৪. |ও০.০০৩৩| পকিণ্ণককথা

তত্র ঠত্ৰা রঞেঞো উপ্পত্তি কথেতব্বা. (সো পন) অম্হাকং সত্থুনো বোধিপ্পত্তিতো পুরেতরমেৰ মহামলয রট্ঠে ৰনচরকং পটিচ্চ তস্স ভরিযায কুচ্ছিযং পটিসন্ধিং গণ্হি. নৰড্ঢমাসাৰসানে মাতুকুচ্ছিতো নিক্খমিত্ৰা কমেন ৰড্ঢন্তো ৰিঞ্ঞুভাৰং পাপুণি. তস্স পিতা একং দারিকং আনেত্ৰা পুত্তস্স গেহে অকাসি. অপরভাগে তস্স পিতা কালমকাসি. কুমারো’চরকো’তি পঞ্ঞাযি. সো ততো পট্ঠায পচ্চেকবুদ্ধং উপট্ঠহি. চরকো অত্তনো নিৰাসৰত্থুস্মিং কদলিপনসাদীনি রোপেত্ৰা ফলারামং অকাসি. ততো অপরভাগে তেন রোপিতপনসরুক্খো মহন্তং চাটিপ্পমাণং পনসফলং গণ্হি. চরকো অত্তনো ৰত্থুং গন্ত্ৰা সাখায সুপক্কং পনসফলং পস্সিত্ৰা ছিন্দিত্ৰা গেহং আহরিত্ৰা অপস্সাযং লুঞ্চিত্ৰা উপধারেসি. ততো সমন্তা চতুমধুরং ৰিয যূসং ওতরিত্ৰা অপস্সযং অপনীত আৰাটং পূরেত্ৰা অট্ঠাসি. ততো চরকো এৰং চিন্তেসি. ইমং পনসফলং অম্হাকং পচ্চেকবুদ্ধেন ৰিনা অঞ্ঞেসং নানুচ্ছৰিকন্তি. পটিসামেত্ৰা ঠপেসি.

পুনদিৰসে পচ্চেকবুদ্ধো লেনতো নিক্খমিত্ৰা সরীরপটিজগ্গনং কত্ৰা সুরত্তপল্লৰসদিসং অন্তরৰাসকং পরিমণ্ডলং কত্ৰা নিৰাসেত্ৰা বহলপৰরমহাপংসুকূলচীৰরং পারুপিত্ৰা নীলভমরৰণ্ণং পত্তং হত্থেন গহেত্ৰা আকাসেন আগন্ত্ৰা তস্স কুটিদ্ৰারে পাকটো অহোসি. চরকো কুটিতো নিক্খমিত্ৰা তং ৰন্দিত্ৰা হত্থতো পত্তং গহেত্ৰা গেহং পৰেসেত্ৰা পীঠে নিসীদাপেত্ৰা অত্তনা ঠপিতট্ঠানতো পনসফলং গহেত্ৰা যূসং পত্তে পূরেত্ৰা পটিগ্গহাপেসি. পচ্চেকবুদ্ধো |ও০.০০৩৪| তং পরিভুঞ্জিত্ৰা আকাসতো অত্তনো ৰসনট্ঠানমেৰ গতো. অথেকদিৰসং চরকো পরদেসা গচ্ছন্তো ভরিযং পক্কোসাপেত্ৰা;’ অম্ম, অয্যস্স অপ্পমত্তো হুত্ৰা দানং দেহী’তি সব্বূপকরণং নিয্যাদেত্ৰা পরদেসং গতো. পুনদিৰসে পচ্চেকবুদ্ধো লেনতো নিক্খমিত্ৰা চীৰরং পারুপিত্ৰা পত্তমাদায আকাসতো আগন্ত্ৰা কুটিদ্ৰারে ওতরিত্ৰা অট্ঠাসি. তস্মিং খণে চরকস্স ভরিযা কুটিতো নিক্খমিত্ৰা পচ্চেকবুদ্ধস্স হত্থতো পত্তং গহেত্ৰা গেহে নিসীদাপেত্ৰা ভত্তং অদাসি.

