৬. জীৰকসুত্তং

২৬. একং সমযং ভগৰা রাজগহে ৰিহরতি জীৰকম্বৰনে. অথ খো জীৰকো কোমারভচ্চো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো জীৰকো কোমারভচ্চো ভগৰন্তং এতদৰোচ – ‘‘কিত্তাৰতা নু খো, ভন্তে, উপাসকো হোতী’’তি? ‘‘যতো খো, জীৰক, বুদ্ধং সরণং গতো হোতি, ধম্মং সরণং গতো হোতি, সঙ্ঘং সরণং গতো হোতি; এত্তাৰতা খো জীৰক, উপাসকো হোতী’’তি.

‘‘কিত্তাৰতা পন, ভন্তে, উপাসকো সীলৰা হোতী’’তি? ‘‘যতো খো, জীৰক, উপাসকো পাণাতিপাতা পটিৰিরতো হোতি…পে… সুরামেরযমজ্জপমাদট্ঠানা পটিৰিরতো হোতি; এত্তাৰতা খো, জীৰক, উপাসকো সীলৰা হোতী’’তি.

‘‘কিত্তাৰতা পন, ভন্তে, উপাসকো অত্তহিতায পটিপন্নো হোতি, নো পরহিতাযা’’তি? ‘‘যতো খো, জীৰক, উপাসকো অত্তনাৰ সদ্ধাসম্পন্নো হোতি, নো পরং সদ্ধাসম্পদায সমাদপেতি…পে… অত্তনাৰ অত্থমঞ্ঞায ধম্মমঞ্ঞায ধম্মানুধম্মপ্পটিপন্নো হোতি, নো পরং ধম্মানুধম্মপ্পটিপত্তিযা সমাদপেতি. এত্তাৰতা খো, জীৰক, উপাসকো অত্তহিতায পটিপন্নো হোতি, নো পরহিতাযা’’তি.

‘‘কিত্তাৰতা পন, ভন্তে, উপাসকো অত্তহিতায চ পটিপন্নো হোতি পরহিতায চা’’তি? ‘‘যতো খো, জীৰক, উপাসকো অত্তনা চ সদ্ধাসম্পন্নো হোতি, পরঞ্চ সদ্ধাসম্পদায সমাদপেতি; অত্তনা চ সীলসম্পন্নো হোতি, পরঞ্চ সীলসম্পদায সমাদপেতি; অত্তনা চ চাগসম্পন্নো হোতি, পরঞ্চ চাগসম্পদায সমাদপেতি; অত্তনা চ ভিক্খূনং দস্সনকামো হোতি, পরঞ্চ ভিক্খূনং দস্সনে সমাদপেতি; অত্তনা চ সদ্ধম্মং সোতুকামো হোতি, পরঞ্চ সদ্ধম্মস্সৰনে সমাদপেতি; অত্তনা চ সুতানং ধম্মানং ধারণজাতিকো হোতি, পরঞ্চ ধম্মধারণায সমাদপেতি; অত্তনা চ সুতানং ধম্মানং অত্থূপপরিক্খিতা হোতি, পরঞ্চ অত্থূপপরিক্খায সমাদপেতি; অত্তনা চ অত্থমঞ্ঞায ধম্মমঞ্ঞায ধম্মানুধম্মপ্পটিপন্নো হোতি, পরঞ্চ ধম্মানুধম্মপ্পটিপত্তিযা সমাদপেতি. এত্তাৰতা খো, জীৰক, উপাসকো অত্তহিতায চ পটিপন্নো হোতি পরহিতায চা’’তি. ছট্ঠং.