৫. ইত্থিকণ্ডো

৯৪. কোকিলানং সদ্দং রূপং,

নারীরূপং পতিব্বতা;

ৰিজ্জা রূপং অ-রূপানং,

খমা রূপং তপস্সিনং.

৯৫. ইত্থীনঞ্চ ধনং রূপং,

পুরিসানং ৰিজ্জা ধনং;

ভিক্খূনঞ্চ ধনং সীলং,

রাজানঞ্চ ধনং বলং.

৯৬. তপস্সিনো কিসা সোভা,

থূলা সোভা চতুপ্পদা;

পুরিসা ৰিজ্জৰা সোভা,

ইত্থী সোভাস সামিকা.

৯৭. পঞ্চ রত্যা সুগন্ধব্বা,

সত্ত রত্যা ধনুগ্গহা;

এক মাসা সুভরিযা,

অড্ঢ মাসা সিস্সা মলা.

৯৮. হিং রমতি পঙ,

হঙ রমতি পোক.

থী রমতি পু,

খু রমতি ধং.

৯৯. জিণ্ণমন্নং পসংসেয্য,

দারঞ্চ গতযোব্বনং;

রণা পুনাগতা সূরং,

সস্সঞ্চ গেহমাগতং.

১০০. দ্ৰত্তি-পতিকা নারী চ,

ভিক্খু দ্ৰত্তি-ৰিহারিকো;

দ্ৰত্তি-পাস-মুত্তো পক্খী,

কত-মাযা বহূথরং.

১০১. দুজ্জনং পহারাদমে,

মিত্তং দমে অ-ভাণিকা;

ইত্থিঞ্চ ব্যসনা দমে,

রাগিনং অপ্প ভোজনা.

১০২. ন রত্তি ৰিনা চন্দিমা,

ৰীচিং ৰিনা চ অণ্ণৰো;

হংসং ৰিনা পোক্খরণী,

পতিং কঞ্ঞাচ সোভতে.

১০৩. পতিনা জনিতো ভোগো,

ইত্থিযাৰ সংগোপ্পিতো;

পুরিসোৰ হি পধানো,

ইত্থী সুত্তংৰ সূচিযা.

১০৪. সব্বানদী ৰঙ্কনদী,

সব্বে কট্ঠমযা ৰনা;

সব্বিত্থিযো করে পাপং,

লভমানে নিৰাতকে.

১০৫. ৰিৰাদসীলিং উসূযভাণিনিং,

সম্পস্সতণ্হিং বহুপাকভুত্তিনিং;

অগ্গন্তভুত্তিং পরগেহৰাসিনিং,

নারিং চজে পুত্তসতম্পি পূমা.

১০৬. ভুত্তেসু মণ্ডেসু জনীৰ কন্তিনী,

গুয্হেচ ঠানে ভগিনীৰ হিরিণী;

কম্মেসু পত্তেসু করোতি দাসীৰ,

ভযেসু মন্তী সযনেসু রামযে;

রূপীসু সিক্খী কুপনেসু খন্তিনী,

সা নারী সেট্ঠাতি ৰদন্তি পণ্ডিতা;

কাযস্স ভেদাচ দিৰেভৰেয্য সা.

১০৭. সামা মিগক্খী তনুমজ্ঝগত্তা,

সূরূ সুকেসী সমদন্তপন্তী;

গম্ভীরনাভী যুৰতী সুসীলী,

হীনে কুলে জাতাপি ৰিৰাহ্যা.

১০৮. সরদংরতু-কালানং,

ভরিযানং রূপৰতী;

জেট্ঠো পধানং পুত্তানং,

দিসানং উত্তরাদিসা.

১০৯. যা ইচ্ছে পুরিসো হোতুং,

জাতি জাতি পুনপ্পুনং;

সামিকং অপচাযেয্য,

ইন্দংৰ পারিচারিকা.

১১০. যো ইচ্ছে পুরিসো হোতুং,

জাতি জাতি পুনপ্পুনং;

পরদানং ৰিৰজ্জেয্য,

ধোতপাদোৰ কদ্দমং.

১১১. অতিক্কন্ত ৰযো পোসো,

আনেতি তিম্বরুত্তনিং;

তস্সা ইস্সা অসদ্ধাতি,

তং পরাভৰতো মুখং.

ইত্থিকণ্ডো নিট্ঠিতো.