২. |ও০.০০১১| পরিনিব্বানকথা

সত্থা পন ততো পঞ্চচত্তালীসৰস্সানি তিপিটকপরিযত্তিধম্মং দেসেত্ৰা ৰেনেয্যজনে সংসারতো চতুঅরিযমগ্গফলপটিলাভৰসেন উদ্ধারেত্ৰা নিব্বানে পতিট্ঠাপেত্ৰা পচ্ছিমে কালে ৰেসালিনগরং উপনিস্সায চাপালচেতিযং নিস্সায ৰিহরন্তো মারেন পরিনিব্বানত্থায আরাধিতো সতো সম্পজানো আযুসঙ্খারে ৰিস্সজ্জেসি. তস্স ৰিস্সট্ঠভাৰং আনন্দোযেৰ অঞ্ঞাসি. অঞ্ঞো কোচিপি জানন্তো নাম নত্থি. তস্মা ভিক্খুসঙ্ঘম্পি জানাপেস্সামীতি জেতৰনমহাৰিহারং গন্ত্ৰা সব্বং ভিক্খুসঙ্ঘং সন্নিপাতাপেত্ৰা ভিক্খৰে তথাগতস্স ন চিরস্সেৰ তিণ্ণং মাসানং অচ্চযেন পরিনিব্বানং ভৰিস্সতি, তুম্হে সত্ততিংসবোধি পক্খিযধম্মেসু সমগ্গা হুত্ৰা একীভাৰা হোথ, তুম্হে ৰিৰাদং মা করোথ. অপ্পমাদেন তিস্সো সিক্খা সম্পাদেথাতি ৰত্ৰা পুন দিৰসে ৰেসালিযং পিণ্ডায চরিত্ৰা পিণ্ডপাতা পটিক্কমিত্ৰা ভণ্ডগামং গতো. ভণ্ডগামতো হত্থিগামং হত্থিগামতো অম্বগামং অম্বগামতো জম্বুগামং জম্বুগামতো নিগ্রোধগামং নিগ্রোধগামতো ভোগনগরং ভোগনগরতো পাৰানগরং পাৰানগরতো কুসিনারানগরং পত্তো. তত্থ যমকসালানমন্তরে ঠীতো আনন্দত্থেরং আমন্তেত্ৰা উন্তরসীসকং কত্ৰা মঞ্চকং পঞ্ঞাপেহি কিলন্তোস্মি আনন্দ নিপজ্জিস্সামি’তি আহ. তং সুত্ৰা আনন্দত্থেরো উত্তরসীসকং কত্ৰা মঞ্চকং পঞ্ঞাপেত্ৰা চতুগ্গুণং সঙ্ঘাটিং অত্থরিত্ৰা পঞ্চচত্তালীসৰস্সানি অসযিতবুদ্ধসেয্যং সযন্তো দক্খিণপস্সেন সতো সম্পজানো অনুট্ঠানসঞ্ঞং মনসিকরিত্ৰা সীহসেয্যং কপ্পেসি.

অতীতমদ্ধান ভৰে চরন্তো,

অনন্তসত্তে করুণাযুপেতো;

কত্ৰান পুঞ্ঞানি অনপ্পকানি,

পত্তো সিৰং লোকহিতায নাথো.

এৰং |ও০.০০১২| হি সো দসবলোপি ৰিহীনথামো,

যমস্স সালান নিপজ্জি মজ্ঝে;

কত্ৰান সঞ্ঞঞ্হি অনুট্ঠহানং,

স ইদ্ধিমা মারমুখং পৰিট্ঠো.

