২. নামকপ্প

পঠমকণ্ড

৫২. , ৬০. জিনৰচনযুত্তং হি.

‘‘জিনৰচনযুত্তং হি’’ ইচ্চেতং অধিকারত্থং ৰেদিতব্বং.

৫৩. , ৬১. লিঙ্গঞ্চ নিপ্পজ্জতে.

যথা যথা জিনৰচনযুত্তং হি লিঙ্গং, তথা তথা ইধ লিঙ্গঞ্চ নিপ্পজ্জতে.

তং যথা? এসো নো সত্থা, ব্রহ্মা অত্তা, সখা, রাজা.

৫৪. , ৬২. ততো চ ৰিভত্তিযো.

ততো জিনৰচনযুত্তেহি লিঙ্গেহি ৰিভত্তিযো পরা হোন্তি.

৫৫. , ৬৩. সি যো, অং যো, না হি, স নং, স্মা হি, স নং, স্মিং সু.

কা চ পন তাযো ৰিভত্তিযো? সি, যো ইতি পঠমা, অং, যোইতি দুতিযা, না হি ইতি ততিযা, স, নংইতি চতুত্থী, স্মা, হি ইতি পঞ্চমী, স, নং ইতি ছট্ঠী, স্মিং, সু ইতি সত্তমী.

ৰিভত্তিইচ্চনেন ক্ৰত্থো? অম্হস্স মমং সৰিভত্তিস্স সে.

৫৬. , ৬৪. তদনুপরোধেন.

যথা যথা তেসং জিনৰচনানং অনুপরোধো. তথা তথা ইধ লিঙ্গঞ্চ নিপ্পজ্জতে.

৫৭. , ৭১. আলপনে সি গ সঞ্ঞো.

আলপনত্থে সি গসঞ্ঞো হোতি.

ভোতি অয্যে, ভোতি কঞ্ঞে, ভোতি খরাদিযে.

আলপনেতি কিমত্থং? সা অয্যা.

সীতি কিমত্থং? ভোতিযো অয্যাযো.

গইচ্চনেন ক্ৰত্থো? ঘতে চ.

৫৮. , ২৯. ইৰণ্ণুৰণ্ণা ঝলা.

ইৰণ্ণুৰণ্ণাইচ্চেতে ঝলসঞ্ঞা হোন্তি যথাসঙ্খ্যং.

ইসিনো, অগ্গিনো, গহপতিনো, দণ্ডিনো. সেতুনো, কেতুনো, ভিক্খুনো. সযম্ভুনো, অভিভুনো.

ঝলইচ্চনেন ক্ৰত্থো? ঝলতো সস্স নো ৰা.

৫৯. , ১৮২. তে ইত্থিখ্যা পো.

তে ইৰণ্ণুৰণ্ণা যদা ইত্থিখ্যা, তদা পসঞ্ঞা হোন্তি.

রত্তিযা, ইত্থিযা, ধেনুযা, ৰধুযা.

ইত্থিখ্যাতি কিমত্থং? ইসিনা, ভিক্খুনা.

সইচ্চনেন ক্ৰত্থো? পতো যা.

৬০. , ১৭৭. আ ঘো.

আকারো যদা ইত্থিখ্যো, তদা ঘসঞ্ঞো হোতি.

সদ্ধায, কঞ্ঞায, ৰীণায, গঙ্গায, দিসায সালায, মালায, তুলায, দোলায, পভায, সোভায, পঞ্ঞায, করুণায নাৰায, কপালিকায.

আতি কিমত্থং? রত্তিযা, ইত্থিযা.

ইত্থিখ্যোতি কিমত্থং? সত্থারা দেসিতো অযং ধম্মো.

ঘইচ্চনেন ক্ৰত্থো? ঘতো নাদীনং.

৬১. , ৮৬. সাগমো সে.

সকারাগমো হোতি সে ৰিভত্তিম্হি.

পুরিসস্স, অগ্গিস্স, ইসিস্স, দণ্ডিস্স, ভিক্খুস্স, সযম্ভুস্স, অভিভুস্স.

সেতি কিমত্তং? পুরিসস্মিং.

৬২. , ২০৬. সংসাস্ৰেকৰচনেসু চ.

