৩. |ও০.০০২৪| ধাতুপরম্পরাকথা

ধাতুসু পন ৰিভজিত্ৰা দীযমানেসু সত্থুনো নলাটধাতু কোসিনারকানং মল্লানং লদ্ধকোট্ঠাসেযেৰ অহোসি. মহাকস্সপত্থেরো তে উপসঙ্কমিত্ৰা সত্থুনো নলাটধাতু তুম্হাকং কোট্ঠাসে অহোসি, তং গহেতুং আগতো, ভগৰা হি ধরমানেযেৰ তম্বপণ্ণিদীপস্স অনুজানি, ‘তস্মা তং অম্হাকং দেথা’তি. তং সুত্ৰা মল্লরাজানো?’এৰং পতিগণ্হথ ভন্তে ধাতু’তি মহাকস্সপত্থেরস্স অদংসু. সো অত্তনো সদ্ধিৰিহারিকং মহানন্দত্থেরং পক্কোসাপেত্ৰা নলাটধাতুং থেরস্স নিয্যাদেত্ৰা’ ইমং ধাতুং তম্বপণ্ণি দীপে মহাৰালুকগঙ্গায দক্খিণভাগে সেরুনাম দহস্স অন্তে ৰরাহ নাম সোণ্ডিমত্থকে কাকৰণ্ণতিস্সো নাম রাজা পতিট্ঠাপেস্সতি, চেতিযং সঙ্ঘারামং কারাপেস্সতি, ত্ৰং ইমং ধাতুং গহেত্ৰা ৰেসালিযং উপনিস্সায মহাৰনৰিহারে কুটাগারসালাযং সত্থুনো ৰসিতগন্ধকুটিযং ঠপেত্ৰা ধাতুপূজং কত্ৰা আযুসঙ্খারে ওস্সট্ঠে পরিনিব্বাপযমানে অত্তনো সদ্ধিৰিহারিকস্স চন্দগুত্তত্থেরস্স ধাতুৰংসং কথেত্ৰা অপ্পমত্তো হোহী’তি ৰত্ৰা ধাতুং থেরস্স দত্ৰা অনুপাদিসেসনিব্বানধাতুযা পরিনিব্বাযি.

সাৰকো সত্থুকপ্পো সো পভীন্নপটিসম্ভিদো;

গহেত্ৰা মানযী ধাতুং মহানন্দো মহাৰনে.

তস্স থেরস্স সদ্ধিৰিহারিকো চন্দগুত্তত্থেরো ধাতুং গহেত্ৰা আকাসং উগ্গন্ত্ৰা সাৰত্থীযং জেতৰনমহাৰিহারে দসবলেন ৰসিতগন্ধকুটিযং ঠপেত্ৰা ধাতুপূজং কত্ৰা চিরং ৰিহাসি. সোপি আযুসঙ্খারে ওস্সট্ঠে পরিনিব্বাপযমানে অত্তনো. সদ্ধিৰিহারিকং ভদ্দসেনত্থেরং পক্কোসাপেত্ৰা ধাতুং থেরস্স নিয্যাদেত্ৰা ধাতুৰংসং কথেত্ৰা অনুসাসিত্ৰা অনুপাদিসেসায নিব্বানধাতুযা পরিনিব্বাযি.

চন্দগুত্তো মহাপঞ্ঞো ছল়ভিঞ্ঞো ৰিসারদো;

রম্মে জেতৰনে ধাতুং ঠপেত্ৰা ৰন্দনং অকা.

তস্স |ও০.০০২৫| সিস্সো ভদ্দসেনত্থেরো ধাতুং গহেত্ৰা আকাসেন গন্ত্ৰা ধম্মচক্কপ্পৰত্তনে ইসিপতনে মহা ৰিহারে সত্থুনো ৰসিতগন্ধকুটিযং ঠপেত্ৰা গন্ধমালাদীহি পূজেত্ৰা চিরং ৰিহাসি. সো পরিনিব্বাপযমানো অত্তনো সদ্ধিৰিহারিকস্স জযসেনত্থেরস্স ধাতুং নিয্যাদেত্ৰা ধাতুৰংসং কথেত্ৰা অনুপাদিসেসায নিব্বানধাতুযা পরিনিব্বাযি.