তস্মিং খণে সমকসালা সুপুপ্ফিতা অহেসুং. ন কেৰলং যমকসালাযেৰ সুপুপ্ফীতা, অথ খো দসসহস্সী লোকধাতু চক্কৰাল়েসু সালরুক্খাপি পুপ্ফিতা. ন সালরুক্খাযেৰ সুপুপ্ফিতা, অথ খো যং কিঞ্চি পুপ্ফুপগফলূপগ রুক্খজাতং সব্বম্পি পুপ্ফঞ্চ ফলঞ্চ গণ্হি. জলেসু জলপদুমানি থলেসু থলপদুমানি খন্ধেসু খন্ধপদুমানি সাখাসু সাখাপদুমানি লতাসু লতাপদুমানি আকাসে ওলম্বপদুমানি পিট্ঠিপাসাণে হিন্দিত্ৰা সতপত্তপদুমানি সুপুপ্ফিতানি অহেসুং. পথৰিতো যাৰ ব্রহ্মলোকো তাৰ দসসহস্সি চক্কৰাল়া একমালাগুণা ৰিয অহেসুং. দেৰা আকাসতো দিব্বমন্দারৰপারিচ্ছত্তককোৰিল়ারপুপ্ফানি চ চন্দনচুণ্ণানি চ সমাকিরন্তি. দিব্বতুরিযসঙ্গিতিযো চ অন্তলিক্খে পৰত্তন্তি. অনেকানি অচ্ছরিযসহস্সানি অহেসুং. এৰং পূজাৰিসেসে পৰত্তমানে পঠমযামে সুভদ্দপরিব্বাজকং ৰিনেত্ৰা মজ্ঝিমযামে দসসহস্সি লোকধাতু দেৰতানং অনুসাসিত্ৰা পচ্ছিমযামাৰসানে পঠমজ্ঝানং সমাপজ্জিত্ৰা ততো ৰুট্ঠায দুতিযজ্ঝানং চতুত্থজ্ঝানং সমাপজ্জি. ততো ৰুট্ঠায আকাসানঞ্চাযতনং ৰিঞ্ঞাণঞ্চাযতনং আকিঞ্চঞ্ঞাযতনং নেৰসঞ্ঞানাসঞ্ঞাযতনং সমাপজ্জিত্ৰা ততো ৰুট্ঠায নিরোধসমাপত্তিং সমাপজ্জি. ততো ৰুট্ঠায পঠমজ্ঝানং দুতিযজ্ঝানং ততিযজ্ঝানং চতুত্থজ্ঝানঞ্চ সমাপজ্জি. ততো ৰুট্ঠায এত্থন্তরতো অনুপাদিসেসনিব্বানধাতুযা পরিনিব্বাযি.

মহামোহতমং হন্ত্ৰা সত্তানং হদযস্সিতং,

রৰীৰ জোতমানো সো লোকস্স অনুকম্পকো;

ৰস্সানি |ও০.০০১৩| পঞ্চতালীসং কত্ৰা সত্তহিতং বহুং,

অধুনা অগ্গিক্খন্ধোৰ পরিনিব্বাযি সো জিনো.

এৰং পন ভগৰতি পরিনিব্বুতে ৰিস্সকম্মদেৰপুত্তো তথাগতস্স সরীরপ্পমাণং ৰরদোণিং রতনেহি মাপেত্ৰা ৰিসুদ্ধকপ্পাসেহি তথাগতস্স সরীরং ৰেঠেত্ৰা রতনদোণিযং পক্খিপিত্ৰা গন্ধতেলেহি পূরেত্ৰা অপরায দোণিযা পিদহিত্ৰা সব্বগন্ধদারুচিতকং কত্ৰা যেভুয্যেন দেৰতাযো লোহিতচন্দনঘটিকাযো আদায চিতকাযং পক্খিপিত্ৰা অগ্গিং গাহাপেতুং নাসক্খিংসু. কস্মা? মহাকস্সপত্থেরস্স অনাগতত্তা. সো আযস্মা মহাকস্সপত্থেরো যেভুয্যেন বহুন্নং দেৰানং পিযো মনাপো. থেরস্স হি দানং দত্ৰা সগ্গে নিব্বত্তানং পমাণো নাম নত্থি. তস্মা দেৰতা তস্মিং সমাগমে অত্তনো কুলূপগত্থেরং অদিস্ৰা অম্হাকং মহাকস্সপত্থেরো কুহিন্তি ওলোকেন্তো অত্তনো পরিৰারেহি পঞ্চমত্তেহি ভিক্খুসতেহি সদ্ধিং মগ্গং পটিপন্নোতি ঞত্ৰা যাৰ থেরো ইমস্মিং ন সম্পত্তো চিতকং তাৰ ন পজ্জলতুতি অধিট্ঠহিংসু. তস্মিং কালে থেরো যেভুয্যেন তেরসধুতঙ্গধরেহি পঞ্চমত্তেহি ভিক্খুসতেহি সদ্ধিং আগন্ত্ৰা চিতকং তিক্খত্তুং পদক্খিণং কত্ৰা পাদপস্সে ঠীতো, ভন্তে তুম্হাকং দস্সনত্থায ইতো কপ্পসতসহস্সমত্থকে পদুমুত্তরসত্থুনো পাদমুলে অভিনীহারতো পট্ঠায অৰিজহিত্ৰা আগতো. ইদানি মে অৰসানদস্সনন্তি পাদে গহেত্ৰা ৰন্দিতুং অধিট্ঠাসি.

