২. ভূকণ্ড

১. ভূমিৰগ্গৰণ্ণনা

১৮০. ইধ ভূকণ্ডে সাঙ্গোপাঙ্গেহি ভূম্যাদীহি দসহি, পাতালেন চাতি একাদসহি কোট্ঠাসেহি কমতো ৰগ্গা ভূমিৰগ্গাদিনামকা ৰগ্গা ৰুচ্চন্তে. সপ্পধানোপকারকানি অঙ্গানি খারাদীনি, অঙ্গানং উপকারকানি চ উপঙ্গানি অদ্ধাদীনি.

১৮১. সাদ্ধপজ্জেন ভূমিযা নামানি. ৰসূনি রতনানি ধারযতীতি ৰসুন্ধরা. খমু সহনে, খস্স ছো, ছমা, অথ ৰা ছি ছেদনে, সত্তানমধোপতনং ছিন্দতীতি ছমা, মো, ইত্থিযমা চ. ভৰন্ত্যস্সং ভূতানীতি ভূমি. ভূ সত্তাযং, মি. পুথইতি পাটিপদিকে ঠিতে নদাদি, ঈ, পুথস্স পুথুআদেসে, ৰুদ্ধিম্হি চ কতে পুথৰী. উস্সুৰাদেসে পুথুৰী. পথাদেসে তু পথৰী, ইমস্মিং পক্খে অৰাগমো, অথ ৰা থৰ গতিযং, পথৰতি এত্থাতি পথৰী, নদাদি, সব্বত্থ পত্থরতীতি ৰা পথৰী, থর সন্থরণে পপুব্বো, রস্স ৰো, নদাদি, পুথৰী, অস্সু.

‘‘মধুনো কেটভস্সাপি, মেদমংসপরিপ্লুতা;

তেনাযং মেদিনী দেৰী, ৰুচ্চতে ব্রহ্মৰাদিভী’’তি [চিন্তামণিটীকা ১১.৩]. –

ৰচনতো মেদযোগা মেদিনী, ঈ, ইনী চ. মিদ স্নেহনে ৰা, যু, নদাদি, ইস্সেত্তঞ্চ. মহ পূজাযং, নদাদি. ৰিত্থিণ্ণত্তা উব্বী, নদাদি, অৰতি ভূতানীতি ৰা উব্বী, অস্সু. ৰসূনি সন্ত্যস্সং ৰসুমতী. গচ্ছন্তি যস্সং লোকা, সা গো, পুমিত্থিযং. কা সদ্দে, কাযতি এত্থ, কাযতি মারৰিজযকালেতি ৰা কু, উ. ৰসূনি ধারযতীতি ৰসুধা. সব্বং লোকং ধরযতীতি ধরণী, যু, নদাদি. ধরতীতি ধরা, ইত্থিযং আ. গমু গমনে, গচ্ছন্ত্যস্সং জগতী, অন্তপচ্চযো, গস্স দ্ৰিত্তং, জত্তঞ্চ, নলোপো, নদাদি. ভূ সত্তাযং, রি, নদাদি, ক্ৰিম্হি ভূ. ভূতে সত্তে ধরতীতি ভূতরো. অৰ রক্খণে, যু, নদাদি, অৰনী.

১৮২. খারা লৰণরসা মত্তিকা ঊসোত্যুচ্চতে. খাদতীতি খারা, দস্স রো. পদেসকত্তা মত্তেন পমাণেন যুত্তা মত্তিকা. ঊস রুজাযং, ঊসো. ঊসযোগা ঊসৰা, ৰন্তু. রপচ্চযে ঊসরো. দ্ৰেপি তীসু ৰত্তন্তে.

থল ঠানে, অধিকরণে অ. কিত্তিমং থলং, অকিত্তিমা থলী, নদাদি. থদ্ধলূখম্হি ভূভাগে ভূমিপ্পদেসে জঙ্গলসদ্দো ৰত্ততি. তত্থ নিজ্জলত্তা কক্খল়ত্তা থদ্ধো. তিক্খসক্খরাদিৰিদারগৰাদিখুরগণ্ডুপ্পাদৰচ্চাদিসহিতত্তা লূখো ৰেদিতব্বো. গল চৰনাধোপতনাদনেসু. জলং গলতি এত্থ, জলেন ৰা গলন্তি এত্থাতি জঙ্গলো, নিজ্জলো দেসো, ‘‘জঙ্গলো নিজ্জলে দেসে, তিলিঙ্গো পিসিতে থিয’’ন্তি [তিকণ্ডসেস ৩.৩.৩৯৩] হি তিকণ্ডসেসো, লস্স লোপো, নিগ্গহীতাগমো চ.

১৮৩. ৰেদেন পঞ্ঞায ঈহন্তি এত্থাতি ৰেদেহো. সো এৰ ৰিদেহো, ইমং দীপমুপাদায সিনেরুনো পুব্বদিসাভাগত্তা পুব্বো চ সো ৰিদেহো চেতি পুব্বৰিদেহো. এৰমপরুত্তরেসু. গৰেন যন্ত্যেত্থাতি গোযানো. অপরো চ সো গোযানো চেতি অপরগোযানো. জম্বুযা লক্খিতো, কপ্পট্ঠাযিতাদিপ্পভাৰেন ৰা তপ্পধানোদীপোতি জম্বুদীপো. ধম্মতাসিদ্ধস্স পঞ্চসীলস্স আনুভাৰেন কং সুখং উরু মহন্তমেত্থাতি কুরু, কুং পাপং রুন্ধন্তি এত্থাতি ৰা কুরু, ক্ৰি. দীপ দিত্তিপ্পকাসনেসু, জলমজ্ঝে দিপ্পন্তীতি দীপা, দিপ্পন্তি এত্থ সদ্ধম্মাতি ৰা দীপা, পমাণতো মহন্তা দীপা মহাদীপা.

১৮৪. কুরুআদযো একৰীসতি জনপদন্তরা জনপদৰিসেসা, আদিনা সুরমহপচ্চুগ্গতা তলকুটা অস্মাকাদযো চ পুম্বহুত্তে পুল্লিঙ্গে বহুত্তে চ সিযুং. কুরু নাম জানপদিনো রাজকুমারা, তেসং নিৰাসো একোপি জনপদো রূল়্হীসদ্দেন ‘‘কুরূ’’তি বহুৰচনেন ৰুচ্চতি, এৰং সব্বত্র. কুং পাপং রুন্ধতীতি কুরু, খত্তিযকুমারা, তেসং নিৰাসো কুরূ, পচ্চযলোপতো ন ৰুদ্ধি, সব্বত্রেৰং [পাণিনি ১.২.৫২ ৪.২.৮১ সুত্তেসু পস্সিতব্বং]. অরিৰিজযলোকমরিযাদাতিক্কমাদীসু সক্কোন্তীতি সক্কা. কোসং লন্তি গণ্হন্তি, কুসলং পুচ্ছন্তীতি ৰা কোসলা. মগেন সদ্ধিং ধাৰন্তীতি মগধা, ক্ৰি, মংসেসু গিজ্ঝন্তীতি ৰা মগধা. গিধ অভিকঙ্খাযং. সেৰন্তি যেনাতি সিৰি, সি সেৰাযং, ৰি. সিৰং করোন্তীতি ৰা সিৰী, অঞ্ঞত্থে ই. কল সদ্দে, ইঙ্গপচ্চযো, কলিঙ্গা, তেসং নিৰাসো কলিঙ্গা, উত্তরাপথো [‘‘জগন্নাথা পুব্বভাগে কণ্হাতীরন্তরং সিৰে কলিঙ্গদেসো সংৰুত্তো’’ ইত্যুত্তদেসে (থোমনিধি)], কলিং গণ্হন্তীতি ৰা কলিঙ্গা, ক্ৰি, কলং মধুরসদ্দং গাযন্তীতিৰা কলিঙ্গা, অস্সিত্তং, কেন সুখেন লিঙ্গন্তীতি ৰা কলিঙ্গা, লিঙ্গ গমনত্থো দণ্ডকো ধাতু. অত্তনা খাদিতং লঞ্জং পরাজিতেহি যাচিতেপি পুন ন ৰমন্তীতি অৰন্তী. পঞ্চালস্স পুত্তা পঞ্চালা. ৰজ্জেতব্বাতি ৰজ্জী, ‘‘ৰজ্জেতব্বা ইমে’’ত্যাদিনা পৰত্তৰচনমুপাদায ৰজ্জীতি লদ্ধনামা রাজানো. ৰজ্জীরট্ঠস্স ৰা রাজানো ৰজ্জী. রট্ঠস্স ৰা পন তংসমঞ্ঞা তংনিৰাসিরাজকুমারৰসেন ৰেদিতব্বা. গং পথৰিং ধারেন্তীতি গন্ধারা, কিত্তিগন্ধেন অরন্তীতি ৰা গন্ধারা. চিত উস্সাহনে, চেতন্তি উস্সহন্তি যুদ্ধকম্মাদীসূতি চেতযো.

১৮৫. ৰঙ্গ গমনত্থো দণ্ডকো ধাতু. ৰিসিট্ঠানি দেহানি যেসং ৰিদেহা, পুব্বৰিদেহদীপতো আগতত্তা ৰা ৰিদেহা. ওজ দিত্তিযং, কম্বুনা সম্বুকেন ওজন্তি তস্সং ৰোহারকরণতোতি কম্বোজা, কম্বুকজো ওজো বলমেতেসন্তি ৰা কম্বোজা. মদ মদ্দনে, মদ্দন্তীতি ৰা মদ্দা, মং সিৰং দদন্তীতি ৰা মদ্দা, পঞ্চকামগুণাদীহি মোদন্তীতি ৰা মদ্দা, মদ হাসে. ভঞ্জ অৰমদ্দনে, ভগ্গা. অঙ্গ গমনত্থো দণ্ডকো ধাতু. সীহং লন্তীতি সীহল়া. কাস দিত্তিযং, সম্পত্তিযা কাসন্তীতি কস্মীরা, মীরো. কাস দিত্তিযং, ই, কাসী. পডি গতিযং, পণ্ডু, উ. অথ ৰা কুং পাপং রুন্ধতি এত্থাতি কুরু, ইতি একোপি জনপদো নিস্সিতানং বহুত্তা বহুৰচনেন ৰুচ্চতি. এৰং সব্বত্থ.

১৮৬. দ্ৰযং ভুৰনে. লুজ অদস্সনে, লুজ্জতীতি লোকো, গস্স কো, জস্স ৰো. ভৰন্তি এত্থাতি ভুৰনং, যু. জগতি, ৰিট্ঠপাদীনিপি ভুৰনপরিযাযানি. দ্ৰযং দেসসামঞ্ঞে. দিস অতিসজ্জনে, অতিসজ্জনং পবোধনং, ‘‘অযং ইত্থন্নামো’’তি দিসতি অপদিসতীতি দেসো. সি সেৰাযং, সঞ্ঞাযং অ, ৰিসযো.