ভদ্দসেনো মহাথেরো কতকিচ্চো মহাইসি;

ধাতুং ঠপেত্ৰা ইসিপতনে ৰন্দিত্ৰা নিব্বুতিং গতো.

সো পন জযসেনত্থেরো তং ধাতুং গহেত্ৰা ৰেলুৰনমহাৰিহারে সত্থুনো ৰসিতগন্ধকুটিযং ঠপেত্ৰা গন্ধমালাদীহি পূজেত্ৰা চিরং ৰসিত্ৰা পরিনিব্বাপযমানো অত্তনো সদ্ধিৰিহারিকস্স মহাসঙ্ঘরক্খিতত্থেরস্স ধাতুং নিয্যাদেত্ৰা ধাতুৰংসং কথেত্ৰা অনুপাদিসেসায নিব্বানধাতুযা পরিনিব্বাযি.

গহেত্ৰান ধাতুৰরং জযসেনো মহামুনি;

নিধায ৰেলুৰনে রম্মে অকা পূজং মনোরমং.

সো পনাযস্মা সঙ্ঘরক্খিতত্থেরো ধাতুং গহেত্ৰা আকাসেন আগন্ত্ৰা কোসম্বিং উপনিস্সায ঘোসিত সেট্ঠিনা কারাপিতে ঘোসিতারামে ভগৰতো ৰসিতগন্ধকুটিযং ঠপেত্ৰা গন্ধমালাদীহি পূজং কত্ৰা চিরং ৰিহাসি. সো’পি পরিনিব্বাপযমানো অত্তনো সদ্ধিৰিহারিকং মহাদেৰত্থেরং পক্কোসাপেত্ৰা ধাতুৰংসং কথেত্ৰা অপ্পমত্তো হোহী’তি ৰত্ৰা অনুপাদিসেসায নিব্বানধাতুযা পরিনিব্বাযি.

সঙ্ঘরক্খিতৰ্হযো থেরো চন্দো ৰিয সুপাকটো;

ঠপেত্ৰা ঘোসিতারামে অকা পূজং মনোরমং.

