৪. মিত্তকণ্ডো

৭৯. হিতকারো পরো বন্ধু,

বন্ধূপি অহিতো পরো;

অ হিতো দেহজো ব্যাধি,

হিতং অরঞ্ঞমোসধং.

৮০. পরোক্খে গুণ-হন্তারং,

পচ্চক্খে পিযৰাদিনং;

ৰজ্জেয্য তাদিসং মিত্তং,

ৰিসকুম্ভে যথা মধুং.

৮১. ধনহীনে চজে মিত্তো,

পুত্তদারা সহোদরা;

ধনৰন্তংৰ সেৰন্তি,

ধনং লোকে মহা সখা.

৮২. জানেয্য পেসেন ভচ্চং,

বন্ধুং ৰাপি ভযাগতে;

অপ্পকাসু তথা মিত্তং,

দারঞ্চ ৰিভৰক্খযে.

৮৩. সো বন্ধু যো হিতে যুত্তো,

পিতরো হোন্তি পোসকো;

তং মিত্তং যত্থ ৰিস্সাসো,

সা ভরিযা চ যস্স নিব্বূতি.

৮৪. ন ৰিস্সসে অ-ৰিস্সত্তং,

মিত্তঞ্চাপি ন ৰিস্সসে;

কদাচি কুপিতো মিতো,

সব্বং দোসং পকাসযে.

৮৫. সকিং দুট্ঠঞ্চ যো মিত্তং,

পুন সন্ধিতুমিচ্ছতি;

সো মচ্চুং উপগণ্হাতি,

গব্ভমস্সতরী যথা.

৮৬. ৰহে অ-মিত্তং খন্ধেন,

যাৰ কালো অনাগতো;

তমেৰ আগতে কালে,

সেলে ভিন্দে ঘটং ইৰ.

৮৭. ইণসেসো অগ্গিসেসো,

সত্রুসেসো তথেৰ চ;

পুনপ্পুনং ৰিৰড্ঢন্তি,

তস্মা সেসং ন কারযে.

৮৮. পদুমংৰ মুখং যস্স,

ৰাচা চন্দন সীতলা;

তাদিসং নোপসেৰেয্য,

হদযেতু হলাহলং.

৮৯. ন সেৰে ফরুসং সামিং,

নচ সেৰেয্য মচ্ছরিং;

ততো অপগ্গণ্হং সামিং,

নেৰ নিগ্গহিতং ততো.

৯০. সিঙ্গী পঞ্ঞাস হত্থেন,

ৰজ্জে সতেন ৰাজিনং;

হত্থিং দন্তিং সহস্সেন,

দেস চাগেন দুজ্জনং.

৯১. কুদেসঞ্চ কুমিত্তঞ্চ,

কুকুলঞ্চ কুবন্ধৰং;

কুদারঞ্চ কুদাসঞ্চ,

দূরতো পরিৰজ্জযে.

৯২. রোগাতুরে চ দুব্ভিক্খে,

ব্যসনে সত্তু ৰিগ্গহে;

রাজদ্ৰারে সুসানে চ,

যে তিট্ঠন্তি সুমিত্তকা.

৯৩. সীতৰাচো বহুমিত্তো,

ফরুসো অপ্পমিত্তকো;

উপমং এত্থ ঞাতব্বা,

চন্দ-সূরিয-রাজূনং.

মিত্তকণ্ডো নিট্ঠিতো.