৫. |ও০.০০৪৫| ধাতুনিধানাধিকারো

ততো ৰিমংসেত্ৰা ভুমিভাগং গহেতুং ৰট্টতী’তি ভূমি ভাগং ৰীমংসেন্তো মঙ্গলসম্মতে অট্ঠ গোণে আহরাপেত্ৰা গন্ধোদকেন নহাপেত্ৰা সিঙ্গেসু সুৰণ্ণকঞ্চুকং পতিমুঞ্চাপেত্ৰা গন্ধপঞ্চঙ্গুলিকং দাপেত্ৰা গীৰায মালাদামং বন্ধাপেত্ৰা অযোদামেন বন্ধাপেত্ৰা এৰং চিন্তেসি? যদি পন ভগৰতো নলাটধাতু যস্মিং ঠানে পতিট্ঠহিত্ৰা লোকত্থচরিযং করোন্তী পঞ্চৰস্সসহস্সানি সাসনং পতিট্ঠহিস্সতি তস্মিং ঠানে গোণা সযমেৰ অযোদামতো মুঞ্চিত্ৰা থুপট্ঠানং সমন্ততো ৰিচরিত্ৰা চতুসু দিসাসু সযন্তুতি অধিট্ঠহিত্ৰা পুরিসে আণাপেসি. তে তথেৰ অকংসু. ততো ৰিভাতায রত্তিযা রাজাগোণে গাহাপনত্থায আযুত্তকে আণাপেসি. তে মনুস্সা গন্ত্ৰা গোণে অপস্সিত্ৰা ন পস্সাম দেৰা’তি রঞ্ঞো আরোচেসুং. গচ্ছ ভণে, গোণানং গতট্ঠানং ওলোকেথা’তি আহ. তে গৰেসমানা বন্ধনট্ঠানে অদিস্ৰা পদানুপদং গন্ত্ৰা থূপকরণট্ঠানং সমন্তা ৰিচরিত্ৰা চতুসু দিসাসু সযিতগোণে দিস্ৰা সযিতট্ঠানতো নঙ্গুট্ঠাদীনি মদ্দন্তাপি উট্ঠাপেতুং অসক্কোন্তা গন্ত্ৰা রঞ্ঞো আরোচেসুং; দেৰ, গোণা ন উট্ঠহন্তি, একং ঠানং সমন্তা ৰিচরিত্ৰা চতুসু দিসাসু সযিতা’তি. তং সুত্ৰা রাজা সেনঙ্গপরিৰুতো সযমেৰ গন্ত্ৰা’পি গোণে উট্ঠাপেতুং অসক্কোন্তো রাজা এৰং অধিট্ঠাসি; যদি ইমস্মিং ঠানে ধাতু পতিট্ঠাপেতব্বা ভৰেয্য গোণা উট্ঠহিত্ৰা গচ্ছন্তু’তি. গোণা চিত্তক্খণেযেৰ উট্ঠহিত্ৰা পলাযিংসু. রাজা তং অচ্ছরিযং দিস্ৰা পসন্নমনো হুত্ৰা পুনেকদিৰসং ৰুত্তনিযামেনেৰ অস্সে |ও০.০০৪৬| অলঙ্কারাপেত্ৰা অযোদামেন বন্ধাপেত্ৰা ঠপেসি. অস্সাপি তে গোণা ৰিয গন্ত্ৰা নিপজ্জিংসু. রাজা গন্ত্ৰা তথেৰ অধিট্ঠহিত্ৰা অস্সে উট্ঠাপেসি. পুনেকদিৰসং হত্থীং অলঙ্কারাপেত্ৰা তথেৰ অধিট্ঠাসি. সোপি বন্ধদামে ছিন্দিত্ৰা পচ্ছিমযামসমনন্তরে গন্ত্ৰা চেতিযকরণট্ঠানে নিপজ্জি. পভাতায রত্তিযা রাজা হত্থীগোপকে পক্কোসাপেত্ৰা হত্থিং আনেথা’তি আহ. হত্থিগোপকা হত্থিং বন্ধনট্ঠানে অদিস্ৰা, হত্থিং বন্ধনট্ঠানে ন পস্সাম দেৰা’তি আহংসু. তেনহি ভণে, সীঘং উপধারেথা’তি ৰুত্তে হত্থিগোপকা পদানুপদং গৰেসমানা চেতিযট্ঠানে নিপন্নং হত্থিং দিস্ৰা আগন্ত্ৰা রঞ্ঞো আরোচেসুং. তং সুত্ৰা রাজা হেট্ঠা ৰুত্তপ্পকারেন পটিপজ্জিত্ৰা হত্থিং পুরে কত্ৰা আগচ্ছি.

এৰং তীহি ৰিমংসনাহি ৰীমংসেত্ৰা ভুমিগহিতভাৰং থেরস্স সন্তিকং গন্ত্ৰা ৰন্দিত্ৰা উপট্ঠহমানো আরোচেসি. তস্মিং কালে সেরুনগরে সিৰরাজা বহূ পণ্ণাকারে গাহাপেত্ৰা রাজানং পস্সিস্সামি’তি আগন্ত্ৰা ৰন্দিত্ৰা একমন্তং অট্ঠাসি. রাজা তেন সদ্ধিং সম্মোদনীযং কথং কত্ৰা নিসিন্নকালে লোণনগরে মহানাগরাজা’পি বহুপণ্ণাকারং গাহাপেত্ৰা রাজানং পস্সিস্সামি’তি আগন্ত্ৰা ৰন্দিত্ৰা একমন্তং নিসীদি. তেন সদ্ধিং সম্মোদনীযং কথং অকাসি; ইমস্মিং ঠানে দসবলধাতুং পতিট্ঠাপেস্সামি, তুম্হে মম সহাযা হোথা’তি তে গহেত্ৰা গন্ত্ৰা ধাতুং ৰন্দথা’তি ৰন্দাপেসি. তস্মিং খণে ধাতুতো ছব্বণ্ণরংসিযো উগ্গচ্ছিংসু. দেৰা সাধুকারং করোন্তা আকাসতো মালাযো খিপিংসু. রাজানো সোমনস্সপ্পত্তা অম্হাকং লঙ্কাযং দসবলস্স নলাটধাতু অম্হাকং রট্ঠে পতিট্ঠহিস্সতি. এসা ধাতু মহা জনস্স সত্থুকিচ্চং সাধেয্যাতি ৰন্দিত্ৰা গতা. রাজা তেসং গতকালে গিরিঅভযং পক্কোসাপেত্ৰা তাত, ইট্ঠকং জনস্স পীল়নং অকত্ৰা কারাপেমা’তী আহ. মা চিন্তযিত্থ দেৰ, অহং |ও০.০০৪৭| ইট্ঠকং কারাপেস্সামীতি. এৰঞ্হি সতি পপঞ্চো ভৰিস্সতী’তি আহ. অম্হাকং সন্তিকে সুৰণ্ণরজতানি মন্দানি কুতো লভিস্সামা’তি ৰুত্তে গিরিঅভযো এৰমাহ; দেৰ, সত্থা মহাপুঞ্ঞো মহন্তং পূজাসক্কারসম্মানং লভিস্সতি. ত্ৰং অচিন্তেত্ৰা চেতিযকম্মং পট্ঠপেহী’তি আহ.

সো তস্স তং অচিন্তনীযং কথং সুত্ৰা সোমনস্সপ্পত্তো থেরস্স সন্তিকে ধম্মং সুত্ৰা ধাতুং ৰন্দিত্ৰা নগরং গন্ত্ৰা ভুত্তসাযমাসো সযনে নিপন্নো নিদ্দং ওক্কমি. ৰিভাতায রত্তিযা পবুজ্ঝিত্ৰা ইট্ঠকং চিন্তযমানস্স দোমনস্সং অহোসি. তস্মিং কালে সক্কো দেৰরাজা ৰিস্সকম্মং দেৰপুত্তং আমন্তেত্ৰা; তাত, ৰিস্সকম্ম, কাকৰণ্ণতিস্সমহারাজা অম্হাকং সত্থুনো নলাট ধাতুং নিদহিত্ৰা মহন্তং চেতিযং কারাপেতুকামো ইট্ঠকং চিন্তযি. ত্ৰং গন্ত্ৰা ফাসুকট্ঠানে ইট্ঠকং মাপেহীতি আহ. তং সুত্ৰা ৰিস্সকম্মদেৰপুত্তো দুগ্গতস্স ব্রাহ্মণস্স খেত্তে ইট্ঠকং মাপেত্ৰা দেৰলোকমেৰ গতো. তস্মিং খণে খেত্তসামিকো দুগ্গতব্রাহ্মণো পাতোৰ অত্তনো খেত্তং ওলোকনত্থায গতো ইতোৰিতো ওলোকেন্তো ইট্ঠকরাসিং দিস্ৰা চিন্তেসি; হীযো রাজা ইট্ঠকং কথং লভিস্সামীতি কথেসি. মহন্তং ৰত পণ্ণাকারং মযা লদ্ধন্তি তুট্ঠো দেৰ্ैট্ঠকানি কাজেন গহেত্ৰা রঞ্ঞো দস্সনত্থায গন্ত্ৰা রাজদ্ৰারে ঠত্ৰা সাসনং পহিণি. তং পক্কোসাপেত্ৰা কস্মা পাতো’ৰ আগতোসী’তি পুচ্ছি. দেৰ ময্হং খেত্তে ইট্ঠকরাসিং দিস্ৰা পাতো’ৰ ইট্ঠকানি গহেত্ৰা আগতোম্হী’তি. ঈদিসানি ইট্ঠকানি চেতিযস্স অনুচ্ছৰিকানীতি দস্সেসি. রাজা পস্সিত্ৰা সোমনস্সপ্পত্তো ব্রাহ্মণস্স বহুং ধনং দাপেসি.

তস্মিং |ও০.০০৪৮| খণে অঞ্ঞং সাসনং আহরি. মদনপট্টনদ্ৰারতো চতস্সো রজতনাৰা সুৰণ্ণভুমিতো চতস্সো সুৰণ্ণনাৰা উক্কমিংসূতি পট্টনমুখদ্ৰারে ৰিহরন্তো আরক্খক জেট্ঠকো ধম্মপালো নাম আগন্ত্ৰা রঞ্ঞো আরোচেসি. রাজা তুট্ঠো সুৰণ্ণরজতে আহরাপেসি.

(ইট্ঠকং রজতঞ্চেৰ সুৰণ্ণঞ্চ মহারহং;

আহরিত্ৰান তং সব্বং কম্মং আরভি চেতিযে.