সিট্ঠাচাররহিতো মিলক্খদেসো কামরূপাদি পচ্চন্তো নাম. মিলক্খ অব্যত্তিযং ৰাচাযং, মিলক্খন্তি অব্যত্তৰাচং ভাসন্তীতি মিলক্খা. সিট্ঠাচারমগ্গদস্সনত্থায পঞ্ঞাচক্খুনো অভাৰা রাগাদিমলং অক্খিম্হি যেসন্তি ৰা মিলক্খা, অস্সিত্তং, তেসং নিৰাসট্ঠানং মিলক্খদেসো. পচ্চন্তে মজ্ঝিমদেসস্স বহিদ্ধাভাগে জাতো পচ্চন্তো.

ব্যৰত্থা চতুৰণ্ণানং, যস্মিং দেসে ন ৰিজ্জতে;

মিলক্খদেসো সো ৰুত্তো, মজ্ঝভূমি ততো পরং [চিন্তামণিটীকা ১১.৭].

অরিযাচারভূমিত্তা মজ্ঝো চ সো দেসো চেতি মজ্ঝদেসো, নৰযোজনসতপরিক্খেপো মজ্ঝিমদেসো.

১৮৭. সলিলপ্পাযো বহূদকো দেসো অনূপো নাম, অনুগতা আপা অত্রাতি অনূপো, আপস্স আদিনো উত্তং, পরলোপো ৰা. কচ বন্ধনে, ছো, কচ্ছং. অনূপদেসো চ. অভিনৰোগ্গমনেন তিণেন লক্খিতে হরিতে দেসে সদ্দলো, দল দিত্তিযং, ভাৰে অ. ৰিজ্জতি দলো যত্থ সদ্দলো.

১৮৮. নদিযা আভতেন অম্বুনা উদকেন জীৰন্তি এত্থাতি নদ্যম্বুজীৰনো দেসো নদী মাতা অস্সাতি নদীমাতিকোতি ৰুচ্চতি, বহুব্বীহিম্হি কো. ৰুট্ঠিযা ৰস্সেন নিপ্ফজ্জতি সস্সমেত্থাতি ৰুট্ঠিনিপ্ফজ্জসস্সকো দেসো দেৰো মাতা অস্সাতি দেৰমাতিকোতি ৰুচ্চতি, বহুব্বীহিম্হিযেৰ কো, দেৰসদ্দো চেত্থ ৰুট্ঠিমাহ.

১৮৯. অনূপাদযো দেৰমাতিকান্তা তীসু লিঙ্গেসু. চন্দসূরাদো চন্দসূরিযসিনেরুপব্বতাদিম্হি সস্সতিসদ্দো ঈরিতো কথিতো. সব্বদা সরন্তি গচ্ছন্তীতি সস্সতিযো, সর গতিযং, সরসদ্দস্স সো,তি.

রঠ গতিযং, রঠন্তি এত্থ নগরাদযোতি রট্ঠং, তো. নাগরেহি ৰিজিনিতব্বন্তি ৰিজিতং. আল়িযং পৰত্তমানো যো সেতু, সো পুরিসে পুল্লিঙ্গে ৰত্ততি. সি বন্ধনে, তু. অল ভূসনে, ই, আল়ি, তস্সং আল়িযং.

নগরপব্বতাদিনো উপান্তভূ সমীপভূমি পরিসরো পরিতো সরন্ত্যত্রাতি, ণো.

তিকং ৰজে. গাৰো তিট্ঠন্ত্যত্রাতি গোট্ঠং. কুল সঙ্খ্যানে, গাৰো কুলন্ত্যেত্থাতি গোকুলং, গুন্নং কুলং ঘরন্তি ৰা গোকুলং. ৰজ গতিযং, ৰজন্তি যং গাৰো নিৰাসনত্থাযাতি ৰজো. গোট্ঠানকং, গোট্ঠানন্তিপি ৰজস্স নামানি.

১৯০. সিলোকেন মগ্গস্স নামানি. পথিকেহি মজ্জতে নিত্তিণং করীযতেতি মগ্গো, মজ্জ সুদ্ধিযং, ণো, জস্স গত্তং, পথিকেহি মগ্গীযতেতি ৰা মগ্গো, মগ্গ অন্ৰেসনে, মং সিৰং গচ্ছতি এত্থ, এতেনাতি ৰা মগ্গো, ‘‘মো সিৰে পরিসাযঞ্চে’’তি হি নানত্থসঙ্গহে, সিৰং গমনং করোতীত্যত্থো, ক্রিযাৰিসেসনমেতং. পথি গতিযং, চুরাদি, নাগমো. পন্থযন্তি যন্ত্যনেনাতি পন্থো, অ, কারিতলোপো. পথতি যাত্যনেনাতি পথো. অদ গমনে, অদতি যত্থ সা অদ্ধা, ধো, অদ্ধা মগ্গো, অদ্ধাসদ্দোযং কালেপি, সমভাগত্থৰচনে তু অদ্ধং, তস্মা অদ্ধসদ্দো পুমনপুংসকৰসেন দ্ৰিলিঙ্গো, রাজাদিত্তে অদ্ধা, অরাজাদিত্তে অদ্ধং. অঞ্জ গতিযং, অসো. ৰজ গতিযং, উমো, জস্স টো. পদ গতিযং, অ, দস্স জো, দ্ৰিত্তং, পজ্জো. অয গতিযং, যু, পদ গতিযং, অৰো, নদাদি. ৰত্ত ৰত্তনে, ৰত্তনং গমনাদি, অনি, নদাদি, ৰত্তনী. কন্তনদণ্ডে পুন্নপুংসকং. পথিকেহি পাদেহি হঞ্ঞতেতি পদ্ধতি. পাদসদ্দসমানত্থেন পদসদ্দেন নিযতপ্পযোগতো ৰুত্তিনা সিদ্ধো, পদসদ্দূপপদো হনধাতু,তি, হনস্স ধো, অলোপো. পদ্ধতিসহচরণতো ৰত্তনী, তংসহচরণতো পদৰী চ ইত্থিযং.

১৯১-১৯২. তব্ভেদা তস্স মগ্গস্স ৰিসেসা জঙ্ঘমগ্গাদযো অপথন্তা. জঙ্ঘাহি গতো মগ্গো জঙ্ঘমগ্গো. সকটেহি গতো মগ্গো সকটমগ্গো. তে জঙ্ঘমগ্গসকটমগ্গা মহামগ্গে ৰত্তন্তি.

এত্থ চ ‘‘তেথা’’তি অথসদ্দো ন ৰত্তব্বো, ‘‘তে চা’’তি পন ৰত্তব্বো. ‘‘মতাদ্ধনী’’তি পাঠে পন সতি ‘‘তেথা’’তি ৰত্তব্বোযেৰ, তদা একপদিকে অদ্ধনি মগ্গে একপদী মতাতি যোজনা কাতব্বা. গচ্ছতং একো অসহাযো পাদো যস্সং, ন নিসিন্নস্সেৰ যমকোতি একপদী, সমাসন্তে নিচ্চমীপচ্চযো, কপচ্চযে একপদিকো, ঈস্স রস্সত্তং.

চোরকণ্টকাদিদোসে দুগ্গমে পথে কন্তারো, পুন্নপুংসকে, কেন পানীযেন তরন্তি অতিক্কমন্তি যন্তি কন্তারো, তর তরণে, চোরকন্তারাদীসু পনাযং রূল়্হিৰসেন ৰুত্তো, অথ ৰা কতি ছেদনে, সপ্পটিভযত্তা কন্ততি নিচ্চগমনাগমনমেত্থাতি কন্তারো, আরো, নাগমো চ. দুক্খেন গচ্ছন্ত্যেত্থাতি দুগ্গমো.

১৯৩. দ্ৰযং পটিমগ্গে. পটি অভিমুখেন গন্তব্বো মগ্গো, পথো চ পটিমগ্গো, পটিপথো চ. দীঘমঞ্জসং অতিদূরো মগ্গো অদ্ধানন্তি ৰুচ্চতে. অদ্ধানং অযনং অদ্ধানং, অচ্চাযতো মগ্গো, যথা ‘‘পদট্ঠান’’ন্তি, যলোপো.

দ্ৰযং পসত্থেদ্ধনি. সোভনো পথো, পন্থো চাতি ৰিগ্গহো. গন্তব্বপথভাৰতো অপেতং উপ্পথং, অপথঞ্চ, অব্যযীভাৰসমাসো, অসদ্দো অত্র নিপাতো.

১৯৪-১৯৬. পরমাণূনং ছত্তিংস একো অণু নাম, অণুতোপি অণুতরত্তা পরমো অণু, অণুতো ৰা পরমোতি পরমাণু, অণ সদ্দত্থো দণ্ডকো ধাতু, উ. তে অণৰো ছত্তিংস তজ্জারী নাম, তং তং অত্তনো নিস্সযং মলীনকরণৰসেন জরাপেতীতি তজ্জারী, জর জীরণে, জর ৰযোহানিম্হি ৰা, অ, নদাদি. তাপি তজ্জারিযো ছত্তিংস রথরেণু নাম, রথানং সঞ্চরণৰসেন পৰত্তো রেণু রথরেণু. তে রথরেণৰো ছত্তিংস লিক্খা নাম. লক্খ দস্সনে, পকতিচক্খুনাপি লক্খ্যতেতি লিক্খা, অস্সিত্তং.

তা লিক্খা সত্ত ঊকা নাম, ঊকাতি ৰুচ্চতি সিরোৰত্তকিমি, তপ্পমাণত্তা ঊকা. তা সত্ত ঊকা ধঞ্ঞমাসো নাম, ধঞ্ঞো ৰীহিযেৰ পরিমাণিতব্বত্তা মাসো চাতি ধঞ্ঞমাসো, মসি পরিমাণে. তে সত্ত ধঞ্ঞমাসা অঙ্গুলং নাম, অঙ্গ গমনত্থো, উলো, অঙ্গুলং, পমাণং, উলিপচ্চযে অঙ্গুলি, করসাখা. অমুদ্ৰিচ্ছেতি অদুং দ্ৰাদসঙ্গুলং ৰিদত্থি নাম, কণিট্ঠসহিতেনঙ্গুট্ঠেন ৰিত্থারীযতে, ৰিধীযতেতি ৰা ৰিদত্থি, ৰিপুব্বো তনু ৰিত্থারে. ধা ধারণে, উভযত্রাপিতি, পুব্বপক্খে তস্স থো, নস্স তো, তস্স দো. পচ্ছিমে ধস্স দো, তস্স থো, অসরূপদ্ৰিভাৰো চ. তা দুৰে ৰিদত্থী রতনং সিযুং, রমু কীল়াযং, তনো, মলোপো. তানি সত্তেৰ রতনানি যট্ঠি নাম, যত পযতনে,তি, তস্স ঠো, তস্স টো. তা ৰীসতি যট্ঠিযো উসভং নাম, উস দাহে, অভো. এত্থ পন উসভনদন্তরং উসভং. উসভানং অসীতিপ্পমাণং গাৰুতং নাম, গৰং, গৰেহি ৰা যুতং গাৰুতং. যুজ সমাধিম্হি, গোনদন্তরেহি গহিতপ্পমাণসমাধানন্ত্যত্থো, তং চতুগাৰুতং যোজনং নাম, যুজ সমাধিম্হি, যু, ‘‘এত্তকং যোজনং নাম হোতূ’’তি চতুগাৰুতেহি সমাধানন্ত্যত্থো.

