নমো তস্স ভগৰতো অরহতো সম্মাসম্বুদ্ধস্স

লোকনীতি

১. পণ্ডিতকণ্ডো

১. লোকনীতিং পৰক্খামি,

নানাসত্থসমুদ্ধটং;

মাগধেনেৰ সঙ্খেপং,

ৰন্দিত্ৰা রতনত্থযং.

২. নীতিলোকে পুরিসস্স সারো,

মাতা পিতা আচরিযোচ মিত্তো;

তস্মা হি নীতিং পুরিসো ৰিজঞ্ঞা,

ঞাণী মহা হোতি বহুস্সুতোচ.

৩. অলসস্স কুতো সিপ্পং,

অসিপ্পস্স কুতো ধনং;

অধনস্স কুতো মিত্তং,

অমিত্তস্স কুতো সুখং;

অসুখস্স কুতো পুঞ্ঞং,

অপুঞ্ঞস্স কুতো ৰরং.

৪. সিপ্পা সমং ধনং নত্থি,

সিপ্পং চোরা নগণ্হরে;

ইধ লোকে সিপ্পং মিত্তং,

পরলোকে সুখাৰহং.

৫. অপ্পকং নাতিমঞ্ঞেয্য,

চিত্তে সুতং নিধাপযে;

ৰম্মিকোদকবিন্দূৰ,

চিরেন পরিপূরতি.

৬. খুদ্দোতি নাতিমঞ্ঞেয্য,

ৰিজ্জং ৰা সিপ্পমেৰ ৰা;

একম্পি পরিযোদাতং,

জীৰিতকপ্পকারণং.

৭. সেলে সেলে ন মাণিকং,

গজে গজে ন মুত্তিকং;

ৰনে ৰনে ন চন্দনং,

ঠানে ঠানে ন পণ্ডিতং.

৮. পণ্ডিতো সুতসম্পন্নো,

যত্থ অত্থীতি চে সুতো;

মহুস্সাহেন তং ঠানং,

গন্তব্বংৰ সুতেসিনা.

৯. সিনে সিপ্পং সিনে ধনং,

সিনে পব্বতমারুহং;

সিনে কামস্স কোধস্স,

ইমে পঞ্চ সিনে সিনে.

১০. সুতি সম্মুতি সঙ্খ্যাচ,

যোগা নীতি ৰিসেসকা;

গন্ধব্বা গণিকা চেৰ,

ধনু বেদা চ পূরণা.

১১. তিকিচ্ছা ইতিহাসা চ,

জোতি মাযা চ ছন্দতি;

কেতু মন্তা চ সদ্দা চ,

সিপ্পাট্ঠারসকা ইমে.

১২. অপুট্ঠো পণ্ডিতো ভেরী,

পজ্জুন্নো মে হোতি পুচ্ছিতো;

বালো পুট্ঠো অপুট্ঠোপি,

বহুম্পি ভণতে সদা.

১৩. পোত্থকেসু চ যং সিপ্পং,

পরহত্থেসু যং ধনং;

যথাকিচ্চে সমুপ্পন্নে,

ন তং সিপ্পং ন তং ধনং.

১৪. জলপ্পমাণং কুমুদ্দনালং,

কুলপ্পমাণং ৰিনযো পমাণং;

ব্যত্তিপ্পমাণং কথীতৰাক্যং,

পথৰিযা পমাণং তিণ মিলাতং.

১৫. অপ্পস্সুতো সুতং অপ্পং,

বহুং মঞ্ঞতি মানৰা;

সিন্ধূদকং অপস্সন্তো,

কূপে তোযংৰ মণ্ডুকো.

১৬. পথমং পরাজযে সিপ্পং,

দুতিযং পরাজযে ধনং;

ততিযং পরাজযে ধম্মং,

চতুত্থং কিং করিস্সতি.

১৭. ব্যত্ত পুত্র কিমলসো,

অব্যত্তো ভারহারকো;

ব্যত্তকো পূজিতো লোকে,

ব্যত্ত পুত্র দিনে দিনে.

১৮. মাতা ৰেরী পিতা সত্রু,

কেন বালে ন সিক্খিতা;

সভামজ্ঝে ন সোভন্তি,

হংসমজ্ঝে বকোযথা.