তেন ভত্তকিচ্চে পরিনিট্ঠিতে সা তরুণপচ্চেকবুদ্ধং পস্সিত্ৰা কিলেসপটিসংযুত্তং চিত্তং উপ্পাদেত্ৰা পচ্চেকবুদ্ধস্স অত্তনো অজ্ঝাসযং কথেসি. পচ্চেকবুদ্ধো তস্সা কথং সুত্ৰা জিগুচ্ছমানো উপ্পতিত্ৰা আকাসতো অত্তনো ৰসনট্ঠানমেৰ গতো. সা পচ্চেকবুদ্ধস্স গতকালে অত্তনো সরীরং তেলেন মক্খেত্ৰা ভণ্ডনকা ৰিয নিত্থুনমানা মঞ্চে নিপজ্জি. চরকো পরদেসতো আগন্ত্ৰা ভরিযং নিপজ্জমানং এৰমাহ?’ভদ্দে, কিং অয্যস্স ভিক্খং অদাসী’তি. সা নিত্থুনমানা আহ? মা পুচ্ছ তৰ অয্যস্স কম্মন্তি. কথেহি ভদ্দে, কিং তেন কম্মং কতন্তি. সো অত্তনা সদ্ধিং কিলেসৰস্নে ওকাসং কারাপেতুং ৰাযমিত্ৰা মযা অযুত্তন্তি ৰুত্তে মম কেসে গহেত্ৰা হত্থপাদেহি আকোটেত্ৰা সরীরং নখেন ওত্থরিত্ৰা সীসে পহরিত্ৰা গতো’তি ৰুত্তে চরকো তং সুত্ৰা অসহন্তো (এসো মযা) এৰরূপস্স অস্সমণকম্মস্স পোসিতো’তি ৰত্ৰা তস্সা সোকং ৰিনোদেত্ৰা ধনুং আদায তিক্খসরং গহেত্ৰা এতং মারেত্ৰা আগমিস্সামী’তি ৰত্ৰা ৰসনট্ঠানং অগমাসি.

তস্মিং সমযে পচ্চেকবুদ্ধো নহানত্থায গতো. গন্ত্ৰা চ পন কাযবন্ধনং আকাসে চীৰরৰংসং ৰিয কত্ৰা নিৰাসনপাপুরণং তস্মিং ঠপেত্ৰা জলসাটকং নিৰাসেত্ৰা উদকমত্থকা আকাসে নিসীদিত্ৰা নহাযিতুং আরভি. চরকো পচ্চেকবুদ্ধস্স গরুগারৰকারণং পস্সন্তো গুম্বন্তরে নিলীনো |ও০.০০৩৫| অট্ঠাসি. ঠত্ৰা চ পন এৰরূপং অচ্ছরিযং দিস্ৰা চিন্তেসি? অযঞ্চ এৰরূপং ন করোতি, অদ্ধা এসা মুসাৰাদা’তি. অহং এতিস্সা ৰচনং গহেত্ৰা এৰরূপস্স সমণস্স অকারণে অপরাধং কতং. এসো তাদিসং ন করোতী’তি চিন্তেত্ৰা পচ্চেকবুদ্ধস্স নহত্ৰা ঠীতকালে গন্ত্ৰা পাদেসু নিপতিত্ৰা?’ময্হং খমথ অয্যা’তি আহ. পচ্চেক বুদ্ধো? কিং কথেসি উপাসকা’তি. সো অত্তনো মাতুগামস্স কথিতং আচিক্খি. এৰঞ্হি সতি উপাসক তুম্হাকং আগতকম্মং নিট্ঠপেত্ৰা গন্তুং ৰট্টতী’তি আহ. মা এৰং কথেথ সামি, অহং অঞ্ঞাণভাৰেন তস্সা ৰচনং গহেত্ৰা তুম্হাকং অকারণে দুব্ভিতুং আগতোম্হি’তি সব্বং অত্তনা চিন্তিতং আচিক্খি.

পচ্চেকবুদ্ধো? আম উপাসক, সা অত্তনা সদ্ধিং অসদ্ধম্মপটিসংযুত্তকথং কথেসী’তি আহ. সো তস্সা কুজ্ঝিত্ৰা অহং এতং নিস্সায ইমস্স অপরজ্ঝামি. গন্ত্ৰা তং মারেস্সামী’তি পচ্চেকবুদ্ধং পঞ্চপতিট্ঠিতেন ৰন্দিত্ৰা নিক্খমি. পচ্চেকবুদ্ধো তং নিৰত্তেত্ৰা মাতুগামং মা মারেহী’তি অনেকৰিধানি কারণানি কথেত্ৰা পঞ্চসীলে পতিট্ঠপেত্ৰা তস্স ধম্মং দেসেন্তো ইমং গাথমাহ?

যো অপ্পদুট্ঠস্স নরস্স দুস্সতি,

সুদ্ধস্স পোসস্স অনঙ্গণস্স;

তমেৰ বালং পচ্চেতি পাপং,

সুখুমো রজো পটিৰাতংৰ খিত্তো’তি;

চরকো তস্স ধম্মদেসনং সুত্ৰা পসন্তচিত্তো হুত্ৰা পঞ্চপতিট্ঠিতেন ৰন্দিত্ৰা গেহং গন্ত্ৰা তায সদ্ধিং সমগ্গৰাসং ৰসিত্ৰা ততো পট্ঠায যাৰজীৰং পচ্চেকবুদ্ধস্স চীৰরপিণ্ডপাতসেনাসনগিলানপচ্চযভেসজ্জপরিক্খারাদযো পরিক্খারে চ দত্ৰা পটিজগ্গি. সো তস্মিংযেৰ লেনে ৰসন্তো অপরভাগে অনুপাদিসেসায নিব্বানধাতুযা পরিনিব্বাযি.