মহাকস্সপথেরো সো ভিক্খুসঙ্ঘপুরক্খতো;

একংসং চীৰরং কত্ৰা পগ্গহেত্ৰান অঞ্জলিং.

পদক্খিণঞ্চ তিক্খত্তুং কত্ৰা ঠত্ৰা পদন্তিকে;

পতিট্ঠহন্তু সীসে মে জিনপাদেতি’ধিট্ঠহি.

সহাধিট্ঠানং চিতকা দুস্সানি চ ৰিভিন্দিয;

নিক্খমিংসু তদা পাদা ঘনমুত্তোৰ চন্দিমা.

উহো হত্থেহি পগ্গয্হ ঠপেত্ৰা অত্তনো সিরে;

ৰন্দিত্ৰা সত্থুনো পাদে খমাপেত্ৰা ৰিসজ্জযী.

পুণ্ণচন্দো যথা অব্ভং চিতকং পাৰিসি তদা;

ইদং অচ্ছেরকং দিস্ৰা রৰং রৰি মহাজনো.

উট্ঠহিত্ৰান পাচীনা ৰন্দো অত্থঙ্গতো যথা;

পাদে অন্তরধাযন্তে অরোদিংসু মহাজনা.

তদা মল্লরাজানো ভগৰতো সরীরকিচ্চং করিস্সামাতি ৰত্ৰা নানাৰত্থাভরণানি নিৰাসেত্ৰা পরিৰারযিংসু. ততো রাজানো মনুস্সা চ অগ্গিং দাতুং আরহিংসু. তদা সক্কো? মযি পন পরিনিব্বুতে সক্কো দেৰরাজা মণিজোতিরসং পসারেত্ৰা নিক্খন্তঅগ্গিনা মম সরীরকিচ্চং করিস্সতি. মণিঅগ্গিনো অৰসানে মনুস্সা অগ্গিং করিস্সন্তিতি. এৰং বুদ্ধৰচনং পরিভাৰেত্ৰা নিক্খত্তুং পদক্খিণং কত্ৰা ভগৰতো সরীরকিচ্চং কত্ৰা সমন্ততো উট্ঠহতুতি অধিট্ঠহি.

তস্মিং খণে সযমেৰ চিতকং অগ্গি গণ্হি. সরীরং পন ভগৰতো ঝাযামানং ছৰিচম্মমংসনহারুঅট্ঠিঅট্ঠিমিঞ্জং অসেসেত্ৰা সুমনমকুল়মুত্তারাসিসদিসমেৰ ধাতুযো অৰসেসা অহেসুং.

পরিনিব্বুতকালেপি সকলং কলুনং অহু;

পরিদেৰো মহা আসি মহী উদ্রিযনং যথা.

দেৰতাযানুভাৰেন সত্থুনো চিতকো সযং;

ততো একপ্পহারেন পজ্জলিত্থ সমন্ততো.

যঞ্চ অব্ভন্তরং দুস্সং যং দুস্সং সব্ববাহিরং

দুস্সে দ্ৰেৰ ন ঝাযিংসু তেসং দুস্সানমন্তরে;

যথা নিরুদ্ধতেলস্স ন মসী ন চ ছারিকা;

এৰমস্স ন দিস্সতি বুদ্ধগত্তস্স ঝাযতো.

সুমনমকুল়সভাৰা চ ধোতমুত্তাভমেৰ চ;

সুৰণ্ণৰণ্ণসংকাসা অৰসিস্সংসু ধাতুযো.

দাঠা চতস্সো উণ্হীসং অক্খকা দ্ৰে চ সত্তিমা;

ন ৰিকিণ্ণা ততো সেসা ৰিপ্পকিণ্ণাৰ ধাতুযো.

অহোসি তনুকা ধাতু সাসপবীজমত্তিকা;

ধাতুযো মজ্ঝিমা মজ্ঝেভিন্নতণ্ডুলমত্তিকা.

ধাতুযো |ও০.০০১৫| মহতি মজ্ঝে ভিন্নমুগ্গপ্পমাণিকা;

ধাতুৰণ্ণা তযো আসুং বুদ্ধাধিট্ঠানতেজসা.

সারিপুত্তস্স থেরস্স সিস্সো সরভুনামকো;

আদায জিনগীৰট্ঠিং চিতকাতোৰ ধাতু সো.

সদ্ধিং সিস্সসহস্সেন চেতিযে মহিযঙ্গণে;

ঠপেত্ৰা চেতিযং কত্ৰা কুসিনারমগা মুনি.

ছল়ভিঞ্ঞো ৰসিপ্পত্তো খেমো কারুণিকো মুনি;

সহসা চিতকাতোৰ ৰামদাঠং সমগ্গহী.