তস্স থেরস্স সদ্ধিৰিহারিকো মহাদেৰত্থেরো ধাতুং গহেত্ৰা দেৰানম্পিযতিস্সস্স মহারঞ্ঞো ভাতু মহানাগস্স উপরাজস্স মহাগামে সেতচ্ছত্তং উস্সাপিতকালে হত্থোট্ঠ নামজনপদে কুক্কুটপব্বতন্তরে মহাসালরুক্খমূলে আকাসতো ওতরিত্ৰা নিসীদি. তস্মিং সমযে মহাকাল়ো নাম উপাসকো অত্তনো পুত্তদারেহি সদ্ধিং মালাগন্ধৰিলেপনং ধজপতাকাদীনি গাহাপেত্ৰা দিৰসস্স তিক্খত্তুং মহন্তেহি পূজাৰিধানেহি ধাতুং পরিহরিত্ৰা চিরং ৰসি. মাসস্স অট্ঠ-উপোসথদিৰসে |ও০.০০২৬| ধাতুতো ছব্বণ্ণরংসিযো উগ্গচ্ছিংসু. তস্মিং সমযে সো পদেসো বুদ্ধস্স ধরমানকালো ৰিয অহোসি. জনপদৰাসী মনুস্সাপি থেরস্স সন্তিকে সীলানি গণ্হন্তি, উপোসথৰাসং ৰসন্তি, দানং দেন্তি, চেতিযস্স মহন্তং পূজং করোন্তী. ততো অপরভাগে উপরাজা মহাগামে ৰিহরন্তো ভেরিং চরাপেসি? যো অম্হাকং দসবলস্স ধাতুং গহেত্ৰা ইধাগতো, তস্স মহন্তং সম্পত্তিং দস্সামীতি. তস্মিং কালে কুটুম্বিকো মহাকাল়ো উপরাজং পস্সিস্সামীতি তস্স অনুচ্ছৰিকং পণ্ণাকারং গহেত্ৰা রাজদ্ৰারে ঠত্ৰা সাসনং পহিণি. উপরাজা তং পক্কোসাপেসি. সো গন্ত্ৰা ৰন্দিত্ৰা ঠিতো তং পণ্ণাকারং রাজপুরিসানং পটিচ্ছাপেসি. উপরাজা? মাতুল মহাকাল়, তুম্হাকং জনপদে অম্হাকং সত্থুনো ধাতু অত্থী’তি আহ. মহাকাল়ো উপ রাজস্স কথং সুত্ৰা অত্থি দেৰ, ময্হং কুলুপগত্থেরস্স সন্তিকে আদাসমণ্ডলপ্পমাণং সত্থুনো নলাটধাতু ছব্বণ্ণরংসীহি আকাসপ্পদেসে সূরিযসহস্সচন্দসহস্সানং উট্ঠিতকালো ৰিয ওভাসেতি. সো জনপদো বুদ্ধস্স উপ্পন্নকালো ৰিয অহোসীতি আহ. তস্স কুটুম্বিকস্স কথং সুণন্তস্সএৰ রঞ্ঞো সকলসরীরং পঞ্চৰণ্ণায পীতিযা পরিপুণ্ণং অহোসি. অতিৰিয সোমনস্সপ্পত্তো রাজা ময্হং মাতুলস্স মহাকাল়স্স সতসহস্সং কহাপণানি চ চতুসিন্ধৰযুত্তরথঞ্চ সুৰণ্ণালঙ্কারেহি সুসজ্জিতং একং অস্সঞ্চ উদকফাসুকট্ঠানকে খেত্তঞ্চ পঞ্চদাসীসতঞ্চ দেথা’তি ৰত্ৰা অঞ্ঞঞ্চ পসাদং দাপেসি. সো উপরাজা এত্তকং কুটুম্বিকস্স দাপেত্ৰা তং দিৰসমেৰ নগরে ভেরিং চরাপেত্ৰা হত্থস্সরথযানানি গহেত্ৰা কুটুম্বিকং মগ্গদেসকং কত্ৰা অনুপুব্বেন হত্থোট্ঠজনপদং পত্ৰা রমণীযে ভূমিপ্পদেসে খন্ধাৰারং বন্ধিত্ৰা অমচ্চগণপরিৰুতো কুটুম্বিকং গহেত্ৰা থেরস্স ৰসনট্ঠানং গন্ত্ৰা ৰন্দিত্ৰা একমন্তং অট্ঠাসি. সেসা অমচ্চা কুটুম্বিকো চ থেরং ৰন্দিত্ৰা একমন্তং |ও০.০০২৭| অট্ঠংসু. উপরাজা থেরং ৰন্দিত্ৰা সারাণীযং কথং কত্ৰা একমন্তং নিসিন্নো পটিসন্থারমকাসি. মহাদেৰত্থেরোপি সম্মোদনীযং কথং কত্ৰা কিস্স ত্ৰং মহারাজ ইধাগতোসি আগতকারণং মে আরোচেহী’তি আহ. ভন্তে তুম্হাকং. সন্তিকে অম্হাকং ভগৰতো নলাটধাতু অত্থী কির. তং ৰন্দিস্সামি’তি আগতোম্হী’তি আহ. থেরো? ভদ্দকং মহা রাজ তযা কতন্তি ৰত্ৰা ধাতুঘরদ্ৰারং ৰিৰরিত্ৰা মহারাজ বুদ্ধস্স নলাটধাতু অতিদুল্লভা’তি আহ. রাজা সোল়সেহি গন্ধোদকেহি নহাযিত্ৰা সব্বালঙ্কারপতিমণ্ডিতো একংসং উত্তরাসঙ্গং করিত্ৰা অঞ্জলিং পগ্গয্হ নমস্সমানো অট্ঠাসি. বুদ্ধারম্মণায পীতিযা সকলসরীরং ফুটং অহোসি.

(রাজা পীতিৰেগেন ইমা গাথা আহ;

নমামি ৰীর পাদে তে চক্কঙ্কিত তলে সুভে;

ৰন্দিতে নরদেৰেহি অমতং দেহি ৰন্দিতে.