১৯৭. আরোপিতানং আচরিযধনূনং পঞ্চসতং কোসো নাম, অনারোপিতানন্ত্যপরে. কুস অৰ্হানে, ণো, কুসনং অৰ্হানং কোসো, ইধ পন কোসপ্পমাণত্তা কোসো, দ্ৰিসহস্সকরপ্পমাণো. অঞ্ঞত্থ পন –

‘‘চতুক্কাধিৰীসতিযা, অঙ্গুলেহি করো ভৰে;

খ্যাতমট্ঠসহস্সেহি, কোসমানং ৰিভাৰিনা’’ত্যুত্তং.

চতুরম্বণন্তি চতুরম্বণৰীহিবীজজাতরোপনযোগ্যো ভূমিপ্পদেসো করীসং নাম, করোন্তি এত্থ কসনরোপনাদিকন্তি করীসং, ঈসো. চতুরম্বণবীজজাতানি রোপেন্ত্যেত্থাতি চতুরম্বণং, অম্বণং একাদসদোণমত্তং, অঞ্ঞে পন ‘‘চতুরম্বণং চতুযট্ঠিকং ঠানং করীসং নামা’’তি ৰদন্তি, তং করীসব্ভন্তরানং পরিযাযভাৰপ্পসঙ্গা ন গহেতব্বং.

পমাণতো হত্থানমট্ঠৰীসপ্পমাণং ঠানং অব্ভন্তরং নাম, অব্ভন্তরে অন্তোকোট্ঠাসে জাতং, ন বহিকোট্ঠাসেতি অব্ভন্তরং. যত্থ যত্থ হি যো যো ঠিতো, নিসিন্নো ৰা, তত্থ তত্থ সমন্তা অট্ঠৰীসতিহত্থপ্পমাণং ঠানং তস্স তস্স অব্ভন্তরং ঠানং নাম. ভূম্যাদিত্তা ভূমিৰগ্গো, অথ ৰা অঙ্গাপেক্খায ভূমিযেৰ পধানং, পধানেন চ ব্যপ্পদেসো ভৰতীতি ভূমিৰগ্গব্যপ্পদেসো.

ভূমিৰগ্গৰণ্ণনা নিট্ঠিতা.

২. পুরৰগ্গৰণ্ণনা

১৯৮. ছক্কং নগরে.

‘‘পট্টনঞ্চ অধিট্ঠানং, নগরং পুটভেদনং;

থিযো পূ নগরী পূরিযো, ঠানীযং কব্বটং পুট’’ন্তি.

হি সিলোকপরিযাযেসু ৰোপালিতো.

‘‘ৰিচিত্তদেৰাযতনং, পাসাদাপণমন্দিরং;

নগরং দস্সযে ৰিদ্ৰা, রাজমগ্গোপসোভিত’’ন্তি [চিন্তামণিটীকা ১.২.১]. –

নগরলক্খণং. পু পালনে, পুর পালনেতি চ, পুনাতি পুরেতি চ রক্খতি পরচক্কা দুগ্গতাযাতি পুরং, রো, অ চ, পুর অগ্গগমনেতিপি ধাত্ৰত্থো. নগা পাসাদাদযো অস্স সন্তি নগরং, রো. ৰাকারেন নগরসদ্দস্স পুল্লিঙ্গত্তং সমুচ্চিনোতি [নগরিযো ৰা পত্তনং (অমর ১.২.১) পক্খে পত্তনসাহচরিযা নপুংসকত্তং. (চিন্তামণিটীকা ১.২.১)], পুরসদ্দস্সাপীত্যাচরিযা. অকুতোভযত্তা ঠানায হিতং ঠানীযং, ঈযো. পণিকানং পুটা ভিজ্জন্তে অত্রাতি পুটভেদনং.

নিচ্চনিৰাসনট্ঠানং দস্সেত্ৰা ইতরং দস্সেতুমাহ ‘‘থিয’’মিচ্চাদি. রাজা তিট্ঠতি এত্থাতি রাজঠানী, যু, নদাদি, নিচ্চনিৰাসনট্ঠানেপি ‘‘চতুরাসীতিনগরসহস্সানি কুসৰতীরাজঠানীপমুখানী’’ত্যাদীসু [দী. নি. ২.২৬৩]. দারুক্খন্ধাদীহি আ সমন্ততো ৰরন্তি পরিক্খিপীযন্তি এত্থাতি খন্ধাৰারো, পত্থনত্থো ৰরধাতু আপুব্বত্তা পরিক্খিপনত্থো হোতি. পঞ্চকং নগরে, ‘‘খন্ধাৰারো’’তি পন একমেৰ অচিরনিৰাসনট্ঠানস্স নামং.

১৯৯. মূলপুরা অঞ্ঞত্র মূলপুরং ৰজ্জেত্ৰা যং পুরমত্থি যোজনৰিত্থিণ্ণপাকারাদিপরিক্খিত্তং, তং মূলপুরস্স তরুট্ঠানিযস্স সাখাসদিসত্তা সাখানগরং নাম.

২০০-২০১. সাদ্ধপজ্জদ্ৰযেন মূলপুরস্স নামানি. ৰানরসীসং, তংসণ্ঠানো ৰা পাসাণো এত্থ অত্থীতি ‘‘ৰানরসীস’’ন্তি ৰত্তব্বে ৰস্স বত্তং, ৰণ্ণৰিপরিযযং, দীঘং, ণত্তং, সস্স লোপঞ্চ কত্ৰা ‘‘বারাণসী’’তি ৰুত্তং. সৰত্থস্স ইসিনো নিৰাসনট্ঠানত্তা সাৰত্থি, সব্বং ধনমেত্থ অত্থীতি ৰা সাৰত্থি [ম. নি. অট্ঠ. ১.১৪], সব্বস্স সাৰো, ধনৰাচকো অত্থসদ্দো, ই. তিক্খত্তুং ৰিসালীভূতত্তা ৰেসালী, অস্সত্থুত্থে ঈ. মথি হিংসাযং, ইলো, অস্সিত্তং, মিথিলা. অলং ভূসনমেত্থাতি আল়ৰী, ৰী, ল়ত্তঞ্চ. কুস অৰ্হানে, ‘‘খাদথ পিৰথা’’ত্যাদীহি দসহি সদ্দেহি কোসন্তি এত্থাতি কোসম্বী, বো, নদাদি, কুসম্বরুক্খৰন্ততায ৰা কোসম্বী, কুসম্বস্স ইসিনো অস্সমতো অৰিদূরে মাপিতত্তাতি একে [উদা. অট্ঠ. ৩৫; ম. নি. টী. ১.১৪; ২.২৮৪]. উগ্গং রিপুং জযতি যত্থ, সা উজ্জেনী, যু, নদাদি. তক্ক ঊহে, ঊহো ঊনপূরণং, তক্কনং তক্কো, সো সীলং সভাৰো যত্থ সা তক্কসীলা, যো হি পুরিসকারেন ঊনো, সো তত্থ গন্ত্ৰা তমূনং পূরেতীতি. চম অদনে, পো, চম্পা. সানং ধনানং আকরং উপ্পত্তিট্ঠানং সাকরো, সো এৰ সাগলং. সংসুমারসণ্ঠানো গিরি এত্থাতি সংসুমারগিরং, সংসুমারো গাযতি এতস্স মাপিতকালেতি ৰা সংসুমারগিরং, গে সদ্দে, ইরো. রাজূনমেৰ আধিপচ্চৰসেন পরিগ্গহিতব্বত্তা রাজগহং. আদিকালে কপিলনামস্স ইসিনো নিৰাসনট্ঠানত্তা কপিলৰত্থু, পুমনপুংসকে.

সাকো রাজূনং যুদ্ধাদীসু সত্তি সঞ্জাতা এত্থাতি সাকেতং, ‘‘সাকো সত্তিম্হি ভূপালে, দুমদীপন্তরেসু চে’’তি নানত্থসঙ্গহে. সঞ্জাতত্থে ইতো, সাকো নাম রাজা, দুমো ৰা এত্থ আদিকালে সঞ্জাতোতি ৰা সাকেতং. ইন্দং পরমিস্সরিযভাৰং পাপুণন্তি এত্থাতি ইন্দপত্তং, ইন্দো ৰা সক্কো দেৰরাজা, সো পত্তো এত্থাতি ইন্দপত্তং. উক্কং ধারযতি এতস্স মাপিতকালেতি উক্কট্ঠা, ৰণ্ণৰিকারো. যস্স মাপিতট্ঠানে পাটলীনামকো একো তরুণরুক্খো অত্থীতি তং পাটলিপুত্তকং, অথ ৰা পটলি নাম একো গামণী, তস্স পুত্তো এত্থ ৰসতিআদিকালেতি পাটলিপুত্তকং. চেতিযরট্ঠে উত্তমত্তা চেতুত্তরং, ‘‘জেতুত্তর’’ন্তি পাঠে পন ৰণ্ণৰিকারো, ৰেরিজযট্ঠানত্তা জেতঞ্চ তং উত্তমত্তা উত্তরঞ্চেতি ৰা জেতুত্তরং. যস্স মাপিতকালে দীপো দিপ্পতি, তং সঙ্কস্সং, কাস দিত্তিযং, দ্ৰিত্তং, সম্মা কসন্তি এত্থাতি ৰা সঙ্কস্সং, কস ৰিলেখনে, যস্স মাপিতকালে নিমিত্তমোলোকেন্তা ব্রাহ্মণা কুসহত্থং নরং পস্সিত্ৰা মাপেন্তি, তং কুসিনারং. আদিনা মথুর [মধুর, মাধুর (ক.)] পাসাণপুরসোণিকাদযোপ্যনেকপুরৰিসেসা সঙ্গহিতা.

২০২. চতুক্কং অব্ভন্তরগামমগ্গে. রথস্স হিতা রচ্ছা, পব্বজ্জাদি. ৰিসযন্তে পকাসযন্তে ৰিক্কযেন দব্বানি যস্সং, সা ৰিসিখা, ৰিপুব্বো সি সেৰাযং, খো, ৰিসন্তি এত্থাতি ৰা ৰিসিখা, ৰিস পৰেসনে, খো. রথস্স হিতা রথিকা, ইকো. ৰী গমনে, থি, ৰীথি.

অনিব্বিদ্ধা রচ্ছন্তরেন মজ্ঝে অনিব্বিদ্ধা রচ্ছা ব্যূহো নাম. ব্যূহেতি সম্পিণ্ডেতি জনে অঞ্ঞত্র গন্তুমপ্পদানৰসেনাতি ব্যূহো, ঊহ সম্পিণ্ডনে ৰিপুব্বত্তা. ন নিব্বিজ্ঝতে রচ্ছন্তরেনাতি অনিব্বিদ্ধো, ৰিধ সম্পহারে, অ. নিব্বিদ্ধা রচ্ছন্তরেন রচ্ছা পথো, অদ্ধীতি চ ৰুচ্চতি. পথ গমনে, পথো. অদ গমনে,তি, অদ্ধি.

