৮. নকুলমাতাসুত্তং

৪৮. একং সমযং ভগৰা ভগ্গেসু ৰিহরতি সুংসুমারগিরে [সুংসুমারগিরে (সী. স্যা. পী.)] ভেসকল়াৰনে মিগদাযে. অথ খো নকুলমাতা গহপতানী যেন ভগৰা তেনুপসঙ্কমি; উপসঙ্কমিত্ৰা…পে…. একমন্তং নিসিন্নং খো নকুলমাতরং গহপতানিং ভগৰা এতদৰোচ –

‘‘অট্ঠহি খো, নকুলমাতে, ধম্মেহি সমন্নাগতো মাতুগামো কাযস্স ভেদা পরং মরণা মনাপকাযিকানং দেৰানং সহব্যতং উপপজ্জতি. কতমেহি অট্ঠহি? ইধ, নকুলমাতে, মাতুগামো যস্স মাতাপিতরো ভত্তুনো দেন্তি অত্থকামা হিতেসিনো অনুকম্পকা অনুকম্পং উপাদায তস্স হোতি পুব্বুট্ঠাযিনী পচ্ছানিপাতিনী কিঙ্কারপটিস্সাৰিনী মনাপচারিনী পিযৰাদিনী.

‘‘যে তে ভত্তু গরুনো হোন্তি – মাতাতি ৰা পিতাতি ৰা সমণব্রাহ্মণাতি ৰা – তে সক্করোতি গরুং করোতি মানেতি পূজেতি, অব্ভাগতে চ আসনোদকেন পটিপূজেতি.

‘‘যে তে ভত্তু অব্ভন্তরা কম্মন্তা – উণ্ণাতি ৰা কপ্পাসাতি ৰা – তত্থ দক্খা হোতি অনলসা তত্রুপাযায ৰীমংসায সমন্নাগতা অলং কাতুং অলং সংৰিধাতুং.

‘‘যো সো ভত্তু অব্ভন্তরো অন্তোজনো – দাসাতি ৰা পেস্সাতি ৰা কম্মকরাতি ৰা – তেসং কতঞ্চ কততো জানাতি অকতঞ্চ অকততো জানাতি, গিলানকানঞ্চ বলাবলং জানাতি খাদনীযং ভোজনীযঞ্চস্স পচ্চংসেন সংৰিভজতি.

‘‘যং ভত্তা আহরতি ধনং ৰা ধঞ্ঞং ৰা রজতং ৰা জাতরূপং ৰা তং আরক্খেন গুত্তিযা সম্পাদেতি, তত্থ চ হোতি অধুত্তী অথেনী অসোণ্ডী অৰিনাসিকা.

‘‘উপাসিকা খো পন হোতি বুদ্ধং সরণং গতা ধম্মং সরণং গতা সঙ্ঘং সরণং গতা.

‘‘সীলৰতী খো পন হোতি – পাণাতিপাতা পটিৰিরতা…পে… সুরামেরযমজ্জপমাদট্ঠানা পটিৰিরতা…পে….

‘‘চাগৰতী খো পন হোতি ৰিগতমলমচ্ছেরেন চেতসা অগারং অজ্ঝাৰসতি মুত্তচাগা পযতপাণিনী ৰোস্সগ্গরতা যাচযোগা দানসংৰিভাগরতা.

‘‘ইমেহি খো, নকুলমাতে, অট্ঠহি ধম্মেহি সমন্নাগতো মাতুগামো কাযস্স ভেদা পরং মরণা মনাপকাযিকানং দেৰানং সহব্যতং উপপজ্জতী’’তি.

‘‘যো নং ভরতি সব্বদা, নিচ্চং আতাপি উস্সুকো;

তং সব্বকামদং পোসং, ভত্তারং নাতিমঞ্ঞতি.

‘‘ন চাপি সোত্থি ভত্তারং, ইস্সাৰাদেন রোসযে;

ভত্তু চ গরুনো সব্বে, পটিপূজেতি পণ্ডিতা.

‘‘উট্ঠাহিকা অনলসা, সঙ্গহিতপরিজ্জনা;

ভত্তু মনাপং চরতি, সম্ভতং অনুরক্খতি.

‘‘যা এৰং ৰত্ততি নারী, ভত্তু ছন্দৰসানুগা;

মনাপা নাম তে [মনাপকাযিকা (সী.)] দেৰা, যত্থ সা উপপজ্জতী’’তি. অট্ঠমং;