৫. মহাযঞ্ঞৰগ্গো

১. সত্তৰিঞ্ঞাণট্ঠিতিসুত্তং

৪৪. [দী. নি. ৩.৩৩২; চূল়নি. পোসালমাণৰপুচ্ছানিদ্দেস ৮৩] ‘‘সত্তিমা, ভিক্খৰে, ৰিঞ্ঞাণট্ঠিতিযো. কতমা সত্ত? সন্তি, ভিক্খৰে, সত্তা নানত্তকাযা নানত্তসঞ্ঞিনো, সেয্যথাপি মনুস্সা, একচ্চে চ দেৰা, একচ্চে চ ৰিনিপাতিকা. অযং পঠমা ৰিঞ্ঞাণট্ঠিতি.

‘‘সন্তি, ভিক্খৰে, সত্তা নানত্তকাযা একত্তসঞ্ঞিনো, সেয্যথাপি দেৰা ব্রহ্মকাযিকা পঠমাভিনিব্বত্তা. অযং দুতিযা ৰিঞ্ঞাণট্ঠিতি.

‘‘সন্তি, ভিক্খৰে, সত্তা একত্তকাযা নানত্তসঞ্ঞিনো, সেয্যথাপি দেৰা আভস্সরা. অযং ততিযা ৰিঞ্ঞাণট্ঠিতি.

‘‘সন্তি, ভিক্খৰে, সত্তা একত্তকাযা একত্তসঞ্ঞিনো, সেয্যথাপি দেৰা সুভকিণ্হা. অযং চতুত্থা ৰিঞ্ঞাণট্ঠিতি.

‘‘সন্তি, ভিক্খৰে, সত্তা সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনূপগা. অযং পঞ্চমা ৰিঞ্ঞাণট্ঠিতি.

‘‘সন্তি, ভিক্খৰে, সত্তা সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনূপগা. অযং ছট্ঠা ৰিঞ্ঞাণট্ঠিতি.

‘‘সন্তি, ভিক্খৰে, সত্তা সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনূপগা. অযং সত্তমা ৰিঞ্ঞাণট্ঠিতি. ইমা খো, ভিক্খৰে, সত্ত ৰিঞ্ঞাণট্ঠিতিযো’’তি. পঠমং.

২. সমাধিপরিক্খারসুত্তং

৪৫. ‘‘সত্তিমে, ভিক্খৰে, সমাধিপরিক্খারা. কতমে সত্ত? সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি. যা খো, ভিক্খৰে, ইমেহি সত্তহঙ্গেহি চিত্তস্সেকগ্গতা পরিক্খতা [‘সপরিক্খারতা’তিপি, ‘সপরিক্খতা’তিপি (সং. নি. ৫.২৮)], অযং ৰুচ্চতি, ভিক্খৰে, অরিযো সম্মাসমাধি [সমাধি (স্যা.)] সউপনিসো ইতিপি সপরিক্খারো ইতিপী’’তি. দুতিযং.

৩. পঠমঅগ্গিসুত্তং

৪৬. ‘‘সত্তিমে, ভিক্খৰে, অগ্গী. কতমে সত্ত? রাগগ্গি, দোসগ্গি, মোহগ্গি, আহুনেয্যগ্গি, গহপতগ্গি, দক্খিণেয্যগ্গি, কট্ঠগ্গি – ইমে খো, ভিক্খৰে, সত্ত অগ্গী’’তি. ততিযং.

৪. দুতিযঅগ্গিসুত্তং

৪৭. তেন খো পন সমযেন উগ্গতসরীরস্স ব্রাহ্মণস্স মহাযঞ্ঞো উপক্খটো হোতি. পঞ্চ উসভসতানি থূণূপনীতানি হোন্তি যঞ্ঞত্থায, পঞ্চ ৰচ্ছতরসতানি থূণূপনীতানি হোন্তি যঞ্ঞত্থায, পঞ্চ ৰচ্ছতরিসতানি থূণূপনীতানি হোন্তি যঞ্ঞত্থায, পঞ্চ অজসতানি থূণূপনীতানি হোন্তি যঞ্ঞত্থায, পঞ্চ উরব্ভসতানি থূণূপনীতানি হোন্তি যঞ্ঞত্থায. অথ খো উগ্গতসরীরো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো উগ্গতসরীরো ব্রাহ্মণো ভগৰন্তং এতদৰোচ –

‘‘সুতং মেতং, ভো গোতম, অগ্গিস্স আদানং [আধানং (সী. স্যা.)] যূপস্স উস্সাপনং মহপ্ফলং হোতি মহানিসংস’’ন্তি. ‘‘মযাপি খো এতং, ব্রাহ্মণ, সুতং অগ্গিস্স আদানং যূপস্স উস্সাপনং মহপ্ফলং হোতি মহানিসংস’’ন্তি. দুতিযম্পি খো উগ্গতসরীরো ব্রাহ্মণো…পে… ততিযম্পি খো উগ্গতসরীরো ব্রাহ্মণো ভগৰন্তং এতদৰোচ – ‘‘সুতং মেতং, ভো গোতম, অগ্গিস্স আদানং যূপস্স উস্সাপনং মহপ্ফলং হোতি মহানিসংস’’ন্তি. ‘‘মযাপি খো এতং, ব্রাহ্মণ, সুতং অগ্গিস্স আদানং যূপস্স উস্সাপনং মহপ্ফলং হোতি মহানিসংস’’ন্তি. ‘‘তযিদং, ভো গোতম, সমেতি ভোতো চেৰ গোতমস্স অম্হাকঞ্চ, যদিদং সব্বেন সব্বং’’.

এৰং ৰুত্তে আযস্মা আনন্দো উগ্গতসরীরং ব্রাহ্মণং এতদৰোচ – ‘‘ন খো, ব্রাহ্মণ, তথাগতা এৰং পুচ্ছিতব্বা – ‘সুতং মেতং, ভো গোতম, অগ্গিস্স আদানং যূপস্স উস্সাপনং মহপ্ফলং হোতি মহানিসংস’ন্তি. এৰং খো, ব্রাহ্মণ, তথাগতা পুচ্ছিতব্বা – ‘অহঞ্হি, ভন্তে, অগ্গিং [অগ্গিস্স (ক.)] আদাতুকামো, [আধাতুকামো (সী. স্যা.)] যূপং উস্সাপেতুকামো. ওৰদতু মং, ভন্তে, ভগৰা. অনুসাসতু মং, ভন্তে, ভগৰা যং মম অস্স দীঘরত্তং হিতায সুখাযা’’’তি.

অথ খো উগ্গতসরীরো ব্রাহ্মণো ভগৰন্তং এতদৰোচ – ‘‘অহঞ্হি, ভো গোতম, অগ্গিং আদাতুকামো যূপং উস্সাপেতুকামো. ওৰদতু মং ভৰং গোতমো. অনুসাসতু মং ভৰং গোতমো যং মম অস্স দীঘরত্তং হিতায সুখাযা’’তি.