১৯. কণ্টকং গিরি কো তিক্খতি,

কো অঞ্জনং মিগক্খিকং;

উপ্পথং পল্ললে কো সুগন্ধং,

কুল-পুত্ত-রূপো কো পৰত্ততি;

সামং-ভাৰো.

২০. ন রসং অকোতম্বুলং,

অধনস্স, লঙ্কতম্পি;

অলোনকন্তু ব্যঞ্জনং,

ব্যাকরণং অসিপ্পস্স.

২১. সুস্সুসা সুতসম্পন্নো,

সুতাপঞ্ঞায পৰড্ঢতি;

পঞ্ঞায অত্থং জানাতি,

ঞাতো অত্থো সুখাৰহো.

২২. ভোজনং মেথুনং নিদ্দা,

গোণে পোসেপি ৰিজ্জতি;

ৰিজ্জা ৰিসেসো পোসস্স,

তং হীনো গোসমো ভৰে.

২৩. নত্থি ৰিজ্জাসমংমিত্তং,

নচ ব্যাধিসমো রিপু;

নচ অত্তসমং পেমং,

নচ কম্মসমং বলং.

২৪. হংসো মজ্ঝে ন কাকানং,

সীহো গুন্নং ন সোভতে;

গদ্রভমজ্ঝে তুরঙ্গো,

বালমজ্ঝে চ পণ্ডিতো.

২৫. যাৰজীৰম্পি চে বালো,

পণ্ডিতং পযিরুপাসতি;

ন সো ধম্মং ৰিজানাতি,

দব্বি সূপরসং যথা.

২৬. মুহুত্তমপি চে ৰিঞ্ঞূ,

পণ্ডিতং পযিরুপাসতি;

খিপ্পং ধম্মং ৰিজানাতি,

জিৰ্হা সূপরসং যথা.

২৭. ৰিনা সত্থং ন গচ্ছেয্য,

সূরো সঙ্গামভূমিযং;

পণ্ডিত্ৰাদ্ধগূ ৰাণিজো,

ৰিদেসগমনো তথা.

২৮. ধননাসং মনোতাপং,

ঘরে দুচ্চরিতানি চ;

ৰঞ্চনঞ্চ অৰমানং,

পণ্ডিতো ন পকাসযে.

২৯. পত্তানুরূপকং ৰাক্যং,

সভাৰরূপকং পিযং;

অত্তানুরূপকং কোধং,

যো জানাতি স পণ্ডিতো.

৩০. অ-ধনস্স রসং খাদা,

অ-বলস্স হথা নরা;

অ-পঞ্ঞস্স ৰাক্য-কথা,

উম্মত্তক-সমা ইমে.

৩১. অনৰ্হাযং গমযন্তো,

অ-পুচ্ছা বহু-ভাসকো;

অত্ত-গুণং পকাসেন্তো,

তি-ৰিধং হীন-লক্খণং.

৩২. অপ্প-রূপো বহুং ভাসো,

অপ্প-পঞ্ঞো পকাসিতো;

অপ্প-পূরো ঘটো খোভে,

অপ্প-খীরা গাৰী চথে.

৩৩. মণ্ডূকেপি উক্রে সীহে,

কাকগ্গহে পিযে পিযে;

অ-পণ্ডীপি পণ্ডী হুত্ৰা,

ধীরা পুচ্ছে ৰযে ৰযে.

৩৪. মণ্ডূকেপি উক্রে সীহে,

সূকরেপি উহে দীপে;

বিল়ারে সদিসে ব্যগ্ঘে,

সব্ব ধীরে সিপ্প-সমে.

৩৫. ন তিত্তি রাজা ধনম্হি,

পণ্ডিতোপি সু-ভাসিতে;

চক্খুংপি পিয-দস্সনে,

জলে সাগরো ন তিত্তি.

৩৬. রূপ-যোব্বন-সম্পন্না,

ৰিসাথ-কুথ-সম্ভৰা;

ৰিজ্জা-হীনা ন সোভন্তি,

নিগন্ধা ইৰ কিংসুকা.