২০৩. চতুক্কং চচ্চরে. চতুন্নং পথানং সমাহারো চতুক্কং, চর গতিভক্খনেসু, চরো, রস্স চো, চচ্চরং, অঙ্গণৰাচকো চাযং. দ্ৰিন্নং, চতুন্নং ৰা মগ্গানং সন্ধি মগ্গসন্ধি. সিঙ্ঘ ঘাযনে, আটকো.

দ্ৰযং ৰপ্পস্সোপরি ইট্ঠকাদিরচিতে ৰেঠনে. ৰপ্পং নাম দুগ্গনগরে পরিখামত্তিকং কূটং [কুটিং (ক.)] কত্ৰা গোহি, হত্থীহি চ ৰিমদ্দাপেত্ৰা তিংসহত্থপ্পমাণং পাকারস্স হেট্ঠিমতলং, তথা হত্থসতং ততো উদ্ধরিত্ৰা পংসুনা ৰপ্পং কারযে, তস্সোপরি পাকারন্তি, পকুব্বন্তি তন্তি পাকারো, সমন্ততো করীযতেতি ৰা পাকারো, অকত্তরি চ কারকে সঞ্ঞাযং ণো, রস্সস্স দীঘতা. ৰু সংৰরণে, ৰুণোতীতি ৰরণো, যু, রাগমো চ. ‘‘সালো’’তিপি পাকারস্স নামং.

দ্ৰযং রাজভৰনসামঞ্ঞে. সব্বগেহানং ৰিসেসেন পকাসনতো উদ্দাপো, দীপ পকাসনে, ঈস্সাকারো. সঙ্গম্ম করোন্তি তন্তি উপকারিকা, ণ্ৰু. কে পচ্চযে থীকতাকারপরে পুব্বো অকারো দীঘং [কাতন্ত ২.২.৬৫], অকাদেসোপি হি ‘‘কো’’তি ৰুচ্চতি, যথা দেৰদত্তো ‘‘দত্তো’’তি. কপচ্চযো ৰা.

২০৪. দ্ৰযং গেহাদিনো মত্তিকেট্ঠকাদিমযভিত্তিযং. কুট ছেদনে, কুটতি ছিন্দতি মগ্গন্তি কুট্টং. ভিদি দ্ৰিধাকরণে,তি, ভিত্তি. গুন্নং ৰাচানং পুরং গোপুরং. দ্ৰারসমীপে কতো কোট্ঠকো দ্ৰারকোট্ঠকো, কুস অক্কোসে, ঠকো, কোট্ঠকোতি গেহৰিসেসো.

দ্ৰযং ইন্দখীলে. ইস ইচ্ছাযং, এস গৰেসনে ৰা, ইকো. ইন্দস্স সক্কস্স খীলো কণ্টকো ইন্দখীলো. দ্ৰযং দ্ৰারপস্সোপসালাযং’হম্যাদিপিট্ঠে চ ৰাতকুটিকাযং. অড্ড অতিক্কমহিংসাসু, অ. আলকপচ্চযে অট্টালকো.

২০৫. উপরি মালাদিযুত্তং সোভনথম্ভদ্ৰযমুভযতো নিখনিত্ৰা যং বহিদ্ৰারং কপ্পীযতে, তং তোরণং. তুর ৰারণে, যু, থৰন্তা ৰা রণন্ত্যত্রাতি তোরণং, তু অভিত্থৰে. রণ সদ্দত্থো, ৰণ্ণৰিকারো. দ্ৰারস্স বহি বহিদ্ৰারং. পরি সমন্ততো খঞ্ঞতেতি পরিখা. দীঘভাৰেন যুত্তা দীঘিকা.

২০৬-২০৭. সদুমন্তং গেহে. মন্দ মোদনথুতিজল়ত্তেসু, মন্দন্তে যত্থাতি মন্দিরং, ইরো. সীদন্তি তত্থাতি সদনং, যু. সদ ৰিসরণগত্যাৰসানেসু. ন গচ্ছন্তীতি অগা, থম্ভাদযো, তে রাতি গণ্হাতীতি অগারং. রস্সস্স দীঘত্তে আগারং. চি চযে, নিচীযতে ছাদীযতেতি নিকাযো, যম্হি চিস্স কাদেসো নিপাতনা. লী সিলেসনে, ণো, নিলযো, আলযো চ. ৰস নিৰাসে, আৰসন্ত্যত্রাতি আৰাসো, ণো. ভূ সত্তাযং, ভৰন্ত্যত্রাতি ভৰনং. ৰিসন্তি তন্তি ৰেস্মং, মো. কিত নিৰাসে, অধিকরণে যু, নিকেতনং. নিৰিসন্তি, নিৰসন্তি ৰা যত্র, তং নিৰেসনং. ঘর সেচনে, ঘরতি কিলেসমেত্থাতি ঘরং, গয্হতীতি ৰা ঘরং, ণো. গহস্স ঘরাদেসো. গণ্হাতি পুরিসেন আনীতং ধনন্তি গহং. অধিকরণে থো, আৰসথো. সর গতিচিন্তাহিংসাসু, সরন্তি চিন্তেন্তি এত্থ সুভাসুভকম্মানি, সরতি ৰা সূরিযসন্তাপাদিকন্তি সরণং. সি সেৰাযং, ণো, পতিস্সযো. উচ সমৰাযে, ওকং. সল গমনে, ‘‘ইত্থিযমতিযৰো ৰা’’তি অ, সালা, সরধাতুম্হি সতি লত্তমেৰ ৰিসেসো. চি চযে, কম্মনি ণো, চযো. কুট ছেদনে, ই. ৰস নিৰাসে,তি. উপধস্স এত্তে গেহং. সদধাতুম্হা উমো, সদুমং.

দ্ৰযং মুখরহিতদেৰকুলসদিসে যঞ্ঞাযতনে. চিত পূজাযং, কম্মনি ইযো. যত যতনে, আযতন্তি ৰাযমন্তি এত্থ ফলকামাতি আযতনং, অথ ৰা আযন্তীতি আযানি, তানি তনোতীতি আযতনং, ফলকারকন্ত্যত্থো. এত্থ তুসদ্দো সমাগতানং দ্ৰিন্নং পুব্বাপরগমনত্থো. ‘‘চেতিযাযতনানি চা’’তিপি পাঠো.

২০৮. দ্ৰযং দেৰানং, নরপতীনঞ্চ ইট্ঠকাদিমযে ভৰনে. অঞ্ঞস্সাপি সাদিস্যা. পসীদন্তি নযনমনান্যত্রাতি পাসাদো. যু মিস্সনে, পো, দীঘো চ, দীঘৰিধানসামত্থিযা ওত্তাভাৰো.

দ্ৰযং রাজতো অঞ্ঞেসং ধনীনং ব্যৰহারকাদীনং ভৰনে. মুণ্ডো ছদনমেতস্স, ন পাসাদস্স ৰিযাতি মুণ্ডচ্ছদো, দ্ৰিত্তং. হর হরণে, যো, যম্হি মিআগমো চ.

দুগ্গপুরদ্ৰারে ৰা, যত্থ কত্থচি ৰা মত্তিকাদিমযে গজকুম্ভম্হি যো যূপো পাসাদো পতিট্ঠিতো, সো হত্থিনখো নাম, হত্থিস্সেৰ নখো যস্সাতি হত্থিনখো, নখসদ্দেন ৰা নখসহিতো পাসাদো গয্হতে.

২০৯. সুপণ্ণস্স গরুল়স্স ৰঙ্কেন পক্খেন সদিসছদনং গেহং সুৰণ্ণৰঙ্কচ্ছদনং. ৰঙ্ক গমনে. একপস্সেযেৰ ছদনতো অড্ঢযোগো.

একেনেৰ কূটেন যুত্তো অনেককোণো পতিস্সযৰিসেসো মাল়ো নাম, ৰট্টাকারেন কতসেনাসনন্তি কেচি. মা মানে, ল়ো, মাল়ো.

চতুরস্সো পতিস্সযৰিসেসো পাসাদো নাম, আযতচতুরস্সপাসাদোতি কেচি.

২১০. সন্তেহি ভাতি দিব্বতীতি সভাযং, সভা চ, পুরিমে যপচ্চযো, সন্তস্স সাদেসো তূভযত্র. মণ্ডা রৰিরংসযো, তে পিৰতি নাসযতীতি মণ্ডপো, ৰাসদ্দেন মণ্ডপপদস্স পুল্লিঙ্গত্তং সমুচ্চিনোতি, জনানং আলযো সন্নিপাতট্ঠানং জনালযো. আসনত্থায কতা সালা আসনসালা. পটিক্কমন্তি এত্থাতি পটিক্কমনং, কমু পদৰিক্খেপে, অধিকরণে যু.

২১১. জিনস্স ৰাসভূতং ভৰনং গন্ধকুটি নাম, দিব্বগন্ধেহি পরিভাৰিতা কুটি গন্ধকুটি.

তিকং পাকট্ঠানে. রসানি সন্ত্যস্সং রসৰতী, পচনং পাকো, তস্স ঠানং পাকট্ঠানং. মহন্তানি বহূনি অসিতব্বানি সন্তেত্থ মহানসং, অস ভক্খনে, যু, ৰণ্ণৰিপরিযযো.

২১২. সুৰণ্ণকারাদিসিপ্পীনং কম্মসালা আৰেসনং. আৰিসন্ত্যস্মিং আৰেসনং, যু. পানমন্দিরং সুরাপানত্থং কতমন্দিরং সোণ্ডা নাম, কত্তব্বাকত্তব্বং ৰিচারেত্ৰা অত্তনা ইচ্ছিতৰত্থুকারণা সব্বং দেয্যধম্মং সনোন্তীতি সোণ্ডা, সন দানে, তনাদি. ডো, অস্সোত্তং, ৰণ্ণৰিকারো চ, তেসং এসা ৰসতি সোণ্ডা. পানসদ্দসন্নিধানা সুরাসোণ্ডাযেৰিধ গহিতা. ৰচ্চস্স গূথস্স ৰিসজ্জনট্ঠানং ৰচ্চট্ঠানং. ৰচ্চস্স ৰিসজ্জনট্ঠানা কুটি ৰচ্চকুটি. মুনীনং ইসীনং ৰসনট্ঠানং অস্সমো নাম, আ কোধং সমেন্তি এত্থাতি অস্সমো, আ ভুসো সমেন্তি এত্থ রাগাদযোতি ৰা অস্সমো.

২১৩. তিকং পণ্যৰিক্কযসালাযং. পণ ব্যৰহারে, পণিতব্বাতি পণ্যা, ৰত্থাদযো, তে এত্থ ৰিক্কিণন্তীতি পণ্যৰিক্কযো, কী দব্বৰিনিমযে, সো এৰ সালা গেহন্তি পণ্যৰিক্কযসালা. আপণযন্তে ব্যৰহরন্তে অস্মিন্তি আপণো, ণো. পণ্যানং ৰিক্কযায নীযমানানং ৰীথি পন্থো পণ্যৰীথিকা. ৰস অচ্ছাদনে, তো, উদকং ৰসিতং অচ্ছাদনং কতমনেনাতি উদোসিতো, ৰস্সোত্তং, ভণ্ডট্ঠপনস্স সালা ভণ্ডসালা. কমু পদৰিক্খেপে, চঙ্কমত্যত্রাতি চঙ্কমনং, চঙ্কমো চ, দ্ৰিত্তাদি.