‘‘অগ্গিং, ব্রাহ্মণ, আদেন্তো [আধেন্তো (সী. স্যা.)] যূপং উস্সাপেন্তো পুব্বেৰ যঞ্ঞা তীণি সত্থানি উস্সাপেতি অকুসলানি দুক্খুদ্রযানি [দুক্খুদ্দযানি (সী.)] দুক্খৰিপাকানি. কতমানি তীণি? কাযসত্থং, ৰচীসত্থং, মনোসত্থং. অগ্গিং, ব্রাহ্মণ, আদেন্তো যূপং উস্সাপেন্তো পুব্বেৰ যঞ্ঞা এৰং চিত্তং উপ্পাদেসি – ‘এত্তকা উসভা হঞ্ঞন্তু যঞ্ঞত্থায, এত্তকা ৰচ্ছতরা হঞ্ঞন্তু যঞ্ঞত্থায, এত্তকা ৰচ্ছতরিযো হঞ্ঞন্তু যঞ্ঞত্থায, এত্তকা অজা হঞ্ঞন্তু যঞ্ঞত্থায, এত্তকা উরব্ভা হঞ্ঞন্তু যঞ্ঞত্থাযা’তি. সো ‘পুঞ্ঞং করোমী’তি অপুঞ্ঞং করোতি, ‘কুসলং করোমী’তি অকুসলং করোতি, ‘সুগতিযা মগ্গং পরিযেসামী’তি দুগ্গতিযা মগ্গং পরিযেসতি. অগ্গিং, ব্রাহ্মণ, আদেন্তো যূপং উস্সাপেন্তো পুব্বেৰ যঞ্ঞা ইদং পঠমং মনোসত্থং উস্সাপেতি অকুসলং দুক্খুদ্রযং দুক্খৰিপাকং.

‘‘পুন চপরং, ব্রাহ্মণ, অগ্গিং আদেন্তো যূপং উস্সাপেন্তো পুব্বেৰ যঞ্ঞা এৰং ৰাচং ভাসতি – ‘এত্তকা উসভা হঞ্ঞন্তু যঞ্ঞত্থায, এত্তকা ৰচ্ছতরা হঞ্ঞন্তু যঞ্ঞত্থায, এত্তকা ৰচ্ছতরিযো হঞ্ঞন্তু যঞ্ঞত্থায, এত্তকা অজা হঞ্ঞন্তু যঞ্ঞত্থায, এত্তকা উরব্ভা হঞ্ঞন্তু যঞ্ঞত্থাযা’তি. সো ‘পুঞ্ঞং করোমী’তি অপুঞ্ঞং করোতি, ‘কুসলং করোমী’তি অকুসলং করোতি, ‘সুগতিযা মগ্গং পরিযেসামী’তি দুগ্গতিযা মগ্গং পরিযেসতি. অগ্গিং, ব্রাহ্মণ, আদেন্তো যূপং উস্সাপেন্তো পুব্বেৰ যঞ্ঞা ইদং দুতিযং ৰচীসত্থং উস্সাপেতি অকুসলং দুক্খুদ্রযং দুক্খৰিপাকং.

‘‘পুন চপরং, ব্রাহ্মণ, অগ্গিং আদেন্তো যূপং উস্সাপেন্তো পুব্বেৰ যঞ্ঞা সযং পঠমং সমারম্ভতি [সমারব্ভতি (সী. ক.), সমারভতি (স্যা.)] উসভা হন্তুং [হঞ্ঞন্তু (সী. স্যা.)] যঞ্ঞত্থায, সযং পঠমং সমারম্ভতি ৰচ্ছতরা হন্তুং যঞ্ঞত্থায, সযং পঠমং সমারম্ভতি ৰচ্ছতরিযো হন্তুং যঞ্ঞত্থায, সযং পঠমং সমারম্ভতি অজা হন্তুং যঞ্ঞত্থায, সযং পঠমং সমারম্ভতি উরব্ভা হন্তুং যঞ্ঞত্থায [হঞ্ঞন্তু যঞ্ঞত্থাযাতি (সী. স্যা.)]. সো ‘পুঞ্ঞং করোমী’তি অপুঞ্ঞং করোতি, ‘কুসলং করোমী’তি অকুসলং করোতি, ‘সুগতিযা মগ্গং পরিযেসামী’তি দুগ্গতিযা মগ্গং পরিযেসতি. অগ্গিং, ব্রাহ্মণ, আদেন্তো যূপং উস্সাপেন্তো পুব্বেৰ যঞ্ঞা ইদং ততিযং কাযসত্থং উস্সাপেতি অকুসলং দুক্খুদ্রযং দুক্খৰিপাকং. অগ্গিং, ব্রাহ্মণ, আদেন্তো যূপং উস্সাপেন্তো পুব্বেৰ যঞ্ঞা ইমানি তীণি সত্থানি উস্সাপেতি অকুসলানি দুক্খুদ্রযানি দুক্খৰিপাকানি.

‘‘তযোমে, ব্রাহ্মণ, অগ্গী পহাতব্বা পরিৰজ্জেতব্বা, ন সেৰিতব্বা. কতমে তযো? রাগগ্গি, দোসগ্গি, মোহগ্গি.

‘‘কস্মা চাযং, ব্রাহ্মণ, রাগগ্গি পহাতব্বো পরিৰজ্জেতব্বো, ন সেৰিতব্বো? রত্তো খো, ব্রাহ্মণ, রাগেন অভিভূতো পরিযাদিন্নচিত্তো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. তস্মাযং রাগগ্গি পহাতব্বো পরিৰজ্জেতব্বো, ন সেৰিতব্বো.

‘‘কস্মা চাযং, ব্রাহ্মণ, দোসগ্গি পহাতব্বো পরিৰজ্জেতব্বো, ন সেৰিতব্বো? দুট্ঠো খো, ব্রাহ্মণ, দোসেন অভিভূতো পরিযাদিন্নচিত্তো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. তস্মাযং দোসগ্গি পহাতব্বো পরিৰজ্জেতব্বো, ন সেৰিতব্বো.

‘‘কস্মা চাযং, ব্রাহ্মণ, মোহগ্গি পহাতব্বো পরিৰজ্জেতব্বো, ন সেৰিতব্বো? মূল়্হো খো, ব্রাহ্মণ, মোহেন অভিভূতো পরিযাদিন্নচিত্তো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. তস্মাযং মোহগ্গি পহাতব্বো পরিৰজ্জেতব্বো, ন সেৰিতব্বো. ইমে খো তযো, ব্রাহ্মণ, অগ্গী পহাতব্বা পরিৰজ্জেতব্বা, ন সেৰিতব্বা.

‘‘তযো খো, ব্রাহ্মণ, অগ্গী সক্কত্ৰা গরুং কত্ৰা মানেত্ৰা পূজেত্ৰা সম্মা সুখং পরিহাতব্বা. কতমে তযো? আহুনেয্যগ্গি, গহপতগ্গি, দক্খিণেয্যগ্গি.

‘‘কতমো চ, ব্রাহ্মণ, আহুনেয্যগ্গি? ইধ, ব্রাহ্মণ, যস্স তে হোন্তি মাতাতি ৰা পিতাতি ৰা, অযং ৰুচ্চতি, ব্রাহ্মণ, আহুনেয্যগ্গি. তং কিস্স হেতু? অতোহযং [ইতোপাযং (ক.)], ব্রাহ্মণ, আহুতো সম্ভূতো, তস্মাযং আহুনেয্যগ্গি সক্কত্ৰা গরুং কত্ৰা মানেত্ৰা পূজেত্ৰা সম্মা সুখং পরিহাতব্বো.

‘‘কতমো চ, ব্রাহ্মণ, গহপতগ্গি? ইধ, ব্রাহ্মণ, যস্স তে হোন্তি পুত্তাতি ৰা দারাতি ৰা দাসাতি ৰা পেস্সাতি ৰা কম্মকরাতি ৰা, অযং ৰুচ্চতি, ব্রাহ্মণ, গহপতগ্গি. তস্মাযং গহপতগ্গি সক্কত্ৰা গরুং কত্ৰা মানেত্ৰা পূজেত্ৰা সম্মা সুখং পরিহাতব্বো.