আকাসতো পতিত্ৰাপি নিক্খমিত্ৰাপি সালতো;

সমন্ততোম্বুমুগ্গন্ত্ৰা নিব্বাপেসুং জলানলং.

মল্লরাজগণা সব্বে সব্বগন্ধোদকেন তং;

চিতকং লোকনাথস্স নিব্বাপেসুং মহেসিনো.

এৰং পন সব্বলোকে করুণাধিকো সম্মাসম্বুদ্ধো ৰেসাখপুণ্ণমুপোসথে অঙ্গারদিৰসে পরিনিব্বুতো. দেৰমনুস্সানং সঙ্গহকরণত্থায যমকসালানমন্তরে চিতকং সত্তরত্তিন্দিৰং ৰসী. ততো ৰীসং হত্থসতিকস্স উপরি সত্তরত্তিন্দিৰং ৰসি. যাৰ অগ্গিপরিনিব্বাপনং সত্তরত্তিন্দিৰং হোতি.

ততো সত্তদিৰসানি কুসিনারাযং মল্লরাজপুত্তেসু গন্ধোদকেন চিতকং নিব্বাপযমানেসু সালরুক্খতো উদকধারা নিক্খমিত্ৰা চিতকং নিব্বাপযিংসু. ততো দসবলস্স ধাতুযো সুৰণ্ণচঙ্গোটকে পক্খিপিত্ৰা অত্তনো নগরে সন্থাগারে ঠপেত্ৰা সত্তিপঞ্জরং কত্ৰা ধনুপাকারেহি পরিক্খিপাপেত্ৰা সত্তাহং নচ্চগীতৰাদিতগন্ধমালাদীহি মল্লরাজপুত্তা সক্কারং করিংসু.

ততো তে মল্লরাজানো রম্মং দেৰসভোপমং;

সব্বথা মণ্ডুযিত্ৰান সন্থাগারং ততো পন.

মগ্গং |ও০.০০১৬| অলঙ্করিত্ৰান যাৰ মকুটচেতিযা;

হত্থীক্খন্ধে ঠপেত্ৰান হেমদোণিং সধাতুকং.

গন্ধাদীহিপি পূজেত্ৰা কীল়ন্তা সাধুকীল়িতং;

পৰেসেত্ৰান নগরং সন্থাগারে মনোরমে.

দসভূমস্মিং পল্লঙ্কে ঠপেত্ৰা জিনধাতুযো;

উস্সযুং তে তদা ছত্তে সন্থাগারসমন্ততো.

হত্থীহি পরিক্খিপাপেসুং ততো অস্সে ততো রথে,

অঞ্ঞো’ঞ্ঞং পরিৰারেত্ৰা ততো যোধে ততো ধনু;

ইতি পরিক্খিপাপেসুং সমন্তা যোজনং কমা,

তদা নচ্চেহি গীতেহি ৰাদিতেহি চ পূজযুং.)

পরিনিব্বানকথা সমত্তা.

ততো ভগৰতো পরিনিব্বুতভাৰং সুত্ৰা অজাতসত্তু মহারাজা কোসিনারকানং মল্লানং সাসনং পেসেসি. অহম্পি খত্তিযো ভগৰাপি খত্তিযো সত্থুনো সরীরধাতুনং থূপঞ্চ মহঞ্চ করোমীতি. তেনেৰ উপাযেন ৰেসালিযং লিচ্ছৰিরাজানো চ কপিলৰত্থুম্হি সক্যরাজানো চ অল্লকপ্পকে বুলযো চ রামগামকে কোল়িযা চ ৰেঠদীপকে ব্রাহ্মণো চ পাৰাযং পাৰেয্যকা চ সাসনং পেসেত্ৰা সব্বে একতো হুত্ৰা কোসিনারকেহি সদ্ধিং ৰিৰাদং উপ্পাদেসুং. তেসং পন আচরিযো দ্রোণব্রাহ্মণো নাম. সো তেসং? মা ভোন্তো ৰিগ্গহৰিৰাদং করোথ, অম্হাকং ভগৰা খন্তিৰাদীযেৰাতি ৰত্ৰা তাদিসস্স চ খন্তিমেত্তানুদ্দযসম্পন্নস্স সরীরভাগে কলহং কাতুং অযুত্তন্তি আহ.

(রাজা অজাতসত্তু চ লিচ্ছৰী চ নরাধিপা;

সক্যা চ অল্লকপ্পা চ কোল়িযাপি চ রামকে.