সত্থু পুঞ্ঞানুভাৰেন রঞ্ঞো পুঞ্ঞবলেন চ;

চিন্তিতচিন্তিতং সব্বং খণেনেৰ সমিজ্ঝতি.)

ততো রাজা চূল়পিণ্ডপাতিযতিস্সত্থেরস্স সন্তিকং গন্ত্ৰা? অয্য ইট্ঠকভুমিং গমিস্সামীতি আহ. থেরো সুত্ৰা তুট্ঠো অত্তনো পরিৰারেহি পঞ্চসতভিক্খূহি সদ্ধিং ইট্ঠক ভূমিং গতো. ততো মহাসাগলত্থেরো চ মহিন্দত্থেরো চ অত্তনো পরিৰারেহি ভিক্খুহি সদ্ধিং ইট্ঠকভুমিং গতা. সিৰ নগরে রাজাপি ইট্ঠকভুমিং গতো. লোণনগরে নাগরাজাপি ইট্ঠকভুমিং গতো. সোমনগরে গিরিঅভযরাজাপি অত্তনো সেনঙ্গেহি পরিৰারেত্ৰা ইট্ঠকভুমিং গতো. তেসং সমণ ব্রাহ্মণানং রাজবল়ানঞ্চ সম্পিণ্ডিতত্তা সো পিট্ঠিপাসাণো বলৰাহনো নাম জাতো. তে সব্বে ইট্ঠকভুমিং সমোসরিংসু. থেরো ইট্ঠকরাসিং ওলোকেত্ৰা রাজানং এৰমাহ? মহারাজ, অযং ইট্ঠকরাসি চেতিযে সব্বকম্মত্থায পহোতী’তি. রাজা অত্তমনো সেনঙ্গপরিৰুতো সযমেৰ পঠমং ইট্ঠকং গণ্হি. তং দিস্ৰা সেসরাজানো চ অমচ্চাদযো চ পরিসা চ সব্বে ভিক্খু চ ইট্ঠকানি গণ্হিংসু তস্মিং কালে ভারং উক্খিপিত্ৰা গমনং পপঞ্চং ভৰিস্সতী’তি রাজা চিন্তেসি. থেরো তস্স চিত্তং জানিত্ৰা এৰমাহ? মা চিন্তযিত্থ মহারাজ, ইট্ঠকানি গহেত্ৰা গচ্ছ. পচ্ছা দেৰনাগাদযো ইট্ঠকভুমিতো পট্ঠায যাৰ চেতিযট্ঠানং নিরন্তরা ঠিতা আহরিস্সন্তী’তি. তে আহরিত্ৰা চেতিযট্ঠানে রাসিং করোন্তি. তেনেৰ |ও০.০০৪৯| নীযামেন যাৰ চেতিযস্স নিট্ঠঙ্গমা তাৰ দেৰনাগসুপণ্ণাদযো নিরন্তরং ঠত্ৰা ইট্ঠকানি আহরিত্ৰা চেতিযকরণট্ঠানেৰ চতুসু দিসাসু রাসিং অকংসু.

ততো রাজা সব্বে ইট্ঠকৰড্ঢকী রাসিং কারাপেত্ৰা তেসং ৰড্ঢকীনং অন্তরে জযসেনং নাম ইট্ঠকৰড্ঢকিং পরিগণ্হিত্ৰা তস্স পন সতসহস্সগ্ঘনকানি দ্ৰে সাটকানি কহাপণসতসহস্সানি চ সুৰণ্ণকুণ্ডলাদযো আভরণানি চ দাপেসি. তস্স পরিৰারানং ৰড্ঢকীনং অহতৰত্থাদীনি সব্বুপকরণানি দাপেসি. অনেকৰিধং মহন্তং সম্মানং কারেত্ৰা থেরেন সদ্ধিং মন্তেন্তো; অয্য অজ্জ ৰিসাখপুণ্ণমী উপোসথদিৰসো, তস্মা নলাটধাতুযা মঙ্গলং করিত্ৰা চেতিযট্ঠানে ইট্ঠকং পতিট্ঠাপেতুং ৰট্টতী’তি আহ. তং সুত্ৰা থেরো; ভদ্দকং মহারাজ, বুদ্ধস্স ভগৰতো জাতদিৰসো’তি ৰত্ৰা চেতিযকম্মকরণত্থায পঞ্চ জনে গণ্হি. তেসু একো ৰরদেৰো নাম, একো সঙ্খো নাম, একো ৰিজ্জো নাম, একো পুস্সদেৰো নাম, একো মহাদেৰো নাম. ইমেসং ৰড্ঢকীনং মঙ্গলং কারাপেত্ৰা ছণৰেসং গহেত্ৰা সব্বালঙ্কারেন অলঙ্কারাপেত্ৰা রাজা সযম্পি সব্বালঙ্কারেন পতিমণ্ডিতো মঙ্গলৰিধানং কারাপেত্ৰা ভিক্খুসঙ্ঘং গন্ধমালাদীহি পূজেত্ৰা তিক্খত্তুং পদক্খিণং কত্ৰা চতুসু ঠানেসু পঞ্চপতিট্ঠিতেন ৰন্দিত্ৰা ৰিজম্হেত্ৰা সুৰণ্ণঘট্ঠানং পৰিসিত্ৰা সুৰণ্ণখচিতং মণিমুত্তারতনমযং পরিব্ভমনদণ্ডং জীৰমানকমাতাপিতরেন উভতোসুমণ্ডিতপসাধিতেন অভিমঙ্গলসম্মতেন অমচ্চপুত্তেন গাহাপেত্ৰা মহন্তং চেতিযং তত্থ করোন্তো সযম্পি পরিব্ভমনদণ্ডং গহেত্ৰা পরিকম্মকতভুমিযং পরিব্ভমিত্ৰা একমন্তং অট্ঠাসি. ততো মহাৰড্ঢকী সুনক্খত্তেন সুমুহুত্তেন চেতিযট্ঠানে ইট্ঠকং পতিট্ঠাপেসি.

তস্মিং |ও০.০০৫০| খণে চতুনহুতাধিক দ্ৰিযোজন সতসহস্সবহুলা অযং মহাপথৰী সাধুকারং পৰত্তেন্তী ৰিয মহানাদং পৰত্তেসি. দেৰমনুস্সা দিৰসে দিৰসে পহোনক-মত্তিকং নিসদেন পিংসিত্ৰা সুপ্পেহি পপ্ফোঠেত্ৰা দেন্তি. এৰং করোন্তো কতিপযেনেৰ দিৰসেন পুপ্ফাধানত্তযং চিনিত্ৰা মহাভিক্খু সঙ্ঘস্স নিৰেদেসি. তং সুত্ৰা সঙ্ঘো চুন্দুত্তরনামকে দ্ৰে সামণেরে আণাপেসি? তুম্হে হিমৰন্তং গন্ত্ৰা মেদৰণ্ণপাসাণে আহরথা’তি. তে পন সামণেরা জাতিযা সোল়সৰস্সিকা ছল়ভিঞ্ঞাপ্পভেদেন পটিসম্ভিদপ্পত্তা. মহাখীণাসৰভিক্খুসঙ্ঘস্স সন্তিকা ভিক্খুসঙ্ঘস্স ৰচনং সম্পটিচ্ছিত্ৰা আকাসং অব্ভুগ্গন্ত্ৰা হিমৰন্ততো অত্তনো ইদ্ধিবলেন মেদৰণ্ণপাসাণে আহরিংসু. এতেসু একং পাসাণং ধাতুগব্ভস্স ভুমিযং পত্থরিত্ৰা চতুসু পস্সেসু চত্তারো পাসাণে পতিট্ঠাপেত্ৰা অপরং ধাতুগব্ভং পিদহিতুং অদস্সনং কত্ৰা ঠপযিংসু.

তদা রাজা ধাতুগব্ভে কম্মং নিট্ঠপেন্তো নৰ কোটিপ্পমাণং সুৰণ্ণং আহরাপেত্ৰা সুৰণ্ণকারানং দত্ৰা ধাতুগব্ভস্স ইট্ঠকানি করোথা’তি আণাপেসি. তে সুৰণ্ণকারা দীঘতো রতনপ্পমাণং পুথুলতো ৰিদত্থীপ্পমাণং বহলতো চতুরঙ্গুলপ্পমাণং ইট্ঠকং কত্ৰা ধাতুগব্ভং চিনিংসু. তং পন ধাতুগব্ভং উচ্চতো সোল়সহত্থং ৰিত্থারতোপি ইতোচিতো দসদসরতনং কত্ৰা সুৰণ্ণিট্ঠকেহেৰ নিট্ঠপেত্ৰা ধাতুগব্ভস্স মজ্ঝে সত্তরতনমযং সিনেরুং কারাপেত্ৰা সিনেরুস্স উপরি জাতিহিঙ্গুলকেন পণ্ডুকম্বলসিলাসনং সত্তরতনেন পারিচ্ছত্তকরুক্খং রজতমযং সেতচ্ছত্তং ব্রহ্মুনা গাহাপেত্ৰা সত্থুনো পটিমায উপরি ধারিযমানং কারেসি. সিনেরুপাদমূলে গন্ধকললপূরিত নীলুপ্পলৰিভুসিতসুৰণ্ণমযঅট্ঠুত্তরসতঘটপন্তিযো ঠপাপেসি. তদনন্তরং গন্ধকললপূরিতরত্নপদুমৰিভুসিতরজতমযঅট্ঠুত্তর- |ও০.০০৫১| সতঘটপন্তিযো ঠপাপেসি. তদনন্তরং গন্ধকললপূরিত সেতুপ্পলমালাৰিভুসিতমণিমযঅট্ঠুত্তরসতঘটপত্তিযো ঠপাপেসি. তদনন্তরং গন্ধকললপূরিতসেতুপ্পলৰিভুসিত-মসারগল্লময অট্ঠুত্তরসতঘটপন্তিযো ঠপাপেসি. তদনন্তরং গন্ধকললপূরিতচম্পকপুপ্ফৰিভুসিতলোহিতঙ্কমযঅট্ঠুত্তরসত ঘটপত্তিযো ঠপাপেসি. তদনন্তরং গন্ধকললপূরিতপঞ্চুপ্পলৰিভুসিতমত্তিকামযঅট্ঠুত্তরসতঘটপন্তিযো ঠপাপেসি. তাসং ঘটপন্তীনং অন্তরে গন্ধকললপূরিতসত্তরতনমযসরাৰকে ঠপাপেসি. কঞ্চনময-সত্তরতনময-ৰিচিত্তমালালতাপুণ্ণঘটসিরিৰচ্ছনন্দিযাৰট্টভদ্দপীঠাদযো চ হত্থিঅস্সসীহৰ্যগ্ঘোসভপন্তিআদযো চ কারেসি. দেৰোরোহণং যমকপাটিহীরাদযো ধনপাল-অঙ্গুলিমাল-আল়ৰকদমনাদযো, সারিপুত্ত-মোগ্গল্লান-মহাকস্সপত্থেরাদযো, অসীতিমহাসাৰকরূপাদীনি চ কারাপেসি. সিনেরুস্স মজ্ঝিমভাগে তারাগণপরিৰারিতং রজতমযং চন্দমণ্ডলঞ্চ কারাপেসি. রংসিজালৰিভুসিতং কনকমযং সূরিযমণ্ডলঞ্চ কারাপেসি.