‘‘কতমো চ, ব্রাহ্মণ, দক্খিণেয্যগ্গি? ইধ, ব্রাহ্মণ, যে তে সমণব্রাহ্মণা পরপ্পৰাদা পটিৰিরতা খন্তিসোরচ্চে নিৰিট্ঠা একমত্তানং দমেন্তি, একমত্তানং সমেন্তি, একমত্তানং পরিনিব্বাপেন্তি, অযং ৰুচ্চতি, ব্রাহ্মণ, দক্খিণেয্যগ্গি. তস্মাযং দক্খিণেয্যগ্গি সক্কত্ৰা গরুং কত্ৰা মানেত্ৰা পূজেত্ৰা সম্মা সুখং পরিহাতব্বো. ইমে খো, ব্রাহ্মণ, তযো অগ্গী সক্কত্ৰা গরুং কত্ৰা মানেত্ৰা পূজেত্ৰা সম্মা সুখং পরিহাতব্বা.

‘‘অযং খো পন, ব্রাহ্মণ, কট্ঠগ্গি কালেন কালং উজ্জলেতব্বো, কালেন কালং অজ্ঝুপেক্খিতব্বো, কালেন কালং নিব্বাপেতব্বো, কালেন কালং নিক্খিপিতব্বো’’তি.

এৰং ৰুত্তে উগ্গতসরীরো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম; অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গতন্তি. এসাহং, ভো গোতম, পঞ্চ উসভসতানি মুঞ্চামি জীৰিতং দেমি, পঞ্চ ৰচ্ছতরসতানি মুঞ্চামি জীৰিতং দেমি, পঞ্চ ৰচ্ছতরিসতানি মুঞ্চামি জীৰিতং দেমি, পঞ্চ অজসতানি মুঞ্চামি জীৰিতং দেমি, পঞ্চ উরব্ভসতানি মুঞ্চামি জীৰিতং দেমি. হরিতানি চেৰ তিণানি খাদন্তু, সীতানি চ পানীযানি পিৰন্তু, সীতো চ নেসং ৰাতো উপৰাযত’’ন্তি [উপৰাযতূতি (ক.)]. চতুত্থং.

৫. পঠমসঞ্ঞাসুত্তং

৪৮. ‘‘সত্তিমা, ভিক্খৰে, সঞ্ঞা ভাৰিতা বহুলীকতা মহপ্ফলা হোন্তি মহানিসংসা অমতোগধা অমতপরিযোসানা.

‘‘কতমা সত্ত? অসুভসঞ্ঞা, মরণসঞ্ঞা, আহারে পটিকূলসঞ্ঞা, সব্বলোকে অনভিরতসঞ্ঞা, অনিচ্চসঞ্ঞা, অনিচ্চে দুক্খসঞ্ঞা, দুক্খে অনত্তসঞ্ঞা. ইমা খো, ভিক্খৰে, সত্ত সঞ্ঞা ভাৰিতা বহুলীকতা মহপ্ফলা হোন্তি মহানিসংসা অমতোগধা অমতপরিযোসানা’’তি. পঞ্চমং.

৬. দুতিযসঞ্ঞাসুত্তং

৪৯. ‘‘সত্তিমা, ভিক্খৰে, সঞ্ঞা ভাৰিতা বহুলীকতা মহপ্ফলা হোন্তি মহানিসংসা অমতোগধা অমতপরিযোসানা. কতমা সত্ত? অসুভসঞ্ঞা, মরণসঞ্ঞা, আহারে পটিকূলসঞ্ঞা, সব্বলোকে অনভিরতসঞ্ঞা, অনিচ্চসঞ্ঞা, অনিচ্চে দুক্খসঞ্ঞা, দুক্খে অনত্তসঞ্ঞা. ইমা খো, ভিক্খৰে, সত্ত সঞ্ঞা ভাৰিতা বহুলীকতা মহপ্ফলা হোন্তি মহানিসংসা অমতোগধা অমতপরিযোসানাতি.

‘‘‘অসুভসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি. ইতি খো পনেতং ৰুত্তং. কিঞ্চেতং পটিচ্চ ৰুত্তং? অসুভসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো মেথুনধম্মসমাপত্তিযা চিত্তং পতিলীযতি পতিকুটতি পতিৰত্ততি, ন সম্পসারিযতি উপেক্খা ৰা পাটিকুল্যতা ৰা সণ্ঠাতি. সেয্যথাপি, ভিক্খৰে, কুক্কুটপত্তং ৰা ন্হারুদদ্দুলং ৰা অগ্গিম্হি পক্খিত্তং পতিলীযতি পতিকুটতি পতিৰত্ততি, ন সম্পসারিযতি. এৰমেৰং খো, ভিক্খৰে, ভিক্খুনো অসুভসঞ্ঞাপরিচিতেন চেতসা বহুলং ৰিহরতো মেথুনধম্মসমাপত্তিযা চিত্তং পতিলীযতি পতিকুটতি পতিৰত্ততি, ন সম্পসারিযতি উপেক্খা ৰা পাটিকুল্যতা ৰা সণ্ঠাতি.

‘‘সচে, ভিক্খৰে, ভিক্খুনো অসুভসঞ্ঞাপরিচিতেন চেতসা বহুলং ৰিহরতো মেথুনধম্মসমাপত্তিযা চিত্তং অনুসন্দহতি [অনুসণ্ঠাতি (সী.)] অপ্পটিকুল্যতা সণ্ঠাতি; ৰেদিতব্বমেতং, ভিক্খৰে, ভিক্খুনা ‘অভাৰিতা মে অসুভসঞ্ঞা, নত্থি মে পুব্বেনাপরং ৰিসেসো, অপ্পত্তং মে ভাৰনাবল’ন্তি. ইতিহ তত্থ সম্পজানো হোতি. সচে পন, ভিক্খৰে, ভিক্খুনো অসুভসঞ্ঞাপরিচিতেন চেতসা বহুলং ৰিহরতো মেথুনধম্মসমাপত্তিযা চিত্তং পতিলীযতি পতিকুটতি পতিৰত্ততি, ন সম্পসারিযতি উপেক্খা ৰা পাটিকুল্যতা ৰা সণ্ঠাতি; ৰেদিতব্বমেতং, ভিক্খৰে, ভিক্খুনা ‘সুভাৰিতা মে অসুভসঞ্ঞা, অত্থি মে পুব্বেনাপরং ৰিসেসো, পত্তং মে ভাৰনাবল’ন্তি. ইতিহ তত্থ সম্পজানো হোতি. ‘অসুভসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি যং তং ৰুত্তং ইদমেতং পটিচ্চ ৰুত্তং.

‘‘‘মরণসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি খো পনেতং ৰুত্তং কিঞ্চেতং পটিচ্চ ৰুত্তং? মরণসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো জীৰিতনিকন্তিযা চিত্তং পতিলীযতি পতিকুটতি পতিৰত্ততি, ন সম্পসারিযতি উপেক্খা ৰা পাটিকুল্যতা ৰা সণ্ঠাতি. সেয্যথাপি, ভিক্খৰে, কুক্কুটপত্তং ৰা ন্হারুদদ্দুলং ৰা অগ্গিম্হি পক্খিত্তং পতিলীযতি পতিকুটতি পতিৰত্ততি, ন সম্পসারিযতি. এৰমেৰং খো, ভিক্খৰে, ভিক্খুনো মরণসঞ্ঞাপরিচিতেন চেতসা বহুলং ৰিহরতো জীৰিতনিকন্তিযা চিত্তং পতিলীযতি পতিকুটতি পতিৰত্ততি, ন সম্পসারিযতি উপেক্খা ৰা পাটিকুল্যতা ৰা সণ্ঠাতি.

