১. সন্ধিকপ্প

পঠমকণ্ড

(ক)

সেট্ঠং তিলোকমহিতং অভিৰন্দিযগ্গং,

বুদ্ধঞ্চ ধম্মমমলং গণমুত্তমঞ্চ;

সত্থুস্স তস্স ৰচনত্থৰরং সুবুদ্ধুং,

ৰক্খামি সুত্তহিতমেত্থ সুসন্ধিকপ্পং.

(খ)

সেয্যং জিনেরিতনযেন বুধা লভন্তি,

তঞ্চাপি তস্স ৰচনত্থসুবোধনেন;

অত্থঞ্চ অক্খরপদেসু অমোহভাৰা,

সেয্যত্থিকো পদমতো ৰিৰিধং সুণেয্যং.

১. , ১. অত্থো অক্খরসঞ্ঞাতো.

সব্বৰচনানমত্থো অক্খরেহেৰ সঞ্ঞাযতে. অক্খরৰিপত্তিযং হি অত্থস্স দুন্নযথা হোতি, তস্মা অক্খরকোসল্লং বহূপকারং সুত্তন্তেসু.

২. , ২. অক্খরাপাদযো একচত্তালীসং.

তে চ খো অক্খরা অপি অকারাদযো একচত্তা লীস সুত্তন্তেসু সোপকারা.

তং যথা? অ আ ই ঈ উ ঊ এ ও, ক খ গ ঘ ঙ, চ ছ জ ঝ ঞ, ট ঠ ড ঢ ণ, ত থ দ ধ ন, প ফ ব ভ ম, য র ল ৰ স হ ল় অং, ইতি অক্খরা নাম.

তেন ক্ৰত্থো? অত্থো অক্খরসঞ্ঞাতো.

৩. , ৩. তত্থোদন্তা সরা অট্ঠ.

তত্থ অক্খরেসু অকারাদীসু ওদন্তা অট্ঠ অক্খরা সরা নাম হোন্তি.

তং যথা? অ আ ই ঈ উ ঊ এ ও, ইতি সরা নাম.

তেন ক্ৰত্থো? সরা সরে লোপং.

৪. , ৪. লহুমত্তা তযো রস্সা.

তত্থ অট্ঠসু সরেসু লহুমত্তা তযো সরা রস্সা নাম হোন্তি.

তং যথা? অ ই উ, ইতি রস্সা নাম.

তেন ক্ৰত্থো? রস্সং.

৫. , ৫. অঞ্ঞে দীঘা.

তত্থ অট্ঠসু সরেসু রস্সেহি অঞ্ঞে পঞ্চ সরা দীঘা নাম হোন্তি.

তং যথা? আ ঈ ঊ এ ও, ইতি দীঘা নাম.

তেন ক্ৰত্থো? দীঘং.

৬. , ৮. সেসা ব্যঞ্জনা.

ঠপেত্ৰা অট্ঠ সরে সেসা অক্খরা ককারাদযো নিগ্গহিতন্তা ব্যঞ্জনা নাম হোন্তি.

তং যথা? ক খ গ ঘ ঙ, চ ছ জ ঝ ঞ, ট ঠ ড ঢ ণ, ত থ দ ধ ন, প ফ ব ভ ম, য র ল ৰ স হ ল় অং, ইতি ব্যঞ্জনা নাম.

তেন ক্ৰত্থো? সরা পকতি ব্যঞ্জনে.

৭. , ৯. ৰগ্গা পঞ্চপঞ্চসো মন্তা.

তেসং খো ব্যঞ্জনানং ককারাদযো মকারন্তা পঞ্চপঞ্চসো অক্খরৰন্তো ৰগ্গা নাম হোন্তি.

তং যথা? ক খ গ ঘ ঙ, চ ছ জ ঝ ঞ, ট ঠ ড ঢ ণ, ত থ দ ধ ন, প ফ ব ভ ম, ইতি ৰগ্গা নাম.

তেন ক্ৰত্থো? ৰগ্গন্তং ৰা ৰগ্গে.

৮. , ১০. অং ইতি নিগ্গহিতং.

অং ইতি নিগ্গহিতং নাম হোতি.