ততো সিনেরুস্স মত্থকে পারিচ্ছত্তকমুলে পণ্ডুকম্বলসিলাসনে অম্হাকং সত্থুনো পটিমং ঘনকোট্টিম রত্তসুৰণ্ণমযং কারাপেত্ৰা মাতুদেৰপামোক্খ দসসহস্স চক্কৰাল়দেৰতানং সত্তপ্পকরণং অভিধম্মং দেসনাকারেন নিসীদাপেসি. তস্স ৰীসতিনখা অক্খিতলানং সেতট্ঠানানি জাতিফলিকমযানি. অঙ্গুলিযো সুৰণ্ণমযা হত্থপাদতলানি চ দন্তাৰরণানি চ অক্খীনং রত্তট্ঠানানি চ জাতিপৰাল়মযানি, কেসমস্সুভমুকট্ঠানানি ইন্দনীলমযানি, সমচত্তালীস দন্তা ৰজিরমযা অহেসুং. উণ্ণলোমং পন সুৰণ্ণ ভিত্তিযং ঠপিতরজতবুব্বুল়ৰিলাসং রজতমযং অহোসি. ভগৰতো অনৰলোকিত মুদ্ধনি মত্থকে সত্তরতনমযং ৰিচিত্তকিংকিণিজালং পরিক্খিপাপেসি. মণ্ডপস্স অন্তো নৰসতসহস্সগ্ঘনকং মুত্তাকলাপমোলম্বকং মনোরমং চেলৰিতানং বন্ধাপেত্ৰা মণ্ডপকোটিযং মুত্তাজালং তদনন্তরং সত্ত রতনৰিচিত্তং কিংকিণিজালং পরিক্খিপাপেসি.

অম্হাকং |ও০.০০৫২| ভগৰতো মাতুদেৰপুত্তম্পি সত্তরতনেন কারাপেসি. তথা এরাৰণৰিস্সকম্মদেৰপুত্তাদযো চ সপরিৰারো সক্কো দেৰরাজা চ চত্তারো মহারাজানো চ পঞ্চসিখদেৰপুত্তাদযো গন্ধব্বদেৰপুত্তা চ সহম্পতি মহা ব্রহ্মাদযো মহাব্রহ্মনো চ কারাপেসি. ৰেস্সন্তরজাতকং করোন্তো সংজযমহারাজা ফুসতীদেৰী আদযো চ মদ্দীদেৰী দ্ৰে দারকে চ জূজকব্রাহ্মণাদযো চ কারাপেসি. ৰিধুর-সোণদত্ত মহানারদকস্সপ-সুতসোম-সুপ্পারক-সঙ্খপালজাতকাদীনি চ, ধম্মচক্কপ্পৰত্তন-মহাসমযসুত্তাদি দেসনাকারো চ, সুদ্ধোদনমহারাজা মহামাযা মহাপজাপতী গোতমী ভদ্দকচ্চানা রাহুলমাতাদেৰী চ রাহুলকুমারো চ ছন্নঞ্চ কন্থকঞ্চ মহাভিনিক্খমনং মহাবোধিমণ্ডলং অসীতিমহাসাৰকা কোসলমহারাজা অনাথপিণ্ডিকমহাসেট্ঠি চূল়অনাথপিণ্ডিক-ৰিসাখা সুপ্পৰাসা চ পচ্ছা চূল়পিণ্ডপাতিয তিস্সত্থেরঞ্চ অত্তানঞ্চ কারাপেত্ৰা তে সব্বে ধাতু গব্ভে পতিট্ঠাপেসি.

ধাতুগব্ভৰণ্ণণা সমত্তা.

এৰং ধাতুগব্ভে পূজাৰিধানং সুৰিভত্তং সুমনোরমং কারাপেত্ৰা থেরেন সদ্ধিং কথেসি? ভন্তে ধাতুগব্ভে মযা কত্তব্বং নিট্ঠাপিতং. স্ৰে রোহিণীনক্খত্তেন ধাতু নিধানং করিস্সামী. অয্যা পন কেসধাতুযো গহেত্ৰা আগচ্ছন্তুতি. তিস্সত্থেরস্স ভারমকাসি. থেরো তং সুত্ৰা ভদ্দকং মহারাজ, কেসধাতুযো ৰিচিনিত্ৰা আহরাপেস্সামাতি ৰত্ৰা অত্তনো সদ্ধিৰিহারিকং সিৰত্থেরং পক্কোসাপেত্ৰা আৰুসো ভূমিন্ধরনাগৰিমানে জযসেনো নাম নাগরাজা ৰসতি. তস্স সন্তিকে (কেসধাতুযো সন্তি.) তপুস্স ভল্লিকানং দ্ৰেভাতিকৰাণিজানং পরিচরণকালে তেসং পমাদং ঞত্ৰা নাগরাজা দ্ৰে কেসধাতুযো গহেত্ৰা নাগভৰনে ঠপেসি. ত্ৰং তা ধাতুযো আহরিত্ৰা রঞ্ঞো দেহীতি আণাপেসি. থেরো তং ৰচনং সম্পটিচ্ছিত্ৰা গতো.

ততো রাজা অত্তনো ভগিনিযা সোমদেৰিযা চ ভাগিনেয্যস্স গিরিঅভযরঞ্ঞো চ সাসনং পেসেসি? স্ৰে ধাতুনিধানংকরিস্সাম. তুম্হে সেনঙ্গং গহেত্ৰা আগচ্ছথা’তি. লোণনগরে |ও০.০০৫৩| মহানাগরঞ্ঞো চ সেরু নগরে সিৰরঞ্ঞো চ তথেৰ সাসনং পেসেত্ৰা সযম্পি অত্তনো ৰিজিতে যেন ময্হং হত্থতো অন্তমসো এককরীসমত্তম্পি লদ্ধং তদুপাদায সব্বেপি তুম্হে সদ্ধিং পরিৰারেন আগচ্ছথা’তি ভেরিং চরাপেসি. তং সুত্ৰা সোমনস্সপ্পত্তা মহাজনা অত্তনো অত্তনো ৰিভৰানুরূপেন অলঙ্কতপটিযত্তা অগমিংসু. রাজা পভাতায রত্তিযা সব্বে সেনিযো গন্ধমালাধূপধজাদযো গহেত্ৰা ধাতুনিধানং আগচ্ছন্তুতি ৰত্ৰা ভিক্খুসঙ্ঘস্স মহাদানং দত্ৰা তিৰীৰরত্থায মহগ্ঘৰত্থাদীনি দত্ৰা সযম্পি সব্বালঙ্কারপতিমণ্ডিতো নানগ্গরসভোজনং ভুঞ্জিত্ৰা উপোসথং অধিট্ঠায মণিকুণ্ডলমেখলানূপুর ৰলযাদিৰিচিত্তসব্বালঙ্কারৰিভূসিতাহি কোসেয্যাদিসুখুমনানাৰিধৰিচিত্তৰত্থনিৰত্থাহি নচ্চগীতৰাদিততুরিযভণ্ডগহিত হত্থাহি দেৰচ্ছরাপটিভাগনাটকিত্থীহি পরিৰারিতো ৰুত্তপ্পকারেহি সদ্ধিং চেতিযট্ঠানং গন্ত্ৰা মহাভিক্খুসঙ্ঘং ৰন্দিত্ৰা অট্ঠাসি.

ততো সোমনগরে গিরিঅভযরাজা’পি সব্বে নাগরা অত্তনো অত্তনো ৰিভৰানুরূপেন ধাতুনিধানট্ঠানং আগচ্ছন্তুতি নগরে ভেরিং চরাপেত্ৰা সযং সব্বালঙ্কারপতিমণ্ডিতো সুসজ্জিতঅমচ্চগণপরিৰারিতো নিক্খমি. সোম দেৰীপি সীসং নহাত্ৰা অহতৰত্থনিৰত্থা সব্বালঙ্কারপতিমণ্ডিতা দেৰচ্ছরা ৰিয অত্তনো পরিৰারা পঞ্চসতকুমারিযো নীলৰত্থেহি পরিদহাপেত্ৰা তথেৰ অলঙ্কারেত্ৰা পুণ্ণঘটে গাহাপেত্ৰা তাসং অনন্তরা পঞ্চসতকুমারিযো পীতৰত্থেহি পরিদহাপেত্ৰা তথেৰ অলঙ্কারেত্ৰা পূজাভণ্ডানি গাহাপেত্ৰা, তাসং অনন্তরা পঞ্চসত কুমারিযো রত্তৰত্থেহি পরিদহাপেত্ৰা তথেৰ. অলঙ্কারেত্ৰা ৰিচিত্রপুপ্ফপূরিতমঞ্জুসাযো গাহাপেত্ৰা তাসং অনন্তরা পঞ্চসতকুমারিযো সেতৰত্থেহি পরিদহাপেত্ৰা তথেৰ অলঙ্কারেত্ৰা ধূম কটচ্ছুকে গাহাপেত্ৰা এৰং পূজাৰিধানং সংৰিদহিত্ৰা পরিৰারেন |ও০.০০৫৪| চেতিঙ্গণং গন্ত্ৰা মহাভিক্খুসঙ্ঘং পঞ্চপতিট্ঠিতেন ৰন্দিত্ৰা গন্ধমালাদীহি পূজং কত্ৰা অত্তনো সামিনা গিরিঅভযরাজেন সদ্ধিং একপস্সে ঠীতা.

লোণনগরে মহানাগরাজা’পি সব্বালঙ্কারেহি পতিমণ্ডিতো সব্বাভরণেহি সুসজ্জীতঅমচ্চমণ্ডলপরিৰুতো নচ্চগীততুরীযানি পগ্গণ্হাপযমানো গন্ধমালা ধূমকটচ্ছু গাহাপেত্ৰা চেতিযট্ঠানং আগন্ত্ৰা ভিক্খুসঙ্ঘং ৰন্দিত্ৰা একমন্তং অট্ঠাসি.