‘‘সচে, ভিক্খৰে, ভিক্খুনো মরণসঞ্ঞাপরিচিতেন চেতসা বহুলং ৰিহরতো জীৰিতনিকন্তিযা চিত্তং অনুসন্দহতি অপ্পটিকুল্যতা সণ্ঠাতি; ৰেদিতব্বমেতং, ভিক্খৰে, ভিক্খুনা ‘অভাৰিতা মে মরণসঞ্ঞা, নত্থি মে পুব্বেনাপরং ৰিসেসো, অপ্পত্তং মে ভাৰনাবল’ন্তি. ইতিহ তত্থ সম্পজানো হোতি. সচে পন, ভিক্খৰে, ভিক্খুনো মরণসঞ্ঞাপরিচিতেন চেতসা বহুলং ৰিহরতো জীৰিতনিকন্তিযা চিত্তং পতিলীযতি পতিকুটতি পতিৰত্ততি, ন সম্পসারিযতি উপেক্খা ৰা পাটিকুল্যতা ৰা সণ্ঠাতি; ৰেদিতব্বমেতং, ভিক্খৰে, ভিক্খুনা ‘সুভাৰিতা মে মরণসঞ্ঞা, অত্থি মে পুব্বেনাপরং ৰিসেসো, পত্তং মে ভাৰনাবল’ন্তি. ইতিহ তত্থ সম্পজানো হোতি. ‘মরণসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি যং তং ৰুত্তং ইদমেতং পটিচ্চ ৰুত্তং.

‘‘‘আহারে পটিকূলসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি খো পনেতং ৰুত্তং, কিঞ্চেতং পটিচ্চ ৰুত্তং? আহারে পটিকূলসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো রসতণ্হায চিত্তং পতিলীযতি …পে… উপেক্খা ৰা পাটিকুল্যতা ৰা সণ্ঠাতি. সেয্যথাপি, ভিক্খৰে, কুক্কুটপত্তং ৰা ন্হারুদদ্দুলং ৰা অগ্গিম্হি পক্খিত্তং পতিলীযতি পতিকুটতি পতিৰত্ততি, ন সম্পসারিযতি. এৰমেৰং খো, ভিক্খৰে, ভিক্খুনো আহারে পটিকূলসঞ্ঞাপরিচিতেন চেতসা বহুলং ৰিহরতো রসতণ্হায চিত্তং পতিলীযতি…পে… উপেক্খা ৰা পাটিকুল্যতা ৰা সণ্ঠাতি.

‘‘সচে, ভিক্খৰে, ভিক্খুনো আহারে পটিকূলসঞ্ঞাপরিচিতেন চেতসা বহুলং ৰিহরতো রসতণ্হায চিত্তং অনুসন্দহতি অপ্পটিকুল্যতা সণ্ঠাতি; ৰেদিতব্বমেতং, ভিক্খৰে, ভিক্খুনা ‘অভাৰিতা মে আহারে পটিকূলসঞ্ঞা, নত্থি মে পুব্বেনাপরং ৰিসেসো, অপ্পত্তং মে ভাৰনাবল’ন্তি. ইতিহ তত্থ সম্পজানো হোতি. সচে পন, ভিক্খৰে, ভিক্খুনো আহারে পটিকূলসঞ্ঞাপরিচিতেন চেতসা বহুলং ৰিহরতো রসতণ্হায চিত্তং পতিলীযতি…পে… উপেক্খা ৰা পাটিকুল্যতা ৰা সণ্ঠাতি; ৰেদিতব্বমেতং, ভিক্খৰে, ভিক্খুনা ‘সুভাৰিতা মে আহারে পটিকূলসঞ্ঞা, অত্থি মে পুব্বেনাপরং ৰিসেসো, পত্তং মে ভাৰনাবল’ন্তি. ইতিহ তত্থ সম্পজানো হোতি. ‘আহারে পটিকূলসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি যং তং ৰুত্তং ইদমেতং পটিচ্চ ৰুত্তং.

‘‘‘সব্বলোকে অনভিরতসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? সব্বলোকে অনভিরতসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো লোকচিত্রেসু চিত্তং পতিলীযতি…পে… সেয্যথাপি ভিক্খৰে…পে… পতিলীযতি পতিকুটতি পতিৰত্ততি, ন সম্পসারিযতি. এৰমেৰং খো, ভিক্খৰে, ভিক্খুনো সব্বলোকে অনভিরতসঞ্ঞাপরিচিতেন চেতসা বহুলং ৰিহরতো লোকচিত্রেসু চিত্তং পতিলীযতি পতিকুটতি পতিৰত্ততি, ন সম্পসারিযতি উপেক্খা ৰা পাটিকুল্যতা ৰা সণ্ঠাতি.

‘‘সচে, ভিক্খৰে, ভিক্খুনো সব্বলোকে অনভিরতসঞ্ঞাপরিচিতেন চেতসা বহুলং ৰিহরতো লোকচিত্রেসু চিত্তং অনুসন্দহতি অপ্পটিকুল্যতা সণ্ঠাতি; ৰেদিতব্বমেতং, ভিক্খৰে, ভিক্খুনা ‘অভাৰিতা মে সব্বলোকে অনভিরতসঞ্ঞা, নত্থি মে পুব্বেনাপরং ৰিসেসো, অপ্পত্তং মে ভাৰনাবল’ন্তি. ইতিহ তত্থ সম্পজানো হোতি. সচে পন, ভিক্খৰে, ভিক্খুনো সব্বলোকে অনভিরতসঞ্ঞাপরিচিতেন চেতসা বহুলং ৰিহরতো লোকচিত্রেসু চিত্তং পতিলীযতি…পে… উপেক্খা ৰা পাটিকুল্যতা ৰা সণ্ঠাতি; ৰেদিতব্বমেতং, ভিক্খৰে, ভিক্খুনা ‘সুভাৰিতা মে সব্বলোকে অনভিরতসঞ্ঞা, অত্থি মে পুব্বেনাপরং ৰিসেসো, পত্তং মে ভাৰনাবল’ন্তি. ইতিহ তত্থ সম্পজানো হোতি. ‘সব্বলোকে অনভিরতসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি যং তং ৰুত্তং ইদমেতং পটিচ্চ ৰুত্তং.

‘‘‘অনিচ্চসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? অনিচ্চসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো লাভসক্কারসিলোকে চিত্তং পতিলীযতি…পে… উপেক্খা ৰা পাটিকুল্যতা ৰা সণ্ঠাতি. সেয্যথাপি, ভিক্খৰে, কুক্কুটপত্তং ৰা ন্হারুদদ্দুলং ৰা অগ্গিম্হি পক্খিত্তং পতিলীযতি পতিকুটতি পতিৰত্ততি ন সম্পসারিযতি. এৰমেৰং খো, ভিক্খৰে, ভিক্খুনো অনিচ্চসঞ্ঞাপরিচিতেন চেতসা বহুলং ৰিহরতো লাভসক্কারসিলোকে চিত্তং পতিলীযতি…পে… উপেক্খা ৰা পাটিকুল্যতা ৰা সণ্ঠাতি.

‘‘সচে, ভিক্খৰে, ভিক্খুনো অনিচ্চসঞ্ঞাপরিচিতেন চেতসা বহুলং ৰিহরতো লাভসক্কারসিলোকে চিত্তং অনুসন্দহতি অপ্পটিকুল্যতা সণ্ঠাতি; ৰেদিতব্বমেতং, ভিক্খৰে, ভিক্খুনা ‘অভাৰিতা মে অনিচ্চসঞ্ঞা, নত্থি মে পুব্বেনাপরং ৰিসেসো, অপ্পত্তং মে ভাৰনাবল’ন্তি. ইতিহ তত্থ সম্পজানো হোতি. সচে পন, ভিক্খৰে, ভিক্খুনো অনিচ্চসঞ্ঞাপরিচিতেন চেতসা বহুলং ৰিহরতো লাভসক্কারসিলোকে চিত্তং পতিলীযতি পতিকুটতি পতিৰত্ততি, ন সম্পসারিযতি উপেক্খা ৰা পাটিকুল্যতা ৰা সণ্ঠাতি; ৰেদিতব্বমেতং, ভিক্খৰে, ভিক্খুনা ‘সুভাৰিতা মে অনিচ্চসঞ্ঞা, অত্থি মে পুব্বেনাপরং ৰিসেসো, পত্তং মে ভাৰনাবল’ন্তি. ইতিহ তত্থ সম্পজানো হোতি. ‘অনিচ্চসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি যং তং ৰুত্তং ইদমেতং পটিচ্চ ৰুত্তং.