ব্রাহ্মণো ৰেঠদীপো চ মল্লপাৰেয্যকাপি চ;

মল্লা চ ধাতু অত্থায অঞ্ঞমঞ্ঞং ৰিৰাদযুং.

এৰং |ও০.০০১৭| সন্তে তদা দোণো ব্রাহ্মণো এতদব্রৰী;

সুণন্তু ভোন্তো মে ৰাচং হিতমত্থুপসংহিতং.

খন্তিৰাদী ইসিকালে ধম্মপালকুমারকে;

ছদ্দন্তে ভুরিদত্তে চ চম্পেয্যে সঙ্খপালকে.

মহাকপিজাতকালে অম্হাকং লোকনাযকো;

কোপং অকত্ৰা অঞ্ঞেসু খন্তিমেৰ অকা জিনো.

সিট্ঠাসিট্ঠে সুখে দুক্খে লাভালাভে যসাযসে;

তাদী লক্খণসম্পন্নো খন্তিৰাদেসু কা কথা.

এৰং ভৰতং ৰিৰাদে সম্পহারো ন সাধুকো;

সব্বেৰ সহিতা হোথ সমগ্গা মোদমানকা.

তথাগতস্স সারীরং অট্ঠভাগং করোমসে;

থূপা ৰিত্থারিতা হোন্তু পসন্না হি বহুজ্জনা.

তেন হি ৰিভজেহি ত্ৰং অট্ঠভাগন্তু ব্রাহ্মণ;

থূপা ৰিত্থারিতা হোন্তু পসন্না হি বহুজ্জনা.

এৰং ৰুত্তে তদা দোণো ব্রাহ্মণো গণজেট্ঠকো;

সুৰণ্ণং নাল়িং কত্ৰান সমং ভাজেসি রাজুনং.

সোল়সনাল়িযো আসুং সব্বা তা সেসধাতুযো;

একেকপুরৰাসীনং দ্ৰে দ্ৰে দোণো অদা তদা.

ধাতুযো চ গহেত্ৰান হট্ঠতুট্ঠা নরাধিপা;

গন্ত্ৰা সকে সকে রট্ঠে চেতিযানি অকারযুং.

দোণো তুম্বং গহেত্ৰান কারেসি তুম্বচেতিযং;

অঙ্গারথূপং কারেসুং মোরিযা হট্ঠমানসা.

একা দাঠা তিদসপুরে একা নাগপুরে অহু;

একা গন্ধারৰিসযে একা কালিঙ্গরাজিনো.)

তত্থ |ও০.০০১৮| দোণোতি? তদা গণাচরিযো. সো ধাতুযো ৰিভজন্তো একং দক্খিণদাঠাধাতুং গহেত্ৰা ৰেঠন্তরে ঠপেসি. তদা সক্কো অজ্জ দক্খিণদাঠাধাতুং কো লভতীতি চিন্তেত্ৰা ৰেঠন্তরে পস্সি. সো রতনচঙ্গোটকং গহেত্ৰা অদিস্সমানকাযেন গন্ত্ৰা ধাতুং গহেত্ৰা তাৰতিংসভৰনে চূল়ামণিচেতিয একযোজনুব্বেধংযেৰ মহন্তং থূপং কত্ৰা ঠপেসি. একং দক্খিণদঠাধাতুং পাদগ্গন্তরে অক্কমিত্ৰা গণ্হি. এত্তাৰতা তাৰতিংসভৰনদন্তধাতুকথা পরিপুণ্ণা ৰেদিতব্বা.

তদা জযসেনো নাম নাগরাজা ভগৰতো পরিনিব্বুতভাৰং সুত্ৰা অজ্জ পচ্ছিমদস্সনং পস্সিস্সামীতি মহন্তং নাগরাজসম্পত্তিং গহেত্ৰা কুসিনারং গন্ত্ৰা মহাপূজং কত্ৰা একমন্তং ঠত্ৰা পাদগ্গন্তরে ঠিতং ধাতুং দিস্ৰা নাগেদ্ধিবলেন গহেত্ৰা নাগভৰনং নেত্ৰা নাগপুরস্স মজ্ঝে রতনখচিতে চেতিযে ঠপেসি. তং তম্বপণ্ণিযং কাকৰণ্ণতিস্সরাজকালে মহাদেৰত্থেরস্স সিস্সো মহিন্দত্থেরো নাম নাগভৰনং গন্ত্ৰা দক্খিণদাঠং গহেত্ৰা তম্বপণ্ণিযং সেরুনগরং হরিত্ৰা গিরিঅভযস্স সেরুনগরপব্বতন্তরে চেতিযং কারাপেত্ৰা ঠপেসি.