সেরুনগরে সিৰরাজা’পি অত্তানং সব্বালঙ্কারেহি অলঙ্করিত্ৰা মহন্তেন পরিৰারেন পূজাৰিধানং গাহাপেত্ৰা চেতিযট্ঠানং আগন্ত্ৰা মহাভিক্খুসঙ্ঘং ৰন্দিত্ৰা একমন্তং অট্ঠাসি. রাজপরিসা অত্তনো ৰিভৰানুরূপেন ৰত্থালঙ্কারেহি চন্দন মালাদীহি চ সোভমানা নলাটে মুত্তাকলাপমোলম্বক ৰিচিত্তসুৰণ্ণপট্টানি বন্ধিত্ৰা হত্থাভরণাদি অনেকাভরণেহি দিব্বপরিসা ৰিয সুমণ্ডিতপসাধিতা ৰেসানুরূপানি ৰিৰিধাৰুধানি গহেত্ৰা একপস্সে ঠীতা. সীহৰ্যগ্ঘদীপিচম্মেহি পসাধিতসুৰণ্ণালঙ্কারসুৰণ্ণধজহেমজালসঞ্ছন্নে রথ ৰরে চ সব্বালঙ্কারৰিভুসিতা রথিকা আরুয্হ একপস্সে ঠীতা. ব্রাহ্মণপুত্তাদযো মণ্ডিতচম্মে পারুপিত্ৰা উপসোভযমানা একপস্সে ঠীতা. বহু অমচ্চা অত্তনো অত্তনো ৰেসানুরূপেন মহগ্ঘৰত্থাভরণৰিভূসিতা সপরিৰারা একপস্সে ঠীতা. গন্ধোদক পূরিত দক্খিণাৰত্ত সঙ্খং গহেত্ৰা উপৰীতসুত্তং একংসং করিত্ৰা ব্রাহ্মণৰেঠনং ৰেঠেত্ৰা পুরোহিতব্রাহ্মণা মহন্তেন পরিৰারেন পূজাৰিধানং গাহাপেত্ৰা চেতিযট্ঠানং আগন্ত্ৰা মহাভিক্খুসঙ্ঘং ৰন্দিত্ৰা জযঘোসং সাৰেন্তা এৰমাহংসু?

খেমং সুভিক্খং ভৰতু নিচ্চং জনপদং সিৰং;

সস্সানি সমুপ্পজ্জন্তু রঞ্ঞো এৰং জযা সিযুং.

অৰসেসা মহাজনা এৰমাহংসু? সমুদ্দপরিযন্তং |ও০.০০৫৫| হি মহিং সাগরকুণ্ডলং ৰসুন্ধরং আৰসতু অমচ্চপরিৰারিতো. এৰং ৰত্ৰা? অম্হাকং অয্যো কাকৰণ্ণতিস্সো মহা রাজা সদেৰকে লোকে একপুগ্গলস্স লোকনাথস্সনলাটধাতুং পতিট্ঠাপেতী’তি অত্তনো অত্তনো ৰিভৰানুরূপেন সুমণ্ডিতপসাধিতা. খুজ্জৰামনকাদযো’পি সব্বে জনা পূজাভণ্ডানি গহেত্ৰা সাধুকারং দদমানা অট্ঠংসু. ইমস্মিং চেতিযট্ঠানে রাসীভূতা পরিসা এৰং ৰেদিতব্বা? খত্তিযা ব্রাহ্মণা ৰেস্সা নেগমা চ সমাগতা পুপ্ফাদিগহিতা সব্বে অলঙ্কারৰিভূসিতা.

গণনা ৰীতিৰত্তা তে অনেকে চ মহাজনা;

সমুদ্দো পত্থরন্তোৰ খত্তিযা সমুপাগতা.

অলঙ্কতো মহারাজা সরাজপরিৰারিতো;

দেৰরাজা যথা সক্কো অট্ঠাসি চেতিযঙ্গণে.

সাধুৰাদেন সত্তানং পঞ্চঙ্গতুরিযেহি চ;

হত্থস্সরথসদ্দেন সমাকিণ্ণং মহীতলং.

ততো চূল়পিণ্ডপাতিযতিস্সত্থেরো অত্তনো সদ্ধিৰিহারীকে পঞ্চসত খীণাসৰে পরিৰারেত্ৰা চেতিযট্ঠানমেৰ আগতো. মহাসাগলত্থেরো’পি পঞ্চসত খীণাসৰে পরিৰারেত্ৰা চেতিযট্ঠানমেৰ আগতো. মহিন্দত্থেরো’পি অত্তনো সাৰকে সট্ঠিমত্তে খিণাসৰে গহেত্ৰা চেতিযট্ঠানমেৰ আগতো. ইতি ইমিনা নিযামেনেৰ একো দ্ৰে তযো চত্তারো পঞ্চ খীণাসৰা আগচ্ছন্তা সত্ত সহস্সমত্তা অহেসুং. ততো চূল়পিণ্ডপাতিযতিস্সত্থেরো এত্তকে ভিক্খূ পরিৰারেত্ৰা চেতিযঙ্গণে নিসীদী. ততো রাজা আগন্ত্ৰা পঞ্চপতিট্ঠিতেন ৰন্দিত্ৰা থেরেন সদ্ধিং কথেসি? |ও০.০০৫৬| কেসধাতু কুতো লভিস্সাম অয্যা’তি. তস্মিং খণে তিস্সত্থেরো অত্তনো সদ্ধিৰিহারিকং সিৰত্থেরং ওলোকেসি. সো ওলোকিতক্খণেযেৰ নিসিন্নট্ঠানতো উট্ঠায চীৰরং পারুপিত্ৰা মহাভিক্খুসঙ্ঘং ৰন্দিত্ৰা ছল়ভিঞ্ঞো মহাখীণাসৰো চতুত্থজ্ঝানং সমাপজ্জিত্ৰা ততো ৰুট্ঠায পথৰিযং নিমুজ্জিত্ৰা ভুমিন্ধরনাগৰিমানে পাতুরহোসি.

(সুত্ৰাস্স সিৰথেরো চ ৰসিপ্পত্তো ৰিসারদো;

পাকটো অভৰি নাগনগরং পুরতো খণে.)

তস্মিং খো পন সমযে জযসেনো নাগরাজা অত্তনো ভাগিনেয্যং দ্ৰিকোটিমত্তে নাগে পরিৰারেত্ৰা মহা যসং অনুভৰমানং নিসিন্নং ইঙ্গিতসঞ্ঞং দত্ৰা থেরং দুরতোৰ আগচ্ছন্তং দিস্ৰা চিন্তেসি? ইমস্মিং নাগভৰনে সমণেহি কত্তব্বকিচ্চং নত্থী. নিস্সংসযং কেসধাতুং নিস্সায আগতো ভৰিস্সতীতি উট্ঠায ধাতুঘরং পৰিসিত্ৰা ধাতুকরণ্ডকং গিলিত্ৰা কিঞ্চি অজানন্তো ৰিয নিসীদি. তস্মিং কালে থেরো তস্স সন্তিকং অগমাসি. নাগরাজা পচ্চুগ্গন্ত্ৰা পটিসন্থারং করোন্তো থেরেন সদ্ধিং কথেসি. কস্মা অয্যো আগতো’তি ৰুত্তে এৰমাহ? তিলোকনাথস্স অম্হাকং সম্বুদ্ধস্স কেসধাতূনং অত্থায আগতো, তুয্হং সন্তিকে ঠপিতকেসধাতুযো পপঞ্চং অকত্ৰা ময্হং দেহি, তেযেৰ সন্ধায উপজ্ঝাযেন পেসিতোম্হী’তি ৰুত্তে অম্হাকং সম্মা সম্বুদ্ধস্স কেসধাতুযো মম সন্তিকে নত্থী’তি আহ. থেরো ধাতুকরণ্ডকং গিলিতভাৰং ঞত্ৰা গণ্হামি মহারাজা কেসধাতুযো’তি ৰুত্তে আম পস্সন্তো গহেত্ৰা গচ্ছাহীতি আহ. এৰং তযো ৰারে পটিঞ্ঞং গহেত্ৰা তথেৰ ঠীতো?

ইদ্ধিযা মাপযিত্ৰান ততো সো সুখুমং করং,

পৰেসেত্ৰা মুখে তস্স গণ্হী ধাতুকরণ্ডকং;

নাগালযাভিনিক্খমি তিট্ঠ নাগা’তি ভাসিয.

তস্মিং |ও০.০০৫৭| খণে জযসেনো নাগরাজা সমণং ৰঞ্চেত্ৰা পেসিতোম্হী’তি ৰত্ৰা তস্স গতকালে ধাতুকরণ্ডকং ওলোকেত্ৰা ধাতু অপস্সিত্ৰা সমণেন নাসিতোম্হী’তি দ্ৰে হত্থে উক্খিপিত্ৰা ঠপেত্ৰা অত্তনো সকলনাগভৰনং এক কোলাহলং কত্ৰা মহন্তেন সদ্দেন পরিদেৰন্তো? অম্হাকং চক্খুনি উপ্পাটেত্ৰা গতো ৰিয সদেৰকস্স লোকস্স পতিট্ঠানভূতস্স সম্মাসম্বুদ্ধস্স কেসধাতুযো অপাযদুক্খতো অমুঞ্চন্তানং অম্হাকং অভিভৰিত্ৰা ধাতুযো গহেত্ৰা গতসমণং অনুবন্ধিত্ৰা গণ্হিস্সামা’তি দ্ৰেকোটিমত্তে নাগে গহেত্ৰা অত্তনো ভাগিনেয্যেন সদ্ধিং তস্স পিট্ঠিতো পিট্ঠিতো অনুবন্ধিত্ৰা আকাসং উগ্গচ্ছিং (সু). তস্মিং খণে পন সিৰত্থেরো অকাসতো ওতরিত্ৰা পথৰিযং পাৰিসি. পুন তেপি পথৰিযং পৰিসিংসু. এৰং থেরো তেহি সদ্ধিং উম্মুজ্জ নিমুজ্জং করোন্তো পাটিহারিযং দস্সেত্ৰা সেরুনগরস্স নাতিদূরে পিট্ঠিপাসাণে উগ্গঞ্জি. তত্থেৰ তে সংৰেজেত্ৰা চেতিযঙ্গণে মহাভিক্খুসঙ্ঘস্স পুরতো পাকটো অহোসি. নাগা তং গহেতুং অসক্কোন্তা মহন্তেন সদ্দেন রৰং পতিরৰং দত্ৰা. ইতো পট্ঠায নট্ঠম্হা’তি তস্মিং পিট্ঠি পাসাণে সব্বে সমাগমং কত্ৰা মহাসদ্দেন পরিদেৰিংসু? নট্ঠম্ভা ৰত ভো’তি. ততো পট্ঠায সো পিট্ঠিপাসাণো নাগানং রৰং পতিরৰং দত্ৰা পরিদেৰিতহাৰেন নাগগল্লং নাম অহোসি.