২১৪. জলন্তি এত্থাতি জন্তা, জল দিত্তিযং, অন্তো, ‘‘ইত্থিযমতিযৰো ৰা’’তি অ, আ, ললোপো, জনেত্যত্র অগ্গিন্তি ৰা জন্তা, জন জননে, অন্তো, সা এৰ ঘরং জন্তাঘরং. অগ্গিনো সালা অগ্গিসালা. পা পিৰনে, পপিৰন্ত্যস্সন্তি পপা, অ. পানীযট্ঠা সালা পানীযসালা, সা এৰ পানীযসালিকা.

গস গমনে, ভো, সস্স বো. অৰতি রক্খতীতি ওৰরকো, অরো, সকত্থে কো, অস্সোত্তঞ্চ. ৰসনং ৰাসো, তদত্থং অগারং ৰাসাগারং. সযতি এত্থাতি সযনী, যু, নদাদি, সা এৰ গহং সযনিগ্গহং.

২১৫. চতুক্কং রাজিত্থাগারে, তদত্থিযতো [তদট্ঠিযতো (ক.)] উপচারেন রাজিত্থীসুপি. রাজিত্থীনমগারং ইত্থাগারং. অৰরুন্ধীযন্তে রাজিত্থিযো অনেনাতি ওরোধো, রুধ আৰরণে. সুদ্ধা কামাপগমত্তা পরিসুদ্ধা রক্খকা অন্তে সমীপে যস্সাতি সুদ্ধন্তো. অন্তে অব্ভন্তরে পুরং গেহং অন্তেপুরং, পুরস্স অন্তেতি ৰা অন্তেপুরং. ‘‘অন্তোপুর’’ন্তিপি পাঠো.

রঞ্ঞং রাজূনং অসব্বৰিসযট্ঠানং সব্বেহ্যসাধারণট্ঠানং ‘‘কচ্ছন্তর’’ন্তি মতং কথিতং, যং ‘‘পমদৰন’’ন্তি ৰুচ্চতি, পমদৰনং নাম উপকারিকাসন্নিহিতং ৰা পুরসন্নিহিতং ৰা অন্তেপুরোচিতং, যত্র অন্তেপুরসহিতো এৰ রাজা ৰিহরতি, নাঞ্ঞজনপ্পৰেসো [অমর ১৪.৩]. পমদানং ৰনং পমদৰনং. নিপাতনা যাকারানং [ঈকার আকারানন্তি অত্থো] ইত্থিগতানং রস্সো ক্ৰচীতিরস্সো. কচ্ছস্স পকোট্ঠস্স অন্তরং অব্ভন্তরং কচ্ছন্তরং. পকোট্ঠং নাম অব্ভন্তরদ্ৰারং.

২১৬. দ্ৰযং ইট্ঠকাদিরচিতে আরোহনে. উপানেন সহ ৰত্ততেতি সোপানো, সোপানং ৰা নপুংসকেপি. আরূয্হতে যেন তং আরোহনং, যু, রুহ জননে.

দ্ৰযং কট্ঠাদিরচিতাযং. নিচ্ছযেন সযন্তি পাকারাদিকমেতাযাতি নিস্সেণী, সি সেৰাযং, ণী, নদাদি. উদ্ধমারোহতে এতাযাতি অধিরোহিণী, সাসদ্দো দ্ৰিন্নম্পি ইত্থিলিঙ্গত্তং জোতেতি.

২১৭. পঞ্চকং জালকে. ৰাতং পিৰতীতি ৰাতপানং. গৰং অক্খি গৰক্খো, সমাসন্তত্তা অ, সঞ্ঞাসদ্দতো পুল্লিঙ্গত্তং, অক্খি সদ্দে ৰা, গৰং অক্খি গৰক্খীতি ৰিগ্গহো. জল দিত্তিযং, জালং. সীহরূপযুত্তং পঞ্জরং সীহপঞ্জরং. আলোকানং আতপানং পৰিসনট্ঠানং সন্ধি ছিদ্দন্তি আলোকসন্ধি, আলোকীযন্তি এতেনাতি আলোকো, সো এৰ সন্ধীতি ৰা আলোকসন্ধি.

দ্ৰযং লঙ্গিযং. লগি গত্যত্থো, অ, নদাদি. পরি পুনপ্পুনং গমনাগমনৰসেন হন্তীতি পলিঘো, ণো. কপিরূপমত্থকত্তা কপিসীসো. অগ্গল়ং নাম কৰাটকো [কৰাটফলৰিধারণো (ক.)], তস্স থম্ভো অগ্গল়ত্থম্ভো, ‘‘অগ্গল়ং তীসু কল্লোলে, দণ্ডে চান্তকৰাটেসূ’’তি রভসো, ইত্থিযমতো আপচ্চযো, অগ্গল়া. নিস্সেসতো অব্বতি ৰস্সোদকমনেনাতি নিব্বং, অব্ব গতিহিংসাসু. ছদ্দস্স ছদনস্স কোটি হেট্ঠিমাৰসানং ছদ্দকোটি, তস্সং.

২১৮. তিকং গেহচ্ছদনে. ছাদেতি এতেনাতি ছদনং, ছদ সংৰরণে, চুরাদি. পটগমনে, ‘‘পট্যাদীহ্যল’’ন্তি অলো. ছাদেতি এতেনাতি ছদ্দং, দ্ৰিত্তাদি.

তিকং গেহঙ্গণে. অজ গতিম্হি, ইরো, অজিরং. চর গতিভক্খনেসু, চরো. অঙ্গ গমনে, করণাধিকরণেসু যু, ৰণ্ণৰিকারো, ণত্তং.

পঞ্চকং গেহদ্ৰারতো বহিপকোট্ঠকে, ৰীথিযং দ্ৰারপিণ্ডকে চ. অলিন্দো ত্ৰঞ্ঞপিণ্ডকেপিচ্ছতে. পঠমং হনন্তি গচ্ছন্তি এত্থাতি পঘাণো, পঘণো চ, হনস্স ঘণাদেসো. অলি সখা ইন্দো এত্থাতি অলিন্দো, ‘‘গেহেকদেসে অলিন্দো, পঘাণো পঘণোভৰে’’তি [চিন্তামণিটীকা ১২.১২] অমরমালাযং. আলিন্দো, দীঘাদি. পধানং মুখং পমুখং, গেহস্স হি চতূসু মুখেসু তদেৰ পধানং, যত্থ সাধুজনাপি আগন্তুকাপি নিসীদন্তি. দ্ৰারং বন্ধতি পিদহতি এত্থাতি দ্ৰারবন্ধনং.

২১৯. দ্ৰযং দ্ৰারবাহাযং. পীঠানি লোহৰিকতিআদীহি সঙ্ঘটীযন্তি এত্থাতি পীঠসঙ্ঘাটকং, পীঠেহি সঙ্ঘটীযতীতি ৰা পীঠসঙ্ঘাটকং, ঘট ঘটনে. দ্ৰিভাগেন বাহাসদিসত্তা বাহা, দ্ৰারস্স বাহা দ্ৰারবাহা. ‘‘কপাটং, কৰাট’’ন্তিপি দ্ৰারবাহায নামানি, কং ৰাতং পাটযতি, ৰাটযতি চেতি কম্মনি ণো, ইত্থিযং কপাটী.

দ্ৰযং গেহাদীনং কূটে. কুট ছেদনে, কম্মনি ণো. নয গমনত্থো, কে সীসে নযতীতি কণ্ণীকা, ণ্ৰু, ইত্তং, ণত্তঞ্চ.

২২০. দ্ৰযং দ্ৰারে. দ্ৰে অরন্ত্যত্রাতি দ্ৰারং, দুজ্জনে ৰারযন্ত্যস্মা রক্খকাতি ৰা দ্ৰারং, উলোপো. পটিহরন্তি অপনেন্তি এতস্মা রক্খকা অঞ্ঞাতন্তি পটিহরো, পটিপক্খে হরতি এতস্মাতি ৰা পটিহরো, রস্সস্স দীঘত্তে পটিহারো.

চতুক্কং উম্মারে, যং ‘‘দ্ৰারপিণ্ডিকা’’তি ৰুচ্চতি. উর গতিম্হি, মারো করণে. দেহং নেতি পৰেসেনাতি দেহনী, ‘‘দেহলী’’তিপি পাঠো, দেহং লাতি পৰেসেনাতি দেহলী. ইল গতিম্হি, ণ্ৰু. ইন্দো এৰ পাদং খিপতি এত্থাতি ইন্দখীলো, খিপ পেরণে. পস্স লোপো, অথ ৰা ইং গমনং দদাতীতি ইন্দো, দ্ৰারং, তত্থ ঠপিতো খীলো কণ্টকোতি ইন্দখীলো, ৰেগগভিঘাতনতো হি সো খীলো ৰিয হোতি.

থম্ভ পটিবন্ধনে, থম্ভো, ধারেতীতি ৰা থম্ভো, ধর ধরণে, রম্ভপচ্চযো, ৰণ্ণৰিকারো চ. থু অভিত্থৰে, উণো, যু ৰা, ধারেতীতি ৰা থূণো, যু, রলোপো, অস্সূ.

অড্ঢেন্দুপাসাণে অদ্ধচন্দাকারে পাসাণে পটিকাসদ্দো ৰত্ততি. পট গতিযং, ণ্ৰু. ইত্থিকতাকারপরে কে অস্সিত্তং. গজি সদ্দে, ণ্ৰু, অস্সিত্তং, বিন্দাগমো চ. ইস ইচ্ছাযং, ঠকো.

২২১. ৰলভীতি চূল়া, ‘‘সিখাযং ৰলভী চূল়ে’’তি রুদ্দো [রস্সন্তা চ, সিখাযং ৰল়ভিযং চূল়েতি রুদ্দো (চিন্তামণিটীকা ১২.১৫)]. তচ্ছাদনে দারুম্হি কট্ঠে গোপানসী মতা. ৰঙ্কেতি দারুৰিসেসনং. গং ৰস্সোদকং, সূরিযাদিকিরণঞ্চ পিৰন্তি ৰিনাসযন্তি অব্ভন্তরমপ্পৰেসনৰসেনাতি গোপানা, ইট্ঠকাদযো, তানি সিনোন্তি বন্ধন্তি এত্থাতি গোপানসী.

সোধাদিগেহেসু ছেকপক্খাৰাসত্থং যো বহি করিয কট্ঠেকদেসো ঠপীযতে, সো ৰিটঙ্কো. কপোতে পালযতীতি কপোতপালিকা, কম্মনি ণ্ৰু. টকি নিৰাসগতীসু. ৰিনো পক্খিনো টঙ্কন্তি এত্থাতি ৰিটঙ্কো. ণো.

২২২. দ্ৰযং কুঞ্চিকাছিদ্দে. কুঞ্চিকায ৰিৰরং ছিদ্দং কুঞ্চিকাৰিৰরং. তাল়স্স পৰেসনট্ঠানভূতো ছিগ্গল়ো ছিদ্দং তাল়চ্ছিগ্গল়ো.

