৮. দেৰাসুরসঙ্গামসুত্তং

৩৯. ‘‘ভূতপুব্বং, ভিক্খৰে, দেৰাসুরসঙ্গামো সমুপব্যূল়্হো [সমুপব্বূল়্হো (সী. পী.)] অহোসি. তস্মিং খো পন, ভিক্খৰে, সঙ্গামে অসুরা জিনিংসু, দেৰা পরাজযিংসু [পরাজিযিংসু (সী. স্যা. ক.)]. পরাজিতা চ, ভিক্খৰে, দেৰা [দেৰা ভীতা (পী.)] অপযিংসুযেৰ [অপযংস্ৰেৰ (সী.)] উত্তরেনাভিমুখা, অভিযিংসু [অভিযংসু (সী.)] অসুরা. অথ খো, ভিক্খৰে, দেৰানং এতদহোসি – ‘অভিযন্তেৰ খো অসুরা. যংনূন মযং দুতিযম্পি অসুরেহি সঙ্গামেয্যামা’তি. দুতিযম্পি খো, ভিক্খৰে, দেৰা অসুরেহি সঙ্গামেসুং. দুতিযম্পি খো, ভিক্খৰে, অসুরাৰ জিনিংসু, দেৰা পরাজযিংসু. পরাজিতা চ, ভিক্খৰে, দেৰা অপযিংসুযেৰ উত্তরেনাভিমুখা, অভিযিংসু অসুরা’’.

অথ খো, ভিক্খৰে, দেৰানং এতদহোসি – ‘অভিযন্তেৰ খো অসুরা. যংনূন মযং ততিযম্পি অসুরেহি সঙ্গামেয্যামা’তি. ততিযম্পি খো, ভিক্খৰে, দেৰা অসুরেহি সঙ্গামেসুং. ততিযম্পি খো, ভিক্খৰে, অসুরাৰ জিনিংসু, দেৰা পরাজযিংসু. পরাজিতা চ, ভিক্খৰে, দেৰা ভীতা দেৰপুরংযেৰ পৰিসিংসু. দেৰপুরগতানঞ্চ পন [পুন (ক.)], ভিক্খৰে, দেৰানং এতদহোসি – ‘ভীরুত্তানগতেন খো দানি মযং এতরহি অত্তনা ৰিহরাম অকরণীযা অসুরেহী’তি. অসুরানম্পি, ভিক্খৰে, এতদহোসি – ‘ভীরুত্তানগতেন খো দানি দেৰা এতরহি অত্তনা ৰিহরন্তি অকরণীযা অম্হেহী’তি.

‘‘ভূতপুব্বং, ভিক্খৰে, দেৰাসুরসঙ্গামো সমুপব্যূল়্হো অহোসি. তস্মিং খো পন, ভিক্খৰে, সঙ্গামে দেৰা জিনিংসু, অসুরা পরাজযিংসু. পরাজিতা চ, ভিক্খৰে, অসুরা অপযিংসুযেৰ দক্খিণেনাভিমুখা, অভিযিংসু দেৰা. অথ খো, ভিক্খৰে, অসুরানং এতদহোসি – ‘অভিযন্তেৰ খো দেৰা. যংনূন মযং দুতিযম্পি দেৰেহি সঙ্গামেয্যামা’তি. দুতিযম্পি খো, ভিক্খৰে, অসুরা দেৰেহি সঙ্গামেসুং. দুতিযম্পি খো, ভিক্খৰে, দেৰা জিনিংসু, অসুরা পরাজযিংসু. পরাজিতা চ, ভিক্খৰে, অসুরা অপযিংসুযেৰ দক্খিণেনাভিমুখা, অভিযিংসু দেৰা’’.

অথ খো, ভিক্খৰে, অসুরানং এতদহোসি – ‘অভিযন্তেৰ খো দেৰা. যংনূন মযং ততিযম্পি দেৰেহি সঙ্গামেয্যামা’তি. ততিযম্পি খো, ভিক্খৰে, অসুরা দেৰেহি সঙ্গামেসুং. ততিযম্পি খো, ভিক্খৰে, দেৰা জিনিংসু, অসুরা পরাজযিংসু. পরাজিতা চ, ভিক্খৰে, অসুরা ভীতা অসুরপুরংযেৰ পৰিসিংসু. অসুরপুরগতানঞ্চ পন, ভিক্খৰে, অসুরানং এতদহোসি – ‘ভীরুত্তানগতেন খো দানি মযং এতরহি অত্তনা ৰিহরাম অকরণীযা দেৰেহী’তি. দেৰানম্পি, ভিক্খৰে, এতদহোসি – ‘ভীরুত্তানগতেন খো দানি অসুরা এতরহি অত্তনা ৰিহরন্তি অকরণীযা অম্হেহী’তি.

‘‘এৰমেৰং খো, ভিক্খৰে, যস্মিং সমযে ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি, তস্মিং, ভিক্খৰে, সমযে ভিক্খুস্স এৰং হোতি – ‘ভীরুত্তানগতেন খো দানাহং এতরহি অত্তনা ৰিহরামি অকরণীযো মারস্সা’তি. মারস্সাপি, ভিক্খৰে, পাপিমতো এৰং হোতি – ‘ভীরুত্তানগতেন খো দানি ভিক্খু এতরহি অত্তনা ৰিহরতি অকরণীযো ময্হ’’’ন্তি.

‘‘যস্মিং, ভিক্খৰে, সমযে ভিক্খু ৰিতক্কৰিচারানং ৰূপসমা…পে… দুতিযং ঝানং… ততিযং ঝানং… চতুত্থং ঝানং উপসম্পজ্জ ৰিহরতি, তস্মিং, ভিক্খৰে, সমযে ভিক্খুস্স এৰং হোতি – ‘ভীরুত্তানগতেন খো দানাহং এতরহি অত্তনা ৰিহরামি অকরণীযো মারস্সা’তি. মারস্সাপি, ভিক্খৰে, পাপিমতো এৰং হোতি – ‘ভীরুত্তানগতেন খো দানি ভিক্খু এতরহি অত্তনা ৰিহরতি, অকরণীযো ময্হ’’’ন্তি.

‘‘যস্মিং, ভিক্খৰে, সমযে ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. অযং ৰুচ্চতি, ভিক্খৰে, ‘ভিক্খু অন্তমকাসি মারং, অপদং ৰধিত্ৰা মারচক্খুং অদস্সনং গতো পাপিমতো তিণ্ণো লোকে ৰিসত্তিক’’’ন্তি.

‘‘যস্মিং, ভিক্খৰে, সমযে ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং উপসম্পজ্জ ৰিহরতি… সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি… সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি… সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. অযং ৰুচ্চতি, ভিক্খৰে, ‘ভিক্খু অন্তমকাসি মারং, অপদং ৰধিত্ৰা মারচক্খুং অদস্সনং গতো পাপিমতো তিণ্ণো লোকে ৰিসত্তিক’’’ন্তি. অট্ঠমং.