লোকনাথ তুৰং একো সরণং সব্বপাণিনং;

লোকে তযা সমো নত্থি তারেহি জনতং বহুং.

মহণ্ণৰে মযং ভন্তে নিমুগ্গা দীঘসম্ভৰে;

অপ্পতিস্সা অপ্পতিট্ঠা সংসরাম চিরং তহিং.

এতরহি তুম্হে আপজ্জ পতিট্ঠং অধিগচ্ছরে;

তুম্হাকং ৰন্দনং কত্ৰা উত্তিণ্ণম্হ ভৰণ্ণৰা’তি.)

তস্মিং খণে ধাতুতো রস্মিযো নিক্খমিংসু. সকল লঙ্কাদীপং সুৰণ্ণরসধারাহি সঞ্ছন্নং ৰিয অহোসি. মহন্তং পীতিসোমনস্সং উপ্পজ্জি. রাজা মহন্তং সোমনস্সং পত্তো হুত্ৰা হট্ঠতুট্ঠো অহোসি. সো ধাতুঘরতো নিক্খমিত্ৰা থেরেন সদ্ধিং অলঙ্কতমণ্ডপে একমন্তং নিসীদি. একমন্তং নিসিন্নো (নিসজ্জাদোসে ৰজ্জেত্ৰা সেয্যথিদং? অতিদুরচ্চাসন্ত-উপরিৰাত-উন্নতপ্পদেস-অতিসম্মুখ-অতিপচছা’তি. |ও০.০০২৮| অতিদূরে নিসিন্নো সচে কথেতুকামো উচ্চাসদ্দেন কথেতব্বং হোতি. অচ্চাসন্নে নিসিন্নো সঙ্করং করোতি. উপরিৰাতে নিসিন্নো সরীরগন্ধো ৰাযতি. উন্নতপ্পদেসে নিসিন্নো অগারৰং করোতি. অতিসম্মুখে নিসিন্নো চক্খুনা চক্খুং পহরিত্ৰা দট্ঠব্বং হোতি. অতিপচ্ছা নিসিন্নো গীৰং পরিৰত্তেত্ৰা দট্ঠব্বং হোতি. ইতি নিসজ্জাদোসং ৰজ্জেত্ৰা নিসিন্নো). এৰমাহ. ভন্তে ইমং ধাতুং ময্হং দেথ. মহন্তং পূজাসক্করং কত্ৰা পরিহরামীতি. ভদ্দকং মহারাজ ইমায ধাতুযা সম্মাসম্বুদ্ধো ধরমানোযেৰ ৰ্যাকরণং অকাসি. তুম্হাকং ৰংসে জাতো কাকৰণ্ণতিস্সো নাম রাজা ইমস্মিং দীপে মহাৰালুকগঙ্গায দক্খিণতীরে সেরু নাম দহস্স অন্তে ৰরাহ নাম সোণ্ডিযা মত্থকে পতিট্ঠপেত্ৰা মহন্তং থূপং করিস্সতী’তি ৰত্ৰা সত্থা তত্থ সমাপত্তিং সমাপজ্জিত্ৰা পঞ্চসতখীণাসৰেহি সদ্ধিং তিক্খত্তুং পদক্খিণং কত্ৰা গতো. তস্মা গণ্হথ মহারাজা’তি ৰত্ৰা ধাতুং অদাসি.

