রাজকণ্ড

২৫১. মহাজনং যো রঞ্জেতি, চতূহিপি ৰত্থূহি ৰা;

রাজাতি ৰুচ্চতে লোকে, ইতি সল্লক্খযে ৰিদ্ৰা.

২৫২. দানঞ্চ অত্থচরিযা, পিযৰাচা অত্তসমং;

সঙ্গহা চতুরো ইমে, মুনিন্দেন পকাসিতা.

দানম্পি অত্থচরিযতঞ্চ, পিযৰাদিতঞ্চ সমানত্ততঞ্চ;

করিযচরিযসুসঙ্গহং বহূনং, অনৰমতেন গুণেন যাতি সগ্গং;

দানঞ্চ পেয্যৰজ্জঞ্চ, অত্থচরিযা চ যা ইধ;

সমানত্ততা চ ধম্মেসু, তত্থ তত্থ যথারহং;

এতে খো সঙ্গহা লোকে, রথস্সাণীৰ যাযতো.

২৫৩. দানং সীলং পরিচ্চাগং, অজ্জৰং মদ্দৰং তপং;

অক্কোধং অৰিহিংসঞ্চ, খন্তী চ অৰিরোধনং;

দসেতে ধম্মে রাজানো, অপ্পমত্তেন ধারয্যুং.

২৫৪. একযামং সযে রাজা, দ্ৰিযা মঞ্ঞেৰ পণ্ডিতো;

ঘরাৰাসো তিযামোৰ, চতুযামো তু যাচকো.

২৫৫. অপুত্তকং ঘরং সুঞ্ঞং, রট্ঠং সুঞ্ঞং অরাজকং;

অসিপ্পস্স মুখং সুঞ্ঞং, সব্বসুঞ্ঞং দলিদ্দত্তং.

২৫৬. ধনমিচ্ছে ৰাণিজেয্য, ৰিজ্জমিচ্ছে ভজে সুতং;

পুত্তমিচ্ছে তরুণিত্থিং, রাজামচ্চং ইচ্ছাগতে.

২৫৭. পক্খীনং বলমাকাসো, মচ্ছানমুদকং বলং;

দুব্বলস্স বলং রাজা, কুমারানং রুদং বলং.

২৫৮. খমা জাগরিযুট্ঠানং, সংৰিভাগো দযিক্খণা;

নাযকস্স গুণা এতে, ইচ্ছিতব্বা সতং সদা.

২৫৯. সকিং ৰদন্তি রাজানো, সকিং সমণব্রাহ্মণা;

সকিং সপ্পুরিসা লোকে, এস ধম্মো সনন্তনো.

২৬০. অলসো গীহি কামভোগী ন সাধু,

অসঞ্ঞতো পব্বজিতো ন সাধু;

রাজা ন সাধু অনিসম্মকারী,

যো পণ্ডিতো কোধনো তং ন সাধু.

২৬১. আযং খযং সযং জঞ্ঞা, কতাকতং সযং জঞ্ঞা;

নিগ্গহে নিগ্গহারহং, পগ্গহে পগ্গহারহং.

২৬২. মাতা পুত্তকতং পাপং, সিস্সকতং গুরু তথা;

রাজা রট্ঠকতং পাপং, রাজকতং পুরোহিতো.

২৬৩. অক্কোধেন জিনে কোধং, অসাধুং সাধুনা জিনে;

জিনে কদরিযং দানেন, সচ্চেনালিকৰাদিনং.

২৬৪. অদন্তদমনং দানং, দানং সব্বত্থসাধকং;

দানেন পিযৰাচায, উন্নমন্তি নমন্তি চ.

অদন্তদমনং দানং, অদানং দন্তদূসকং;

দানেন পিযৰাচায, উন্নমন্তি নমন্তি চ.

২৬৫. দানং সিনেহভেসজ্জং, মচ্ছেরং দোসনোসধং;

দানং যসস্সীভেসজ্জং, মচ্ছেরং কপণোসধং.

২৬৬. ন রঞ্ঞা সমকং ভুঞ্জে, কামভোগং কুদাচনং;

আকপ্পং রসভুত্তং ৰা, মালাগন্ধৰিলেপনং;

ৰত্থসব্বমলঙ্কারং, ন রঞ্ঞা সদিসং করে.

২৬৭. ন মে রাজা সখা হোতি, ন রাজা হোতি সমকো;

এসো সামিকো ময্হন্তি, চিত্তে নিট্ঠং সণ্ঠাপযে.

২৬৮. নাতিদূরে ভজে রঞ্ঞো, নচ্চাসন্নে পৰাতকে;

উজুকে নাতিনিন্নে চ, ন ভজে উচ্চমাসনে;

ছ দোসে ৰজ্জে সেৰকো, অগ্গীৰ সংযতো তিট্ঠে.

ন পচ্ছতো ন পুরতো, নাপি আসন্নদূরতো;

ন কচ্ছে নোপি পটিৰাতে, ন চাপি ওণতুণ্ণতে;

ইমে দোসে ৰিৰজ্জেত্ৰা, একমন্তং ঠিতা অহু –

২৬৯. জপ্পেন মন্তেন সুভাসিতেন,

অনুপ্পদানেন পৰেণিযা ৰা;

যথা যথা যত্থ লভেথ অত্থং,

তথা তথা তত্থ পরক্কমেয্য.

২৭০. কস্সকো ৰাণিজো মচ্চো, সমণো সুতসীল ৰা;

তেসু ৰিপুলজাতেসু, রট্ঠম্পি ৰিপুলং সিযা.

২৭১. তেসু দুব্বলজাতেসু, রট্ঠম্পি দুব্বলং সিযা;

তস্মা সরট্ঠং ৰিপুলং, ধারযে রট্ঠভারৰা.

২৭২. মহারুক্খস্স ফলিনো, আমং ছিন্দতি যো ফলং;

রসঞ্চস্স ন জানাতি, বীজঞ্চস্স ৰিনস্সতি.

২৭৩. মহারুক্খূপমং রট্ঠং, অধম্মেন পসাসতি;

রসঞ্চস্স ন জানাতি, রট্ঠঞ্চস্স ৰিনস্সতি.

২৭৪. মহারুক্খস্স ফলিনো, পক্কং ছিন্দতি যো ফলং;

রসঞ্চস্স ৰিজানাতি, বীজঞ্জস্স ন নস্সতি.

২৭৫. মহারুক্খূপমং রট্ঠং, ধম্মেন যো পসাসতি;

রসঞ্চস্স ৰিজানাতি, রট্ঠঞ্চস্স ন নস্সতি.