‘‘‘অনিচ্চে দুক্খসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? অনিচ্চে দুক্খসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো আলস্যে কোসজ্জে ৰিস্সট্ঠিযে পমাদে অননুযোগে অপচ্চৰেক্খণায তিব্বা ভযসঞ্ঞা পচ্চুপট্ঠিতা হোতি, সেয্যথাপি, ভিক্খৰে, উক্খিত্তাসিকে ৰধকে.

‘‘সচে, ভিক্খৰে, ভিক্খুনো অনিচ্চে দুক্খসঞ্ঞাপরিচিতেন চেতসা বহুলং ৰিহরতো আলস্যে কোসজ্জে ৰিস্সট্ঠিযে পমাদে অননুযোগে অপচ্চৰেক্খণায তিব্বা ভযসঞ্ঞা, ন পচ্চুপট্ঠিতা হোতি, সেয্যথাপি, ভিক্খৰে, উক্খিত্তাসিকে ৰধকে. ৰেদিতব্বমেতং, ভিক্খৰে, ভিক্খুনা ‘অভাৰিতা মে অনিচ্চে দুক্খসঞ্ঞা, নত্থি মে পুব্বেনাপরং ৰিসেসো, অপ্পত্তং মে ভাৰনাবল’ন্তি. ইতিহ তত্থ সম্পজানো হোতি. সচে পন, ভিক্খৰে, ভিক্খুনো অনিচ্চে দুক্খসঞ্ঞাপরিচিতেন চেতসা বহুলং ৰিহরতো আলস্যে কোসজ্জে ৰিস্সট্ঠিযে পমাদে অননুযোগে অপচ্চৰেক্খণায তিব্বা ভযসঞ্ঞা পচ্চুপট্ঠিতা হোতি, সেয্যথাপি, ভিক্খৰে, উক্খিত্তাসিকে ৰধকে. ৰেদিতব্বমেতং, ভিক্খৰে, ভিক্খুনা ‘সুভাৰিতা মে অনিচ্চে দুক্খসঞ্ঞা, অত্থি মে পুব্বেনাপরং ৰিসেসো, পত্তং মে ভাৰনাবল’ন্তি. ইতিহ তত্থ সম্পজানো হোতি. ‘অনিচ্চে দুক্খসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি যং তং ৰুত্তং ইদমেতং পটিচ্চ ৰুত্তং.

‘‘‘দুক্খে অনত্তসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? দুক্খে অনত্তসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো ইমস্মিঞ্চ সৰিঞ্ঞাণকে কাযে বহিদ্ধা চ সব্বনিমিত্তেসু অহঙ্কারমমঙ্কারমানাপগতং মানসং হোতি ৰিধাসমতিক্কন্তং সন্তং সুৰিমুত্তং.

‘‘সচে, ভিক্খৰে, ভিক্খুনো দুক্খে অনত্তসঞ্ঞাপরিচিতেন চেতসা বহুলং ৰিহরতো ইমস্মিঞ্চ সৰিঞ্ঞাণকে কাযে বহিদ্ধা চ সব্বনিমিত্তেসু ন অহঙ্কারমমঙ্কারমানাপগতং মানসং হোতি ৰিধাসমতিক্কন্তং সন্তং সুৰিমুত্তং. ৰেদিতব্বমেতং, ভিক্খৰে, ভিক্খুনা ‘অভাৰিতা মে দুক্খে অনত্তসঞ্ঞা, নত্থি মে পুব্বেনাপরং ৰিসেসো, অপ্পত্তং মে ভাৰনাবল’ন্তি. ইতিহ তত্থ সম্পজানো হোতি.

‘‘সচে পন, ভিক্খৰে, ভিক্খুনো দুক্খে অনত্তসঞ্ঞাপরিচিতেন চেতসা বহুলং ৰিহরতো ইমস্মিঞ্চ সৰিঞ্ঞাণকে কাযে বহিদ্ধা চ সব্বনিমিত্তেসু অহঙ্কারমমঙ্কারমানাপগতং মানসং হোতি ৰিধাসমতিক্কন্তং সন্তং সুৰিমুত্তং. ৰেদিতব্বমেতং, ভিক্খৰে, ভিক্খুনা ‘সুভাৰিতা মে দুক্খে অনত্তসঞ্ঞা, অত্থি মে পুব্বেনাপরং ৰিসেসো, পত্তং মে ভাৰনাবল’ন্তি. ইতিহ তত্থ সম্পজানো হোতি. ‘দুক্খে অনত্তসঞ্ঞা, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা’তি, ইতি যং তং ৰুত্তং ইদমেতং পটিচ্চ ৰুত্তং.

‘‘ইমা খো, ভিক্খৰে, সত্ত সঞ্ঞা ভাৰিতা বহুলীকতা মহপ্ফলা হোন্তি মহানিসংসা অমতোগধা অমতপরিযোসানা’’তি. ছট্ঠং.

৭. মেথুনসুত্তং

৫০. অথ খো জাণুস্সোণি ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো জাণুস্সোণি ব্রাহ্মণো ভগৰন্তং এতদৰোচ – ‘‘ভৰম্পি নো গোতমো ব্রহ্মচারী পটিজানাতী’’তি? ‘‘যঞ্হি তং, ব্রাহ্মণ, সম্মা ৰদমানো ৰদেয্য – ‘অখণ্ডং অচ্ছিদ্দং অসবলং অকম্মাসং পরিপুণ্ণং পরিসুদ্ধং ব্রহ্মচরিযং চরতী’তি, মমেৰ তং, ব্রাহ্মণ, সম্মা ৰদমানো ৰদেয্য – ‘অহঞ্হি, ব্রাহ্মণ, অখণ্ডং অচ্ছিদ্দং অসবলং অকম্মাসং পরিপুণ্ণং পরিসুদ্ধং ব্রহ্মচরিযং চরামী’’’তি. ‘‘কিং পন, ভো গোতম, ব্রহ্মচরিযস্স খণ্ডম্পি ছিদ্দম্পি সবলম্পি কম্মাসম্পী’’তি?

‘‘ইধ, ব্রাহ্মণ, একচ্চো সমণো ৰা ব্রাহ্মণো ৰা সম্মা ব্রহ্মচারী পটিজানমানো ন হেৰ খো মাতুগামেন সদ্ধিং দ্ৰযংদ্ৰযসমাপত্তিং সমাপজ্জতি; অপি চ খো মাতুগামস্স উচ্ছাদনপরিমদ্দনন্হাপনসম্বাহনং সাদিযতি. সো তং অস্সাদেতি [সো তদস্সাদেতি (সী.)], তং নিকামেতি, তেন চ ৰিত্তিং আপজ্জতি. ইদম্পি খো, ব্রাহ্মণ, ব্রহ্মচরিযস্স খণ্ডম্পি ছিদ্দম্পি সবলম্পি কম্মাসম্পি. অযং ৰুচ্চতি, ব্রাহ্মণ, অপরিসুদ্ধং ব্রহ্মচরিযং চরতি, সংযুত্তো মেথুনেন সংযোগেন ন পরিমুচ্চতি জাতিযা জরায মরণেন [জরামরণেন (সী. স্যা.)] সোকেহি পরিদেৰেহি দুক্খেহি দোমনস্সেহি উপাযাসেহি, ন পরিমুচ্চতি দুক্খস্মাতি ৰদামি.