এত্তাৰতা নাগভৰনদন্তধাতুকথা পরিপুণ্ণা ৰেদিতব্বা.

তত্রাযং গন্ধারৰাসিনোতি? একা ৰামদাঠা দোণো নাম আচরিযো নিৰত্থ ৰত্থন্তরে ঠপেত্ৰা গণ্হি. তদা একো গন্ধারৰাসী পুব্বে লদ্ধব্যাকরণো কতাভিনীহারো ৰত্থন্তরে ঠতপিদন্তধাতুং দিস্ৰা কুসলচিত্তেন ততো দন্তধাতুং গহেত্ৰা গন্ধারৰাসিকেহি সদ্ধিং অত্তনো রট্ঠং গন্ত্ৰা চেতিযৰনে ঠপেসি.

এত্তাৰতা ৰামদন্তধাতুকথা পরিপুণ্ণা ৰেদিতব্বা.

তত্থ অধো ৰামদন্তধাতুং সারিপুত্তত্থেরস্স সিস্সো খেমো নাম মুনি জালচিতকতোৰ উপ্পতিত্ৰা ৰামদাঠং গহেত্ৰা কালিঙ্গপুরং নেত্ৰা ব্রহ্মদত্তস্স রঞ্ঞো সমীপং গন্ত্ৰা |ও০.০০১৯| দন্তধাতুং দস্সেত্ৰা? মহারাজ ৰামদন্তধাতুং ভগৰা তমেৰ ইমস্মিং জম্বুদীপে যাৰ গুহসীৰপরম্পরা দেৰমনুস্সানং অত্থং করিত্ৰা পরিযোসানে গুহসীৰরঞ্ঞো পাহেস্সতীতি (নীযাদেতুং) আহাতি নীয্যাদেসি.

অপরভাগে হেমমালা রাজকঞ্ঞা দন্তকুমারেন সদ্ধিং ব্রাহ্মণৰেসং গহেত্ৰা দন্তধাতুং আদায পলাযিত্ৰা ৰাণিজে আরোচেত্ৰা নাৰা ৰেগেন গন্ত্ৰা চেৰ নাগসুপণ্ণেহি মহন্তং পূজং কারেত্ৰা অনুক্কমেনাগন্ত্ৰা জম্বুকোল়পট্টনং পত্ৰা দিজৰরস্স আচিক্খিতমগ্গেন অনুরাধপুরং পত্ৰা কিত্তিস্সিরিমেঘস্স পৰত্তিং পুচ্ছিত্ৰা নৰৰস্সআযুসমানো তীসু সরণেসু পসন্নভাৰং সুত্ৰা মেঘগিরি মহাথেরস্স সন্তিকং গন্ত্ৰা ৰন্দিত্ৰা একমন্তং নিসীদিত্ৰা দন্তধাতুং জম্বুদীপতো গহেত্ৰা আগতভাৰং আরোচেত্ৰা দস্সেসি. দিস্ৰা চ পন পীতিযা ফুটো উভিন্নম্পি সঙ্গহং কত্ৰা মহাৰিহারং অলঙ্কারেত্ৰা জিনদন্তধাতুং ঠপেত্ৰা একং ভিক্খুং পেসেত্ৰা তং পৰত্তিং রঞ্ঞো আরোচাপেসি. তং সুত্ৰা রাজা পীতিপামোজ্জো চক্কৰত্তিস্স সিরিসম্পত্তো দল়িদ্দো ৰিয তস্স পাটিহারিযং দিস্ৰা ৰীমংসিত্ৰা নিক্কঙ্খো হুত্ৰা সকললঙ্কাদীপেন পূজেসি. এতেন নযেন পূজং কত্ৰা একদিৰসেনেৰ নৰলক্খং পূজেসি.

সীহল়িন্দো উভিন্নম্পি বহূনি রতনানি চ;

গামে চ ইস্সরে চেৰ দত্ৰান সঙ্গহং অকা.

এত্তাৰতা অধোদাঠাধাতুকথা পরিপুণ্ণা ৰেদিতব্বা.

চত্তালীস সমা দন্তা কেসা লোমা চ সব্বসো দেৰা হরিংসু একেকং চক্কৰাল়পরম্পরা.