নাগো থেরস্স পিট্ঠিতোযেৰ অনুবন্ধিত্ৰা চেতিযঙ্গণং গন্ত্ৰা রাজানং এৰমাহ? দেৰ, এসো ভিক্খু মযা অদিন্নধাতু গহেত্ৰা আগতো’তি. তং সুত্ৰা রাজা? সচ্চং কির অয্য নাগস্স ৰচনন্তি ৰুত্তে নহেৰ মহারাজ, ইমিনা দিন্নং এৰ ধাতুং অগ্গহেসিন্তি ৰুত্তে? নাগো তৰ সক্খিং দেহীতি আহ. থেরো তস্স ভাগিন্যেং সমণুপ্পল নাগরাজানং সক্খিং অকাসি. রাজা তস্স ভাগিনেয্যস্স সব্বৰচনং সুত্ৰা সদ্দহি. তস্মিং কালে দুক্খাভিভূতো নাগরাজা গন্ত্ৰা বহি ঠীতো. ততো পট্ঠায সো নাগরাজা |ও০.০০৫৮| বহি হুত্ৰা নিসিন্নত্তা বহিনাগরাজা নাম অহোসি. তস্স পন ভাগিনেয্যং অন্তো চেতিযঙ্গণে নিসীদাপেসি. ইমস্স পন চেতিযস্স আরক্খং গহিতনাগা কথেতব্বা. সুমননাগরঞ্ঞো পরিৰারা ছকোটিমত্তা নাগা, জযসেনস্স পরিৰারা কোটিসতমত্তা নাগা, সমণুপ্পলনাগরঞ্ঞো পরিৰারা দ্ৰিকোটিমত্তা নাগা অহেসুং. সব্বে ধাতুযা আরক্খং গণ্হিংসু. রাজা থেরস্স হত্থতো কেসধাতুং গহেত্ৰা রতনচঙেগাটকে ঠপেত্ৰা মহিন্দস্স নাম অমচ্চস্স অদাসি. তস্মিং সমাগমে তিপিটকমহাফুস্সদেৰত্থেরস্স সদ্ধিৰিহারিকা পটিসম্ভিদপ্পত্তা চত্তারো সামণেরা অহেসুং. তেসু একো মলয রাজপুত্তো সুমনসামণেরো নাম, একো সেরুনগরে সিৰরাজভাগিনেয্যস্স পুত্তো উত্তর সামণেরো নাম. একো মহাগামে মালাকারপুত্তো চুন্দ সামণেরো নাম একো মহাগামে একস্স কুটুম্বিকস্স পুত্তো মহাকস্সপসামণেরো নাম, ইমে চত্তারো সামণেরা অজ্জ কাকৰণ্ণতিস্সমহারাজা মহাচেতিযে ধাতু নিধানং করিস্সতি, মযং হিমৰন্তং গন্ত্ৰা সুকুসুমানি আহরিস্সামাতি থেরং ৰন্দিত্ৰা আকাসতো হিমৰন্তং গন্ত্ৰা চম্পকনাগসললাদযো পূজনীযমালং গহেত্ৰা তাৰতিংসদেৰ লোকং গতা.

তস্মিং কালে সক্কো দেৰরাজা সব্বাভরণপতিমণ্ডিতো দ্ৰিসু দেৰলোকেসু দেৰতাযো গহেত্ৰা এরাৰণহত্থীক্খন্ধমারুয্হ অড্ঢতেয্যকোটিদেৰচ্ছরাপরিৰারিতো সুদস্সনমহা ৰীথিযং ৰিচরন্তো সৰঙ্গোটকে তে চত্তারো সামণেরে দুরতোৰ আগচ্ছন্তে দিস্ৰা হত্থীক্খন্ধতো ওরুয্হ পঞ্চ পতিট্ঠিতেন ৰন্দিত্ৰা তেসং হত্থে মালাচঙ্গোটকে দিস্ৰা? কিং অয্যা তুম্হাকং হত্থে’তি পুচ্ছি. তং সুত্ৰা সামণেরা মহারাজ, কিং ত্ৰং ন জানাসি. লঙ্কাযং কাকৰণ্ণতিস্স মহারাজা দসবলস্স নলাটধাতুং গহেত্ৰা মহাৰালুকগঙগায দক্খিণপস্সে সেরু নাম দহস্স অন্তে ৰরাহ নাম সোণ্ডিমত্থকে চেতিযং কারাপেতুং তুম্হাকং নিযোগেন ৰিস্সকম্মদেৰপুত্তেন নিম্মিত্ैট্ঠকানি গহেত্ৰা চেতিযং কারাপেত্ৰা অজ্জ ধাতুনিধানং করোতি. তত্থ পূজনত্থায হিমৰন্ততো আনীতপুপ্ফমিদন্তি ৰত্ৰা ইতোপি কুসুমং গহেতুং আগতম্হা’তি ৰদিংসু. সক্কো তেসং ৰচনং সুত্ৰা?

অয্য |ও০.০০৫৯| তুম্হাকং হত্থে পুপ্ফানি চূল়ামণিচেতিযে পুজেত্ৰা অম্হাকং উয্যানতো পুপ্ফানি গহেত্ৰা গচ্ছথাতি ৰত্ৰা তেহি সদ্ধিং গন্ত্ৰা তেসং পুপ্ফেহি চূল়ামণিচেতিযং পূজেসি. ততো পপঞ্চং ন ভৰিতব্বন্তি সক্কস্স নিৰেদেসুং. তং সুত্ৰা সক্কো সামণেরানং পঞ্চমহাউয্যানতো পারিচ্ছত্ত-কোৰিল়ারাদীনি পুপ্ফানি চ চন্দনচুণ্ণঞ্চ গহেত্ৰা দাপেসি. সামণেরা পুপ্ফানি গহেত্ৰা দেৰলোকতো ওতরিত্ৰা হিমৰন্তং পৰিসিত্ৰা সুৰণ্ণমণিপব্বতে সন্তচ্ছাযায নসীদিত্ৰা দিৰাৰিহারং কত্ৰা নক্খত্তৰেলায সম্পত্তায মণী গৰেসমানা চত্তারো মণযো অদ্দসংসু. তেসং একো ইন্দনীলমণী, একো পহস্সরজোতিরঙ্গ মণী, একো ৰেলুরিযমণি, একো মসারগল্লমণি, চত্তারো মণযো চ দিব্বপুপ্ফানি চ গহেত্ৰা থেরানং দস্সেসুং. থেরো? মহারাজ, ইমে সামণেরা পারিচ্ছত্তককোৰিল়ারাদীনি পুপ্ফানি চ চন্দনচুণ্ণঞ্চ চত্তারো মণযো চ গহেত্ৰা আগতা’তি রঞ্ঞো আরোচেসুং.

রাজা তং সুত্ৰা সোমনস্সজাতো সামণেরে পঞ্চ পতিট্ঠীতেন ৰন্দিত্ৰা তেসমাহতমণযো গহেত্ৰা মহানন্দ নাম অমচ্চস্স দত্ৰা থেরেহী সদ্ধিং মহন্তেন পরিৰারেন চেতিযঙ্গণং গন্ত্ৰা মণিকরণ্ডকেন ধাতুং গহেত্ৰা অত্তনো সীসে ধাতুং ঠপেত্ৰা উপরি সেতচ্ছত্তং কারাপেত্ৰা চেতিযং তিক্খত্তুং পদক্খিণং কত্ৰা পাচীনদ্ৰারে ঠীতো? অযং দসবলস্স নলাটধাতু অম্হেহি কারাপিতায বুদ্ধপটিমায নলাটে উণ্ণলোমাকারং হুত্ৰা পতিট্ঠহতূতি অধিট্ঠাসি. তস্স চিন্তিতক্খণেযেৰ ধাতু করণ্ডতো নভমুগ্গন্ত্ৰা আকাসে সত্ততালপ্পমাণে ঠত্ৰা ছব্বণ্ণ রংসিযো ৰিস্সজ্জেসি. তা রংসিযো কুটেন আসিঞ্চমানৰিলীন সুৰণ্ণং ৰিয অন্তলিক্খতো নিক্খন্তসুৰণ্ণরসধারা ৰিয সকললঙ্কাদীপং |ও০.০০৬০| রংসিজালেহি একোভাসং কত্ৰা গণ্হিংসু. তস্মিং কালে যমকপাটিহারিযসদিসং পাটিহারিযং অহোসি. মহাকারুণিকস্স ভগৰতো অদিট্ঠপুব্বং পাটিহারিযং দিস্ৰা মহাজনা তথাগতস্স রূপকাযং পচ্চক্খভুতা ৰিয অহেসুং.

অদিট্ঠপুব্বং সত্থুস্স পাটিহীরং মহাজনা;

দিস্ৰা পীতিপরা জাতা পসাদমজ্ঝগুং জিনে.

পূজেসুং গন্ধমালঞ্চ অলঙ্কারং সকং সকং;

সব্বে ৰন্দিংসু সিরসা-চেতিযং ঈদিসং ৰরং.

তস্মিং সমাগমে একো পণ্ডিতপুরিসো জিনং থোমেন্তো এৰমাহ?

নিব্বুতস্সাপি বুদ্ধস্স যসো ভৰতি ঈদিসো;

ঠীতস্স লোকনাথস্স কীদিসা আসি সম্পদা.

অনুভাৰমিদং সব্বং পুঞ্ঞেনেৰ মহেসিনো;

করেয্য ঞত্ৰা পুঞ্ঞং তং পত্থেন্তো বোধিমুত্তমং.