সংসাসু একৰচনেসু ৰিভত্তাদেসেসু সকারাগমো হোতি.

এতিস্সং, এতিস্সা ইমিস্সং, ইমিস্সা, তিস্সং, তিস্সা,

তস্সং তস্সা, যস্সং, যস্সা, অমুস্সং, অমুস্সা.

সংসাস্ৰীতি কিমত্থং? অগ্গিনা, পাণিনা.

একৰচনেস্ৰীতি কিমত্থং? তাসং, সব্বাসং.

ৰিভত্তাদেসেস্ৰীতি কিমত্থং? মনসা, ৰচসা, থামসা.

৬৩. , ২১৭. এতিমাসমি.

এতাইমাইচ্চেতেসমন্তো সরো ইকারো হোতি সংসাসু একৰচনেসু ৰিভত্তাদেসেসু.

এতিস্সং, এতিস্সা, ইমিস্সং, ইমিস্সা.

সংসাস্ৰীতি কিমত্থং? এতায, ইমায.

একৰচনেস্ৰীতি কিমত্থং? এতাসং, ইমাসং.

৬৪. , ২১৬. তস্সা ৰা.

তস্সা ইত্থিযং ৰত্তমানস্স অন্তস্স আকারস্স ইকারো হোতি ৰা সংসাসু একৰচনেসু ৰিভত্তাদেসেসু.

তিস্সং, তিস্সা, তস্সং, তস্সা.

৬৫. , ২১৫. ততো সস্স স্সায.

ততো তা এতা ইমাতো সস্স ৰিভত্তিস্স স্সাযাদেসো হোতি ৰা.

তিস্সায, এতিস্সায, ইমিস্সায.

ৰাতি কিমত্থং? তিস্সা, এতিস্সা, ইমিস্সা.

৬৬. , ২০৫. ঘো রস্সং.

ঘো রস্সমাপজ্জতে সংসাসু একৰচনেসু ৰিভত্তাদেসেসু.

তস্সং, তস্সা, যস্সং, যস্সা, সব্বস্সং, সব্বস্সা.

সংসাস্ৰীতি কিমত্থং? তায, সব্বায.

একৰচনেস্ৰীতি কিমত্থং? তাসং, সব্বাসং.

৬৭. , ২২৯. নো চ দ্ৰাদিতো নংম্হি.

দ্ৰিইচ্চেৰমাদিতো সঙ্খ্যাতো নকারাগমো হোতি নংম্হি ৰিভত্তিম্হি.

দ্ৰিন্নং, তিন্নং, চতুন্নং, পঞ্চন্নং, ছন্নং, সত্তন্নং, অট্ঠন্নং, নৰন্নং, দসন্নং.

দ্ৰাদিতোতি কিমত্থং? সহস্সানং.

নংম্হীতি কিমত্থং? দ্ৰীসু, তীসু.

চগ্গহণেনস্সঞ্চাগমো হোতি. চতস্সন্নং ইত্থীনং তিস্সন্নং ৰেদনানং.

৬৮. , ১৮৪. অমা পতো স্মিংস্মানং ৰা.

পইচ্চেতস্মা স্মিংস্মাইচ্চেতেসং অংআআদেসা হোন্তি ৰা যথাসঙ্খ্যং.

মত্যং, মতিযং, মত্যা, মতিযা, নিকত্যং. নিকতিযং, নিকত্যা, নিকতিযা, ৰিকত্যং, ৰিকতিযং, ৰিকত্যা, ৰিকতিযা, ৰিরত্যং, ৰিরতিযং, ৰিরত্যা, ৰিরতিযা, রত্যং, রতিযং, রত্যা, রতিযা, পুথব্যং, পুথৰিযং, পুথব্যা, পুথৰিযা, পৰত্যং, পৰত্যা, পৰত্তিযং, পৰত্তিযা.

৬৯. , ১৮৬. আদিতো ও চ.

আদিইচ্চেতস্মা স্মিংৰচনস্স অংওআদেসা হোন্তি ৰা.

আদীং, আদো.