সযম্ভুঞাণেন |ও০.০০৩৬| ৰিগয্হ ধম্মং,

দুক্খং অনন্তং সকলং পহায;

সমাধিঝানাভিরতো যসস্সি,

গতো ৰিনাসং পৰরো যসস্সি.

অথ পচ্ছা চরকো কালং কত্ৰা সগ্গে নিব্বত্তি. তত্থ চিরং দিব্বসম্পত্তিং অনুভৰিত্ৰা দেৰলোকতো চৰিত্ৰা ইমস্মিং দীপে মলয রট্ঠে অমরুপ্পল লেনস্স আসন্নট্ঠানে উপচরকস্স পুত্তো হুত্ৰা নিব্বত্তি. সো নৰমাসড্ঢপরিযোসানে মাতুকুচ্ছিতো নিক্খমি. তস্স নামগহণদিৰসে ঞাতকা অমরুপ্পল কুমারোতি নামং অকংসু. সো পন অপরভাগে ৰড্ঢেন্তো দারকেহি সদ্ধিং কীল়ন্তো পত্তপুটেন ৰালুকভত্তং পচিত্ৰা, দারকা ইমে সমণাতি ৰত্ৰা পটিপাটিযা নিসীদাপেত্ৰা দানং দস্সামী’তি ৰত্ৰা কীল়াদানং দেতি. একদিৰসং অমরুপ্পল কুমারো ৰালুকথুপং কত্ৰা অত্তনো নিৰাসনৰত্থদুস্সং গহেত্ৰা খুদ্দকদণ্ডকে বন্ধিত্ৰা পটাকং কত্ৰা পূজনত্থায ঠপেসি. অমরুপ্পল লেনৰাসী মলিয দেৰত্থেরং নিস্সায দানাদীনি পুঞ্ঞানি কত্ৰা ততো চুতো ইমস্মিংযেৰ দীপে মহাগামে গোঠাভযমহারাজস্স অগ্গমহেসিযা কুচ্ছিম্হি পটিসন্ধিং গণ্হি. সো নৰমাসড্ঢপরিযোসানে মাতুকুচ্ছিতো নিক্খমি. তস্স নামগহণ দিৰসে’কাকৰণ্ণতিস্সো’তি নামং অকংসু. সো অনুপুব্বেন ৰড্ঢিত্ৰা পিতু অচ্চযেন ছত্তং উস্সাপেত্ৰা কাকৰণ্ণতিস্সমহারাজা অহোসি. তস্স ছত্তে উস্সাপিতেযেৰ সকলরট্ঠং সুভিক্খং অহোসি. পঞ্চ ৰা দ্ৰাদস ৰা দিৰসে অনতিক্কমিত্ৰা দেৰো সম্মা ৰস্সতি. ৰেস্সন্তরবোধিসত্তস্স দানগ্গে যাচকানং হত্থে ভিক্খাভাজনং ৰিয তস্মিং কালে ৰাপীপোক্খরণী-নদী-কন্দর-সোব্ভ-জাতসরাদযো ৰস্সোদকেন পূরিতা অহেসুং. পঞ্চৰিধপদুমসঞ্ছন্না অনেকদিজসমাকিণ্ণা নানারুক্খেহি ৰিরোচিতা অহেসুং. নানা সস্সানি সম্পজ্জিংসু, উত্তরকুরু আলকমন্দা রাজধানিসদিসংৰ হিরঞ্ঞসুৰণ্ণাদি রতনট্ঠানং.

সো |ও০.০০৩৭| রাজা সদ্ধায সম্পন্নো মহাভিক্খুসঙ্ঘস্স চত্তারো পচ্চযে অনূনং কত্ৰা দাপেসি. সট্ঠিমত্তানং তিপিটকধরানং চন্দনদোণিযা সতপাকতেলস্স পূরাপেত্ৰা যাৰপিট্ঠিপাদং তাৰ ওসীদাপেত্ৰা নিসিন্নানং লট্ঠিম ধুদন্তকট্ঠং চতুমধুরং পক্খিপিত্ৰা দাপেসি. উচ্ছুকণ্ড-সক্খরা-নালিকের-ফলমূলখন্ধখাদনঞ্চ নানাৰিধমচ্ছরসেহি সুগন্ধসালিতণ্ডুলেন সাধিতযাগুভত্তঞ্চ পাতোৰ অদাসি. অন্তরাভত্তে অট্ঠারসৰিধ-অন্তরখজ্জকঞ্চ উচ্ছুকদলিপনসফলাদযো চ নানাৰিধোত্তরিভঙ্গেন সদ্ধিং সুগন্ধসালিতণ্ডুলভত্তং নানগ্গরসং দাপেত্ৰা পচ্ছাভত্তং অট্ঠৰিধকপ্পীযপানকে চ দাপেসি. অঞ্ঞে সমণপরিক্খারে চ দাপেসি. ইমিনা নিযামেনেৰ ভিক্খুসঙ্ঘস্স তিপিটকধরভিক্খূনঞ্চ নিরন্তরং মহা দানং দত্ৰা ৰসতি.