তস্মিং কালে নানারতনৰিচিত্তং অনেকালঙ্কারপতিমণ্ডিতং মহারহং সমুস্সিতধজপতাকং নানাৰিধকুসুমসমাকিণ্ণং অনেকপূজাৰিধানং গহেত্ৰা মনুস্সা ছণৰেসং গণ্হিংসু. অনেকৰিধতুরিযসঙ্ঘুট্টং অহোসি. তস্মিং খণে দেৰতাযো পুপ্ফৰস্সং ৰস্সাপেন্তি. মহানুভাৰসম্পন্না নাগা পূজং করোন্তি. এৰং সব্বে দেৰা নাগা মনুস্সা সাধুকারং দেন্তি, অপ্ফোটেন্তি, ৰেলুক্খেপং করোন্তি, হত্থীনো কুঞ্চনাদং নদন্তি. অস্সা তুট্ঠিরৰং রৰন্তি, বহলঘন মহাপথৰী যাৰ উদকপরিযন্তং কম্পি. দিসাসু ৰিজ্জুল্লতা নিচ্ছরিংসু. সকললঙ্কাদীপে সুমনকূটাদযো মহানগা কুসুমগণসমাকিণ্ণা অহেসুং. সব্বে জলাসযা পঞ্চৰিধ পদুমসঞ্ছন্তা, দেৰতানমন্তরে মনুস্সা, মনুস্সানং অন্তরে যক্খনাগসুপণ্ণাদযো চ অহেসুং. ভিক্খুভিক্খুনীউপাসক উপাসিকা অপরিমাণা অহেসুং. মহন্তেন সাধুকারেন মহা নিগ্ঘোসেন সকললঙ্কাদীপে তিব্বৰাতাভিহতসমুদ্দো ৰিয একনিন্নাদং |ও০.০০৬১| একনিগ্ঘোসং অহোসি. ইমিনা পূজাৰিধানেন পসাদকভূতমহাজনকাযমজ্ঝে ধাতু পাটিহারিযং দস্সেত্ৰা আকাসতো ওতরিত্ৰা বুদ্ধপটিমায নলাটে পুণ্ণচন্দসস্সিরীকং অভিভৰন্তমিৰ ৰিরোচমানা পতিট্ঠাসি.

রাজা মহানন্দনামকস্স অমচ্চস্স হত্থতো কেসধাতুং গহেত্ৰা ৰিহারদেৰিযা দত্ৰা ত্ৰং ইমা কেসধাতুযো দসবলস্স অনৰলোকিত মত্থকে পতিট্ঠাপেহী’তি আহ. সা কেসধাতুযো গহেত্ৰা তত্থেৰ পতিট্ঠহন্তু’তি অধিট্ঠানং অকাসি. তস্মিং খণে কেসধাতুযো করণ্ডতো নভং উগ্গন্ত্ৰা মযূরগীৰসংকাসনীলরংসিযো ৰিস্সজ্জেন্তী আকাসতো ওতরিত্ৰা বুদ্ধপটিমায উত্তমঙ্গে সিরস্মিং পতিট্ঠহিংসু.

ততো রাজা থেরেন সদ্ধিং ধাতুগব্ভং পৰিসিত্ৰা দিব্বচন্দনচুণ্ণসমাকিণ্ণং পারিচ্ছত্তককোৰিল়ারাদি সুগন্ধপুপ্ফসন্থরং ৰিযূহিত্ৰা পভাসমুদযসমাকিণ্ণে চত্তারো মণি পাসাণে ঠপেসি. তেসং আলোকাভিভূতো ধাতুগব্ভো অতিৰিয ৰিরোচিত্থ. সব্বনাটকিত্থীযো অত্তনো অত্তনো আভরণানি ওমুঞ্চিত্ৰা ধাতুগব্ভেযেৰ পূজেসুং. ততো রাজা ধাতুনিধানং কত্ৰা বুদ্ধরূপস্স পাদতলে সীসং ঠপেত্ৰা নিপন্নো এৰং পরিদেৰি; ময্হং পিতুপিতামহপরম্পরাগতাধাতু অজ্জ আদিং কত্ৰা ইতো পট্ঠায ৰিযোগা জাতা অহং দানি তুম্হাকং অতিচিরং (ঠীতা) রমণীযা রোহণজনপদা আহরিত্ৰা ইমস্মিং ঠানে পতিট্ঠাপেসিন্তি ৰত্ৰা সিনেরু মুদ্ধনি |ও০.০০৬২| সমুজ্জলমহাপদীপো ৰিয তুম্হে ইধেৰ ঠীতা. ইদানি ন গমিস্সাম মযং খমথ ভগৰা’তি পরিদেৰমানো ধাতু গব্ভেযেৰ পতিত্ৰা আহ?

অহো ৰিযোগং দুক্খং মে এতা বাধেন্তি ধাতুযো;

ৰত্ৰা সো পরিদেৰন্তো ধাতুগব্ভে সযী তদা.

মরিস্সামি নো গমিস্সং অয্যং হিত্ৰা ইধেৰ’হং;

দুল্লভং দস্সনং তস্স সংসারে চরতো মমা’তি.

ৰত্ৰা পরিদেৰন্তো নিপজ্জি. তস্স পন ভিক্খুসঙ্ঘস্স অন্তরে সহদেৰো নাম থেরো রাজানং ধাতুগব্ভে রোদমানং নিপন্নং দিস্ৰা কিমজ্ঝাসযো এতস্সা’তি চেতোপরিযঞাণেন সমন্তাহরিত্ৰা ইধ নিপন্নো মরিস্সামী’তি নিপন্নভাৰং জানিত্ৰা ইদ্ধিযা সংসরং পিযরূপং মাপেত্ৰা ধাতুগব্ভতো তং বহি অকাসি.

(ইদ্ধিযা সো ৰসিপত্তো ছল়ভিঞ্ঞো ৰিসারদো;

তং খণঞ্ঞেৰ সপ্পঞ্ঞো রাজানং তং বহিং অকা.)

ততো পঠমানীতজোতিরঙ্গ পাসাণং ধাতুগব্ভস্স উপরি ৰিতানং ৰিয ঠপেত্ৰা অরহন্তা? ধাতুগব্ভো সমন্ততো চতুরস্সমঞ্চং ৰিয একঘনো হোতু. ধাতু গব্ভে গন্ধা মা সুস্সন্তু, পুপ্ফানি মা মিলাযন্তু, রতনানি মা ৰিৰণ্ণা হোন্তু, পূজনীযভণ্ডানি মা নস্সন্তু, পচ্চত্থিকপচ্চামিত্তানং ওকাসো ৰা ৰিৰরো ৰা মা হোতু’তি অধিট্ঠহিংসু. ততো রাজা ধাতুযো মহন্তং পূজং কত্ৰা মঙ্গলচেতিযে চতুরস্সকোট্ঠকং অতিমনোরমং ছত্তকম্মঞ্চ কেলাসকূটং ৰিয সুধাকম্মঞ্চ ৰালুকপাদতো পট্ঠায সব্বঞ্চ কত্তব্বং কম্মং নিট্ঠাপেসি. সো পন সেত নিম্মলচন্দরংসি ৰিয উদকবুব্বুল়কেলাসকূটপটিভাগো ছত্তধরো |ও০.০০৬৩| অচলপ্পতিট্ঠিতো সুজনপ্পসাদকো অঞ্ঞতিত্থীয মদ্দনকরো মঙ্গলথূপো ৰিরোচিত্থ.

ৰিলাসমানো অট্ঠাসি তোসযন্তো মহাজনে;

মঙ্গলকেলাসথূপো অচলো সুপ্পতিট্ঠিতো.

সুজনপ্পসাদনকরো তিত্থিযদিট্ঠিমদ্দনো;

ভৰি সদ্ধাকরো সেট্ঠো সব্বজনপসাদকো.

চেতিযো পৰরো লোকে মহাজননিসেৰিতো;

ধজপুপ্ফসমাকিণ্ণো সদা পূজারহো ভৰি.

বহূ জনা সমাগম্ম নানা দেসা সমাগতা;

পূজেসুং তং মহাথূপং সব্বদাপি অতন্দিতা.

ঈদিসো পতিরূপৰাসো সো দেসো দুল্লভো ভৰে;

অপ্পমত্তা সদা সন্তা ৰিনাথ কুসলং বহুন্তি.