‘‘পুন চপরং, ব্রাহ্মণ, ইধেকচ্চো সমণো ৰা ব্রাহ্মণো ৰা সম্মা ব্রহ্মচারী পটিজানমানো ন হেৰ খো মাতুগামেন সদ্ধিং দ্ৰযংদ্ৰযসমাপত্তিং সমাপজ্জতি, নপি মাতুগামস্স উচ্ছাদনপরিমদ্দনন্হাপনসম্বাহনং সাদিযতি; অপি চ খো মাতুগামেন সদ্ধিং সঞ্জগ্ঘতি সংকীল়তি সংকেলাযতি…পে… নপি মাতুগামেন সদ্ধিং সঞ্জগ্ঘতি সংকীল়তি সংকেলাযতি; অপি চ খো মাতুগামস্স চক্খুনা চক্খুং উপনিজ্ঝাযতি পেক্খতি…পে… নপি মাতুগামস্স চক্খুনা চক্খুং উপনিজ্ঝাযতি পেক্খতি; অপি চ খো মাতুগামস্স সদ্দং সুণাতি তিরোকুট্টং ৰা তিরোপাকারং ৰা হসন্তিযা ৰা ভণন্তিযা ৰা গাযন্তিযা ৰা রোদন্তিযা ৰা…পে… নপি মাতুগামস্স সদ্দং সুণাতি তিরোকুট্টং ৰা তিরোপাকারং ৰা হসন্তিযা ৰা ভণন্তিযা ৰা গাযন্তিযা ৰা রোদন্তিযা ৰা; অপি চ খো যানিস্স তানি পুব্বে মাতুগামেন সদ্ধিং হসিতলপিতকীল়িতানি তানি অনুস্সরতি…পে… নপি যানিস্স তানি পুব্বে মাতুগামেন সদ্ধিং হসিতলপিতকীল়িতানি তানি অনুস্সরতি; অপি চ খো পস্সতি গহপতিং ৰা গহপতিপুত্তং ৰা পঞ্চহি কামগুণেহি সমপ্পিতং সমঙ্গীভূতং পরিচারযমানং…পে… নপি পস্সতি গহপতিং ৰা গহপতিপুত্তং ৰা পঞ্চহি কামগুণেহি সমপ্পিতং সমঙ্গীভূতং পরিচারযমানং; অপি চ খো অঞ্ঞতরং দেৰনিকাযং পণিধায ব্রহ্মচরিযং চরতি ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা দেৰো ৰা ভৰিস্সামি দেৰঞ্ঞতরো ৰাতি. সো তং অস্সাদেতি, তং নিকামেতি, তেন চ ৰিত্তিং আপজ্জতি. ইদম্পি খো, ব্রাহ্মণ, ব্রহ্মচরিযস্স খণ্ডম্পি ছিদ্দম্পি সবলম্পি কম্মাসম্পি. অযং ৰুচ্চতি, ব্রাহ্মণ, অপরিসুদ্ধং ব্রহ্মচরিযং চরতি সংযুত্তো মেথুনেন সংযোগেন, ন পরিমুচ্চতি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, ন পরিমুচ্চতি দুক্খস্মাতি ৰদামি.

‘‘যাৰকীৰঞ্চাহং, ব্রাহ্মণ, ইমেসং সত্তন্নং মেথুনসংযোগানং অঞ্ঞতরঞ্ঞতরমেথুনসংযোগং [অঞ্ঞতরং মেথুনসংযোগং (সী. স্যা.)] অত্তনি অপ্পহীনং সমনুপস্সিং, নেৰ তাৰাহং, ব্রাহ্মণ, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায অনুত্তরং সম্মাসম্বোধিং অভিসম্বুদ্ধোতি পচ্চঞ্ঞাসিং [অভিসম্বুদ্ধো পচ্চঞ্ঞাসিং (সী. স্যা.)].

‘‘যতো চ খোহং, ব্রাহ্মণ, ইমেসং সত্তন্নং মেথুনসংযোগানং অঞ্ঞতরঞ্ঞতরমেথুনসংযোগং অত্তনি অপ্পহীনং ন সমনুপস্সিং, অথাহং, ব্রাহ্মণ, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায অনুত্তরং সম্মাসম্বোধিং অভিসম্বুদ্ধোতি পচ্চঞ্ঞাসিং. ‘ঞাণঞ্চ পন মে দস্সনং উদপাদি, অকুপ্পা মে ৰিমুত্তি [চেতোৰিমুত্তি (সী. ক.)], অযমন্তিমা জাতি, নত্থি দানি পুনব্ভৰো’’’তি.

এৰং ৰুত্তে জাণুস্সোণি ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম; অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি. সত্তমং.

৮. সংযোগসুত্তং

৫১. ‘‘সংযোগৰিসংযোগং ৰো, ভিক্খৰে, ধম্মপরিযাযং দেসেস্সামি. তং সুণাথ…পে… কতমো চ সো, ভিক্খৰে, সংযোগো ৰিসংযোগো ধম্মপরিযাযো?

‘‘ইত্থী, ভিক্খৰে, অজ্ঝত্তং ইত্থিন্দ্রিযং মনসি করোতি – ইত্থিকুত্তং ইত্থাকপ্পং ইত্থিৰিধং ইত্থিচ্ছন্দং ইত্থিস্সরং ইত্থালঙ্কারং. সা তত্থ রজ্জতি তত্রাভিরমতি. সা তত্থ রত্তা তত্রাভিরতা বহিদ্ধা পুরিসিন্দ্রিযং মনসি করোতি – পুরিসকুত্তং পুরিসাকপ্পং পুরিসৰিধং পুরিসচ্ছন্দং পুরিসস্সরং পুরিসালঙ্কারং. সা তত্থ রজ্জতি তত্রাভিরমতি. সা তত্থ রত্তা তত্রাভিরতা বহিদ্ধা সংযোগং আকঙ্খতি. যঞ্চস্সা সংযোগপচ্চযা উপ্পজ্জতি সুখং সোমনস্সং তঞ্চ আকঙ্খতি. ইত্থত্তে, ভিক্খৰে, অভিরতা সত্তা পুরিসেসু সংযোগং গতা. এৰং খো, ভিক্খৰে, ইত্থী ইত্থত্তং নাতিৰত্ততি.

‘‘পুরিসো, ভিক্খৰে, অজ্ঝত্তং পুরিসিন্দ্রিযং মনসি করোতি – পুরিসকুত্তং পুরিসাকপ্পং পুরিসৰিধং পুরিসচ্ছন্দং পুরিসস্সরং পুরিসালঙ্কারং. সো তত্থ রজ্জতি তত্রাভিরমতি. সো তত্থ রত্তো তত্রাভিরতো বহিদ্ধা ইত্থিন্দ্রিযং মনসি করোতি – ইত্থিকুত্তং ইত্থাকপ্পং ইত্থিৰিধং ইত্থিচ্ছন্দং ইত্থিস্সরং ইত্থালঙ্কারং. সো তত্থ রজ্জতি তত্রাভিরমতি. সো তত্থ রত্তো তত্রাভিরতো বহিদ্ধা সংযোগং আকঙ্খতি. যঞ্চস্স সংযোগপচ্চযা উপ্পজ্জতি সুখং সোমনস্সং তঞ্চ আকঙ্খতি. পুরিসত্তে, ভিক্খৰে, অভিরতা সত্তা ইত্থীসু সংযোগং গতা. এৰং খো, ভিক্খৰে, পুরিসো পুরিসত্তং নাতিৰত্ততি. এৰং খো, ভিক্খৰে, সংযোগো হোতি.

