৪. বালদুজ্জনকণ্ডো

৬৮. অতিপ্পিযো ন কাতব্বো,

খলো কোতূহলং করো;

সিরসা ৰহ্যমানোপি,

অড্ঢপূরো ঘটো যথা.

৬৯. সপ্পো দুট্ঠো খলো দুট্ঠো,

সপ্পো দুট্ঠতরো খলো;

মন্তোসধেহি সো সপ্পো,

খলো কেনুপসম্মতি.

৭০. যো বালো মঞ্ঞতি বাল্যং,

পণ্ডিতো ৰাপি তেন সো;

বালোৰ পণ্ডিতমানী,

সো ৰে বালোতি ৰুচ্চতি.

৭১. মধুংৰ মঞ্ঞতী বালো,

যাৰ পাপং ন পচ্চতি;

যদাচ পচ্চতী পাপং,

অথ দুক্খং নিগচ্ছতি.

৭২. ন সাধু বলৰা বালো,

সহসা ৰিন্দতে ধনং;

কাযস্স ভেদা দুপ্পঞ্ঞো,

নিরযং সোপপজ্জতি.

৭৩. ঘরে দুট্ঠো চ মূসীকো চ,

ৰনে দুট্ঠো চ ৰানরো;

সকুণে চ দুট্ঠো কাকো,

নরে দুট্ঠোচ ব্রাহ্মণো.

৭৪. দীঘা জাগরতো রত্তি,

দীঘং সন্তস্স যোজনং;

দীঘো বালান সংসারো,

সদ্ধম্মং অ-ৰিজানতং.

৭৫. তিল মত্তং পরেসংৰ,

অপ্প দোসঞ্চ পস্সতি;

নাল়িকেরম্পি সদোসং,

খল-জাতো ন পস্সতি.

৭৬. নত্তদোসং পরে জঞ্ঞা,

জঞ্ঞা দোসং পরস্সতু;

গুয্হে কুম্মো অঙ্গানি,

পর দোসঞ্চ লক্খযে.

৭৭. পণ্ডিতস্স পসংসায,

দণ্ডো বালেন দীযতে;

পণ্ডিতো পণ্ডিতেনেৰ,

ৰণ্ণিতোৰ সুৰণ্ণিতো.

৭৮. লুদ্ধং অত্থেন গণ্হেয্য,

থদ্ধং অঞ্জলি কম্মুনা;

ছন্দানুৰত্তিযা মূল়্হং,

যথাভূতেন পণ্ডিতং.

বালদুজ্জনকণ্ডো নিট্ঠিতো.