তেন ক্ৰত্থো? অং ব্যঞ্জনে নিগ্গহিতং.

৯. , ১১. পরসমঞ্ঞা পযোগে.

যা চ পন পরেসু সক্কতগন্থেসু সমঞ্ঞা ঘোসাতি ৰা অঘোসাতি ৰা, তা পযোগে সতি এত্থাপি যুজ্জন্তে.

তত্থ ঘোসা নাম-গ ঘ ঙ, জ ঝ ঞ, ড ঢ ণ, দ ধ ন, ব ভ ম, য র ল ৰ হ ল়, ইতি ঘোসা নাম. অঘোসা নাম-ক খ, চ ছ, ট ঠ, ত থ, প ফ, স, ইতি অঘোসা নাম.

তেন ক্ৰত্থো? ৰগ্গে ঘোসাঘোসানং ততিযপঠমা.

১০. , ১২. পুব্বমধোঠিত মস্সরং সরেন ৰিযোজযে.

তত্থ সন্ধিং কত্তুকামো পুব্বব্যঞ্জনং অধোঠিতং অস্সরং কত্ৰা সরঞ্চ উপরি কত্ৰা সরেন ৰিযোজযে.

তত্রাযমাদি.

১১. , ১৪. নযে পরং যুত্তে.

অস্সরং খো ব্যঞ্জনং অধোঠতং পরক্খরং নযে যুত্তে. তত্রাভিরতিমিচ্ছেয্য.

যুত্তেতিকস্মা? অক্কোচ্ছি মং অৰধি মং, অজিনি মং অহাসি মে. এত্থ পন যুত্তং ন হোতি.

ইতি সন্ধিকপ্পে পঠমো কণ্ডো.

দুতিযকণ্ড

১২. , ১৩. সরা সরে লোপং.

সরা খো সরে পরে লোপং পপ্পোন্তি.

যস্সিন্দ্রিযানি সমথঙ্গতানি. নো হেতং ভন্তে সমেতাযস্মা সঙ্ঘেন.

১৩. , ১৫. ৰা পরো অসরূপা.

সরম্হা অসরূপা পরো সরো লোপং পপ্পোতি ৰা.

চত্তারো’মে ভিক্খৰে ধম্মা, কিন্নু’ মাৰসমণিযো. ৰাতি কস্মা? পঞ্চিন্দ্রিযানি, তযস্সু ধম্মা জহিতা ভৰন্তি.

১৪. , ১৬. ক্ৰচাসচণ্ণং লুত্তে.

সরো খো পরো পুব্বসরে লুত্তে ক্ৰচি অসৰণ্ণং পপ্পোতি.

সঙ্খ্যং নোপেতি ৰেদগূ, বন্ধুস্সেৰ সমাগমো.

ক্ৰচীতি কস্মা? যস্সিন্দ্রিযানি, তথূপমং ধম্মৰরং অদেসযি.

১৫. , ১৭. দীঘং.

সরো খো পরো পুব্বসরে লুত্তে ক্ৰচি দীঘং পপ্পোতি. সদ্ধীধ ৰিত্তং পুরিসস্স সেট্ঠং, অনাগারেহি চূভযং.

ক্ৰচীতি কস্মা? পঞ্চহুপালি অঙ্গেহি সমন্নাগতো. নত্থঞ্ঞং কিঞ্চি.

১৬. , ১৮. পুব্বো চ.

পুব্বো চ সরো পরসরলোপে কতে ক্ৰচি দীঘং পপ্পোতি.

কিংসূধ ৰিত্তং পুরিসস্স সেট্ঠং, সাধূতি পটিস্সুণিত্ৰা, ক্ৰচীতি কস্মা? ইতিস্স মুহুত্তম্পি.

১৭. , ১৯. যমেদন্তস্সাদেসো.

একারস্স অন্তভূতস্স সরে পরে ক্ৰচি যকারাদেসো হোতি.

অধিগতো খো ম্যাযং ধম্মো, ত্যাহং এৰং ৰদেয্যং, ত্যাস্স পহীনা হোন্তি.

ক্ৰচীতি কস্মা? নে’নাগতা, ইতি নেত্থ.

