো,

দোসো এত্থ কনিট্ঠকো;

কণ্ণ ঘানান-মক্খীনং,

ৰামো তু পাদ-পাসকো.

১৪৯. তম্বূলস্স মজ্ঝ পত্তে,

কুৰেরো রক্খতী সদা;

মূলম্হি রক্খতি যক্খো,

অগ্গম্হি কালকণ্ণিকা;

তানি ভুঞ্জেয্য ছিন্দিত্ৰা,

সিরী এৰং পৰড্ঢতি.

১৫০. সম্পুণ্ণরক্খো ব্রহ্মাৰ,

অচ্চুরক্খো চ বিস্সণো;

তস্মা হি তে পূজযন্তু,

সদা মানেন্তি তং নরং.

১৫১. গোণা হি সব্বগিহীনং,

পোসকা ভোগদাযকা;

তস্মা হি মাতা পিতূৰ,

মানযে সক্করেয্য চ.

১৫২. যেচ খাদন্তি গোমংসং,

মাতু মংসংৰ খাদরে;

মতেসু তেসু গিজ্ঝানং,

দদে সোতে চ ৰাহযে.

১৫৩. গুরুসিদ্ধো সিপ্পারম্ভো,

রৰি সোক্রা চ মজ্ঝিমো;

ন সিপ্পো বুদ্ধচন্দরো,

সোরী অঙ্গাচ মরণং.

১৫৪. অট্ঠমিযং গুরুং হন্তি,

সিস্সং হন্তি চতুদ্দসিং;

সিপ্পং হন্তি দস সিপ্পং,

মাতাপিতা চ পুণ্ণমিং.

১৫৫. নাল়িকং সত্ত নভুঞ্জে,

ন লাবুং নৰমং তথা;

দ্ৰাদস প্রিন্নংত্রিমিনং,

ভুঞ্জে সিপ্পং ৰিনস্সতি.

১৫৬. একং চজে কুলঅত্থং,

গামস্সত্থং কুৰং চজে;

গাম চজে জনপদত্থং,

অত্তত্থং পথৰিং চজে.

১৫৭. দেসং ওস্সজ্জ গচ্ছন্তি,

সীহো সপ্পুরিসো গজো;

তত্থেৰ নিধনং যন্তি,

কাকো কাপুরিসো মিগো.

১৫৮. যম্হি পদেসে ন মানো,

ন পেমং ন চ বন্ধৰা;

ন চ ৰিজ্জাগাহো কোচি,

ন তত্থ ৰসনং করে.

১৫৯. চরত্যেকেন পাদেন,

তিট্ঠত্যেকেন পণ্ডিতো;

অ নিসম্ম পরং ঠানং,

ন পুব্বমালযং জহে.

১৬০. ধন ধঞ্ঞ পযোগেসু,

তথা ৰিজ্জাগমেসু চ;

দূতেসু অপচারেসু,

চজ্জা লজ্জা তদা ভৰে.

১৬১. দ্ৰি গুণো থীনমাহারো,

বুদ্ধিচাপি চতুগ্গুণো;

ছগ্গুণো হোতি ৰাযামো,

কামোত্ৰট্ঠ-গুণো ভৰে.

১৬২. পব্বে পব্বে কমেনুচ্ছু,

ৰিসেসরসৰাগ্গতো;

তথা সুমেত্তিকো সাধু,

ৰিপরীতোৰ দুজ্জনো.

১৬৩. কস্সকো ৰাণিজো মচ্চো,

সমণো সুত সীলৰা;

তেসু ৰিপুল জাতেসু,

রট্ঠম্পি ৰিপুলং সিযা.

১৬৪. অসজ্ঝায মলা মন্তা,

অনুট্ঠান মলা ঘরা;

মলং ৰণ্ণস্স কোসজ্জং,

পমাদো রক্খতো মলং.

১৬৫. হীনানং গচ্ছতে ৰিত্তং,

ৰীরানং সন্তকত্তনং;

ৰদন্তি চ হীনা জনা,

পুব্ব-কম্মপ্পধানকা.

১৬৬. ন ৰদন্তি চেৰংধীরা,

ৰাযমিংসু সব্বকম্মে;

ন চে সিজ্ঝতি তং কম্মং,

অ-ফলং এৰ কো দোসো.

১৬৭. নীচং কুলং নিপঞ্ঞং ৰা,

নিরূপং নিবলং সমং;

ইমং কালং ছুত্তকালং,

ধনমেৰ ৰিসেসকং.

পকিণ্ণককণ্ডো নিট্ঠিতো.

পণ্ডিতো সুজনো কণ্ডো,

দুজ্জনো মিত্ত-ইত্থি চ;

রাজা পকিণ্ণকো চাতি,

সত্ত-কণ্ড-ৰিভূসিতং.

ৰিসুদ্ধা চার-থেরেন,

ৰিসুদ্ধারাম-ৰাসিনা;

সব্ব-কুলানমত্থায,

ৰিসোধিতং পথক্খযে.