ৰাতি কিমত্থং? আদিস্মিং, আদিম্হি নাথং নমস্সিত্ৰান,

চগ্গহণেন অঞ্ঞস্মাপি স্মিং ৰচনস্স আ ও অংআদেসা হোন্তি. দিৰা চ রত্তো চ হরন্তি যে বলি. বারাণসিং অহু রাজা.

৭০. , ৩০. ঝলানমিযুৰা সরে ৰা.

ঝলইচ্চেতেসং ইয উৰইচ্চেতে আদেসা হোন্তি ৰা সরে পরে যথাসঙ্খ্যং.

তিযন্তং পচ্ছিযাগারে, অগ্গিযাগারে, ভিক্খুৰাসনে নিসীদতি, ৰুথুৰাসনে নিসীদতি.

সরেতি কিমত্থং? তিমলং, তিফলং, তিচতুক্কং, তিদণ্ডং, তিলোকং, তিনযনং, তিপাসং, তিহংসং, তিভৰং, তিখন্ধং, তিপিটকং, তিৰেদনং, চতুদ্দিসং, পুথুভূতং.

ৰাতি কিমত্থং? পঞ্চহঙ্গেহি তীহাকারেহি. চক্খাযতনং.

ৰাতি ৰিকপ্পনত্থং, ইকারস্স অযাদেসো হোতি, ৰত্থুত্তযং.

৭১. , ৫০৫. যৰকারা চ.

ঝলানং যকার ৰকারাদেসা হোন্তি সরে পরে যথাসঙ্খ্যং.

অগ্যাগারং, পক্খাযতনং, স্ৰাগতং, তে মহাৰীর.

চগ্গহণং সম্পিণ্ডনত্থং.

৭২. , ১৮৫. পসঞ্ঞস্স চ.

পসঞ্ঞস্স চ ইৰণ্ণস্স ৰিভত্তাদেসে সরে পরে যকারাদেসো হোতি.

পুথব্যা, রত্যা, মত্যা.

সরেতি কিমত্থং? পুথৰিযং.

৭৩. , ১৭৪. গাৰ সে.

গোইচ্চেতস্স ওকারস্স আৰাদেসো হোতি সে ৰিভত্তিম্হি.

গাৰস্স.

৭৪. , ১৬৯. যোসু চ.

গোইচ্চেতস্স ওকারস্স আৰাদেসো হোতি যোইচ্চেতেসু পরেসু.

গাৰো গচ্ছন্তি, গাৰো পস্সন্তি, গাৰী গচ্ছন্তি, গাৰী পস্সন্তি.

চগ্গহণং কিমত্থং? নাস্মাস্মিংসু ৰচনেসু আৰা দেসো হোতি.

গাৰেন, গাৰা, গাৰে, গাৰেসু.

৭৫. , ১৭০. অৰম্হি চ.

গোইচ্চেতস্স ওকারস্স আৰঅৰইচ্চেতে আদেসা হোন্তি অংম্হি ৰিভত্তিম্হি.

গাৰং, গৰং.

চগ্গহণেন সাদিসেসেসু পুব্বুত্তৰচনেসু গোইচ্চেতস্স ওকারস্স অৰাদেসো হোতি.

গৰস্স, গৰো, গৰেন, গৰা, গৰে, গৰেসু.

৭৬. , ১৭১. আৰস্সু ৰা.

আৰইচ্চেতস্স গাৰাদেসস্স অন্ত সরস্স উকারাদেসো হোতি ৰা অংম্হি ৰিভত্তিম্হি.

গাৰুং, গাৰং.

আৰস্সেতি কিমত্থং? গাৰো তিট্ঠন্তি.

৭৭. , ১৭৫. ততো নমং পতিম্হা লুত্তে চ সমাসে.

ততো গোসদ্দতো নংৰচনস্স অংআদেসো হোতি, গোইচ্চেতস্স ওকারস্স অৰাদেসো হোতি পতিম্হি পরে অলুত্তে চ সমাসে.

গৰপতি.

অলুত্তেতি কিমত্থং? গোপতি.

চগ্গহণেন অসমাসেপি নংৰচনস্স অংআদেসো হোতি, গোইচ্চেতস্স ওকারস্স অৰাদেসো হোতি.

গৰং.

৭৮. , ৩. ওসরে চ.

