১২. দুতিযনিদ্দসসুত্তং

৪৩. এৰং মে সুতং – একং সমযং ভগৰা কোসম্বিযং ৰিহরতি ঘোসিতারামে. অথ খো আযস্মা আনন্দো পুব্বণ্হসমযং নিৰাসেত্ৰা পত্তচীৰরমাদায কোসম্বিং পিণ্ডায পাৰিসি. অথ খো আযস্মতো আনন্দস্স এতদহোসি – ‘‘অতিপ্পগো খো তাৰ কোসম্বিযং পিণ্ডায চরিতুং. যংনূনাহং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্য’’ন্তি. অথ খো আযস্মা আনন্দো যেন অঞ্ঞতিত্থিযানং পরিব্বাজকানং আরামো তেনুপসঙ্কমি; উপসঙ্কমিত্ৰা তেহি অঞ্ঞতিত্থিযেহি পরিব্বাজকেহি সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি.

তেন খো পন সমযেন তেসং অঞ্ঞতিত্থিযানং পরিব্বাজকানং সন্নিসিন্নানং সন্নিপতিতানং অযমন্তরাকথা উদপাদি – ‘‘যো হি কোচি, আৰুসো, দ্ৰাদস ৰস্সানি পরিপুণ্ণং পরিসুদ্ধং ব্রহ্মচরিযং চরতি, ‘নিদ্দসো ভিক্খূ’তি অলং ৰচনাযা’’তি.

অথ খো আযস্মা আনন্দো তেসং অঞ্ঞতিত্থিযানং পরিব্বাজকানং ভাসিতং নেৰ অভিনন্দি নপ্পটিক্কোসি. অনভিনন্দিত্ৰা অপ্পটিক্কোসিত্ৰা উট্ঠাযাসনা পক্কামি – ‘‘ভগৰতো সন্তিকে এতস্স ভাসিতস্স অত্থং আজানিস্সামী’’তি. অথ খো আযস্মা আনন্দো কোসম্বিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ –

‘‘ইধাহং, ভন্তে, পুব্বণ্হসমযং নিৰাসেত্ৰা পত্তচীৰরমাদায কোসম্বিং পিণ্ডায পাৰিসিং. তস্স ময্হং, ভন্তে, এতদহোসি – ‘অতিপ্পগো খো তাৰ কোসম্বিযং পিণ্ডায চরিতুং. যংনূনাহং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্য’ন্তি…পে… তেহি সদ্ধিং সম্মোদিং. সম্মোদনীযং কথং সারণীযং ৰীতিসারেত্ৰা একমন্তং নিসীদিং.

‘‘তেন খো পন, ভন্তে, সমযেন তেসং অঞ্ঞতিত্থিযানং পরিব্বাজকানং সন্নিসিন্নানং সন্নিপতিতানং অযমন্তরাকথা উদপাদি – ‘যো হি কোচি, আৰুসো, দ্ৰাদসৰস্সানি পরিপুণ্ণং পরিসুদ্ধং ব্রহ্মচরিযং চরতি, নিদ্দসো ভিক্খূতি অলং ৰচনাযা’তি. অথ খ্ৰাহং, ভন্তে, তেসং অঞ্ঞতিত্থিযানং পরিব্বাজকানং ভাসিতং নেৰ অভিনন্দিং নপ্পটিক্কোসিং. অনভিনন্দিত্ৰা, অপ্পটিক্কোসিত্ৰা উট্ঠাযাসনা পক্কমিং – ‘ভগৰতো সন্তিকে এতস্স ভাসিতস্স অত্থং আজানিস্সামী’তি. সক্কা নু খো, ভন্তে, ইমস্মিং ধম্মৰিনযে কেৰলং ৰস্সগণনমত্তেন নিদ্দসো ভিক্খু পঞ্ঞাপেতু’’ন্তি?

‘‘ন খো, আনন্দ, সক্কা ইমস্মিং ধম্মৰিনযে কেৰলং ৰস্সগণনমত্তেন নিদ্দসো ভিক্খু পঞ্ঞাপেতুং. সত্ত খো ইমানি, আনন্দ, নিদ্দসৰত্থূনি মযা সযং অভিঞ্ঞা সচ্ছিকত্ৰা পৰেদিতানি.

‘‘কতমানি সত্ত? ইধানন্দ, ভিক্খু, সদ্ধো হোতি, হিরীমা হোতি, ওত্তপ্পী হোতি, বহুস্সুতো হোতি, আরদ্ধৰীরিযো হোতি, সতিমা হোতি, পঞ্ঞৰা হোতি. ইমানি খো, আনন্দ, সত্ত নিদ্দসৰত্থূনি মযা সযং অভিঞ্ঞা সচ্ছিকত্ৰা পৰেদিতানি. ইমেহি খো, আনন্দ, সত্তহি নিদ্দসৰত্থূহি সমন্নাগতো ভিক্খু দ্ৰাদস চেপি ৰস্সানি পরিপুণ্ণং পরিসুদ্ধং ব্রহ্মচরিযং চরতি, ‘নিদ্দসো ভিক্খূ’তি অলং ৰচনায; চতুব্বীসতি চেপি ৰস্সানি পরিপুণ্ণং পরিসুদ্ধং ব্রহ্মচরিযং চরতি, ‘নিদ্দসো ভিক্খূ’তি অলং ৰচনায; ছত্তিংসতি চেপি ৰস্সানি পরিপুণ্ণং পরিসুদ্ধং ব্রহ্মচরিযং চরতি, ‘নিদ্দসো ভিক্খূ’তি অলং ৰচনায, অট্ঠচত্তারীসং চেপি ৰস্সানি পরিপুণ্ণং পরিসুদ্ধং ব্রহ্মচরিযং চরতি, ‘নিদ্দসো ভিক্খূ’তি অলং ৰচনাযা’’তি. দ্ৰাদসমং.

দেৰতাৰগ্গো চতুত্থো.