তিকং কুঞ্চিকাযং. কুঞ্চ কোটিল্যে, ণ্ৰু. তাযতি রক্খতীতি তালো. অলো, তলতি তিট্ঠতি এতেনাতি ৰা তালো, তল পতিট্ঠাযং. অৰাপুরতি ৰিৰরতি যেনাতি অৰাপুরণং, ৰর সংৰরণে, যু, ৰস্স পো, উত্তং, উপসগ্গস্স দীঘতা চ, ‘‘অপারুতা তেসং অমতস্স দ্ৰারা’’তি [দী. নি. ২.৭১; ম. নি. ১.২৮৩] ৰচনতো পুর, পার সংৰরণেতিপি ধাত্ৰত্থং পঠন্তি. অৰপুব্বো ৰু সংৰরণেতিপি ধাত্ৰত্থে পন সতি ৰস্স রত্তং, উপসগ্গস্স দীঘতা চ, ‘‘অপারুতা, সঙ্ঘাটিং পারুপিত্ৰা’’ত্যাদীসু পন পকারৰণ্ণাগমেন সিদ্ধো. ৰিদ লাভে, ইম্হি ৰেদিকা, সকত্থে কো. ইতরত্থ ইযেৰ.

২২৩. সঙ্ঘাটাদযো মন্দিরঙ্গা গেহঙ্গৰিসেসা. সম্মা ঘটেন্তি এত্থ গোপানস্যাদযোতি সঙ্ঘাটো, পুব্বপচ্ছিমদক্খিণুত্তরাযামৰসেন থম্ভানমুপরি ঠিতো কট্ঠৰিসেসো, তে পন পুব্বপচ্ছিমযামা তযো কট্ঠা, দক্খিণুত্তরযামা পন হেট্ঠিমপরিচ্ছেদতো তযো কট্ঠা, উক্কট্ঠপরিচ্ছেদেন পন পঞ্চসত্তনৰাদযোপি. দ্ৰিন্নং পক্খানং অপতনত্থং বন্ধনতো পাসো ৰিযাতি পক্খপাসো. তুলতি সঙ্ঘাটেসু পতিট্ঠতীতি তুলা, তল পতিট্ঠাযং, অস্সুত্তং, পক্খানং ৰা সমৰাহিতভাৰকরণতো তুলযতি মিনাতি এতাযাতি তুলা, তুল উম্মানে.

তিকং সম্মজ্জনিযং. মুজি সোধনে, যু. মজ্জ সংসুদ্ধিযং, যু. সুধ সুদ্ধিযং, সব্বত্র করণে যু.

২২৪. তিকং সঙ্কারছড্ডনপ্পদেসে. কট ছড্ডনমদ্দনেসু, সঙ্কটন্তি এত্থাতি সঙ্কটীরং, ঈরো, ‘‘সঙ্কটো’’তি ৰা সঙ্কারো ৰুচ্চতি, তং ঈরযন্তি খিপন্তি এত্থাতি সঙ্কটীরং, ঈর খেপে. সঙ্কারস্স ঠানং সঙ্কারট্ঠানং. সঙ্কারং কটতি ছড্ডেতি এত্থাতি সঙ্কারকূটং, অস্সূ, সকত্থে কো.

চতুক্কং সম্মজ্জনিযা নিরাকতে [নিরস্সতে (ক.)] থুসাদিম্হি. নানাৰিধে সঙ্কারে রাসীকরণৰসেন কচতি বন্ধতি এতেনাতি কচো, সো এত্থ ইচ্ছিতব্বোতি কচৰরো, ৰর ইচ্ছাযং. উচ্ছিট্ঠো কলাপো সমূহো উক্লাপো, কস্সাকারলোপো. নানাৰিধেহি তিণাদীহি সঙ্করীযতে মিস্সীকরীযতেতি সঙ্কারো, ণো. অৰকরোতিপ্যত্র. অৰকরীযতে নিরস্সতেতি, অ. ‘‘সম্মজ্জো মজ্জনী চেৰ, সঙ্কারো’ৰকরো মতো’’তি হলাযুধো. কস ৰিলেখনে, অম্বু.

২২৫. ঘরাদিভূমি ঘরখেত্তৰিহারাদীনং যো ভূমিপ্পদেসো ৰত্থু নাম, তং নপুংসকে, ৰসন্তি এত্থাতি ৰত্থু, রত্থু. গস মদনে, গসন্তি এত্থাতি গামো, মো. সংৰসন্ত্যত্রাতি সংৰসথো, অথো.

পাকটো খ্যাতো গামো, সো নিগমো নাম, অতিরেকো গামো নিগমো, ভুসত্থো নি, সঞ্ঞাসদ্দত্তা রস্সো.

উপভুঞ্জিতব্বভোগমনুস্সাদীহি ( ) [(ইভ্যো) (?)] ৰড্ঢিতো অধিকো গামো নিগমতোপি অধিকতরত্তা ‘‘অধিভূ’’তি ঈরিতো কথিতো, অধিকো ভৰতীতি অধিভূ.

২২৬. দ্ৰযং গামাদিপরিযন্তভাগে. সি বন্ধনে, মো. পরিচ্ছিন্দিত্ৰা আদীযতেতি মরিযাদা, পস্স মো.

দ্ৰযং আভীরকুটিযং [ঘোসো আভীরপল্লী সিযা (অমর ১২.২০)]. ঘু সদ্দে, ঘোসন্ত্যত্রাতি ঘোসো. গোপালানং গামো গোপালগামকো, সকত্থে কো.

পুরৰগ্গৰণ্ণনা নিট্ঠিতা.

৩. নরৰগ্গৰণ্ণনা

২২৭-২২৮. পোরিসন্তানি মনুস্সজাতিযা নামানি. মনো উস্সন্নমস্সাতি মনুস্সো, সতিসূরভাৰব্রহ্মচরিযযোগ্যতাদিগুণৰসেন উপচিতমানসা উক্কট্ঠগুণচিত্তা, কে পন তে? জম্বুদীপৰাসিনো সত্তৰিসেসা. তেনাহ ভগৰা – ‘‘তীহি, ভিক্খৰে, ঠানেহি জম্বুদীপকা মনুস্সা উত্তরকুরুকে মনুস্সে অধিগ্গণ্হন্তি দেৰে চ তাৰতিংসে. কতমেহি তীহি, সূরা সতিমন্তো ইধ ব্রহ্মচরিযৰাসো’’তি [অ. নি. ৯.২১]. তথা হি বুদ্ধা ভগৰন্তো পচ্চেকবুদ্ধা অগ্গসাৰকমহাসাৰকচক্কৰত্তিনো চ অঞ্ঞে চ মহানুভাৰা সত্তা তত্থেৰ উপ্পজ্জন্তি. সমানরূপাদিতায পন সদ্ধিং পরিত্তদীপৰাসীহি ইতরমহাদীপৰাসিনোপি মনুস্সাত্ৰেৰ পঞ্ঞাযিংসূতি একে, অপরে পন ভণন্তি ‘‘লোভাদীহি, অলোভাদীহি চ সহিতস্স মনস্স উস্সদতায মনুস্সা, যে হি সত্তা মনুস্সজাতিকা, তেসু ৰিসেসতো লোভাদযো, অলোভাদযো চ উস্সদা, তে লোভাদীহি উস্সদতায অপাযমগ্গং, অলোভাদীহি উস্সদতায সুগতিমগ্গং, নিব্বানগামিমগ্গঞ্চ পূরেন্তি, তস্মা লোভাদীহি, অলোভাদীহি চ সহিতস্স মনস্স উস্সদতায পরিত্তদীপৰাসীহি সদ্ধিং চতুমহাদীপৰাসিনো সত্তৰিসেসা মনুস্সাতি ৰুচ্চন্তী’’তি. লোকিযা পন মনুনো অপচ্চভাৰেন মনুস্সাতি ৰদন্তি, মনু নাম পঠমকপ্পিকো লোকমরিযাদায আদিভূতো হিতাহিতৰিধাযকো সত্তানং পিতুট্ঠানিযো, যো সাসনে ‘‘মহাসম্মতো’’তি ৰুচ্চতি, পচ্চক্খতো, পরম্পরতায চ তস্স ওৰাদানুসাসনিযং ঠিতা তস্স পুত্তসদিসতায মনুস্সাতি ৰুচ্চন্তি, ততো এৰ হি তে ‘‘মানৰা, মনুজা’’তি চ ৰোহরীযন্তি, উস্সপচ্চযো. মনুনো অপচ্চং মানুসো, উসো. মর পাণচাগে, চো, মচ্চো, পব্বজ্জাদিনা ৰা ত্যপচ্চযো, ধাত্ৰন্তস্স লোপো চ. ততো ‘‘যৰত’’মিচ্চাদিনা চো, দ্ৰিত্তং. মনুনো অপচ্চং মানৰো. মাণৰোপ্যত্র, ণৰো. মনুম্হা জাতো মনুজো. নী নযে, নেতীতি নরো, অরো. পুস পোসনে, ণো, পুরেতীতি ৰা পোসো. পুর পূরণে, সো, উস্সোত্তং, রলোপো. পুনাতীতি পুমা,পু পৰনে, মো, সিস্সা. পুরেতীতি পুরিসো, পোরিসো চ, ইসো, রস্সস্স দীঘতায পূরিসো চ. এত্থ চ মনুস্সাদিপঞ্চকং ইত্থিযম্পি ৰত্ততে, নরাদযো তু পুমেযেৰ ৰিসিট্ঠলিঙ্গত্তা. তত্র মনুস্স মানুস মনুজ মাণৰেহি নদাদিত্তা ঈপচ্চযো, একসকারলোপো, মনুসী, মানুসী, মনুজী, মাণৰী. মচ্চা, ইত্থিযমতো আপচ্চযো.

ৰিদ্দসুপরিযন্তং পণ্ডিতে. পণ্ডা বুদ্ধি সঞ্জাতা অস্সাতি পণ্ডিতো, তরত্যাদি. পডি গতিযং ৰা, তো. বুজ্ঝতীতি বুধো. ৰিদতি জানাতীতি ৰিদ্ৰা, ৰিদ ঞাণে, ৰো, সিস্সা. ভূ সত্তাযং, অত্থে ৰিভাৰেতি পকাসেতি সীলেনাতি ৰিভাৰী, ণী. রাগাদযো সমেতীতি সন্তো, তো, সুন্দরো অন্তো অৰসানমেতস্সাতি ৰা সন্তো. সুন্দরা পঞ্ঞা যস্স সপ্পঞ্ঞো. কিন্নাম ন ৰিন্দতীতি কোৰিদো, নেরুত্তো, কুং পাপং ৰিন্দতীতি ৰা কোৰিদো. ধী পঞ্ঞা যস্সত্থীতি সো ধীমা, সোভনং ঝাযতীতি সুধী, ঝে চিন্তাযং. ঝস্স ধো, ঈ, সুন্দরা ধী যস্সাতি ৰা সুধী. কৰি ৰণ্ণে, ই, ইত্থিযং কৰী চ, কু সদ্দে ৰা, ই, কৰি. ব্যঞ্জযতীতি ব্যত্তো, অঞ্জ গতিযং, তো. ভুজাদীনমন্তো নো দ্ৰি চ. ৰিসিট্ঠো অত্তা যস্সাতি ৰা ব্যত্তো. চক্খ দস্সনে, যু, ৰিচক্খণো, ৰিচারেতীতি ৰা ৰিচক্খণো, নেরুত্তো. ৰিগতো সারদো এতস্মাতি ৰিসারদো.

