১. তিঠানসুত্তং

২১. ‘‘তীহি, ভিক্খৰে, ঠানেহি উত্তরকুরুকা মনুস্সা দেৰে চ তাৰতিংসে অধিগ্গণ্হন্তি জম্বুদীপকে চ মনুস্সে. কতমেহি তীহি? অমমা, অপরিগ্গহা, নিযতাযুকা, ৰিসেসগুণা [ৰিসেসভুনো (সী. স্যা. পী.)] – ইমেহি খো, ভিক্খৰে, তীহি ঠানেহি উত্তরকুরুকা মনুস্সা দেৰে চ তাৰতিংসে অধিগ্গণ্হন্তি জম্বুদীপকে চ মনুস্সে.

‘‘তীহি, ভিক্খৰে, ঠানেহি দেৰা তাৰতিংসা উত্তরকুরুকে চ মনুস্সে অধিগ্গণ্হন্তি জম্বুদীপকে চ মনুস্সে. কতমেহি তীহি? দিব্বেন আযুনা, দিব্বেন ৰণ্ণেন, দিব্বেন সুখেন – ইমেহি খো, ভিক্খৰে, তীহি ঠানেহি দেৰা তাৰতিংসা উত্তরকুরুকে চ মনুস্সে অধিগ্গণ্হন্তি জম্বুদীপকে চ মনুস্সে.

[কথা. ২৭১] ‘‘তীহি, ভিক্খৰে, ঠানেহি জম্বুদীপকা মনুস্সা উত্তরকুরুকে চ মনুস্সে অধিগ্গণ্হন্তি দেৰে চ তাৰতিংসে. কতমেহি তীহি? সূরা, সতিমন্তো, ইধ ব্রহ্মচরিযৰাসো – ইমেহি খো, ভিক্খৰে, তীহি ঠানেহি জম্বুদীপকা মনুস্সা উত্তরকুরুকে চ মনুস্সে অধিগ্গণ্হন্তি দেৰে চ তাৰতিংসে’’তি. পঠমং.