‘‘কথঞ্চ, ভিক্খৰে, ৰিসংযোগো হোতি? ইত্থী, ভিক্খৰে, অজ্ঝত্তং ইত্থিন্দ্রিযং ন মনসি করোতি – ইত্থিকুত্তং ইত্থাকপ্পং ইত্থিৰিধং ইত্থিচ্ছন্দং ইত্থিস্সরং ইত্থালঙ্কারং. সা তত্থ ন রজ্জতি, সা তত্র নাভিরমতি. সা তত্থ অরত্তা তত্র অনভিরতা বহিদ্ধা পুরিসিন্দ্রিযং ন মনসি করোতি – পুরিসকুত্তং পুরিসাকপ্পং পুরিসৰিধং পুরিসচ্ছন্দং পুরিসস্সরং পুরিসালঙ্কারং. সা তত্থ ন রজ্জতি, তত্র নাভিরমতি. সা তত্থ অরত্তা তত্র অনভিরতা বহিদ্ধা সংযোগং নাকঙ্খতি. যঞ্চস্সা সংযোগপচ্চযা উপ্পজ্জতি সুখং সোমনস্সং তঞ্চ নাকঙ্খতি. ইত্থত্তে, ভিক্খৰে, অনভিরতা সত্তা পুরিসেসু ৰিসংযোগং গতা. এৰং খো, ভিক্খৰে, ইত্থী ইত্থত্তং অতিৰত্ততি.

‘‘পুরিসো, ভিক্খৰে, অজ্ঝত্তং পুরিসিন্দ্রিযং ন মনসি করোতি – পুরিসকুত্তং পুরিসাকপ্পং পুরিসৰিধং পুরিসচ্ছন্দং পুরিসস্সরং পুরিসালঙ্কারং. সো তত্থ ন রজ্জতি, সো তত্র নাভিরমতি. সো তত্থ অরত্তো তত্র অনভিরতো বহিদ্ধা ইত্থিন্দ্রিযং ন মনসি করোতি – ইত্থিকুত্তং ইত্থাকপ্পং ইত্থিৰিধং ইত্থিচ্ছন্দং ইত্থিস্সরং ইত্থালঙ্কারং. সো তত্থ ন রজ্জতি, তত্র নাভিরমতি. সো তত্থ অরত্তো তত্র অনভিরতো বহিদ্ধা সংযোগং নাকঙ্খতি. যঞ্চস্স সংযোগপচ্চযা উপ্পজ্জতি সুখং সোমনস্সং তঞ্চ নাকঙ্খতি. পুরিসত্তে, ভিক্খৰে, অনভিরতা সত্তা ইত্থীসু ৰিসংযোগং গতা. এৰং খো, ভিক্খৰে, পুরিসো পুরিসত্তং অতিৰত্ততি. এৰং খো, ভিক্খৰে, ৰিসংযোগো হোতি. অযং খো, ভিক্খৰে, সংযোগো ৰিসংযোগো ধম্মপরিযাযো’’তি. অট্ঠমং.

৯. দানমহপ্ফলসুত্তং

৫২. একং সমযং ভগৰা চম্পাযং ৰিহরতি গগ্গরায পোক্খরণিযা তীরে. অথ খো সম্বহুলা চম্পেয্যকা উপাসকা যেন আযস্মা সারিপুত্তো তেনুপসঙ্কমিংসু; উপসঙ্কমিত্ৰা আযস্মন্তং সারিপুত্তং অভিৰাদেত্ৰা একমন্তং নিসীদিংসু. একমন্তং নিসিন্না খো চম্পেয্যকা উপাসকা আযস্মন্তং সারিপুত্তং এতদৰোচুং – ‘‘চিরস্সুতা নো, ভন্তে [ভন্তে সারিপুত্ত (সী.)], ভগৰতো সম্মুখা ধম্মীকথা. সাধু মযং, ভন্তে, লভেয্যাম ভগৰতো সম্মুখা ধম্মিং কথং [ভগৰতো সন্তিকা ধম্মিং কথং (সী.), ভগৰতো ধম্মিং কথং (স্যা.)] সৰনাযা’’তি. ‘‘তেনহাৰুসো, তদহুপোসথে আগচ্ছেয্যাথ, অপ্পেৰ নাম লভেয্যাথ ভগৰতো সম্মুখা [ভগৰতো সন্তিকে (স্যা.)] ধম্মিং কথং সৰনাযা’’তি. ‘‘এৰং, ভন্তে’’তি খো চম্পেয্যকা উপাসকা আযস্মতো সারিপুত্তস্স পটিস্সুত্ৰা উট্ঠাযাসনা আযস্মন্তং সারিপুত্তং অভিৰাদেত্ৰা পদক্খিণং কত্ৰা পক্কমিংসু.

অথ খো চম্পেয্যকা উপাসকা তদহুপোসথে যেনাযস্মা সারিপুত্তো তেনুপসঙ্কমিংসু; উপসঙ্কমিত্ৰা আযস্মন্তং সারিপুত্তং অভিৰাদেত্ৰা একমন্তং অট্ঠংসু. অথ খো আযস্মা সারিপুত্তো তেহি চম্পেয্যকেহি উপাসকেহি সদ্ধিং যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা সারিপুত্তো ভগৰন্তং এতদৰোচ –

‘‘সিযা নু খো, ভন্তে, ইধেকচ্চস্স তাদিসংযেৰ দানং দিন্নং ন মহপ্ফলং হোতি ন মহানিসংসং; সিযা পন, ভন্তে, ইধেকচ্চস্স তাদিসংযেৰ দানং দিন্নং মহপ্ফলং হোতি মহানিসংস’’ন্তি? ‘‘সিযা, সারিপুত্ত, ইধেকচ্চস্স তাদিসংযেৰ দানং দিন্নং ন মহপ্ফলং হোতি ন মহানিসংসং; সিযা পন, সারিপুত্ত, ইধেকচ্চস্স তাদিসংযেৰ দানং দিন্নং মহপ্ফলং হোতি মহানিসংস’’ন্তি. ‘‘কো নু খো, ভন্তে, হেতু কো পচ্চযো যেন মিধেকচ্চস্স তাদিসংযেৰ দানং দিন্নং ন মহপ্ফলং হোতি ন মহানিসংসং; কো নু খো, ভন্তে, হেতু কো পচ্চযো যেন মিধেকচ্চস্স তাদিসংযেৰ দানং দিন্নং মহপ্ফলং হোতি মহানিসংস’’ন্তি?

‘‘ইধ, সারিপুত্ত, একচ্চো সাপেখো [সাপেক্খো (স্যা.)] দানং দেতি, পতিবদ্ধচিত্তো [পতিবন্ধচিত্তো (ক.)] দানং দেতি, সন্নিধিপেখো দানং দেতি, ‘ইমং পেচ্চ পরিভুঞ্জিস্সামী’তি দানং দেতি. সো তং দানং দেতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. তং কিং মঞ্ঞসি, সারিপুত্ত, দদেয্য ইধেকচ্চো এৰরূপং দান’’ন্তি? ‘‘এৰং, ভন্তে’’.

‘‘তত্র, সারিপুত্ত, য্ৰাযং সাপেখো দানং দেতি, পতিবদ্ধচিত্তো দানং দেতি, সন্নিধিপেখো দানং দেতি, ‘ইমং পেচ্চ পরিভুঞ্জিস্সামী’তি দানং দেতি. সো তং দানং দত্ৰা কাযস্স ভেদা পরং মরণা চাতুমহারাজিকানং দেৰানং সহব্যতং উপপজ্জতি. সো তং কম্মং খেপেত্ৰা তং ইদ্ধিং তং যসং তং আধিপচ্চং আগামী হোতি আগন্তা ইত্থত্তং.

