৯. পরিসাসুত্তং

৬৯. ‘‘অট্ঠিমা, ভিক্খৰে, পরিসা. কতমা অট্ঠ? খত্তিযপরিসা, ব্রাহ্মণপরিসা, গহপতিপরিসা, সমণপরিসা, চাতুমহারাজিকপরিসা, তাৰতিংসপরিসা, মারপরিসা, ব্রহ্মপরিসা. অভিজানামি খো পনাহং, ভিক্খৰে, অনেকসতং খত্তিযপরিসং উপসঙ্কমিতা. তত্রপি মযা সন্নিসিন্নপুব্বঞ্চেৰ সল্লপিতপুব্বঞ্চ সাকচ্ছা চ সমাপন্নপুব্বা. তত্থ যাদিসকো তেসং ৰণ্ণো হোতি তাদিসকো ময্হং ৰণ্ণো হোতি, যাদিসকো তেসং সরো হোতি তাদিসকো ময্হং সরো হোতি. ধম্মিযা চ কথায সন্দস্সেমি সমাদপেমি সমুত্তেজেমি সম্পহংসেমি. ভাসমানঞ্চ মং ন জানন্তি – ‘কো নু খো অযং ভাসতি দেৰো ৰা মনুস্সো ৰা’তি. ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা অন্তরধাযামি. অন্তরহিতঞ্চ মং ন জানন্তি – ‘কো নু খো অযং অন্তরহিতো দেৰো ৰা মনুস্সো ৰা’’’তি.

‘‘অভিজানামি খো পনাহং, ভিক্খৰে, অনেকসতং ব্রাহ্মণপরিসং…পে… গহপতিপরিসং… সমণপরিসং… চাতুমহারাজিকপরিসং… তাৰতিংসপরিসং… মারপরিসং… ব্রহ্মপরিসং উপসঙ্কমিতা. তত্রপি মযা সন্নিসিন্নপুব্বঞ্চেৰ সল্লপিতপুব্বঞ্চ সাকচ্ছা চ সমাপন্নপুব্বা. তত্থ যাদিসকো তেসং ৰণ্ণো হোতি তাদিসকো ময্হং ৰণ্ণো হোতি, যাদিসকো তেসং সরো হোতি তাদিসকো ময্হং সরো হোতি. ধম্মিযা চ কথায সন্দস্সেমি সমাদপেমি সমুত্তেজেমি সম্পহংসেমি. ভাসমানঞ্চ মং ন জানন্তি – ‘কো নু খো অযং ভাসতি দেৰো ৰা মনুস্সো ৰা’তি. ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা অন্তরধাযামি. অন্তরহিতঞ্চ মং ন জানন্তি – ‘কো নু খো অযং অন্তরহিতো দেৰো ৰা মনুস্সো ৰা’তি. ইমা খো, ভিক্খৰে, অট্ঠ পরিসা’’তি. নৰমং.