রাজা ধাতুং গহেত্ৰা চতুরস্সপল্লঙ্কে ধাতুকরণ্ডকং নিদহিত্ৰা করণ্ডকে ধাতুং পতিট্ঠাপেত্ৰা তং কুমুদপত্তসন্নিহমঙ্গলসিন্ধৰযুত্তরথে ঠপেত্ৰা সমন্তা আরক্খং সংৰিদহিত্ৰা (রাজা ধাতুং গহেত্ৰা) পঞ্চঙ্গতুরিযে পগ্গণ্হাপযমানো পচ্ছা আগচ্ছতু’তি মহাজনস্স সাসনং ৰত্ৰা মহাদেৰত্থেরস্স সন্তিকং গন্ত্ৰা? তুম্হে ভন্তে, ধাতুযা উপট্ঠানং করোন্তো আগচ্ছথা’তি আহ. থেরো তস্স কথং সুত্ৰা;’মহারাজ অযং ধাতু পরম্পরা আগতা. অহং ভগৰতো ধম্মভণ্ডাগারিকআনন্দত্থেরো ৰিয ইমং ধাতুং পরিহরিস্সামী’তি ৰত্ৰা অত্তনো পচ্চযদাযকং কুটুম্বিকং আপুচ্ছিত্ৰা পত্তচীৰরমাদায ধাতুং উপট্ঠহিযমানো পচ্ছতো পচ্ছতো গচ্ছতি. রাজা ধাতুং গহেত্ৰা অনুপুব্বেন মহাগামং পত্তো মহাসেনগুত্তং পক্কোসাপেত্ৰা নগরং অলঙ্করাপেহী’তি আহ. সো নগরে ভেরিং চরাপেত্ৰা অট্ঠারস ৰীথিযো সম্মজ্জন্তু, পুণ্ণঘটে ঠপেন্তু, ধজপতাকাদযো উস্সাপেন্তু, তোরণানি উস্সাপেন্তু, পঞ্চৰণ্ণানি পুপ্ফানি |ও০.০০২৯| ওকিরন্তু, সকলনগরং অলঙ্করোন্তু, গন্ধমালাদযো গহেত্ৰা সুদ্ধুত্তরাসঙ্গা হুত্ৰা সকলনাগরা পটিপথং আগচ্ছন্তুতি আণাপেসি. ততো মহাজনো সব্বতুরিযানি ঘোসাপযমানো গন্ধমালাদিহত্থো পটিপথং নিক্খন্তো. দেৰমনুস্সা ভিক্খুভিক্খুনিযো উপাসকোপাসিকা অপ্পমাণা অহেসুং. (গন্ধমালাদি পুণ্ণঘটসমুস্সিতধজাকিণ্ণা) পরিসা ৰেলুক্খেপসহস্সানি পৰত্তযিংসু. সুগন্ধৰাতাভিঘাতসমুদ্দঘোসো ৰিয সকলনগরং একনিন্নাদজাতং. সো রাজা নগরে বন্ধনাগারে সব্বসত্তে বন্ধনা মুঞ্চন্তু, ধম্মেন সমেন অনুসাসন্তুতি ৰত্ৰা ধাতুং গহেত্ৰা অত্তনো নগরং পৰেসেত্ৰা অত্তনো রাজনিৰেসনং আগন্ত্ৰা নাটকীনং সঞ্ঞমদাসি ধাতুং ৰন্দন্তুতি. নাটকী নানাভরণেহি পতিমণ্ডিতা রাজগেহতো নিক্খমিত্ৰা ধাতুং ৰন্দিত্ৰা অত্তনো অত্তনো হত্থগতানি তুরিযভণ্ডানি সাধুকং পগ্গণ্হিত্ৰা মহন্তং পূজমকংসু.

ততো ৰড্ঢকিং পক্কোসাপেত্ৰা রাজনিৰেসনতো নাতিদূরে নাচ্চাসন্তে সুভুমিতলে ধাতুঘরং কারাপেত্ৰা মালাকম্মলতাকম্মাদিং পতিট্ঠাপেত্ৰা ধাতুঘরে ৰিচিত্তমণ্ডপং কারাপেত্ৰান সত্তরতনমযং ধাতুকরণ্ডকং কারাপেত্ৰা ধাতুকরণ্ডকে ধাতুং ঠপেত্ৰা রতনপল্লঙ্ক মত্থকে ধাতুং ঠপেত্ৰা উপরি ৰিচিত্তৰিতানং বন্ধিত্ৰা সাণিযা পরিক্খিপাপেত্ৰা মহন্তেন পরিৰারেন মহন্তং ধাতুপূজং অকাসি. মহাজনা গন্ধমালং গহেত্ৰা মাসস্স অট্ঠূপোসথদিৰসে ধাতুযা মহন্তং পূজং অকংসু. ধাতুতো রংসিযো সমুগ্গচ্ছন্তি. মহাজনা ৰিম্ভযজাতা সাধুকারং করোন্তি. সোমনস্সভূতা সকলনগরৰাসিনো বুদ্ধারম্মণ পীতিং গহেত্ৰা দিৰসে দিৰসে ধাতুযা মহন্তং পূজং করোন্তা ৰীতিনামেন্তি. পঞ্চসীলানি রক্খন্তি, বুদ্ধমামকা ধম্মমামকা সঙ্ঘমামকা হুত্ৰা সরণানি গচ্ছন্তি. রাজা মহাজনস্স ওৰদতি. ‘‘মেত্তং ভাৰেথ, করুণং মুদিতং উপেক্খং ভাৰেথ, কুলে জেট্ঠাপচাযনকম্মং করোথা‘‘তি. ওৰদিত্ৰা ভিক্খুসঙ্ঘস্সপি চত্তারো পচ্চযে গঙ্গায মহো-ঘপ্পৰত্তনকালো |ও০.০০৩০| ৰিয মহাদানং পৰত্তেসি. মাতাপিতুট্ঠানে ঠত্ৰা ভিক্খুসঙ্ঘং সঙ্গণ্হি. মহাজনা তস্স ওৰাদে ঠত্ৰা দানাদীনি পুঞ্ঞানি কত্ৰা যেভুয্যেন তস্মিং কালে মতা সগ্গং গতা.