অথাপরেন সমযেন কল্যাণিযং সিৰো নাম মহারাজা অত্তনো ভাগিনেয্যস্স অভযকুমারস্স কাকৰণ্ণতিস্স রঞ্ঞো ভগিনিযা সোমদেৰিযা নাম রাজপুত্তিযা আৰাহমঙ্গলং কত্ৰা আনেত্ৰা পাদপরিচারিকং দাপেসি. দত্ৰা চ পন অভয কুমারং গিরিনগরম্হি নিসীদাপেসী. সো গিরিনগরে রজ্জং কারাপেত্ৰা গিরিঅভযো নাম রাজা হুত্ৰা মহন্তং সম্পত্তিং অনুভৰমানো ৰিহাসি. ততো অপরভাগে কাকৰণ্ণতিস্স মহারাজা মহাগামে ৰিহরন্তো অঞ্ঞতরস্স ভিক্খুস্স গত্তে মঙ্কুনা দট্ঠট্ঠানে গণ্ডং উট্ঠিতং দিস্ৰা কিমেতং অয্যা’তি পুচ্ছি. মঙ্কুনা দট্ঠট্ঠানং মহারাজাতি. তং সুত্ৰা সংৰেগপ্পত্তো, ভন্তে মঙ্কুনা কিস্মিং ন ভৰন্তি’তি পুচ্ছি. পট্টসাটকে ন ভৰন্তি’তি. ইমে পন ভদ্দন্তা পট্টসাটকে কুতো লভন্তী’তি চিন্তেত্ৰা গতো. তং দিৰসমেৰ পানীযমাল়কে নিসিন্নো তিপিটকতিস্সত্থেরো নাম রঞ্ঞো বুদ্ধসীহনাদসুত্তং নাম কথেসি. সো থেরে পসন্নো; উত্তরাসঙ্গে দীযমানে’একসাটকো ভৰিস্সামি’ তস্মা ইমমেৰ দাতুং ন সক্কা, কথং করিস্সামী’তি চিন্তেন্তো থেরেন সদ্ধিং কথযমানো তত্থ মাল়কেযেৰ অট্ঠাসি. তস্মিং খণে একো কাকো অম্বসাখন্তরে নিসীদিত্ৰা

সদ্দং |ও০.০০৩৮| করোন্তো এৰমাচিক্খি. অয্য কাকৰণ্ণতিস্সমহারাজ, তুম্হাকং কঙ্খা নাম নত্থী, পসাদক্খণে ধম্মকথিকস্স উত্তরাসঙ্গং দেহী’তি আহ.

(কাকো সো কাকৰণ্ণস্স ৰদেতি ৰচনক্খমো,

পসাদজাতো থেরস্স তুৰং সদ্ধম্মদেসনে;

দদাহি উত্তরাসঙ্গং মহাথেরস্স ভূমিপা’তি.)

মহারাজ, অহং তুম্হাকং পঞ্চসাসনং গহেত্ৰা আগতো. ৰিহারদেৰি পুত্তং ৰিজাযি. ইদমেকং সাসনং. একা করেণুকা সুৰীরহত্থিপোতকং তিত্থসরে ৰিজাযী. ইদং দুতিযং সাসনং. গোঠসমুদ্দমজ্ঝেন সত্তমত্তা নাৰা পট্টনে পচ্চুট্ঠিতা, ইদং ততিযং সাসনং উত্তর ৰড্ঢমানপব্বতপাদে দ্ৰিকরীসপ্পমাণে খেত্তে তরুণতালক্খন্ধপ্পমাণা সুৰণ্ণক্খন্ধা উগ্গচ্ছিংসু, ইদং চতুত্থং সাসনং. গিরিপব্বতপাদে কোট রট্ঠক ৰিহারে কোটরট্ঠকো নাম থেরো মগ্গোপসমং ৰত্ৰা গিরিপব্বতমত্থকে সত্ততালপ্পমাণং উগ্গন্ত্ৰা আকাসে নিসিন্নো পরিনিব্বাযি, ইদং পঞ্চমং সাসনং.

(পুত্তো হত্থী চ নাৰা চ চতুত্থং হেমখন্ধকং;

থেরস্স পরিনিব্বানং পঞ্চমং সাসনং ইদং.