১৮. , ২০. ৰমোদুদন্তানং.

ওকারুকারানং অন্তভূতানং সরে পরে ক্ৰচি ৰকারাদেসো হোতি.

অথ খ্ৰস্স, স্ৰস্স হোতি, বহ্ৰাবাধো, ৰত্থ্ৰেত্থ ৰিহিতং নিচ্চং চক্খাপাথমাগচ্ছতি.

ক্ৰচীতিকস্মা? চত্তারো’মে ভিক্খৰে ধম্মা, কিন্নুমাৰ সমণিযো.

১৯. , ২২. সব্বো চংতি.

সব্বো ইচ্চেসো তিসদ্দো ব্যঞ্জনো সরে পরে ক্ৰচি চকারং পপ্পোতি.

ইচ্চেতং কুসলং, ইচ্চস্স ৰচনীযং, পচ্চুত্তরিত্ৰা, পচ্চাহরতি.

ক্ৰচীতি কস্মা? ইতিস্স মুহুত্তম্পি.

২০. , ২৭. দো ধস্স চ.

ধইচ্চেতস্স সরে পরে ক্ৰচি দকারাদেসো হোতি.

একমিদাহং ভিক্খৰে সমযং.

ক্ৰচীতি কস্মা? ইধেৰ মরণং ভৰিস্সতি.

ৰগ্গহণেন ধকারস্স হকারাদেসো হোতি সাহু দস্সন মরিযানং.

সুত্তৰিভাগেন বহুধা সিযা-

তো দস্স, যথা? সুগতো.

টো তস্স, যথা? দুক্কটং.

ধো তস্স, যথা? গন্ধব্বো.

ত্রো ত্তস্স, যথা? অত্রজো.

কো গস্স, যথা? কুলূপকো.

লো রস্স, যথা? মহাসালো.

জো যস্স, যথা? গৰজো.

ব্বো ৰস্স, যথা? কুব্বতো.

কো যস্স, যথা? সকে.

যো জস্স, যথা? নিযংপুত্তং.

কো তস্স, যথা? নিযকো.

চ্চো ত্তস্স, যথা ভচ্চো.

ফো পস্স, যথা? নিপ্ফত্তি.

খো কস্স, যথা? নিক্খমতি. ইচ্চেৰমাদী যোজেতব্বা.

২১. , ২১. ইৰণ্ণো যং নৰা.

পুব্বো ইৰণ্ণো সরে পরে যকারং পপ্পোতি নৰা. পটিসুন্থারৰুত্যস্স, সব্বা ৰিত্যানুভূযতে.

নৰাতি কস্মা? পঞ্চহঙ্গেহি সমন্নাগতো, মুত্তচাগী অনুদ্ধতো.

২২. , ২৮. এৰাদিস্স রি পুব্বো চ রস্সো.

সরম্হা পরস্স এৰস্স একারস্স আদিস্স রিকারো হোতি, পুব্বো চ সরো রস্সো হোতি নৰা.

যথরিৰ ৰসুধাতলঞ্চ সব্বং, তথরিৰ গুণৰা সুপূজনিযো.

নৰাতি কস্মা? যথা এৰ, তথা এৰ.

ইতি সন্ধিকপ্পে দুতিযো কণ্ডো.

ততিযকণ্ড

২৩. , ২৬. সরা পকতি ব্যঞ্জনে.

সরা খো ব্যঞ্জনে পরে পকতিরূপানি হোন্তি.

মনোপুব্বঙ্গমা ধম্মা, পমাদো মচ্চুনো পদং, তিণ্ণো পারঙ্গতো অহু.

২৪. , ৩৫. সরে ক্ৰচি.

সরা খো সরে পরে ক্ৰচি পকতিরূপানি হোন্তি.

কো ইমং পথৰিং ৰিচেস্সতি.

ক্ৰচীতি কস্মা? অপ্পস্সুতাযং পুরিসো.

২৫. , ৩৭. দীঘং.

সরা খো ব্যঞ্জনে পরে ক্ৰচি দীঘং পপ্পোন্তি.

