৫. মহানামসুত্তং

২৫. একং সমযং ভগৰা সক্কেসু ৰিহরতি কপিলৰত্থুস্মিং নিগ্রোধারামে. অথ খো মহানামো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো মহানামো সক্কো ভগৰন্তং এতদৰোচ – ‘‘কিত্তাৰতা নু খো, ভন্তে, উপাসকো হোতী’’তি? ‘‘যতো খো, মহানাম, বুদ্ধং সরণং গতো হোতি, ধম্মং সরণং গতো হোতি, সঙ্ঘং সরণং গতো হোতি; এত্তাৰতা খো, মহানাম, উপাসকো হোতী’’তি.

‘‘কিত্তাৰতা পন, ভন্তে, উপাসকো সীলৰা হোতী’’তি? ‘‘যতো খো, মহানাম, উপাসকো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, সুরামেরযমজ্জপমাদট্ঠানা পটিৰিরতো হোতি; এত্তাৰতা খো, মহানাম, উপাসকো সীলৰা হোতী’’তি.

‘‘কিত্তাৰতা পন, ভন্তে, উপাসকো অত্তহিতায পটিপন্নো হোতি, নো পরহিতাযা’’তি? ‘‘যতো খো, মহানাম, উপাসকো অত্তনাৰ সদ্ধাসম্পন্নো হোতি, নো পরং সদ্ধাসম্পদায সমাদপেতি [সমাদাপেতি (?)]; অত্তনাৰ সীলসম্পন্নো হোতি, নো পরং সীলসম্পদায সমাদপেতি; অত্তনাৰ চাগসম্পন্নো হোতি, নো পরং চাগসম্পদায সমাদপেতি; অত্তনাৰ ভিক্খূনং দস্সনকামো হোতি, নো পরং ভিক্খূনং দস্সনে সমাদপেতি; অত্তনাৰ সদ্ধম্মং সোতুকামো হোতি, নো পরং সদ্ধম্মস্সৰনে সমাদপেতি; অত্তনাৰ সুতানং ধম্মানং ধারণজাতিকো হোতি, নো পরং ধম্মধারণায সমাদপেতি; অত্তনাৰ সুতানং ধম্মানং অত্থূপপরিক্খিতা হোতি, নো পরং অত্থূপপরিক্খায সমাদপেতি; অত্তনাৰ অত্থমঞ্ঞায ধম্মমঞ্ঞায ধম্মানুধম্মপ্পটিপন্নো হোতি, নো পরং ধম্মানুধম্মপ্পটিপত্তিযা সমাদপেতি. এত্তাৰতা খো, মহানাম, উপাসকো অত্তহিতায পটিপন্নো হোতি, নো পরহিতাযা’’তি.

‘‘কিত্তাৰতা পন, ভন্তে, উপাসকো অত্তহিতায চ পটিপন্নো হোতি পরহিতায চা’’তি? ‘‘যতো খো, মহানাম, উপাসকো অত্তনা চ সদ্ধাসম্পন্নো হোতি, পরঞ্চ সদ্ধাসম্পদায সমাদপেতি; অত্তনা চ সীলসম্পন্নো হোতি, পরঞ্চ সীলসম্পদায সমাদপেতি; অত্তনা চ চাগসম্পন্নো হোতি, পরঞ্চ চাগসম্পদায সমাদপেতি; অত্তনা চ ভিক্খূনং দস্সনকামো হোতি, পরঞ্চ ভিক্খূনং দস্সনে সমাদপেতি; অত্তনা চ সদ্ধম্মং সোতুকামো হোতি, পরঞ্চ সদ্ধম্মস্সৰনে সমাদপেতি; অত্তনা চ সুতানং ধম্মানং ধারণজাতিকো হোতি, পরঞ্চ ধম্মধারণায সমাদপেতি; অত্তনা চ সুতানং ধম্মানং অত্থূপপরিক্খিতা হোতি, পরঞ্চ অত্থূপপরিক্খায সমাদপেতি, অত্তনা চ অত্থমঞ্ঞায ধম্মমঞ্ঞায ধম্মানুধম্মপ্পটিপন্নো হোতি, পরঞ্চ ধম্মানুধম্মপ্পটিপত্তিযা সমাদপেতি. এত্তাৰতা খো, মহানাম, উপাসকো অত্তহিতায চ পটিপন্নো হোতি পরহিতায চা’’তি. পঞ্চমং.