পঞ্চমকণ্ড

৪২. , ৩২. গোসরে পুথস্সাগমো ক্ৰচি.

পুথইচ্চেতস্স অন্তে সরে পরে ক্ৰচি গকারাগমো হোতি.

পুথগে ৰ.

৪৩. , ৩৩. পাস্স চন্তো রস্সো.

পাইচ্চেতস্স অন্তে সরে পরে ক্ৰচি গকারাগমো হোতি, অন্তো চ সরো রস্সো হোতি.

পগেৰ ৰুত্যস্স.

ক্ৰচীতি কস্মা? পা এৰ ৰুত্যস্স.

৪৪. , ২৪. অব্ভো অভি.

অভিইচ্চেতস্স সরে পরে অব্ভাদেসো হোতি. অব্ভুদীরিতং, অব্ভুগ্গচ্ছতি.

৪৫. , ২৫. অজ্ঝো অধি.

অধিইচ্চেতস্স সরে পরে অজ্ঝাদেসো হোতি.

অজ্ঝোকাসে, অজ্ঝাগমা.

৪৬. , ২৬. তে ন ৰা ইৰণ্ণে.

তে চ খো অভিঅধিইচ্চেতে ইৰণ্ণে পরে অব্ভো অজ্ঝোইতিৰুত্তরূপা নং হোন্তি ৰা.

অভিচ্ছিতং, অধীরিতং.

ৰাতি কস্মা? অব্ভীরিতং, অজ্ঝিণমুত্তো.

৪৭. , ২৩. অতিস্স চন্তস্স.

অতিইচ্চেতস্স অন্তভূতস্স তিসদ্দস্স ইৰণ্ণে পরে ‘‘সব্বো চং তী’’তি ৰুত্তরূপং ন হোতি.

অতীসিগণো, অতীরিতং.

ইৰণ্ণেতি কস্মা? অচ্চন্তং.

৪৮. , ৪৩. ক্ৰচি পটি পতিস্স.

পতিইচ্চেতস্স সরে ৰা ব্যঞ্জনে ৰা পরে ক্ৰচি পটিআদেসো হোতি.

পটগ্গি দাতব্বো, পটিহঞ্ঞতি.

ক্ৰচীতি কস্মা? পচ্চন্তিমেসু জনপদেসু, পতিলীযতি, পতিরূপদেসৰাসো চ.

৪৯. , ৪৪. পুথস্সু ব্যঞ্জনে.

পুথইচ্চেতস্স অন্তো সরো ব্যঞ্জনে পরে উকারো হোতি.

পুথুজ্জনো, পুথুভূতং.

অন্তগ্গহণেন অপুথস্সাপি সরে পরে অন্তস্স উকারো হোতি, মনুঞ্ঞং.

৫০. , ৪৫. ও অৰস্স.

অৰইচ্চেতস্স ব্যঞ্জনে পরে ক্ৰচি ওকারো হোতি.

অন্ধকারেন ওনদ্ধা.

ক্ৰচীতি কস্মা? অৰসুস্সতু মে সরীরে মংসলোহিতং.

৫১. , ৫৯. অনুপদিট্ঠানং ৰুত্তযোগতো.

অনুপদিট্ঠানং উপসগ্গনিপাতানং সরসন্ধীহি ব্যঞ্জনসন্ধীহি ৰুত্তসন্ধীহি চ যথাযোগং যোজেতব্বং.

পাপনং, পরাযণং, উপাযনং, উপাহনং, ন্যাযোগো, নিগুপধি, অনুবোধো, দুৰূপসন্তং, সুৰূপসন্তং, দ্ৰালযো, স্ৰালযো, দুরাখ্যাতং, স্ৰাখ্যাতো, উদীরিতং, সমুদ্দিট্ঠং, ৰিযগ্গং, ৰিজ্ঝগ্গং, ব্যগ্গং, অৰযাগমনং, অন্ৰেতি, অনুপঘাতো, অনচ্ছরিযং, পরিযেসনা, পরামাসো, এৰং সরে চ হোন্তি.

পরিগ্গহো, পগ্গহো, পক্কমো, পরক্কমো, নিক্কমো, নিক্কসাৰো, নিল্লযনং, দুল্লযনং, দুম্ভিক্খং, দুব্বুত্তং, সন্দিট্ঠং, দুগ্গহো, ৰিগ্গহো, নিগ্গতো, অভিক্কমো, পটিক্কমো, এৰং ব্যঞ্জনে চ. সেসা সব্বে যোজেতব্বা.

ইতি সন্ধিকপ্পে পঞ্চমো কণ্ডো.

সন্ধিকপ্পো নিট্ঠিতো.