রাজা কপ্পাসিকসুখুমৰত্থেন মহারহং চেতিযং ৰেঠেত্ৰা, সিরিৰড্ঢনং নাম মহাবোধিং পতিট্ঠপেত্ৰা তত্থ বোধিঘরঞ্চ কারাপেত্ৰা তিভূমকং উপোসথাগারং কারাপেত্ৰা রত্তিট্ঠান দিৰাট্ঠানাদীনি কত্ৰা সব্বং ৰিহারে কত্তব্বং কারেসি. এত্তকং কারাপেত্ৰা ৰিহারং দক্খিণোদকং দস্সামী’তি চিন্তেত্ৰা অসীতিসহস্সমত্তানং ভিক্খূনং সত্তদিৰসানি নানাৰিধ সূপৰ্যঞ্জনেহি মহাদানং দত্ৰা সত্তমে দিৰসে মহাভিক্খু সঙ্ঘস্স তিচীৰরত্থায ৰত্থানি দাপেত্ৰা পাতোৰ পাতরাসভত্তং ভুঞ্জিত্ৰা থেরস্স সন্তিকং গন্ত্ৰা ৰন্দিত্ৰা একমন্তং ঠীতো এৰমাহ? অয্যা, চাতুদ্দসিকে মহাভিক্খুসঙ্ঘস্স দক্খিণং দাতুমিচ্ছামী’তি. সো পনাযস্মা এৰমাহ; উপকট্ঠ পুণ্ণমাযং উপোসথদিৰসে অস্সযুজনক্খত্তেন দক্খিণং ধাতুং ভদ্দকন্তি. সো থেরস্স ৰচনং সুত্ৰা পঞ্চপতিট্ঠিতেন থেরং ৰন্দিত্ৰা সোমনগরে অত্তনো ভগিনিং দেৰিং কথেসি? ভগিনি, দসবলস্স নলাটধাতুং নিদহিত্ৰা মঙ্গলমহাচেতিযানুরূপং |ও০.০০৬৪| পাসাদং অলঙ্কতদ্ৰারট্টালকতোরণং সেত ৰত্থ অনেকধজসমাকিণ্ণং ৰিহারঞ্চ কারাপেত্ৰা দক্খিণং দস্সামী’তি অয্যস্স কথেসিং. সো পনাযস্মা; উপকট্ঠ পুণ্ণমায উপোসথদিৰসে দাতুং যুত্তন্তি আহা’তি. দেৰ, কিং কথেসি, অয্যস্স কথীতনিযামেনেৰ উপকট্ঠ পুণ্ণমায উপোসথদিৰসে দক্খিণং দেহী’তি আহ. সো তস্সা কথং সুত্ৰা সোমনস্সপত্তো সাধু ভদ্দে’তি সম্পটিচ্ছিত্ৰা সোমনগরে ৰিহরন্তো, উপকট্ঠ পুণ্ণমায উপোসথে সম্পত্তেযেৰ অজ্জুপোসথো’তি ঞত্ৰা গিরিঅভযং পক্কোসাপেত্ৰা, তাত স্ৰে দক্খিণং দাতব্বং ত্ৰং সেনঙ্গং অলঙ্করিত্ৰা স্ৰে অম্হেহি সদ্ধিং এহী’তি ৰত্ৰা সেরুনগরে সিৰরঞ্ঞো লোণনগরে মহানাগরঞ্ঞো পণ্ণং পহিণী. স্ৰে তুম্হাকং হত্থিঅস্সরথপত্তাদীনি সুৰণ্ণালঙ্কারেহি অলঙ্করিত্ৰা স্ৰে অম্হেহি সদ্ধিং ছণ ৰেসং গাহাপেত্ৰা অয্যস্স তিস্সত্থেরস্স দক্খিণং দীযমানং সমোসরন্তুতি. তে পন রাজানো সাসনং সুত্ৰা অত্তনো অত্তনো ৰিভৰানুরূপেন হত্থিঅস্সরথপত্তাদীনি অলঙ্করিত্ৰা গন্ধপঞ্চঙ্গুলিকং দত্ৰা সুৰণ্ণমালাদীনি পিলন্ধাপেত্ৰা মহা গোণেপি তথেৰ অলঙ্করিত্ৰা সিঙ্গেসু সুৰণ্ণকঞ্চুকং (পটি) মুঞ্চাপেত্ৰা অমচ্চগহপতি-ব্রাহ্মণপুত্ত-অজগোপক-খুজ্জৰামনক-সেনাপতিআদযো চ ৰিচিত্তৰত্থানি নিৰাসেত্ৰা নানাৰিধৰিলেপনানি ৰিলিম্পেত্ৰা আগন্ত্ৰা রঞ্ঞো দস্সযিংসু. রাজাপি চতুরঙ্গিনিযা সেনায পরিৰুতো অলঙ্কতহত্থিক্খন্ধং আরুহি. সেসরাজানো চ অত্তনো অত্তনো সেনঙ্গেহি পরিৰারেত্ৰা হত্থিক্খন্ধে নিসীদিত্ৰা রাজানং মজ্ঝে কত্ৰা ৰামদক্খিণপস্সতো নমস্সমানা নিক্খমিংসু. তস্স পন গমনং অজাতসত্তুনো তথাগতস্স দস্সনত্থায জীৰকম্বৰনগমনং ৰিয তিংসযোজনপ্পমাণং এরাৰণহত্থিক্খন্ধং আরুহিত্ৰা দ্ৰীসু দেৰলোকেসু দেৰেহি পরিৰারেত্ৰা সক্কস্স দেৰানমিন্দস্স নন্দনৰনগমনকালো ৰিয চ অহোসি. সো ৰড্ঢমাসকচ্ছাযায |ও০.০০৬৫| সম্পত্তায সোমনগরতো নিক্খমিত্ৰা সেরুদহস্স অন্তে নানাৰিধ অলঙ্কতপটিযত্তনাটকিত্থীনং পঞ্চঙ্গিকতুরিযং পগ্গণ্হাপযমানো অট্ঠাসি.

মহাপথৰী ভিজ্জমানা ৰিয পব্বতা পরিৰত্তমানা ৰিয মহাসমুদ্দো (থলং) অৰত্থরিত্ৰা ভিজ্জমানকালো ৰিয চ অহোসি. ব্রাহ্মণা জযমুখমঙ্গলিকা সোত্থি ৰচনং ৰদিংসু. সব্বালঙ্কারপতিমণ্ডিতা নাটকিত্থিযো পঞ্চঙ্গিকতুরিযং পৰত্তযিংসু. মহাজনো ৰেলুক্খেপসহস্সানি পৰত্তেসি. ততো রাজা বহূ গন্ধদীপধূপাদযো গাহাপেত্ৰা উট্ঠায সেনায পরিৰুতো থেরস্স ৰসনট্ঠানং পৰিসিত্ৰা থেরং ৰন্দিত্ৰা নিসিন্নো আহ? অয্য রাজানো চ সম্পিণ্ডিত্ৰা দক্খিণোদকস্স দীযমানস্স কালো’তি. থেরো তস্স কথং সুত্ৰা ভদ্দকং মহারাজা’তি সম্পটিচ্ছি. তস্মিং দক্খিণোদকস্স দানদিৰসে নানাৰিধৰিচিত্তমণিদণ্ডকেসু নানাৰিধ ধজপতাকাদীনি বন্ধাপেত্ৰা সমুস্সিতানি অহেসুং. পুরিমাদী দিসাসু মনুঞ্ঞৰাতা ৰাযিংসু. তথা মহারংসিজালসমুজ্জলিতো সহস্সরংসিভাকরো অত্থঙ্গতো অহোসি. ৰিপ্ফুরিতকিরণরজধূমরাহুঅব্ভাদীহি উপরোধেহি ৰিরহিতো তারাগণপরিৰুতো পুণ্ণচন্দো সমুজ্জলরজতমযং আদাসমণ্ডলং ৰিয পাচীনদিসতো সমুগ্গতো. তস্মিং খণে দণ্ডদীপিকাদযো সমুজ্জলাপেসুং. মহামঙ্গলচেতিযং পন জাতিসুমনমালাদামেন পরিক্খিপিত্ৰা একমালাগুণং ৰিয অলঙ্করি. যথা তারাগণপরিৰুতো পুণ্ণচন্দো তথা পদীপমালালঙ্কতো মহাচেতিযো অতিৰিয ৰিরোচতি. সকল লঙ্কাদীপে পন সব্বে রুক্খাপি ৰিচিত্তধজেন অলঙ্কতা ৰিয অকালফলপল্লৰেহি ৰিচিত্তা অহেসুং. মহাসমুদ্দলোণসাগরাদযো’পি পঞ্চৰিধপদুমসঞ্ছন্না অহেসুং.

ৰিচিত্রৰত্থাভরণেহি সব্বে,

অলঙ্কতা দেৰসমানৰণ্ণা;

অনেকসঙ্খ্যা সুমনা পতীতা,

জনা সমন্তা পরিৰারযিংসু.

সব্বেৰ |ও০.০০৬৬| উজ্জলাপেসুং দণ্ডদীপং মনোরমং;

সকলম্পি ইদং দীপং আসি ওভাসিতং তদা.

তারাগণসমাকিণ্ণো পুণ্ণচন্দোৰ জোতযী;

সারদে নভমজ্ঝম্হি ঠিতো রুচিররংসিযা.

তথা অযং থূপৰরো সুপ্পভাসো অলঙ্কতো;

মালাপদীপমজ্ঝম্হি ভাতি ভুতিলকুত্তমো.

সব্বে’পি পাদপা অস্স লঙ্কাদীপস্স সব্বসো;

ধজেহি’ৰ সমাকিণ্ণা আসুং পুপ্ফফলন্দদা.

সচেতনা যথা সব্বে অকা পূজং অকা তদা;

তথা অচেতনা সব্বে অকা পূজং অনপ্পকং.

যেভুয্যেন ভুমট্ঠে দেৰে উপাদায যাৰ অকণিট্ঠকা দেৰা ব্রহ্মা দিব্বমালাপারিচ্ছত্তককোৰিল়ারচন্দনচুণ্ণং গহেত্ৰা আগতাদেৰাতি ৰা মনুস্সাতি ৰা জানিতুং অসক্কোন্তি. উক্কট্ঠমহাসমাগমো অহোসি. তস্মিম্পি দিৰসে মহাপথৰি আকাসযুগন্ধরচক্কৰাল়পব্বতুত্তমাদযো কম্পিংসু. তং দিস্ৰা রাজা অতিৰিয সোমনস্সপ্পত্তো থেরে চ অৰসেস মহামত্তাদযো সন্নিপাতেত্ৰা নাটকাদযো চ গহেত্ৰা, ইদানেৰাহং ৰিহারদক্খিণং দস্সামি’তি চেতিযঙ্গণং অগমাসি. থেরোপি ভিক্খুসঙ্ঘং গহেত্ৰা চেতিযঙ্গণে অলঙ্কতমণ্ডপে নিসীদি. রাজা ৰাসিতগন্ধোদকসুৰণ্ণভিঙ্কারং গহেত্ৰা উদকং থেরস্স হত্থে আসিঞ্চিত্ৰা দক্খিণং অদাসি. দত্ৰা চ পন এৰমাহ; অয্যা এসা ধাতু ময্হং পিতামহৰংসেন আগতা. ইদানি অম্হাকং অতিরুচিররমণিযা রোহণজনপদা আহরিত্ৰা সুৰণ্ণেন ধাতুগব্ভং, সত্তরতনেন ধাতুমণ্ডপং কারাপেত্ৰা তস্মিং সুৰণ্ণমযং বুদ্ধপটিমং নিসীদাপেত্ৰা অম্হাকং দসবলস্স নলাটধাতুং |ও০.০০৬৭| নিদহিত্ৰা অয্যস্স চীৰরাদীনমত্থায ইদানি সোল়সগামৰরানি দস্সামি’তি গামৰরানি দত্ৰা সমন্ততো তিগাৰুতপ্পমাণে সেরুদহে ভেরিং চরাপেত্ৰা আরামিকং কত্ৰা আহ? ভন্তে, তুম্হাকং মযা দিন্নসোল়সগামং অজ্জেৰ গন্তব্বং. গন্ত্ৰা চ পন অজ্জেৰ পরিগ্গহং করোথাতি ৰত্ৰা তত্থেৰ ৰাসুপগতো পুন দিৰসে সমাগন্ত্ৰা সত্তাহং মহাদানং দত্ৰা সত্তমে দিৰসে মহাভিক্খুসঙ্ঘস্স তীচীৰরপ্পহোনকসাটকং পণীতং ভোজনং দত্ৰা থেরস্স সন্তিকং আগতো, অয্য ৰিহারে কত্তব্বং অপরিহাপেত্ৰা মযা কতং, গেহং গমিস্সামীতি (নিৰেদেসি). থেরো তস্স কথং সুত্ৰা সাধু মহারাজাতি সম্পটিচ্ছি.

