৯. পঠমইধলোকিকসুত্তং

৪৯. একং সমযং ভগৰা সাৰত্থিযং ৰিহরতি পুব্বারামে মিগারমাতুপাসাদে. অথ খো ৰিসাখা মিগারমাতা যেন ভগৰা তেনুপসঙ্কমি…পে…. একমন্তং নিসিন্নং খো ৰিসাখং মিগারমাতরং ভগৰা এতদৰোচ –

‘‘চতূহি খো, ৰিসাখে, ধম্মেহি সমন্নাগতো মাতুগামো ইধলোকৰিজযায পটিপন্নো হোতি, অযংস লোকো আরদ্ধো হোতি. কতমেহি চতূহি? ইধ, ৰিসাখে, মাতুগামো সুসংৰিহিতকম্মন্তো হোতি, সঙ্গহিতপরিজনো, ভত্তু মনাপং চরতি, সম্ভতং অনুরক্খতি.

‘‘কথঞ্চ, ৰিসাখে, মাতুগামো সুসংৰিহিতকম্মন্তো হোতি? ইধ, ৰিসাখে, মাতুগামো যে তে ভত্তু অব্ভন্তরা কম্মন্তা – উণ্ণাতি ৰা কপ্পাসাতি ৰা – তত্থ দক্খা হোতি অনলসা তত্রুপাযায ৰীমংসায সমন্নাগতা অলং কাতুং অলং সংৰিধাতুং. এৰং খো, ৰিসাখে, মাতুগামো সুসংৰিহিতকম্মন্তো হোতি.

‘‘কথঞ্চ, ৰিসাখে, মাতুগামো সঙ্গহিতপরিজনো হোতি? ইধ, ৰিসাখে, মাতুগামো যো সো ভত্তু অব্ভন্তরো অন্তোজনো – দাসাতি ৰা পেস্সাতি ৰা কম্মকরাতি ৰা – তেসং কতঞ্চ কততো জানাতি অকতঞ্চ অকততো জানাতি, গিলানকানঞ্চ বলাবলং জানাতি খাদনীযং ভোজনীযঞ্চস্স পচ্চংসেন সংৰিভজতি. এৰং খো, ৰিসাখে, মাতুগামো সঙ্গহিতপরিজনো হোতি.

‘‘কথঞ্চ, ৰিসাখে, মাতুগামো ভত্তু মনাপং চরতি? ইধ, ৰিসাখে, মাতুগামো যং ভত্তু অমনাপসঙ্খাতং তং জীৰিতহেতুপি ন অজ্ঝাচরতি. এৰং খো, ৰিসাখে, মাতুগামো ভত্তু মনাপং চরতি.

‘‘কথঞ্চ, ৰিসাখে, মাতুগামো সম্ভতং অনুরক্খতি? ইধ, ৰিসাখে, মাতুগামো যং ভত্তা আহরতি ধনং ৰা ধঞ্ঞং ৰা রজতং ৰা জাতরূপং ৰা তং আরক্খেন গুত্তিযা সম্পাদেতি, তত্থ চ হোতি অধুত্তী অথেনী অসোণ্ডী অৰিনাসিকা. এৰং খো, ৰিসাখে, মাতুগামো সম্ভতং অনুরক্খতি. ইমেহি খো, ৰিসাখে, চতূহি ধম্মেহি সমন্নাগতো মাতুগামো ইধলোকৰিজযায পটিপন্নো হোতি, অযংস লোকো আরদ্ধো হোতি.

‘‘চতূহি খো, ৰিসাখে, ধম্মেহি সমন্নাগতো মাতুগামো পরলোকৰিজযায পটিপন্নো হোতি, পরলোকো আরদ্ধো হোতি. কতমেহি চতূহি? ইধ, ৰিসাখে, মাতুগামো সদ্ধাসম্পন্নো হোতি, সীলসম্পন্নো হোতি, চাগসম্পন্নো হোতি, পঞ্ঞাসম্পন্নো হোতি.

‘‘কথঞ্চ, ৰিসাখে, মাতুগামো সদ্ধাসম্পন্নো হোতি? ইধ, ৰিসাখে, মাতুগামো সদ্ধো হোতি, সদ্দহতি তথাগতস্স বোধিং – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’তি. এৰং খো, ৰিসাখে, মাতুগামো সদ্ধাসম্পন্নো হোতি.

‘‘কথঞ্চ, ৰিসাখে, মাতুগামো সীলসম্পন্নো হোতি? ইধ, ৰিসাখে, মাতুগামো পাণাতিপাতা পটিৰিরতো হোতি…পে… সুরামেরযমজ্জপমাদট্ঠানা পটিৰিরতো হোতি. এৰং খো, ৰিসাখে, মাতুগামো সীলসম্পন্নো হোতি.

‘‘কথঞ্চ, ৰিসাখে, মাতুগামো চাগসম্পন্নো হোতি? ইধ, ৰিসাখে, মাতুগামো ৰিগতমলমচ্ছেরেন চেতসা অগারং অজ্ঝাৰসতি মুত্তচাগা পযতপাণিনী ৰোস্সগ্গরতা যাচযোগা দানসংৰিভাগরতা. এৰং খো, ৰিসাখে, মাতুগামো চাগসম্পন্নো হোতি.

‘‘কথঞ্চ, ৰিসাখে, মাতুগামো পঞ্ঞাসম্পন্নো হোতি? ইধ, ৰিসাখে, মাতুগামো পঞ্ঞৰা হোতি…পে… এৰং খো, ৰিসাখে, মাতুগামো পঞ্ঞাসম্পন্নো হোতি. ইমেহি খো, ৰিসাখে, চতূহি ধম্মেহি সমন্নাগতো মাতুগামো পরলোকৰিজযায পটিপন্নো হোতি, পরলোকো আরদ্ধো হোতী’’তি.

‘‘সুসংৰিহিতকম্মন্তা, সঙ্গহিতপরিজ্জনা;

ভত্তু মনাপং চরতি, সম্ভতং অনুরক্খতি.

‘‘সদ্ধা সীলেন সম্পন্না, ৰদঞ্ঞূ ৰীতমচ্ছরা;

নিচ্চং মগ্গং ৰিসোধেতি, সোত্থানং সম্পরাযিকং.

‘‘ইচ্চেতে অট্ঠ ধম্মা চ, যস্সা ৰিজ্জন্তি নারিযা;

তম্পি সীলৰতিং আহু, ধম্মট্ঠং সচ্চৰাদিনিং.

‘‘সোল়সাকারসম্পন্না, অট্ঠঙ্গসুসমাগতা;

তাদিসী সীলৰতী উপাসিকা;

উপপজ্জতি দেৰলোকং মনাপ’’ন্তি. নৰমং;