ইমং গহেত্ৰান অহং আগতো তৰ সন্তিকং;

সাসনং ঈদিসং সুত্ৰা পুঞ্ঞকম্মে রতো ভৰ.

ৰত্থং সহসা দাপেহি কতো সব্বসমাগমো;

ইদং নিচ্চং জানন্তো কিং লগ্গো উত্তরাসঙ্গে’তি.)

রাজা কাকস্স ৰচনং সুত্ৰা হসি. থেরো? কস্মা মহারাজ হসী’তি পুচ্ছি. ভন্তে, এতস্মিং অম্বসাখন্তরে নিসীদিত্ৰা সদ্দং করোন্তস্স কাকস্স কথং সুত্ৰা হসিন্তি সব্বং আরোচেসি. থেরো’পি রঞ্ঞা পুরিমত্তভাৰে কতকম্মং |ও০.০০৩৯| পস্সিত্ৰা হসি. রাজা কস্মা অয্যো হসী’তি পুচ্ছি. মহারাজ, তুম্হাকং অনন্তরে অত্তভাৰে মলযরট্ঠে অমরুপ্পল নাম কালে কতকম্মং পস্সিত্ৰা হসিত্তি. তেন পুট্ঠো কতকুসলকম্মং সব্বং ৰিত্থারেন তস্স আচিক্খি. রাজা সোমনস্সপ্পত্তো অত্তনো উত্তরাসঙ্গং দত্ৰা থেরং ৰন্দিত্ৰা গেহং গতো. কোটরট্ঠকৰিহারং গন্ত্ৰা থেরস্স সরীরজ্ঝাপনং কারাপেত্ৰা ধাতুং আদায চেতিযং কারাপেত্ৰা মহন্তং পূজং কত্ৰা মহাগামং গতো. সুৰণ্ণং আহরাপেত্ৰা রাজঙ্গণে ঠপাপেসি. গোঠসমুদ্দকুচ্ছিযং পত্ত নাৰাতো ৰত্থানি আহরাপেত্ৰা ভিক্খুসঙ্ঘস্স চীৰরত্থায দাপেত্ৰা মহাদানং পৰত্তেত্ৰা মহাগামসমীপে ৰিহারং কারাপেত্ৰা ৰিহরন্তো অত্তনো পুত্তং দুট্ঠগামণিং পক্কোসাপেত্ৰা; তাত, ত্ৰং গন্ত্ৰা গিরিম্হি নগরে নিসীদা’তি ৰত্ৰা অমচ্চঞ্চস্স পিতুট্ঠানে ঠপেত্ৰা গিরিনগরং পাহেসি. তং দিস্ৰা গিরিঅভয কুমারো কুমারেন সদ্ধিং আগতবল়স্স ৰত্থাহারাদীনি দাপেত্ৰা মহন্তং সম্মানং অকাসি. রাজকুমারো গিরিপব্বতপাদে ৰিহাসি.

ততো অপরভাগে জাতিং নিস্সায খত্তিযানং ৰিৰাদো অহোসি. সো অভযরাজা কিং মেৰিৰাদেনা’তি অত্তনো ভরিযায সোমদেৰিযা সদ্ধিং বলৰাহনং গহেত্ৰা অনুক্কমেন গচ্ছন্তো সেরুনগরে রজ্জং কারেন্তং অত্তসহাযং সিৰরাজং সন্ধায তস্স সন্তিকং আগঞ্জি. সো’পি সিৰরাজা গিরিঅভযরঞ্ঞা সদ্ধিং আগতবল়স্স মহন্তং সক্কারং কারেত্ৰা অহতৰত্থতিলতণ্ডুলাদীনি আহরাপেত্ৰা দাপেসি. কতিপাহচ্চযে; সম্ম, কস্মা আগতোসি’তি পুচ্ছি. সো আগতকারণং সব্বমস্স আচিক্খি. ভদ্দকং সম্ম, তে কতং আগন্তব্বমেৰ আগতো. অহং তে কত্তব্বং জানিস্সামি. ত্ৰং মা চিন্তযী’তি ৰত্ৰা তস্স ৰসনত্থায নগরভূমিং গৰেসন্তো সরকোটিযং অতিরমণীযভূমিং পস্সিত্ৰা তস্মিং ভূমিভাগে সো নগরং মাপেত্ৰা দেৰিযা একসদিসনামং করিস্সামী’তি সোমনগরন্তি নামং অকাসি. তং নগরং সুসমিদ্ধং সম্পন্নধনধঞ্ঞাদীহি উপকরণেহি দ্ৰারট্টালকগোপুরপরিখাপোক্খর-ণিযাদীহি |ও০.০০৪০| সহিতং হত্থিঅস্সরথপত্তিআদীহি সমাকুলং সঙ্খপণৰভেরিসদ্দাদীহি সমাকিণ্ণং নগরং অহোসি. সো অভযো চিরং সোমনগরে মহন্তং ইস্সরিযং অনুভৰন্তো ৰিহাসি.