২২৯. মেধা ধারণা মতি পঞ্ঞা যস্সাতি মেধাৰী, ৰী. অতিসযমতিযুত্ততায মতিমা. পঞ্ঞায যোগতো পঞ্ঞো. ৰিসেসং জানাতি সীলেনাতি ৰিঞ্ঞূ, রূ. ৰিদ ঞাণে, উরো, ৰিদুরো [ৰিদূরো (ক.)]. রূপচ্চযে ৰিদূ. ধীযোগা ধীরো, রো. ৰিসিট্ঠদস্সনসীলতায ৰিপস্সী, ণী. দোসং জানাতীতি দোসঞ্ঞূ, রূ. বুজ্ঝতীতি বুদ্ধো, তো. দু গতিযং, অ, উস্সাৰো [দু গতিযং অব্বো (সূচি)], দব্বো. ৰিদ ঞাণে, দসু.

২৩০-২৩১. মহিলান্তং ইত্থিসামঞ্ঞে. ইসু ইচ্ছাযং, তো, নদাদি. সীমস্স অন্তো সীমন্তো, কেসৰেসো, তংযোগা সীমন্তিনী, ইনী. নরস্সাযং নারী, ইদমত্থে ণো. তিট্ঠতি গব্ভো যস্সং, সা থী. ধা ধারণে ৰা, ৰণ্ণৰিকারো, ঈ. বন্ধ বন্ধনে, ঊ, বন্ধস্স ৰধাদেসো চ [ণ্ৰাদি ৩], ৰধূসদ্দো সুণিসাভরিযানম্পি ৰাচকো. ৰন সম্ভত্তিযং, তো, ইকারাগমো চ. অঙ্গ গমনত্থো, যু, অঙ্গনা, ৰিসিট্ঠনারিযম্পি অঙ্গনা, তদা কল্যাণঙ্গনারীলক্খণোপেতং পসত্থং হত্থপাদাদিকমঙ্গমস্সত্থীতি অস্সত্থ্যত্থে অঙ্গা কল্যাণে নপচ্চযো [মোগ্গল্লান ৪.৯২]. ৰিরূপেসুপি মদো রাগমদো যস্সা সা পমদা, ৰিসিট্ঠনারিযংপ্যত্র পমদা, তদা পকট্ঠো মদো রূপসোভগ্গজনিতো চেতোৰিকারো যস্সা সা পমদা. রূপলাৰণ্যসম্পন্নতায সুন্দরী, ৰিসিট্ঠাযম্পি. কমনীযৰুত্তিতায কন্তা, কমু কন্তিযং, তো. কন্তিযোগা ৰা কন্তা, ৰিসিট্ঠাযম্পি. রমযতি ৰিনোদযতি নাযকং, সা রমণী, নন্দাদীহি যু, নদাদি, ৰিসিট্ঠাযম্পি. দয রক্খণে, কম্মনি তো. অপ্পং বলং যস্সা সা অবলা, অপ্পত্থোযং অকারো. মাতুযা গামো ৰিয গামো যস্সা সা মাতুগামো, মাতা ৰিয গচ্ছতীতি ৰা মাতুগামো, গমু গমনে, ণো, মাতা ৰিয গসতীতি ৰা মাতুগামো, গস অদনে, মো, মাতা ৰিয গাযতীতি ৰা মাতুগামো, গা সদ্দে, মো. মহী ৰিয সুচিং অসুচিম্পি লাতীতি মহিলা, মহন্তেসু বহূসুপি রত্তচিত্তেসু ইলতি গচ্ছতীতি ৰা মহিলা, ইল গমনে, মহ পূজাযং ৰা, ইরো, লত্তং, আ, মহিলা. মহেলাপ্যত্র.

তিকং ৰিসিট্ঠনারিযমেৰ. লল ৰিলাসে, নন্দাদীহি যু. লল ইচ্ছাযন্তি চুরাদিগণতো ৰা যু. ভযপকতি ভীরু, ভী ভযে, রু, ‘‘ভীরু অত্তে জনে’ত্থিয’’ন্তি রভসো. অতিসযিতকামা কামিনী, কামো সিঙ্গাররূপো মদো যস্সাত্থীতি ইনী, সব্বত্রেৰং. ৰামলোচনা, ভাৰিনী, নিতম্বিনী, রামাইচ্চাদীনিপি ৰিসিট্ঠনারীনামানি.

দ্ৰযং পঠমৰযসি ৰত্তমানাযং.

অট্ঠৰস্সা ভৰে গোরী, দসৰস্সা তু কঞ্ঞকা;

সম্পত্তে দ্ৰাদসে ৰস্সে, কুমারীত্য’ভিধীযতে [চিন্তামণিটীকা ১৬.৮].

ইহ ত্ৰভেদোপচারেনেকত্তং. অঞ্ঞে পনাহু ‘‘কঞ্ঞাসদ্দোযং পুমুনাভিসম্বন্ধপুব্বকে সম্পযোগে নিৰত্তেতী’’তি. কুমার কীল়াযং, চুরাদি, কুমারযতীতি কুমারী, অ, নদাদি, সকত্থে কো, ণ্ৰুনা ৰা সিদ্ধো. কমনীযতেতি কঞ্ঞা, কন দিত্তিকন্তিগতীসু, যো, ন্যস্স ঞত্তং, অ, আ.

যুৰসদ্দতো পাটিপদিকতোতি, যুৰতি. ৰরিত্থিপরিযাযসামঞ্ঞেপি যুৰতিসদ্দো পকত্যন্তরমত্থীতি. তর তরণে, যু, উত্তং, ঈ চ.

২৩২. সাভিসেকা লদ্ধাভিসেকা রাজিত্থী মহেসী নাম, মহ পূজাযং, কম্মনি ইসো, ইস্সে, ততো ঈ, মহতিযো রাজিত্থিযো ঈসতি অভিভৰতীতি ৰা মহেসী, ঈস ইস্সরিযে, ঈ. মহেসিতো অঞ্ঞা রাজনারিযো ভোগিনিযো ভোগযোগা, ঈ, ইনী চ. যানারী পুরিসস্স সঙ্কেতং যাতি, সা ‘‘ধৰত্থিনী, অভিসারিকা’’তি চোচ্চতে. ধৰং পতিং অত্থযতি ইচ্ছতীতি ধৰত্থিনী, অত্থ যাচনিচ্ছাসু, ইনী, অসতীৰিসেসো. সর গতিযং, অভিসরতি সঙ্কেতন্তি, ণ্ৰু.

২৩৩. ছক্কং ৰেসিযং. চতুসট্ঠিকলাকুসলতায, সীলরূপাদিমত্তায চ গণ্যতে আদীযতে গণিকা, গণ সঙ্খ্যানে, ণ্ৰু. ৰেসো আকপ্পো, তেনাতিসোভতে, কম্মৰেসেহি ৰা ইচ্ছীযতেতি. অতিসোভনে, ইচ্ছত্থে ৰা যপচ্চযো. ৰণ্ণসম্পন্না দাসী ৰণ্ণদাসী, দাসিম্পি হি ৰণ্ণসম্পন্নং কেচি সামিকা ধনলোভেন গণিকং করোন্তি. নগরং সোভেতীতি নগরসোভিনী. রূপেন উপজীৰতীতি রূপূপজীৰিনী. অতিসযৰেসযুত্ততায ৰেসী.

দ্ৰযং অসতীসামঞ্ঞে. কুলানি অটতি নাসযতীতি কুলটা. বন্ধমনুবন্ধং কাযতীতি বন্ধকী, নদাদি.

২৩৪. চতুক্কং উত্তমনারিযং. ৰরো আরোহো সোণি যস্সা সা ৰরারোহা. উত্তমগুণযোগা উত্তমা. সোণিগারৰেন মত্তগজো ৰিয বন্ধনগামিনী মত্তকাসিনী, কস গতিযং. ৰরৰণ্ণযোগা ৰরৰণ্ণিনী, ইনী.

‘‘সীতে সুখোণ্হসব্বঙ্গী, গিম্হে যা সুখসীতলা;

ভত্তু ভত্তা চ যা নারী, সা ভৰে ৰরৰণ্ণিনী’’তি. রুদ্দো;

দ্ৰযং অখণ্ডিতচরিত্রাযং. পতি সামিকোৰ কমনীযো যস্সা পতিব্বতা, পতিম্হি ৰতমস্সাতি ৰা পতিব্বতা. অস ভুৰি, অন্তো, ঈ, আদিলোপো. সমেতীতি ৰা সতী, সমু উপসমে, অন্তো, ঈ.

দ্ৰযং কামরত্তরাজপুত্তাদিনো কুলস্স নিযতপতিযং. কুলানুরূপা ইত্থী কুলিত্থী, কুলং পালেতি রক্খতীতি কুলপালিকা, ণ্ৰু.

২৩৫. দ্ৰযং মতভত্তিকাযং. ৰিগতো ধৰো ভত্তা যস্সা ৰিধৰা. পতি সুঞ্ঞো নট্ঠো যস্সাতি পতিসুঞ্ঞা.

দ্ৰযং অত্তিচ্ছায পত্যন্ৰেসিনিযং কঞ্ঞাযং. পতিং ৰরতি গৰেসতীতি পতিম্বরা, দুতিযাযালোপো. সযমেৰ পতিং ৰরতীতি সযম্বরা, পঠমাযালোপো, ৰর পত্থনাযং.

চতুক্কং ৰিজাতাযং. ৰিজনী গব্ভৰিমোক্খনে, তো, ৰিজাযিত্থাতি ৰিজাতা. সূ অভিসৰে, তো. জাতং অপচ্চং পুত্তো এতিস্সাতি জাতাপচ্চা. পসূতাৰ পসূতিকা, কপচ্চযো, ইত্তঞ্চ.

২৩৬. দ্ৰযং দূতিযং. যা পেসীযতে, সা দূতী, দু গমনে,তি, ঈম্হি দূতী. সঞ্চারযতি যথাভিমতন্তি, ণ্ৰু.

তিকং দাসিযং. দু কুচ্ছিতং অসতি ভক্খতীতি দাসী, ঈ, দীযন্তে তাযাতি ৰা দাসী, দা দানে, সো, ঈ চ. চিট পেসনে, কম্মনি ণো, ঈ. কুটং উদককুম্ভং ধারেতীতি কুটধারিকা, ণ্ৰু.

দ্ৰযং সুভাসুভনিরূপিনিযং সংৰরিকাদিম্হি. ৰর গতিযং, কত্তরি ইনী. সুভাসুভস্স ইক্খণং নিরূপনং যস্সাত্থীতি, ই, সকত্থে কো. ইমে দ্ৰে সদ্দা তুল্যত্থা.

যা সযং খত্তিযজাতি যস্স কস্সচি ভরিযা, সা খত্তিযানী, খত্তিযা চ. খত্তিযস্সাপচ্চং খত্তিযানী, আনো, ঈ. ণম্হি খত্তিযা.

