১. সঙ্খিত্তূপোসথসুত্তং

৪১. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘অট্ঠঙ্গসমন্নাগতো, ভিক্খৰে, উপোসথো উপৰুত্থো মহপ্ফলো হোতি মহানিসংসো মহাজুতিকো মহাৰিপ্ফারো. কথং উপৰুত্থো চ, ভিক্খৰে, অট্ঠঙ্গসমন্নাগতো উপোসথো মহপ্ফলো হোতি মহানিসংসো মহাজুতিকো মহাৰিপ্ফারো? ইধ, ভিক্খৰে, অরিযসাৰকো ইতি পটিসঞ্চিক্খতি – ‘যাৰজীৰং অরহন্তো পাণাতিপাতং পহায পাণাতিপাতা পটিৰিরতা নিহিতদণ্ডা নিহিতসত্থা লজ্জী দযাপন্না, সব্বপাণভূতহিতানুকম্পিনো ৰিহরন্তি. অহং পজ্জ ইমঞ্চ রত্তিং ইমঞ্চ দিৰসং পাণাতিপাতং পহায পাণাতিপাতা পটিৰিরতো নিহিতদণ্ডো নিহিতসত্থো লজ্জী দযাপন্নো, সব্বপাণভূতহিতানুকম্পী ৰিহরামি. ইমিনাপঙ্গেন [ইমিনাপি অঙ্গেন (সী. পী.) অ. নি. ৩.৭১] অরহতং অনুকরোমি, উপোসথো চ মে উপৰুত্থো ভৰিস্সতী’তি. ইমিনা পঠমেন অঙ্গেন সমন্নাগতো হোতি.

‘‘‘যাৰজীৰং অরহন্তো অদিন্নাদানং পহায অদিন্নাদানা পটিৰিরতা দিন্নাদাযী দিন্নপাটিকঙ্খী, অথেনেন সুচিভূতেন অত্তনা ৰিহরন্তি. অহং পজ্জ ইমঞ্চ রত্তিং ইমঞ্চ দিৰসং অদিন্নাদানং পহায অদিন্নাদানা পটিৰিরতো দিন্নাদাযী দিন্নপাটিকঙ্খী, অথেনেন সুচিভূতেন অত্তনা ৰিহরামি. ইমিনাপঙ্গেন অরহতং অনুকরোমি, উপোসথো চ মে উপৰুত্থো ভৰিস্সতী’তি. ইমিনা দুতিযেন অঙ্গেন সমন্নাগতো হোতি.

‘‘‘যাৰজীৰং অরহন্তো অব্রহ্মচরিযং পহায ব্রহ্মচারিনো আরাচারিনো ৰিরতা মেথুনা গামধম্মা. অহং পজ্জ ইমঞ্চ রত্তিং ইমঞ্চ দিৰসং অব্রহ্মচরিযং পহায ব্রহ্মচারী আরাচারী [অনাচারী (ক.)] ৰিরতো মেথুনা গামধম্মা. ইমিনাপঙ্গেন অরহতং অনুকরোমি, উপোসথো চ মে উপৰুত্থো ভৰিস্সতী’তি. ইমিনা ততিযেন অঙ্গেন সমন্নাগতো হোতি.

‘‘‘যাৰজীৰং অরহন্তো মুসাৰাদং পহায মুসাৰাদা পটিৰিরতা সচ্চৰাদিনো সচ্চসন্ধা থেতা পচ্চযিকা অৰিসংৰাদকো লোকস্স. অহং পজ্জ ইমঞ্চ রত্তিং ইমঞ্চ দিৰসং মুসাৰাদং পহায মুসাৰাদা পটিৰিরতো সচ্চৰাদী সচ্চসন্ধো থেতো পচ্চযিকো অৰিসংৰাদকো লোকস্স. ইমিনাপঙ্গেন অরহতং অনুকরোমি, উপোসথো চ মে উপৰুত্থো ভৰিস্সতী’তি. ইমিনা চতুত্থেন অঙ্গেন সমন্নাগতো হোতি.

‘‘‘যাৰজীৰং অরহন্তো সুরামেরযমজ্জপমাদট্ঠানং পহায সুরামেরযমজ্জপমাদট্ঠানা পটিৰিরতা. অহং পজ্জ ইমঞ্চ রত্তিং ইমঞ্চ দিৰসং সুরামেরযমজ্জপমাদট্ঠানং পহায সুরামেরযমজ্জপমাদট্ঠানা পটিৰিরতো. ইমিনাপঙ্গেন অরহতং অনুকরোমি, উপোসথো চ মে উপৰুত্থো ভৰিস্সতী’তি. ইমিনা পঞ্চমেন অঙ্গেন সমন্নাগতো হোতি.

‘‘‘যাৰজীৰং অরহন্তো একভত্তিকা রত্তূপরতা ৰিরতা ৰিকালভোজনা. অহং পজ্জ ইমঞ্চ রত্তিং ইমঞ্চ দিৰসং একভত্তিকো রত্তূপরতো ৰিরতো ৰিকালভোজনা. ইমিনাপঙ্গেন অরহতং অনুকরোমি, উপোসথো চ মে উপৰুত্থো ভৰিস্সতী’তি. ইমিনা ছট্ঠেন অঙ্গেন সমন্নাগতো হোতি.

‘‘‘যাৰজীৰং অরহন্তো নচ্চগীতৰাদিতৰিসূকদস্সনমালাগন্ধৰিলেপনধারণমণ্ডনৰিভূসনট্ঠানং পহায নচ্চগীতৰাদিতৰিসূকদস্সনমালাগন্ধৰিলেপনধারণমণ্ডনৰিভূসনট্ঠানা পটিৰিরতা. অহং পজ্জ ইমঞ্চ রত্তিং ইমঞ্চ দিৰসং নচ্চগীতৰাদিতৰিসূকদস্সনমালাগন্ধৰিলেপনধারণমণ্ডনৰিভূসনট্ঠানং পহায নচ্চগীতৰাদিতৰিসূকদস্সনমালাগন্ধৰিলেপনধারণমণ্ডনৰিভূসনট্ঠানা পটিৰিরতো. ইমিনাপঙ্গেন অরহতং অনুকরোমি, উপোসথো চ মে উপৰুত্থো ভৰিস্সতী’তি. ইমিনা সত্তমেন অঙ্গেন সমন্নাগতো হোতি.

‘‘‘যাৰজীৰং অরহন্তো উচ্চাসযনমহাসযনং পহায উচ্চাসযনমহাসযনা পটিৰিরতা নীচসেয্যং কপ্পেন্তি – মঞ্চকে ৰা তিণসন্থারকে ৰা. অহং পজ্জ ইমঞ্চ রত্তিং ইমঞ্চ দিৰসং উচ্চাসযনমহাসযনং পহায উচ্চাসযনমহাসযনা পটিৰিরতো নীচসেয্যং কপ্পেমি – মঞ্চকে ৰা তিণসন্থারকে ৰা. ইমিনাপঙ্গেন অরহতং অনুকরোমি, উপোসথো চ মে উপৰুত্থো ভৰিস্সতী’তি. ইমিনা অট্ঠমেন অঙ্গেন সমন্নাগতো হোতি. এৰং উপৰুত্থো খো, ভিক্খৰে, অট্ঠঙ্গসমন্নাগতো উপোসথো মহপ্ফলো হোতি মহানিসংসো মহাজুতিকো মহাৰিপ্ফারো’’তি. পঠমং.