অথাপরস্মিং কালে সোমদেৰী রঞ্ঞা সদ্ধিং কথেসি; অয্য অম্হাকং পটিসরণং চেতিযঞ্চ ৰিহারঞ্চ কারেতুং ৰট্টতী’তি. ভদ্দকং তে কথিতন্তি সোমনস্সপ্পত্তো হুত্ৰা ৰিহারভূমিং গৰেসন্তো নগরতো নাতিদুরে নাচ্চাসন্নে মহন্তং সালৰনং অত্থি. তং পস্সিতুং গতো. তদা তস্মিং সালৰনে মহাঅরিট্ঠত্থেরস্স ৰংসে মহামহিন্দত্থেরো নাম একো থেরো অত্থি. সো সট্ঠিমত্তে ভিক্খূ গহেত্ৰা ৰিহরতি. তং দিস্ৰা ইরিযাপথে পসন্নো থেরং এৰমাহ; ‘অয্য তুম্হাকং ইমস্মিং সালৰনে ৰিহারং করিস্সামি’তি. থেরো তস্স ৰচনং সুত্ৰা তুণ্হীহাৰেন অধিৰাসেসি. রাজা সোমনস্সপ্পত্তো থেরং ৰন্দিত্ৰা নগরমেৰ গন্ত্ৰা সোমদেৰিং আমন্তেত্ৰা; ভদ্দেসোমদেৰি, অম্হাকং মনোরথো মত্থকং পত্তো. ৰিহারকরণত্থায মনাপো ভূমিভাগো লদ্ধো. তত্থ চ মহিন্দো নাম থেরো সমণানং সট্ঠিমত্তং গহেত্ৰা ৰিহরতি. তং ৰন্দিত্ৰা ৰিহরণত্থায পটিঞ্ঞং গহেত্ৰা আগতো. তত্থ ৰিহারং করিস্সামী’তি আহ. সা তং সুত্ৰা সোমনস্সপ্পত্তা সাধূ’তি সম্পটিচ্ছি. পুনদিৰসে দেৰিযা সদ্ধিং থেরস্স সন্তিকং গন্ত্ৰা ৰন্দিত্ৰা একমন্তং নিসীদি. থেরো তেসং মহাসমযসুত্তং কথেসি. তে উভো’পি ধম্মং সুত্ৰা সোমনস্সজাতা অহেসুং. অথ রাজা অয্য ধাতুং কুতো লভিস্সামা’তি থেরং পুচ্ছি. মা চিন্তযি মহারাজ, ধাতুং অম্হে জানিস্সামা’তি আচিক্খি.

সো ততো পট্ঠায ৰিহারভুমিং সোধাপেত্ৰা খাণুকণ্টকাদযো নীহরিত্ৰা ভেরিতলমিৰ রমণীযং সমং কারাপেত্ৰা ইট্ঠকৰড্ঢকিং পক্কোসাপেত্ৰা ইট্ঠচিতং কারাপেত্ৰা চেতিযকম্মং পট্ঠপেসি. ৰড্ঢকী চেতিযং চিনন্তো কতিপাহেন পুপ্ফাধানত্তযং নিট্ঠপেত্ৰা ধাতুগব্ভে সব্বং কত্তব্বং কম্মং নিট্ঠপেত্ৰা রঞ্ঞো পটিৰেদেসি. রাজা, আগন্ত্ৰা থেরস্স আরোচেসি. নিট্ঠাপিতো অয্য ধাতু গব্ভো’তি. থেরো রঞ্ঞো ৰচনং সুত্ৰা অত্তনা পরিহরিতং |ও০.০০৪১| তথাগতস্স দক্খিণদাঠাধাতুং তস্স অদাসি. রাজা ধাতুং গহেত্ৰা সুনক্খত্তেন সুমুহুত্তেন মহতা পরিৰারেন ধাতুগব্ভে নিদহিত্ৰা অতিমনোরমং উদকবুব্বুল়কেলাসকুটপটিভাগং চেতিযং কারাপেসি.

সদ্ধাদিগুণসম্পন্নো লোকসাসনরক্খকো;

সচেতিযং মহারাজা কারাপেসি ৰিহারকং.