২৩৭. পজ্জং অগ্গিসক্খিপুব্বকতপাণিগহিতাযং ভরিযাযং, অঞ্ঞত্র তূপচারা. দারযন্তে যেনাতি দারো, দর ৰিদারণে, অকত্তরি চ কারকে সঞ্ঞাযং ণো. জাযতি পুত্তো যাযাতি জাযা, জন জননে, যো, জনিস্স জা চ, আ, জযতীতি ৰা জাযা, জি জযে, যো, জিস্স জা, আ, জাযা. কল সঙ্খ্যানে, অত্তো. ঘরং নেতীতি ঘরণী, ণত্তং. ভরিতব্বতো ভরিযা, ভর ভরণে, যো. পিযাযিতব্বতো পিযা,পী তপ্পনকন্তীসু, যো. পজং পুত্তং পালেতীতি পজাপতি, পা পালনে,তি, আত্তং, রস্সত্তঞ্চ. দ্ৰিন্নং পূরণী দুতিযা. পঠমো ভত্তা, ভরিযা দুতিযা. সামিকস্স পাদে পরিচরতীতি পাদপরিচারিকা, ণ্ৰু. পতিনী, পাণিগহিতা, সহধম্মিনীতিপি তস্সাযেৰ নামানি.

২৩৮. তিকং সখিযং. তেসু তেসু কিচ্চেসু সহ খাযতি পকাসতীতি সখী, সহপুব্বো খা পকাসনকথনেসু, ঈ. অল ভূসনে আপুব্বো, ই. ৰযসা তুল্যা ৰযসা, তুল্যে সঞ্ঞাযং সো [পাণিনি ৪.৪.৯১ সুত্তে যপচ্চযো দিস্সতি].

জরোৰুচ্চতি চোরস্সামিকো, তস্সাযং জারী, ণো, ঈ. সামিকং অতিক্কম্ম অঞ্ঞত্র চরতীতি, ইনী.

২৩৯. পুমে তূতি লিঙ্গন্তো তুসদ্দো ন পুব্বং ভজতে. অর গমনে, তু, অরস্সুত্তং. রতিযা জাযতীতি রজো, তিলোপো. পুপ্ফ ৰিকসনে, পুপ্ফং.

তিকং রজস্সলাযং. উতুযোগাউতুনী, ইনী. রজযোগা রজস্সলা, সলো. পুপ্ফৰন্ততায পুপ্ফৰতী. থীধম্মিনী, অৰী, অত্তেযী, মলিনী, উতুমতী, উদকীইচ্চাদীনিপি তস্সা নামানি.

তিকং গব্ভিনিযং. গরু অলহুকো গব্ভো কুচ্ছি এতিস্সাতি গরুগব্ভা. আপন্নো পত্তো গব্ভট্ঠো সত্তো এতাযাতি আপন্নসত্তা. গব্ভযোগা গব্ভিনী.

তিকং যেন ৰেঠিতো গব্ভো কুচ্ছিযং তিট্ঠতি, তত্রাসযেতি খ্যাতে. গব্ভো আসযতে তিট্ঠত্যত্রাতি, ণো. জরং এতীতি জলাবু. উ, রস্স লো, যস্স বো, জরাপুব্বো ই গতিযং. কলং জরতং লাতীতি কললো, কল সঙ্খ্যানে ৰা, অলো.

২৪০-২৪১. সত্তকং ভত্তরি. ধূ কম্পনে, সন্তাসং ধুনোতীতি ধৰো, অ. সং এতস্সত্থীতি সামিকো, আমিপচ্চযো, সকত্থে কো, ইপচ্চযো ৰা, নিগ্গহীতস্স মো, অস্স চ দীঘো, সামিকো. ভর ভরণে, ভরতীতি ভত্তা, রিতু. কমু ইচ্ছাযং, তো, ‘‘পক্কমাদীহি ন্তো চা’’তি ন্তত্তং. পা রক্খণে, অতি, পতি. ৰর ইচ্ছাযং, অ, ৰরো. পী তপ্পনকন্তীসু, যো.

রতিকারণত্তা পতিনো উপ উপপতি, সমাসে কতে অভিধানতো পুব্বনিপাতো, অপ্পধানভূতো ৰা পতি উপপতি. জর ৰযোহানিম্হি, জীযন্তে অনেনাতি জারো, দারো চ.

সত্তকং পুত্তে. নরকে ন পতন্ত্যনেন জাতেনাতি অপচ্চং, পত গতিযং, যো, ত্যস্স চো, ন পততি ন ৰিচ্ছিন্দতি ৰংসো এতেনাতি ৰা অপচ্চং, পুত্তে, ধীতরি চ নিচ্চনপুংসকোযং. পূ পৰনে. পুনাতি পিতরো তেনাতি পুত্তো. ‘‘ছদাদীহি তত্রণ’’তি তো. পূরেতীতি ৰা পুত্তো. অত্ততো জাতো অত্রজো, ‘‘অত্তজো’’তিপি পাঠো. সুযতেতি সুতো. সু অভিসৰে, সুণাতীতি ৰা সুতো, তো, সু সৰনে. তনুম্হা জাতো তনুজো, তনযো চ, যো, তনোতি মুদন্তি ৰা তনযো, অযো. সূযতেতি সূনু, কম্মনি নু, সূ পসৰে.

পুত্তাদযো সূনুপরিযন্তা ধীতরি ৰত্তমানা ইত্থিযং ৰত্তন্তি. দুহিতা, ধীতা চ সদা নারিযমেৰ. দুহ পপূরণে, রাতু, ওত্তাভাৰো, ইকারাগমো চ. ধা ধারণে, রাতু, আস্সী. পুত্তাদযো চ তে সামঞ্ঞেনেৰ কুণ্ডগোলকাদীনং ৰাচকা. সৰণ্ণাযং তু ঊঢাযং সজাতো সযং জনিতো সুতো ওরসো নাম. সজাতসদ্দেন কুণ্ডকগোলকখত্তাদিব্যৰচ্ছেদো. জীৰতি ভত্তরি জারজো সুতো কুণ্ডাখ্যো. মতে ভত্তরি জারজো গোলকাখ্যো. অরিযাসুদ্দজো সুতো খত্তা নাম [খত্তা অরিযাসুদ্দানং (অমর ২০.৩)]. আদিনা মাগধাদীনং গহণং. ৰুত্তঞ্হি –

‘‘অমতে জারজো কুণ্ডো,

মতে ভত্তরি গোলকো’’তি [অমর ১৬.৩৬].

‘‘মাগধো সুদ্দখত্তাজো’’তি [অভিধানু ৫০৩ গাথা] চ.

উরসা মনসা নিম্মিতো, উরসদ্দা ততিযন্তা নিম্মিতত্থে ণো, নিৰিট্ঠত্তা তেন নিম্মিতোতি ৰুচ্চতি. উরসি ভৰোতি ৰা ওরসো.

২৪২. চতুক্কংপতিপতিনীনং যুগে, ‘‘দারা পুমে বহুত্তে চ, দং কলত্রে নপুংসকে’’তি [চিন্তামণিটীকা ১৬.৩৮] অমরমালা, জংসদ্দো ত্ৰব্যযো দারৰচনো. তস্মা ‘‘জম্পতি, দম্পতী’’তিপি ভৰিতব্বং, ইধ পন কচ্চাযনমতেনোদাহটা. জাযা চ পতি চ জাযাপতি. ইতরীতরযোগদ্ৰন্দো. জাযা চ পতি চ জানিপতি, তথা জাযম্পতিআদযো, জাযাসদ্দস্স পতিম্হি পরে জানি, তুদঞ্চ, জাযঞ্চ যদাদিনা.

তিকং নপুংসকে. ৰিগতো রাগস্সৰো যস্মা ৰস্সৰরো. সু সৰনে, অরো. পণ ব্যৰহারে, ডো, পডি লিঙ্গৰেকল্যে ৰা, ভূৰাদি. ন ইত্থী ন পুমা নপুংসকং, নিরুত্তিনযেন ইত্থিপুমানং পুংসকভাৰো, নস্স চ পকতি. ততিযাপকতি, সণ্ডো, কলীবন্তিপি তস্স নামানি. ততিযা পকতি ততিযপ্পকারো, সমজাতিকে ইত্থিপুরিসে অপেক্খিত্ৰা ততিযত্তং পকারস্স. পঠমা হি পকতি ইত্থী, দুতিযা পকতি পুরিসো, ইতরপকতি ততিযা পকতি.

২৪৩. ছক্কং ঞাতিমত্তে, বন্ধুযেৰ বন্ধৰো, অ, উস্সাৰো. বন্ধতীতি বন্ধু, উ. সস্স অত্তনো জনো সজনো. সমানং গোত্তং কুলং অস্সাতি সগোত্তো, সমানস্স সভাৰো. ঞা অৰবোধনে, কম্মেতি, ঞাতিযেৰ ঞাতকো, অত্তং, সকত্থে কো চ. সুসদ্দোপ্যত্র [স্ৰ (অমর ১৬.৩৬)].

দ্ৰযং সত্তপুরিসাৰধিকেসু নিকটঞাতীসু. লোহিতেন সম্বন্ধো সালোহিতো, সম্বন্ধস্স সাদেসো, পুব্বনিপাতো চ, সমানং পিণ্ডদানং যস্স সপিণ্ডো, সনাভযোপ্যত্র [নাভি সত্তপুরিসাৰধিককুলে (চিন্তামণিটীকা ১৬.৩৩)]. তিকং পিতরি. তা পালনে, তো কত্তরি. জনযতীতি জনকো, ণ্ৰু. পা রক্খণে, রিতু, অস্সিত্তং.

২৪৪. ছক্কং মাতরি. অম পূজাযং, কম্মনি মো, বো চ, অম্মা, অম্বা. জনযতীতি জননী, যু, নদাদি. মান পূজাযং, পুত্তং মানেতীতি মাতা, রাতু, পাতীতি ৰা মাতা, পাতিস্স মো. জনেতীতি জনেত্তি,তি. জনেতীতি জনিকা, ণ্ৰু, ইত্তং.

অপ্পধানভূতা মাতা উপমাতা, কুমারে ধারেতীতি ধাতি. ধা ধারণে,তি. জাযায ভরিযায ভাতিকো কনিট্ঠো চ জেট্ঠো চ সালো নাম, সস্স অত্তনো এসা সা, ভরিযা, তস্সা ভাতা সালো, জাযায ভাতরি অলো. সর গতিচিন্তাহিংসাসু ৰা, ণো, লত্তং, সাল ৰিতক্কে ৰা, চুরাদি.

২৪৫. সামিনো ভত্তু ভগিনী ননন্দা নাম, ন নন্দতীতি ননন্দা, অত্তাভাৰো নস্স ৰিভাসাধিকারা. নন্দ সমিদ্ধিযং, ভূৰাদি.

দ্ৰযং অয্যিকাযং. মাতুযা মাতা মাতামহী. পিতূনং পিতরি চ মাতরি চ আমহং যদাদিনা, নদাদি. অরহ পূজাযং, ণ্ৰু, রহস্স যো, অয গতিম্হি ৰা, ণ্ৰু, অয্যিকা.