চতুত্থকণ্ড

৩০. , ৫৮. অং ব্যঞ্জনে নিগ্গহিতং.

নিগ্গহিতং খো ব্যঞ্জনে পরে অং ইতি হোতি.

এৰং ৰুত্তে, তং সাধূতি পটিস্সুণিত্ৰা.

৩১. , ৪৯. ৰগ্গন্তং ৰা ৰগ্গে.

ৰগ্গভূতে ব্যঞ্জনে পরে নিগ্গহিতং খো ৰগ্গন্তং ৰা পপ্পোতি.

তন্নিচ্চুতং, ধম্মঞ্চরে সুচরিতং, চিরপ্পৰাসিং পুরিসং. সন্তন্তস্স মনং হোতি, তঙ্কারুণিকং, এৰঙ্খো ভিক্খৰে সিক্খিতব্বং.

ৰাগ্গহণেননিগ্গহিতং খো লকারাদেসো হোতি. পুগ্গলং.

ৰাতি কস্মা? ন তং কম্মং কতং সাধু.

৩২. , ৫০. এহে উং.

একারহকারে পরে নিগ্গহিতং খো ঞকারং পপ্পোতি ৰা.

পচ্চত্তঞ্ঞেৰ পরিনিব্বাযিস্সামি, তঞ্ঞেৰেত্থ পটিপুচ্ছিস্সামি, এৰঞ্হি ৰো ভিক্খৰে সিক্খিতব্বং. তঞ্হি তস্স মুসা হোতি.

ৰাতি কস্মা? এৰমেতং অভিঞ্ঞায, এৰং হোতি সুভাসিতং.

৩৩. , ৫০. সযে চ.

নিগ্গহিতং খো যকারে পরে সহ যকারেন ঞকারং পপ্পোতি ৰা.

সঞ্ঞোগো, সঞ্ঞুত্তং.

ৰাতি কস্মা? সংযোগো, সংযুত্তং.

৩৪. , ৫২. মদা সরে.

নিগ্গহিতস্স খো সরে পরে মকারদকারাদেসা হোন্তি ৰা.

তমহং ব্রূমি ব্রাহ্মণং, এতদৰোচ সত্থা.

ৰাতি কস্মা? অক্কোচ্ছি মং অৰধি মং, অজিনি মং অহাসি মে.

৩৫. , ৩৪. য ৰ ম দ ন ত র লা চাগমা.

সরে পরে যকারো ৰকারো মকারো দকারো নকারো তকারো রকারো লকারো ইমে আগমা হোন্তি ৰা.

নযিমস্স ৰিজ্জা, যথযিদং চিত্তং. মিগী ভন্তা ৰুদিক্খতি, সিত্তা তে লহু মেস্সতি, অসিত্তা তে গরু মেস্সতি. অস্সো ভদ্রো কসামিৰ, সম্মদঞ্ঞা ৰিমুত্তানং. মনসাদঞ্ঞা ৰিমুত্তানং, অত্তদত্থমভিঞ্ঞায. চিরংনাযতি, ইতো নাযতি. যস্মাতিহ ভিক্খৰে, তস্মাতিহ ভিক্খৰে, অজ্জতগ্গে পাণুপেতং. সব্ভিরেৰ সমাসেথ, আরগ্গেরিৰ সাসপো, সাসপোরিৰ আরগ্গা. ছল়ভিঞ্ঞা, সল়াযতনং.

ৰাতি কস্মা? এৰং মহিদ্ধিযা এসা, অক্কোচ্ছি মং অৰধি মং, অজিনি মং অহাসি মে, অজেয্যো অনুগামিকো.

চগ্গহণেন ইধেৰ মকারস্স পকারো হোতি. চিরপ্পৰাসিং পুরিসং.

ককারস্স চ দকারো হোতি. সদত্থপসুতো সিযা.

দকারস্স চ তকারো হোতি, সুগতো.

৩৬. , ৪৭. ক্ৰচি ও ব্যঞ্জনে.

ব্যঞ্জনে পরে ক্ৰচি ওকারাগমো হোতি.

অতিপ্পগো খো তাৰ সাৰত্থিযং পিণ্ডায চরিতুং. পরোসহস্সং.

ক্ৰচীকি কস্মা? এথ পস্সথিমং লোকং, অন্ধীভূতো অযং লোকো.

৩৭. , ৫৭. নিগ্গহিতঞ্চ.

নিগ্গহিতঞ্চাগমো হোতি সরে ৰা ব্যঞ্জনে ৰা পরে ক্ৰচি.

চক্খুংউদপাদি, অৰংসিরো, যাৰঞ্চিধ ভিক্খৰে পুরিমং জাতিং সরামি, অণুংথূলানি সব্বসো, মনোপুব্বঙ্গমা ধম্মা.

ক্ৰচীতি কস্মা? ইধেৰ নং পসংসন্তি, পেচ্চ সগ্গে পমোদতি, ন হি এতেহি যানেহি, গচ্ছেয্য অগতং দিসং.

চগ্গহণেন ৰিসদ্দস্স চ পকারো হোতি. পচেস্সতি, ৰিচেস্সতি ৰা.

৩৮. , ৫৩. ক্ৰচি লোপং.

নিগ্গহিতং খো সরে পরে ক্ৰচি লোপং পপ্পোতি.

তাসাহং সন্তিকে, ৰিদূনগ্গমিতি.

ক্ৰচীতি কস্মা? অহমেৰ নূন বালো এতমত্থং ৰিদিত্ৰান.

৩৯. , ৫৪. ব্যঞ্জনে চ.

নিগ্গহিতং খো ব্যঞ্জনে পরে ক্ৰচি লোপং পপ্পোতি.

অরিযসচ্চানদস্সনং, এতং বুদ্ধানসাসনং.

ক্ৰচীতি কস্মা? এতং মঙ্গলমুত্তমং, তং ৰো ৰদামি ভদ্দন্তে.

৪০. , ৫৫. পরো ৰাসরো.

নিগ্গহিতম্হা পরো সরো লোপং পপ্পোতি ৰা.

ভাসিতং অভিনন্দুন্তি, উত্তত্তংৰ, যথাবীজংৰ, যথাধঞ্ঞংৰ.

ৰাতি কস্মা? অহমেৰ নূন বালো, এতদহোসি.

৪১. , ৫৬. ব্যঞ্জনো চ ৰিসঞ্ঞোগো.

নিগ্গহিতম্হা পরস্মিং সরে লুত্তে যদি ব্যঞ্জনো সসঞ্ঞোগো ৰিসঞ্ঞোগো হোতি.

এৰংস তে আসৰো, পুপ্ফংসা উপ্পজ্জি.

লুত্তেতি কস্মা? এৰমস্স ৰিদূনগ্গমিতি.

চগ্গহণেন তিণ্ণং ব্যঞ্জনানমন্তরে যে সরূপা, তেসম্পি লোপো হোতি. অগ্যাগারং, পটিসন্থারৰুত্যস্স.

ইতি সন্ধিকপ্পে চতুত্থো কণ্ডো.