তত্র ৰচনে, চত্তালীস সমা দন্তাতি? সেসদন্তা চ কেসা চ লোমা চ নখা চ সব্বসোপি মযি পরিনিব্বুত-কালে |ও০.০০২০| মা ডয্হন্তু লুঞ্চিত্ৰা আকাসে পতিট্ঠন্তু একেকচক্কৰাল়ঞ্চ একেককেসলোমনখদন্তধাতুপরম্পরা নেত্ৰা চেতিযং কারেত্ৰান দেৰমনুস্সানং অত্থং করোতুতি অধিট্ঠহি. তস্মা পরিনিব্বুতকালতো যাৰ সরীরং ন ডয্হতি তাৰ ছব্বণ্ণরস্মিযো লোমধাতু ন পজহতি. দোণব্রাহ্মণোপি ধাতুৰিভজনাৰসানে ৰেঠন্তরে চ নিৰাসনন্তরে চ পাদগ্গন্তরে চ ধাতুনং ৰিনট্ঠভাৰং ঞত্ৰা পথৰিযং উত্তানকোযেৰজাতো. তদা সক্কো দেৰরাজা দিস্ৰা অযং দেণাচরিযো ধাতু অত্থায অনুপরিৰত্তেত্ৰা ৰিনাসং পাপুণেয্য অহং ৰীণাচরিযৰেসং গহেত্ৰা তস্স সন্তিকং গন্ত্ৰা সোকং ৰিনোদেস্সামীতি সক্করূপং জহিত্ৰা ৰীণাচরিযৰেসং গহেত্ৰা তস্স সন্তিকং গন্ত্ৰা একমন্তং ঠিতো দিব্বগীতং গাযিত্ৰা ৰীণং ৰাদেন্তো নানপ্পকারং উদানেসি. যং ধম্মমেতং পুরিসস্স ৰাদং ছিন্দিস্সামীতি ৰত্ৰা কথায সোতুনং লোভং পরস্স অত্থং ৰিনাসেত্ৰা অতিলোভেন পুরিসো পাপকো হোতীতি. হংসরাজজাতকং দীপেত্ৰা যং লদ্ধং তং সুলদ্ধন্তি আহ. তং সুত্ৰা দোণো অযং ৰীণাচরিযো ময্হং থেনভাৰং অঞ্ঞাসীতি সোকং ৰিনোদেত্ৰা উট্ঠায আৰজ্জমানো তুম্বং দিস্ৰা যেন ভগৰতো সরীরধাতুযো মিতা সোপি ধাতুগতিকোৰ. ইদং থূপং করিস্সামীতি চিন্তেত্ৰা তুম্বং গহেত্ৰান চেতিযে ঠপেসি. মোরিযা অঙ্গারং গহেত্ৰা অঙ্গারচেতিযং নাম কারেসুং.

(নগরে কপিলৰত্থুম্হি সম্মাদিট্ঠি বহুজ্জনো;

তত্থ সারীরিকং থূপং অকাসি রতনামযং.

নগরে |ও০.০০২১| অল্লকে রম্মে বুদ্ধধাতু পতিট্ঠিয;

সিলায মুগ্গৰণ্ণায থূপং সধাতুকং অকা.

জনো পাৰেয্যরট্ঠস্মিং পতিট্ঠিয সারীরিকং;

সিলায মণিৰণ্ণায পাৰেয্যং চেতিযং অকা.

চীৰরং পত্তদণ্ডঞ্চ মধুরাযং অপূজযুং;

নিৰাসনং কুসঘরে পূজযিংসু মহাজনা.

পচ্চত্থরণং কপিলে উণ্ণলোমঞ্চ কোসলে;

পূজেসুং পাটলিপুত্তে করকং কাযবন্ধনং.

নিসীদনং অৰন্তিসু চম্পাযং’দকসাটকং;

দেৰরট্ঠে অত্থরণং ৰিদেহে পরিস্সাৰনং.

ৰাসি-সূচিঘরঞ্চাপি ইন্দপত্থে অপূজযুং;

পাসাণকে পদং সেট্ঠং ভণ্ডসেসং পরন্তকে.

মহিংসু মনুজা ধাতুং অট্ঠদোণমিতং তদা;

ধাতু ৰিত্থারিতা আসি লোকনাথস্স সত্থুনো).