ততো থেরস্স সন্তিকে সট্ঠিমত্তানং ভিক্খুনং অত্থায সট্ঠিমত্তানি পরিৰেণানি কারাপেত্ৰা দ্ৰারট্টালকপাকারেহি সোভিতং ৰিহারং নিট্ঠপেত্ৰা অত্তনো দেৰিযা একনামং কত্ৰা মহিন্দত্থেরস্স দক্খিণোদকং দত্ৰা গন্ধমালাধূপধজেহি পূজং করোন্তো দিৰসস্স তিক্খত্তুং ধাতুপট্ঠানং গন্ত্ৰা দানাদীনি পুঞ্ঞানি কুরুমানো গিরিঅভযরাজা মহন্তং সম্পত্তিং অনুভৰমানো সোমনগরং পটিৰসতি.

(নগরে সোমনামম্হি রমণীযে মনোরমে;

দেৰিযা সহ মোদন্তো রজ্জং কারেসি নাযকো.)

ততো ৰিহারদেৰিযা ভাতা চুল্লপিণ্ডপাতিযতিস্সত্থেরো নাম একদিৰসং কাকৰণ্ণতিস্সমহারঞ্ঞো আযুসঙ্খারমোলোকেন্তো ন চিরপ্পৰত্তনভাৰং ঞত্ৰা পুনদিৰসে রঞ্ঞো সন্তিকং গন্ত্ৰা তেন সদ্ধিং কথেসি. মহারাজ তুম্হাকং নলাটধাতুযা সত্থারা ব্যাকরণং দিন্নং;’মহাৰালুকগঙ্গায দক্খিণভাগে সেরু নাম দহস্স অন্তে ৰরাহ নাম সোণ্ডিযা মত্থকে অনাগতে কাকৰণ্ণতিস্সো নাম মহারাজা ময্হং নলাটধাতুং পতিট্ঠপেস্সতী’তি ৰত্ৰা তং সন্ধায ভগৰা সমাপত্তিং সমাপজ্জিত্ৰা গতো. তস্স ৰচনং মনসিকরোহী’তি আহ. তস্স কথং সুত্ৰা অম্হাকং কুসলসম্পত্তিং অৰিনাসেত্ৰা অয্যস্স ৰচনমুদ্দিস্স চেতিযং কারাপনত্থায গন্তব্বন্তি মন্ত্ৰা ভদ্দকং অয্যা’তি থেরস্স ৰচনং সম্পটিচ্ছিত্ৰা অত্তনো পুত্তং দুট্ঠগামণিং গিরিনগরতো পক্কোসাপেত্ৰা মহাগামে নিসীদাপেত্ৰা নগরে ভেরিং চরাপেসি; অহং মহাৰালুকায গঙ্গায সমীপে সেরু নাম |ও০.০০৪২| দহস্স অন্তে ৰরাহ নাম সোণ্ডিযা মত্থকে চেতিযং কারাপনত্থায গমিস্সামি, সব্বসেনিযো চ মহা জনো চ মযা সদ্ধিং আগচ্ছন্তু’তি ৰত্ৰা রাজা চুলপিণ্ডপাতিযতিস্সত্থেরস্স তিস্সমহাৰিহারে সাগলত্থেরস্স চ সন্তিকং গন্ত্ৰা ভন্তে তুম্হাকং পরিৰারে পঞ্চসতমত্তে ভিক্খু গহেত্ৰা ধাতুং উপট্ঠহন্তা মযা সদ্ধিংযেৰ আগচ্ছথা’তি ৰত্ৰা ভদ্দমাসে ভদ্দদিৰসে সুনক্খত্তে সুমুহুত্তে বন্ধাৰারং সজ্জেত্ৰা ধাতুঘরতো ধাতুকরণ্ডকং নীহরিত্ৰা সুসজ্জিতরথে ঠপেত্ৰা উপরি সেতচ্ছত্তঞ্চ কত্ৰা পুরতো পুরতো রতনমণডপে কারাপেত্ৰা পুরেতরমকাসি.