কল্যাণৰগ্গম্হি পতিট্ঠিতা জনা,

দানাদি পুঞ্ঞানি করিত্ৰ সব্বদা;

চুতা চুতা সব্বজনা সুমানসা,

গতা অসেসং সুগতিং সুভে রতা.

রাজা ধাতুযা মহন্তং পূজং করোন্তো মহগামে ৰিহাসি. তেন পতিট্ঠাপিতৰিহারা কথেতব্বা? কথং? লেনৰিহারং চন্দগিরিৰিহারং কোটিপব্বতৰিহারং নগরঙ্গণৰিহারং সেলকা ৰিহারং তলাকাৰিহারন্তি এৰমাদযো ৰিহারে পতিট্ঠাপেত্ৰা তিপিটকমহাঅরিট্ঠত্থেরস্স দক্খিণোদকং দত্ৰা মহাৰিহারে নিয্যাদেসি. এৰং সো রাজা যাৰজীৰং ধাতুং পরিহরিত্ৰা পচ্ছিমে কালে মরণমঞ্চে নিপন্নো অত্তনো পুত্তং যটালতিস্স কুমারং পক্কোসাপেত্ৰা; তাত তিস্স, অম্হেহি পরিহরিত নলাটধাতু পূজেহী’তি ধাতুৰংসং কথেত্ৰা পুত্তং অনুসাসিত্ৰা কালং কত্ৰা সগ্গপুরং গতো.

রাজা মহানাগৰরো যসস্সি,

কত্ৰাপি রজ্জং মতিমা সুসদ্ধো;

মানেত্ৰ সঙ্ঘং চতুপচ্চযেহি,

অগা অসোকো ৰরদেৰলোকং;

তস্স পুত্তো যটালতিস্সকুমারো পিতু অচ্চযেন পিতরা ৰুত্তনিযামেনেৰ ধাতুযা মহন্তং পূজং কারেসি. সো’পি দিৰসস্স তযো ৰারে ধাতুপট্ঠানং করোন্তো রজ্জং কারেত্ৰা চিরং ৰিহাসি. ইমিনা’পি পতিট্ঠাপিতৰিহারা কথেতব্বা; ধম্মসালৰিহারং মহাধম্মসালৰিহারং সেলাভযৰিহারন্তি এৰমাদযো |ও০.০০৩১| পতিট্ঠাপেত্ৰা-তিপিটকমহাঅরিট্ঠত্থেরস্স সদ্ধিৰিহারিকো তিপিটকমহাঅভযত্থেরো উপরাজস্স মহানাগস্স অয্যকো. তস্স থেরস্স দক্খিণোদকং অদাসি. সো’পি রাজা যাৰজীৰং ধাতুং পরিহরিত্ৰা পচ্ছিমে কালে মরণমঞ্চে নিপন্নো অত্তনো পুত্তং গোঠাভযকুমারং পক্কোসাপেত্ৰা’ধাতুযা মহন্তং পূজং করোন্তো অপ্পমত্তো হোহী’তি ৰত্ৰা ধাতুৰংসং কথেত্ৰা কালং কত্ৰা সগ্গে নিব্বত্তি.

