৩. নিব্বানসুখসুত্তং

৩৪. একং সমযং আযস্মা সারিপুত্তো রাজগহে ৰিহরতি ৰেল়ুৰনে কলন্দকনিৰাপে. তত্র খো আযস্মা সারিপুত্তো ভিক্খূ আমন্তেসি – ‘‘সুখমিদং, আৰুসো, নিব্বানং. সুখমিদং, আৰুসো, নিব্বান’’ন্তি. এৰং ৰুত্তে আযস্মা উদাযী আযস্মন্তং সারিপুত্তং এতদৰোচ – ‘‘কিং পনেত্থ, আৰুসো সারিপুত্ত, সুখং যদেত্থ নত্থি ৰেদযিত’’ন্তি? ‘‘এতদেৰ খ্ৰেত্থ, আৰুসো, সুখং যদেত্থ নত্থি ৰেদযিতং. পঞ্চিমে, আৰুসো, কামগুণা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, সোতৰিঞ্ঞেয্যা সদ্দা…পে… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা – ইমে খো, আৰুসো, পঞ্চ কামগুণা. যং খো, আৰুসো, ইমে পঞ্চ কামগুণে পটিচ্চ উপ্পজ্জতি সুখং সোমনস্সং, ইদং ৰুচ্চতাৰুসো, কামসুখং.

‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো কামসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে কামসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু ৰিতক্কৰিচারানং ৰূপসমা…পে… দুতিযং ঝানং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো ৰিতক্কসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে ৰিতক্কসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু পীতিযা চ ৰিরাগা…পে… ততিযং ঝানং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো পীতিসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে পীতিসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু সুখস্স চ পহানা…পে… চতুত্থং ঝানং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো উপেক্খাসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে উপেক্খাসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা অনন্তো আকাসোতি আকাসানঞ্চাযতনং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো রূপসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে রূপসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো আকাসানঞ্চাযতনসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে আকাসানঞ্চাযতনসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু সব্বসো ৰিঞ্ঞাণঞ্চাযতনং সমতিক্কম্ম, নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো ৰিঞ্ঞাণঞ্চাযতনসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে ৰিঞ্ঞাণঞ্চাযতনসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো আকিঞ্চঞ্ঞাযতনসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে আকিঞ্চঞ্ঞাযতনসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বান’’ন্তি. ততিযং.