সম্মা ধম্মং ৰিপস্সতো, এৰং গামে মুনী চরে, খন্তী পরমং তপো তিতিক্খা.

ক্ৰচীতি কস্মা? ইধ মোদতি পেচ্চ মোদতি, পতিলীযতি, পটিহঞ্ঞতি.

২৬. , ৩৮. রস্সং.

সরা খো ব্যঞ্জনে পরে ক্ৰচি রস্সং পপ্পোন্তি.

ভোৰাদিনাম সো হোতি, যথাভাৰি গুণেন সো.

ক্ৰচীতি কস্মা? সম্মাসমাধি, সাৰিত্তী ছন্দসো মুখং, উপনীযতি জীৰিতমপ্পমাযু.

২৭. , ৩৯. লোপঞ্চ তত্রাকারো.

সরা খো ব্যঞ্জনে পরে ক্ৰচি লোপং পপ্পোন্তি. তত্র চ লোপে কতে অকারাগমো হোতি.

স সীলৰা. স পঞ্ঞৰা এস ধম্মো সনন্তনো, স ৰে কসাৰমরহতি, স মানকামোপি ভৰেয্য, স ৰে মুনি জাতিভযং অদস্সি.

ক্ৰচীতি কস্মা? সো মুনি, এসো ধম্মো পদিস্সতি, ন সো কাসাৰমরহতি.

২৮. , ৪০. পর দ্ৰেভাৰো ঠানে.

সরম্হা পরস্স ব্যঞ্জনস্স দ্ৰেভাৰো হোতি ঠানে.

ইধপ্পমাদো, পুরিসস্স জন্তুনো, পব্বজ্জং কিত্তযিস্সামি, চাতুদ্দসি, পঞ্চদ্দসি, অভিক্কন্ততরো চন্দো.

ঠানেতি কস্মা? ইধ মোদতি পেচ্চ মোদতি.

২৯. , ৪২. ৰগ্গে ঘোসাঘোসানং ততিযপঠমা.

ৰগ্গে খো পুব্বেসং ব্যঞ্জনানং ঘোসাঘোসভূতানং সরম্হা যথাসঙ্খ্যং ততিযপঠমক্খরা দ্ৰেভাৰং গচ্ছন্তি ঠানে.

এসেৰ চজ্ঝানপ্ফলো, যত্রট্ঠিতং নপ্পসহেয্য মচ্চু, সেলে যথা পব্বতমুদ্ধনিট্ঠিতো, চত্তারিট্ঠানানি নরো পমত্তো.

ঠানেতি কস্মা? ইধ চেতসো দল়্হং গণ্হাতি থামসা.

ইতি সন্ধিকপ্পে ততিযো কণ্ডো.

চতুত্থকণ্ড

৩০. , ৫৮. অং ব্যঞ্জনে নিগ্গহিতং.

নিগ্গহিতং খো ব্যঞ্জনে পরে অং ইতি হোতি.

এৰং ৰুত্তে, তং সাধূতি পটিস্সুণিত্ৰা.

৩১. , ৪৯. ৰগ্গন্তং ৰা ৰগ্গে.

ৰগ্গভূতে ব্যঞ্জনে পরে নিগ্গহিতং খো ৰগ্গন্তং ৰা পপ্পোতি.

তন্নিচ্চুতং, ধম্মঞ্চরে সুচরিতং, চিরপ্পৰাসিং পুরিসং. সন্তন্তস্স মনং হোতি, তঙ্কারুণিকং, এৰঙ্খো ভিক্খৰে সিক্খিতব্বং.

ৰাগ্গহণেননিগ্গহিতং খো লকারাদেসো হোতি. পুগ্গলং.

ৰাতি কস্মা? ন তং কম্মং কতং সাধু.

৩২. , ৫০. এহে উং.

একারহকারে পরে নিগ্গহিতং খো ঞকারং পপ্পোতি ৰা.

পচ্চত্তঞ্ঞেৰ পরিনিব্বাযিস্সামি, তঞ্ঞেৰেত্থ পটিপুচ্ছিস্সামি, এৰঞ্হি ৰো ভিক্খৰে সিক্খিতব্বং. তঞ্হি তস্স মুসা হোতি.