ততো রাজা পুত্তং দুট্ঠগামণিং পক্কোসাপেত্ৰা অনুসাসিত্ৰা পুত্তং সদ্ধাতিস্সকুমারঞ্চ ৰিহারদেৰিঞ্চ গহেত্ৰা সীঘং নিক্খমি. চূল়পিণ্ডপাতিযতিস্সত্থেরো চ অত্তনো পরিৰারে পঞ্চসতভিক্খূ গহেত্ৰা ধাতুং উপট্ঠহন্তো পচ্ছতো আগঞ্ছি. সব্বসেনিযো চ রাজা চ ভিক্খুসঙ্ঘস্স মহাদানং দত্ৰা ভিক্খু সঙ্ঘেন সদ্ধিং গন্ত্ৰা দীঘৰাপিং পাপুণিংসু. তস্মিং সদ্ধাতিস্সকুমারং নিসীদাপেত্ৰা অনুক্কমেন আগন্ত্ৰা সুমনমালাপিট্ঠিযং খন্ধৰারং বন্ধিত্ৰা নিসীদি. কস্মা পন তং ঠানং এৰং নামকং জাতন্তি. সুমননাগরাজা সত্তদিৰসানি নাগসম্পত্তিং অভিরমমানো (নলাটধাতুং ৰিস্সরি.) সত্তাহচ্চযেন নলাটধাতুং অনুস্সরিত্ৰা পচ্ছা আৰজ্জমানো রঞ্ঞো ধাতুং গহেত্ৰা আগতভাৰং ঞত্ৰা মহন্তং সোমনস্সং পত্তো মহন্তজ্ঝাসযো অত্তনো পরিৰারে ছকোটিমত্তে নাগে গহেত্ৰা ধাতুপটিপথং গন্ত্ৰা ধাতুপতিট্ঠিতট্ঠানেৰ পথৰিযং নাভিপ্পমাণতো সুমনমালাৰস্সং ৰস্সেসি. তস্মা তং ঠানং সুমনমালাপিট্ঠিতি জাতং. পুনদিৰসে রাজা ধাতুং গহেত্ৰা ৰরাহ |ও০.০০৪৩| নাম সোণ্ডিং পাপুণি. সম্পত্তায ধাতুযা তস্মিং ঠানে সুমননাগরাজা রথচক্কে যাৰ নাভিং তাৰ ওসীদাপেত্ৰা অপরিৰত্তনং অকাসি. তং দিস্ৰা রাজা সংৰেগপ্পত্তো থেরং পুচ্ছি. মা ভাযি মহারাজ, ধাতু পতিট্ঠানট্ঠানং আগতো. ইমস্মিং ঠানে পতিট্ঠহিস্সতী’তি আহ.

তং সুত্ৰা রাজা ধাতুপতিট্ঠান ভূমিভাগং ভৰিস্সতী’তি চিন্তেত্ৰা তত্থেৰ সেনংনিৰেসেত্ৰা ইদং ঠানং সমন্ততো সকণ্টকং ৰনং নীহরাপেত্ৰা ভূমিভাগং অতিরমণীযং ভেরিতলমিৰ সমং কারাপেত্ৰা সেনিযপামোক্খং আমন্তেত্ৰা তুম্হে ধাতুং ঠপনত্থায পঠমং ধাতুঘরং কারাপেত্ৰা ধাতু গব্ভং পতিট্ঠাপেত্ৰা নিৰেদেসি. রাজা অন্তো ধাতুঘরে তস্মিং ধাতুগব্ভে ধাতুকরণ্ডকং পতিট্ঠপেত্ৰা বহি আরক্খং সংৰিধায তত্থ মহন্তং পূজাৰিধানং কারাপেত্ৰা ধাতুঘরং চতুজাতিযগন্ধেন ৰিলিম্পাপেসি. তদুপাদায তং গেহং গন্ধমূলং নাম জাতং. তস্মিং ঠানে বহূ সন্নিপতিংসু. তত্থ মহিন্দো নাম থেরো আগন্তুক ভিক্খূনং ৰত্তপটিৰত্তং অকাসি. পুনদিৰসে রাজা ৰিহারং গন্ত্ৰা সুখেন ৰসিত্থ অয্যা’তি পুচ্ছিত্ৰা সব্বে ভিক্খু নিমন্তেত্ৰা রাজগেহে নিসীদাপেত্ৰা যাগুভত্তং সক্কচ্চং দত্ৰা পচ্ছা ভত্তং অনুমোদনং সুত্ৰা নিসিন্নকালে থেরো ওৰদন্তো মহারাজ, পমাদেন ৰসিতুং ন ৰট্টতি জীৰিতং নাম ন চিরট্ঠিতিকং, ধাতুপতিট্ঠাপনং পপঞ্চং অকত্ৰা কারেহী’তি ৰত্ৰা গাথমাহ?

যস্মা হি জীৰিতং নাম অপ্পং বুব্বুলকুপমং;

তস্মা হি পণ্ডিতো পোসো করেয্য কুসলং সদা’তি.

ইমিনা |ও০.০০৪৪| নযেন ধম্মং কথেত্ৰা চূল়পিণ্ডপাতিযতিস্স ত্থেরো চ সাগলত্থেরো চ মহিন্দত্থেরো চা’তি তযো থেরা অত্তনো অত্তনো পরিৰারে ভিক্খূ গহেত্ৰা ধাতু পরিহরণত্থায আগচ্ছিংসু.

ৰিপুলযসো পরহিতাৰহন্তো,

সুজনহিতো ধিতিমা অৰীতসদ্ধো;

সুপরিৰুতো মহতিযা হি পরিসা,

রাজসেট্ঠো পৰরথূপমারভী’তি.

ইতি অরিযজনপ্পসাদনত্থায কতে ধাতুৰংসে

পকিণ্ণকো নাম

চতুত্থো পরিচ্ছেদো.