গোইচ্চেতস্স ওকারস্স অৰাদেসো হোতি সমাসে চ সরে পরে.

গৰস্সকং, গৰেল়কং, গৰাজিনং.

চগ্গহণেন উৰণ্ণইচ্চেৰমন্তানং লিঙ্গানং উৰঅৰউরাদেসা হোন্তি স্মিংযোইচ্চেতেসু ক্ৰচি.

ভুৰি, পসৰো, গুরৰো, চতুরো.

সরেতি কিমত্থং? গোধনো, গোৰিন্দো.

৭৯. , ৪৬. তব্বিপরীতূপপদে ব্যঞ্জনে চ.

তস্স অৰসদ্দস্স যদা উপপদে তিট্ঠমানস্স তস্স ওকারস্স ৰিপরীতো হোতি ব্যঞ্জনে পরে.

উগ্গতে সূরিযে, উগ্গচ্ছতি, উগ্গহেত্ৰা.

চগ্গহণমৰধারণত্থং. অৰসানে, অৰকিরণে, অৰকিরতি.

৮০. , ১৭৩. গোণ নংম্হি ৰা.

সব্বস্সেৰ গোসদ্দস্স গোণাদেসো হোতি ৰা নংম্হি ৰিভত্তিম্হি.

গোণানং সত্তন্নং.

ৰাতি কিমত্থং?

গোনঞ্চে তরমানানং, উজুং গচ্ছতি পুঙ্গৰো.

সব্বা গাৰী উজুং যন্তি, নেত্তে উজুং গতে সতি.

যোগৰিভাগেন অঞ্ঞত্রাপি গোণাদেসো হোতি. গোণভূতানং.

৮১. , ১৭২. সুহিনাসু চ.

সুহিনাইচ্চেতেসু সব্বস্স গোসদ্দস্স গোণাদেসো হোতি ৰা.

গোণেসু, গোণেহি, গোণেভি, গোণেন.

ৰাতি কিমত্থং? গোসু, গোহি, গোভি, গৰেন.

চগ্গহণেন স্যাদিসেসেসু পুব্বুত্তরৰচনেসুপি গোণ গু গৰযাদেসা হোন্তি. গোণো, গোণা, গোণং, গোণে, গোণস্স, গোণম্হা. গোণম্হি, গুন্নং, গৰযেহি, গৰযেভি.

৮২. , ১৪৯. অংমো নিগ্গহিতং ঝলপেহি.

অংৰচনস্স মকারস্স চ ঝলপইচ্চেতেহি নিগ্গহিতং হোতি

অগ্গিং, ইসিং, গহপতিং, দণ্ডিং, মহেসিং, ভিক্খুং, পটুং, সযম্ভুং, অভিভুং, রত্তিং, ইত্থিং, ৰধুং, পুল্লিঙ্গং, পুম্ভাৰো, পুঙ্কোকিলো.

অংমোতি কিমত্থং? অগ্গিনা, পাণিনা, ভিক্খুনা, রত্তিযা, ইত্থিযা, ৰধুযা.

ঝলপেহীতি কিমত্থং? সুখং, দুক্খং.

পুনারম্ভ হণং ৰিভাসানিৰত্তনত্থং. অগ্গিং, পটুং, বুদ্ধিং, ৰধুং.

৮৩. , ৬৭. সরলোপো’ মাদেস পচ্চযাদিম্হি সরলোপে তু পকতি.

সরলোপো হোতি অমাদেসপচ্চযাদিম্হি সর লোপে তু পকতি হোতি.

পুরিসং, পুরিসে, পাপং, পাপে, পাপিযো, পাপিট্ঠো.

অমাদেসপচ্চযাদিম্হীতি কি ত্থং? অপ্পমাদো অমতং পদং.

সরলোপেতি কিমত্থং? পুরিসস্স, দণ্ডিনং.

তুগ্গহণমৰধারণত্থং. ভিক্খুনী, গহপতানী.

পকতিগ্গহণসামত্থেন পুন সন্ধিভাৰো চ হোতি. সেয্যো, সেট্ঠো, জেয্যো, জেট্ঠো.

৮৪. , ১৪৪. অঘোরস্সমেকৰচনযোস্ৰপি চ.