তে পন রাজানো হি অত্তনোলদ্ধধাতুং গহেত্ৰা সকসকনগরং গন্ত্ৰা চেতিযং কারাপেত্ৰা মহন্তং পূজাৰিধানং করিংসু. চক্খুমন্তস্স ভগৰতো সরীরধাতু অট্ঠদোণমত্তং সুৰণ্ণনাল়িযা একসতঅট্ঠৰীসতিনাল়িকা অহোসি? সত্থা পন উত্তরাসাল়্হনক্খত্তেন মাতুকুচ্ছিযং পটিসন্ধিং গণ্হি. ৰিসাখনক্খত্তেন মাতুকুচ্ছিতো নিক্খমি. উত্তরাসাল়্হনক্খত্তেন মহাভিনিক্খমনং নিক্খমি. ৰিসাখনক্খত্তেন বুদ্ধো অহোসি. উত্তরাসাল়্হনক্খত্তেন ধম্মচক্কং পৰত্তেসি. তেনেৰ যমকপাটিহারিযং অকাসি. অস্সযুজনক্খত্তেন দেৰোরোহণং অকাসি. ৰিসাখনক্খত্তেন পরিনিব্বাযি. মহাকস্সপত্থেরা চ অনুরুদ্ধত্থেরো চ দ্ৰে মহাথেরা ভগৰতো সরীরধাতুযো ৰিস্সজ্জাপেত্ৰা অদংসু.

তেসং |ও০.০০২২| রাজুনং ভগৰতো সরীরধাতুং লভিত্ৰা সত্তদিৰসসত্তমাসাধিকানি সত্তৰস্সানি মহারহং পূজং কত্ৰা গতকালে মিচ্ছাদিট্ঠিকমনুস্সা? সমণো গোতমো পরিনিব্বুতো. তস্স ধাতু অত্থায অম্হাকং জীৰিতকপ্পনং নাসেত্ৰা পূজং করোতী’তি সম্মাসম্বুদ্ধে পদুস্সন্তি. সক্কো আৰজ্জেন্তো তং কারণং ঞত্ৰা মহাকস্সপত্থেরস্স আরোচেসি;’ভন্তে মিচ্ছাদিট্ঠিকা মনুস্সা ভগৰতি পদুট্ঠচিত্তেন ইতো চুতা অৰীচিনিরযং উপ্পজ্জন্তি. বহুতরা অনাগতে মিচ্ছাদিট্ঠিকা মাতুপিতুঘাতকা রাজানো ভৰিস্সন্তি. অজ্জেৰ ধাতুযো নিদহিতুং ৰট্টতী’তি থেরো ৰিচারেত্ৰা অদ্দস.

অনন্তমত্থং ধরমানকালে কত্ৰান সত্তানমলীনচিত্তো সেসানমত্থায সরীরধাতুং ঠপেত্ৰ সো মচ্চুমুখং উপেতো. (কত্ৰা যো বোধিঞাণং ৰিৰিধবলৰরং বুজ্ঝিতুং পারমীযো ৰত্ৰা সঙ্খেয্যপুণ্ণে অপরিমিতভৰে উত্তরিত্ৰা সুমুত্তং. আরোহিত্ৰান সীঘং অরিযসিৰপদং অচ্চুতং সীতিভাৰং পত্তো সো জাতিপারং নিখিলপদহনং দুক্করং কারযিত্ৰা.

ধাত্ৰন্তরাযং দিস্ৰান থেরো কস্সপসৰ্হযো;

নিধানং সব্বধাতুনং করোহীত্যাহ ভূপতিং.

সাধূতি সো পটিস্সুত্ৰা মাগধো তুট্ঠমানসো;

ধাতুনিধানং কারেসি সব্বত্থ ৰত্তিতাদিয.

কারাপেত্ৰান সো রাজা কস্সপস্স নিৰেদযী;

ধাতুযো আহরী থেরো ইদং কারণমদ্দস.

ভুজঙ্গা |ও০.০০২৩| পরিগণ্হিংসু রামগামম্হি ধাতুযো;

চেতিযে ধারযিস্সন্তি লঙ্কাদীপে অনাগতে.

তা ধাতুযো ঠপেত্ৰান থেরো কস্সপসৰ্হযো;

রঞ্ঞো অজাতসত্তুস্স অদাসি ধাতুযো তদা.

গেহে চূপকরণানি চতুসট্ঠিসতানি সো;

অব্ভন্তরে ঠপেসি রাজা সব্বা তা বুদ্ধধাতুযো.

করণ্ডাসীতি সংকিণ্ণং চেতিযাসীতিলঙ্কতং;

গেহে বহুসমাকিণ্ণং থূপারামপ্পমাণকং.

কারেত্ৰা সব্বকরণং ৰালিকং ওকিরী তহিং;

নানাপুপ্ফসহস্সানি নানা গন্ধং সমাকিরি.

অসীতিথেররূপানি অট্ঠচক্কসতানি চ;

সুদ্ধোধনস্স রূপম্পি মাযাপজাপতাদিনং.

সব্বানি তানি রূপানি সুৰণ্ণস্সেৰ কারযি;