১০. ভরিযাসুত্তং

৬৩. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায যেন অনাথপিণ্ডিকস্স গহপতিস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. তেন খো পন সমযেন অনাথপিণ্ডিকস্স গহপতিস্স নিৰেসনে মনুস্সা উচ্চাসদ্দা মহাসদ্দা হোন্তি. অথ খো অনাথপিণ্ডিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৰা এতদৰোচ –

‘‘কিং নু তে, গহপতি, নিৰেসনে মনুস্সা উচ্চাসদ্দা মহাসদ্দা কেৰট্টা মঞ্ঞে মচ্ছৰিলোপে’’তি? ‘‘অযং, ভন্তে, সুজাতা ঘরসুণ্হা অড্ঢকুলা আনীতা. সা নেৰ সস্সুং আদিযতি, ন সসুরং আদিযতি, ন সামিকং আদিযতি, ভগৰন্তম্পি ন সক্করোতি ন গরুং করোতি ন মানেতি ন পূজেতী’’তি.

অথ খো ভগৰা সুজাতং ঘরসুণ্হং আমন্তেসি – ‘‘এহি, সুজাতে’’তি! ‘‘এৰং, ভন্তে’’তি খো সুজাতা ঘরসুণ্হা ভগৰতো পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো সুজাতং ঘরসুণ্হং ভগৰা এতদৰোচ –

‘‘সত্ত খো ইমা, সুজাতে, পুরিসস্স ভরিযাযো. কতমা সত্ত? ৰধকসমা, চোরীসমা, অয্যসমা, মাতাসমা, ভগিনীসমা, সখীসমা, দাসীসমা. ইমা খো, সুজাতে, সত্ত পুরিসস্স ভরিযাযো. তাসং ত্ৰং কতমা’’তি? ‘‘ন খো অহং [নাহং (স্যা.)], ভন্তে, ইমস্স ভগৰতা সংখিত্তেন ভাসিতস্স ৰিত্থারেন অত্থং আজানামি. সাধু মে, ভন্তে, ভগৰা তথা ধম্মং দেসেতু যথাহং ইমস্স ভগৰতা সংখিত্তেন ভাসিতস্স ৰিত্থারেন অত্থং জানেয্য’’ন্তি. ‘‘তেন হি, সুজাতে, সুণাহি, সাধুকং মনসি করোহি; ভাসিস্সামী’’তি. ‘‘এৰং, ভন্তে’’তি খো সুজাতা ঘরসুণ্হা ভগৰতো পচ্চস্সোসি. ভগৰা এতদৰোচ –

‘‘পদুট্ঠচিত্তা অহিতানুকম্পিনী,

অঞ্ঞেসু রত্তা অতিমঞ্ঞতে পতিং;

ধনেন কীতস্স ৰধায উস্সুকা,

যা এৰরূপা পুরিসস্স ভরিযা;

‘ৰধা চ ভরিযা’তি চ সা পৰুচ্চতি.

‘‘যং ইত্থিযা ৰিন্দতি সামিকো ধনং,

সিপ্পং ৰণিজ্জঞ্চ কসিং অধিট্ঠহং;

অপ্পম্পি তস্স অপহাতুমিচ্ছতি,

যা এৰরূপা পুরিসস্স ভরিযা;

‘চোরী চ ভরিযা’তি চ সা পৰুচ্চতি.

‘‘অকম্মকামা অলসা মহগ্ঘসা,

ফরুসা চ চণ্ডী দুরুত্তৰাদিনী;

উট্ঠাযকানং অভিভুয্য ৰত্ততি,

যা এৰরূপা পুরিসস্স ভরিযা;

‘অয্যা চ ভরিযা’তি চ সা পৰুচ্চতি.

‘‘যা সব্বদা হোতি হিতানুকম্পিনী,

মাতাৰ পুত্তং অনুরক্খতে পতিং;

ততো ধনং সম্ভতমস্স রক্খতি,

যা এৰরূপা পুরিসস্স ভরিযা;

‘মাতা চ ভরিযা’তি চ সা পৰুচ্চতি.

‘‘যথাপি জেট্ঠা ভগিনী কনিট্ঠকা [কণিট্ঠা (সী.), কনিট্ঠা (স্যা.)],

সগারৰা হোতি সকম্হি সামিকে;

হিরীমনা ভত্তুৰসানুৰত্তিনী,

যা এৰরূপা পুরিসস্স ভরিযা;‘ভগিনী চ ভরিযা’তি চ সা পৰুচ্চতি.

‘‘যাচীধ দিস্ৰান পতিং পমোদতি,

সখী সখারংৰ চিরস্সমাগতং;

কোলেয্যকা সীলৰতী পতিব্বতা,

যা এৰরূপা পুরিসস্স ভরিযা;

‘সখী চ ভরিযা’তি চ সা পৰুচ্চতি.

‘‘অক্কুদ্ধসন্তা ৰধদণ্ডতজ্জিতা,

অদুট্ঠচিত্তা পতিনো তিতিক্খতি;

অক্কোধনা ভত্তুৰসানুৰত্তিনী,

যা এৰরূপা পুরিসস্স ভরিযা;

‘দাসী চ ভরিযা’তি চ সা পৰুচ্চতি.

‘‘যাচীধ ভরিযা ৰধকাতি ৰুচ্চতি,

‘চোরী চ অয্যা’তি চ যা পৰুচ্চতি;

দুস্সীলরূপা ফরুসা অনাদরা,

কাযস্স ভেদা নিরযং ৰজন্তি তা.

‘‘যাচীধ মাতা ভগিনী সখীতি চ,

‘দাসী চ ভরিযা’তি চ সা পৰুচ্চতি;

সীলে ঠিতত্তা চিররত্তসংৰুতা,

কাযস্স ভেদা সুগতিং ৰজন্তি তা’’তি.

‘‘ইমা খো, সুজাতে, সত্ত পুরিসস্স ভরিযাযো. তাসং ত্ৰং কতমা’’তি? ‘‘অজ্জতগ্গে মং, ভন্তে, ভগৰা দাসীসমং সামিকস্স ভরিযং ধারেতূ’’তি. দসমং.