যট্ঠালকো নাম মহামহীপতি,

মহাজনস্সত্থকরো গুণালযো;

সো ধাতুপূজং ৰিপুলং অনেকধা,

কত্ৰা গতো দেৰপুরং অনিন্দিতো.

তস্স পুত্তো গোঠাভযকুমারো পিতু অচ্চযেন পিতরা ৰুত্তনিযামেনেৰ ধাতুযা মহন্তং পূজং কত্ৰা গোঠাভয মহারাজা হুত্ৰা রজ্জং করোন্তো কাচরগামে দসভাতিকে রাজানো ঘাতেত্ৰা দণ্ডকম্মত্থায গোঠাভযমহাথেরস্স হত্থোট্ঠজনপদে ৰসন্তস্স মত্তিকলেনৰিহারং খীরসাল ৰিহারং নাগমহাৰিহারং কুম্ভসেলৰিহারং চেতিযপব্বতৰিহারং সানুপব্বতৰিহারং কণিকার সেলৰিহারং অম্বসেল ৰিহারং তিন্দুকলেন ৰিহারং করণ্ডকৰিহারং গোধসালৰিহারং ৰালুকতিত্থৰিহারন্তি এৰমাদযো গঙ্গায পরতীরে পঞ্চসতৰিহারে ওরিমতীরে পঞ্চসতৰিহারে চা’তি ৰিহারসহস্সং কারেত্ৰা অত্তনো সদিসনামস্স গোঠাভযত্থেরস্স দক্খিণোদকং দত্ৰা অদাসি. সো যাৰজীৰং ধাতুপূজং কত্ৰা পচ্ছিমে কালে মরণমঞ্চে নিপন্নো অত্তনো পুত্তং কাকৰণ্ণতিস্স কুমারং পক্কোসাপেত্ৰা আলিঙ্গিত্ৰা;’তাত তিস্স, অযং নলাটধাতু অম্হাকং পরম্পরায আগতা. ত্ৰং কির ধাতুং গহেত্ৰা মহাগঙ্গায পস্সে সেরু নাম দহস্স অন্তে ৰরাহ নাম সোণ্ডিযা মত্থকে পতিট্ঠাপেত্ৰা সঙ্ঘারামং কারাপেস্সসী’তি সত্থা জীৰমানো ৰ্যাকরণমকাসি. তস্মা ত্ৰং ইমং ধাতুং গহেত্ৰা মমচ্চযেন তস্মিং ঠানে পতিট্ঠাপেহী’তি পুত্তং অনুসাসিত্ৰা কালকিরিযং কত্ৰা সগ্গে নিব্বত্তি.

গোঠাভযো |ও০.০০৩২| নাম মহীপতিস্সরো,

মহাজনে তোসযি অপ্পমত্তো;

সো ধাতুপূজং ৰিপুলং করিত্ৰা,

অগা অসোকো ৰরদেৰলোকং.

মহানন্দো মহাপঞ্ঞো চন্দগুত্তো বহুস্সুতো;

ভদ্দসেনো মহাথেরো ভদ্দধম্মে ৰিসারদো.

জযসেনো চ সো ৰীরো থেরো সো সঙ্ঘরক্খিতো;

দেৰত্থেরো চ মেধাৰী রক্খকা ধাতু ভদ্দকা.

উপরাজা মহানাগো যট্ঠালকো মহাবলো;

গোঠাভযো মহাপুঞ্ঞো কাকৰণ্ণো চ ৰীরিযৰা.

এতে থেরা চ রাজানো পুঞ্ঞৰন্তো সুমানসা;

ধাতু পরম্পরানীতা ধাতা ধাতুসুকোৰিদা.

কস্সপাদীনথেরানং পরম্পরাযমাগতা;

মহানাগাদি হত্থতো যাৰ তিস্সমুপাগতা.

ইতি অরিযজনপ্পসাদনত্থায কতে ধাতুৰংসে

ধাতুপরম্পরা কথা নাম

ততিযো পরিচ্ছেদো.