১. অব্যাকতসুত্তং

৫৪. অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু কো পচ্চযো যেন সুতৰতো অরিযসাৰকস্স ৰিচিকিচ্ছা নুপ্পজ্জতি অব্যাকতৰত্থূসূ’’তি?

‘‘দিট্ঠিনিরোধা খো, ভিক্খু, সুতৰতো অরিযসাৰকস্স ৰিচিকিচ্ছা নুপ্পজ্জতি অব্যাকতৰত্থূসু. ‘হোতি তথাগতো পরং মরণা’তি খো, ভিক্খু, দিট্ঠিগতমেতং; ‘ন হোতি তথাগতো পরং মরণা’তি খো, ভিক্খু, দিট্ঠিগতমেতং; ‘হোতি চ ন চ হোতি তথাগতো পরং মরণা’তি খো, ভিক্খু, দিট্ঠিগতমেতং; ‘নেৰ হোতি ন ন হোতি তথাগতো পরং মরণা’তি খো, ভিক্খু, দিট্ঠিগতমেতং. অস্সুতৰা, ভিক্খু, পুথুজ্জনো দিট্ঠিং নপ্পজানাতি, দিট্ঠিসমুদযং নপ্পজানাতি, দিট্ঠিনিরোধং নপ্পজানাতি, দিট্ঠিনিরোধগামিনিং পটিপদং নপ্পজানাতি. তস্স সা দিট্ঠি পৰড্ঢতি, সো ন পরিমুচ্চতি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, ন পরিমুচ্চতি দুক্খস্মাতি ৰদামি.

‘‘সুতৰা চ খো, ভিক্খু, অরিযসাৰকো দিট্ঠিং পজানাতি, দিট্ঠিসমুদযং পজানাতি, দিট্ঠিনিরোধং পজানাতি, দিট্ঠিনিরোধগামিনিং পটিপদং পজানাতি. তস্স সা দিট্ঠি নিরুজ্ঝতি, সো পরিমুচ্চতি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, পরিমুচ্চতি দুক্খস্মাতি ৰদামি. এৰং জানং খো, ভিক্খু, সুতৰা অরিযসাৰকো এৰং পস্সং ‘হোতি তথাগতো পরং মরণা’তিপি ন ব্যাকরোতি; ‘ন হোতি তথাগতো পরং মরণা’তিপি ন ব্যাকরোতি; ‘হোতি চ ন চ হোতি তথাগতো পরং মরণা’তিপি ন ব্যাকরোতি; ‘নেৰ হোতি ন ন হোতি তথাগতো পরং মরণা’তিপি ন ব্যাকরোতি. এৰং জানং খো, ভিক্খু, সুতৰা অরিযসাৰকো এৰং পস্সং এৰং অব্যাকরণধম্মো হোতি অব্যাকতৰত্থূসু. এৰং জানং খো, ভিক্খু, সুতৰা অরিযসাৰকো এৰং পস্সং ন ছম্ভতি, ন কম্পতি, ন ৰেধতি, ন সন্তাসং আপজ্জতি অব্যাকতৰত্থূসু.

‘‘‘হোতি তথাগতো পরং মরণা’তি খো, ভিক্খু, তণ্হাগতমেতং…পে… সঞ্ঞাগতমেতং …পে… মঞ্ঞিতমেতং…পে… পপঞ্চিতমেতং…পে… উপাদানগতমেতং…পে… ‘হোতি তথাগতো পরং মরণা’তি খো, ভিক্খু, ৰিপ্পটিসারো এসো; ‘ন হোতি তথাগতো পরং মরণা’তি খো, ভিক্খু, ৰিপ্পটিসারো এসো; ‘হোতি চ ন চ হোতি তথাগতো পরং মরণা’তি খো, ভিক্খু, ৰিপ্পটিসারো এসো; ‘নেৰ হোতি ন ন হোতি তথাগতো পরং মরণা’তি খো, ভিক্খু, ৰিপ্পটিসারো এসো. অস্সুতৰা, ভিক্খু, পুথুজ্জনো ৰিপ্পটিসারং নপ্পজানাতি, ৰিপ্পটিসারসমুদযং নপ্পজানাতি, ৰিপ্পটিসারনিরোধং নপ্পজানাতি, ৰিপ্পটিসারনিরোধগামিনিং পটিপদং নপ্পজানাতি. তস্স সো ৰিপ্পটিসারো পৰড্ঢতি, সো ন পরিমুচ্চতি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, ন পরিমুচ্চতি দুক্খস্মাতি ৰদামি.

‘‘সুতৰা চ খো, ভিক্খু, অরিযসাৰকো ৰিপ্পটিসারং পজানাতি, ৰিপ্পটিসারসমুদযং পজানাতি, ৰিপ্পটিসারনিরোধং পজানাতি, ৰিপ্পটিসারনিরোধগামিনিং পটিপদং পজানাতি. তস্স সো ৰিপ্পটিসারো নিরুজ্ঝতি, সো পরিমুচ্চতি জাতিযা…পে… দুক্খস্মাতি ৰদামি. এৰং জানং খো, ভিক্খু, সুতৰা অরিযসাৰকো এৰং পস্সং ‘হোতি তথাগতো পরং মরণা’তিপি ন ব্যাকরোতি…পে… ‘নেৰ হোতি ন ন হোতি তথাগতো পরং মরণা’তিপি ন ব্যাকরোতি. এৰং জানং খো, ভিক্খু, সুতৰা অরিযসাৰকো এৰং পস্সং এৰং অব্যাকরণধম্মো হোতি অব্যাকতৰত্থূসু. এৰং জানং খো, ভিক্খু, সুতৰা অরিযসাৰকো এৰং পস্সং ন ছম্ভতি, ন কম্পতি, ন ৰেধতি, ন সন্তাসং আপজ্জতি অব্যাকতৰত্থূসু. অযং খো, ভিক্খু, হেতু অযং পচ্চযো যেন সুতৰতো অরিযসাৰকস্স ৰিচিকিচ্ছা নুপ্পজ্জতি অব্যাকতৰত্থূসূ’’তি. পঠমং.