সো পন চেতিযস্স পূজনত্থায পুপ্ফারামং কারাপেত্ৰা মালাকারানং পরিব্বযং দাপেসি. তথা ভেরিৰাদকনাটকানম্পি ৰিহারসীমন্তে সুৰণ্ণনঙ্গলেন পরিচ্ছিন্দিত্ৰা আরামিকানম্পি গামং কারাপেসি. ভিক্খুসঙ্ঘস্স ৰেয্যাৰচ্চত্থায অত্তনো সন্তিকে পঞ্চসতঅমচ্চধীতরো তত্তকে অমচ্চপুত্তে দাসদাসিযো চ দত্ৰা পরিব্বযত্থায তেসং তেসং পঞ্চসতসহস্সকহাপণে চ দাপেসি. ভিক্খুসঙ্ঘস্স চ ধাতুপুজনত্থায সোল়সসহস্সং কহাপণং দাপেসি.

ততো গিরিঅভযং পক্কোসাপেত্ৰা, তাত তুম্হে ইধেৰ নিচ্চং ৰসথ. অম্হাকং ৰিহারে চ আরামিকেসু চ অয্যেসু চ অপ্পমত্তো হোহীতি ওৰদিত্ৰা সব্বং তস্স নিয্যাদেসি. থেরো তস্স এৰমাহ? মহারাজ সমন্ততো মহাসীমং বন্ধিতব্বন্তি. বন্ধথ ভন্তেতি ৰুত্তে? মহারাজ অকিত্তিতেন নিমিত্তেন সীমং বন্ধিতুং নসক্কা, ৰিহারস্স পাচীন পচ্ছিমুত্তরদক্খিণতো মহাসীমং বন্ধনায নিমিত্তং সল্লক্খেত্ৰা দেহি, মযং সীমং বন্ধিস্সামাতি আহ. রাজা তুট্ঠো সত্ত অমচ্চে সব্বালঙ্কারেন অলঙ্করিত্ৰা সীমানিমিত্তং কিত্তেত্ৰা আগমনত্থং |ও০.০০৬৮| পেসেসি. তে পন সত্ত অমচ্চা চতুসু দিসাসু নিমিত্তং সল্লক্খেত্ৰা পণ্ণে লিখিত্ৰা আহরিত্ৰা রঞ্ঞো অদংসু. রাজা একেকং সতকহাপণং দত্ৰা চতুসু দিসাসু আরক্খং দাপেত্ৰা সীমং বন্ধন্তূতি মহাভিক্খুসঙ্ঘস্স নিৰেদেসি. অথ থেরো ভিক্খুসঙ্ঘপরিৰুতো চেতিযঙ্গণে নিসীদিত্ৰা ৰপ্পমাসকাল়পক্খদ্ৰাদসদিৰসে সীমং বন্ধিত্ৰা নিট্ঠপেসি.

তত্থ সীমানিমিত্তং এৰং জানিতব্বং; পুরিমায দিসায সিগাল পাসাণং গতো. ততো মচ্ছসেলগামস্স ৰাম পস্সেন কোটসীমা নাম গামক্খেত্তং ৰিস্সজ্জেত্ৰা গণদ্ৰারগামং গতো. চিত্তৰাপিযা উত্তরৰান কোটিতো ৰরগামক্খেত্তে পিট্ঠিপাসাণং গতো. ততো সালিকং নাম মধুকরুক্খে ঠীতপাসাণথূপস্স গতো. ততো ৰুত্তিক নাম ৰাপিযা দক্খিণৰান কোটিতো কণিকার সেলস্স গতো. ততো ছন্নজ্ঝাপিতসেলস্স গতো. ততো কুক্কুটসিৰ নাম উপাসকস্স মধুকরুক্খে ঠীতং থূপং গতো. ততো সোণ্ডং নাম সেলং গতো. ততো সবরং নাম পাসাণং গতো. ততো এলালতিত্থস্স গতো. ততো সোব্ভ মজ্ঝিমেন গন্ত্ৰা অস্সবন্ধনং নাম ঠানং গতো. ততো পাসাণস্স মত্থকে উদক কাকং নাম নিগ্রোধং গতো. সো রুক্খো উদক কাকানং ৰুসিত ভাৰেন এৰং নাম জাতো. ততো তম্বতিত্থং নাম গন্তা মহাচারিকস্সনাম থূপমগ্গস্স গতো. |ও০.০০৬৯| ততো অস্সমণ্ডলপিট্ঠিং গতো. ততো মহা কদম্ব পস্সে ঠীতং পাসাণথূপং গতো. ততো মহা রাজুৰাপিযা উত্তরকোটিযা ঠীতং মহানিগ্রোধরুক্খং গতো. ততো মহাৰনপিট্ঠিং গতো. ততো লোণসাগরস্স অন্তে রজতসেলং গতো. পুন আৰত্তিত্ৰা সিগাল পাসাণেযেৰ ঠীতো. ইমং এত্তকং পদেসং সমন্ততো পরিচ্ছিন্দাপেত্ৰা রাজা অদাসি. ৰিহারস্স বহূ আরামিকে চ (তেসং) ৰিৰিধানি উপকরণানি (চ) দাপেত্ৰা সব্বে পাকারতোরণাদযো কারাপেত্ৰা ৰিহারং নিট্ঠাপেত্ৰা রোহণমেৰ গতো.

রাজা পসন্নহদযো মহাপুঞ্ঞো মহাবলো;

কারেত্ৰা উত্তমং থূপং কঞ্চনগ্ঘীক সোভিতং.

বন্ধাপেত্ৰা ততো সীমং ৰট্টগামঞ্চ সোল়স;

দত্ৰা আরামিকানঞ্চ সব্বুপকরণানি চ.

ততো সো রোহণং গন্ত্ৰা মহাসেনাপুরক্খতো;

ৰিহারদেৰিযা সদ্ধিং মোদমানো ৰসী তহিং.

থেরো পন তত্থেৰ ৰিহরন্তো যো ইমস্মিং ৰিহারে ৰসন্তো তথাগতস্স একগন্ধকুটিযং ৰুত্থো ৰিয ভৰিস্সতীতি খ্যাকরিত্ৰা ততো পট্ঠায সীলাচারসমাধিসমাপত্তিপটিলদ্ধজল়ভিঞ্ঞাপটিসম্ভিদপ্পত্তেহি খীণাসৰেহি পরিৰারেত্ৰা সব্ব বুদ্ধগুণং অনুস্সরন্তো চিরং ৰসিত্ৰা তত্থেৰ অনুপাদিসেসায নিব্বানধাতুযা পরিনিব্বাযি.

অনেকগুণসম্পন্নো |ও০.০০৭০| তিস্সত্থেরো বহুস্সুতো;

জনানং সঙ্গহংকত্ৰা নিব্বুতো সো অনাসৰো.

থেরাপি তে সীলসমাধিযুত্তা,

বহুস্সুতা সাধুগুণাভিরামা;

পঞ্ঞাপভাৰাযুপ্পন্নচিত্তা,

গুণাকরা তানযুতা জনানং.

পহীনভৰসংসারা পভিন্নপটিসম্ভিদা;

নামরূপং সমাসন্তো পেসলা ছিন্নবন্ধনা.

সত্তানং উত্তমং সন্তিং কত্ৰা চ জনসঙ্গহং;

নিব্বুতা তে মহাপঞ্ঞা পদীপোচ সুমানসা.

ইতি অরিযজনপ্পসাদনত্থায কতে ধাতুৰংসে

ধাতুনিধানাধিকারো নাম

পঞ্চমো পরিচ্ছেদো.

ইমিনা |ও০.০০৭১| কারাপিতৰিহারা কথেতব্বা; ৰিহারদেৰীমহাৰিহারং, ছাতপব্বত ৰিহারং, সমুদ্দৰিহারং, চিত্তলপব্বতৰিহারং, ভদ্দপাসাণদ্ৰারৰিহারং, অচ্ছগল্ল ৰিহারং, কোল়ম্বতিস্সপব্বতৰিহারং, গণৰিহারং, কালকৰিহারং, দুক্খপালক ৰিহারং, উচ্চঙ্গণৰিহারং, কোটিতিস্সৰিহারং, তস্স পন একনামং কত্ৰা কারাপিতে মহাগামে তিস্সমহাৰিহারাদিং কত্ৰা একসতঅট্ঠৰীসৰিহারানি কতানি অহেসুং.

অট্ঠৰীসএকসতৰিহারঞ্চ মহারহং;

ৰিহারদেৰিযা সদ্ধিং কারাপেসি মহাযসো.

ততো পট্ঠায রাজা মহাদানং দত্ৰা পুঞ্ঞানি কত্ৰা ততো চুতো দেৰলোকে নিব্বত্তি.

কত্ৰানি পুঞ্ঞকম্মানি অনেকানি মহাযসো;

অত্থং জনস্স কত্ৰান গন্ত্ৰান তুসিতং পুরং.

সো তত্থ দিব্বসম্পত্তিং চীরং ভুঞ্জিয নন্দিতো;

মহাৰীভৰসম্পন্নো দেৰতানং পুরক্খতো.

তম্পি সম্পত্তিমোহায জীৰৰলোকে মনোরমে;

লোকুত্তরং সিৰং খেমং ইচ্ছন্তো আগমিস্সতি.

সো ততো চুতো জম্বুদীপে নিব্বত্তিত্ৰা মেত্তেয্য ভগৰতো পিতা সুব্রহ্মা নাম ভৰিস্সতি. ৰিহারদেৰী তস্সেৰ মাতা ব্রহ্মৰতী নাম ব্রাহ্মণী ভৰিস্সতি. অভযগামণীকুমারো তস্সেৰ মেত্তেয্যস্স ভগৰতো পঠমগ্গসাৰকো ভৰিস্সতি. কনিট্ঠো সদ্ধাতিস্সো দুতিযগ্গসাৰকো ভৰিস্সতি.

এত্তাৰতা নলাটধাতু সংৰণ্ণনা সমত্তা.

ধাতুৰংসো সমত্তো.

অনেন |ও০.০০৭২| পুঞ্ঞকম্মেন সংসরন্তো ভৰাভৰে;

সব্বত্থ পণ্ডিতো হোমী সারিপুত্তোৰ পঞ্ঞৰা.

অরিমেদস্স বুদ্ধস্স পব্বজিত্ৰান সাসনে;

নিব্বানং পাপুণিত্ৰান মুঞ্চেমি ভৰবন্ধনা.

অনেন মে সব্বভৰাভৰে’হং,

ভৰেয্যমেকন্তপরানুকম্পী;

কুলী বলী চেৰ সতী মতী চ,

কৰীহিসন্তেহি সদা সমঙ্গী.

পঞ্ঞাৰন্তানং অগ্গো ভৰতু.