‘‘ইধ পন, সারিপুত্ত, একচ্চো ন হেৰ খো সাপেখো দানং দেতি, ন পতিবদ্ধচিত্তো দানং দেতি, ন সন্নিধিপেখো দানং দেতি, ন ‘ইমং পেচ্চ পরিভুঞ্জিস্সামী’তি দানং দেতি; অপি চ খো ‘সাহু দান’ন্তি দানং দেতি…পে… নপি ‘সাহু দান’ন্তি দানং দেতি; অপি চ খো ‘দিন্নপুব্বং কতপুব্বং পিতুপিতামহেহি ন অরহামি পোরাণং কুলৰংসং হাপেতু’ন্তি দানং দেতি…পে… নপি ‘দিন্নপুব্বং কতপুব্বং পিতুপিতামহেহি ন অরহামি পোরাণং কুলৰংসং হাপেতু’ন্তি দানং দেতি; অপি চ খো ‘অহং পচামি, ইমে ন পচন্তি, নারহামি পচন্তো অপচন্তানং দানং অদাতু’ন্তি দানং দেতি…পে… নপি ‘অহং পচামি, ইমে ন পচন্তি, নারহামি পচন্তো অপচন্তানং দানং অদাতু’ন্তি দানং দেতি; অপি চ খো ‘যথা তেসং পুব্বকানং ইসীনং তানি মহাযঞ্ঞানি অহেসুং, সেয্যথিদং – অট্ঠকস্স ৰামকস্স ৰামদেৰস্স ৰেস্সামিত্তস্স যমদগ্গিনো অঙ্গীরসস্স ভারদ্ৰাজস্স ৰাসেট্ঠস্স কস্সপস্স ভগুনো, এৰং মে অযং দানসংৰিভাগো ভৰিস্সতী’তি দানং দেতি…পে… নপি ‘যথা তেসং পুব্বকানং ইসীনং তানি মহাযঞ্ঞানি অহেসুং, সেয্যথিদং – অট্ঠকস্স ৰামকস্স ৰামদেৰস্স ৰেস্সামিত্তস্স যমদগ্গিনো অঙ্গীরসস্স ভারদ্ৰাজস্স ৰাসেট্ঠস্স কস্সপস্স ভগুনো, এৰং মে অযং দানসংৰিভাগো ভৰিস্সতী’তি দানং দেতি; অপি চ খো ‘ইমং মে দানং দদতো চিত্তং পসীদতি, অত্তমনতা সোমনস্সং উপজাযতী’তি দানং দেতি…পে… নপি ‘ইমং মে দানং দদতো চিত্তং পসীদতি, অত্তমনতা সোমনস্সং উপজাযতী’তি দানং দেতি; অপি চ খো চিত্তালঙ্কারচিত্তপরিক্খারং দানং দেতি. সো তং দানং দেতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. তং কিং মঞ্ঞসি, সারিপুত্ত, দদেয্য ইধেকচ্চো এৰরূপং দান’’ন্তি? ‘‘এৰং, ভন্তে’’.

‘‘তত্র, সারিপুত্ত, য্ৰাযং ন হেৰ [নহেৰ খো (সী. স্যা.)] সাপেখো দানং দেতি; ন পতিবদ্ধচিত্তো দানং দেতি; ন সন্নিধিপেখো দানং দেতি; ন ‘ইমং পেচ্চ পরিভুঞ্জিস্সামী’তি দানং দেতি; নপি ‘সাহু দান’ন্তি দানং দেতি; নপি ‘দিন্নপুব্বং কতপুব্বং পিতুপিতামহেহি ন অরহামি পোরাণং কুলৰংসং হাপেতু’ন্তি দানং দেতি; নপি ‘অহং পচামি, ইমে ন পচন্তি, নারহামি পচন্তো অপচন্তানং দানং অদাতু’ন্তি দানং দেতি; নপি ‘যথা তেসং পুব্বকানং ইসীনং তানি মহাযঞ্ঞানি অহেসুং, সেয্যথিদং – অট্ঠকস্স ৰামকস্স ৰামদেৰস্স ৰেস্সামিত্তস্স যমদগ্গিনো অঙ্গীরসস্স ভারদ্ৰাজস্স ৰাসেট্ঠস্স কস্সপস্স ভগুনো, এৰং মে অযং দানসংৰিভাগো ভৰিস্সতী’তি দানং দেতি; নপি ‘ইমং মে দানং দদতো চিত্তং পসীদতি, অত্তমনতা সোমনস্সং উপজাযতী’তি দানং দেতি; অপি চ খো চিত্তালঙ্কারচিত্তপরিক্খারং দানং দেতি. সো তং দানং দত্ৰা কাযস্স ভেদা পরং মরণা ব্রহ্মকাযিকানং দেৰানং সহব্যতং উপপজ্জতি. সো তং কম্মং খেপেত্ৰা তং ইদ্ধিং তং যসং তং আধিপচ্চং অনাগামী হোতি অনাগন্তা ইত্থত্তং. অযং খো, সারিপুত্ত, হেতু অযং পচ্চযো যেন মিধেকচ্চস্স তাদিসংযেৰ দানং দিন্নং ন মহপ্ফলং হোতি ন মহানিসংসং. অযং পন, সারিপুত্ত, হেতু অযং পচ্চযো যেন মিধেকচ্চস্স তাদিসংযেৰ দানং দিন্নং মহপ্ফলং হোতি মহানিসংস’’ন্তি. নৰমং.

১০. নন্দমাতাসুত্তং

৫৩. এৰং মে সুতং – একং সমযং আযস্মা চ সারিপুত্তো আযস্মা চ মহামোগ্গল্লানো দক্খিণাগিরিস্মিং চারিকং চরন্তি মহতা ভিক্খুসঙ্ঘেন সদ্ধিং. তেন খো পন সমযেন ৰেল়ুকণ্ডকী [ৰেল়ুকণ্ডকী (স্যা.) অ. নি. ৬.৩৭; ২.১৩৪; সং. নি. ২.১৭৩ পস্সিতব্বং] নন্দমাতা উপাসিকা রত্তিযা পচ্চূসসমযং পচ্চুট্ঠায পারাযনং [চূল়নি. পারাযনৰগ্গ, ৰত্থুগাথা] সরেন ভাসতি.

তেন খো পন সমযেন ৰেস্সৰণো মহারাজা উত্তরায দিসায দক্খিণং দিসং গচ্ছতি কেনচিদেৰ করণীযেন. অস্সোসি খো ৰেস্সৰণো মহারাজা নন্দমাতায উপাসিকায পারাযনং সরেন ভাসন্তিযা, সুত্ৰা কথাপরিযোসানং আগমযমানো অট্ঠাসি.

অথ খো নন্দমাতা উপাসিকা পারাযনং সরেন ভাসিত্ৰা তুণ্হী অহোসি. অথ খো ৰেস্সৰণো মহারাজা নন্দমাতায উপাসিকায কথাপরিযোসানং ৰিদিত্ৰা অব্ভানুমোদি – ‘‘সাধু ভগিনি, সাধু ভগিনী’’তি! ‘‘কো পনেসো, ভদ্রমুখা’’তি? ‘‘অহং তে, ভগিনি, ভাতা ৰেস্সৰণো, মহারাজা’’তি. ‘‘সাধু, ভদ্রমুখ, তেন হি যো মে অযং ধম্মপরিযাযো ভণিতো ইদং তে হোতু আতিথেয্য’’ন্তি. ‘‘সাধু, ভগিনি, এতঞ্চেৰ মে হোতু আতিথেয্যং. স্ৰেৰ [স্ৰে চ (সী.)] সারিপুত্তমোগ্গল্লানপ্পমুখো ভিক্খুসঙ্ঘো অকতপাতরাসো ৰেল়ুকণ্ডকং আগমিস্সতি, তঞ্চ ভিক্খুসঙ্ঘং পরিৰিসিত্ৰা মম দক্খিণং আদিসেয্যাসি. এতঞ্চেৰ [এৰঞ্চ (সী. স্যা.), এতঞ্চ (?)] মে ভৰিস্সতি আতিথেয্য’’ন্তি.

অথ খো নন্দমাতা উপাসিকা তস্সা রত্তিযা অচ্চযেন সকে নিৰেসনে পণীতং খাদনীযং ভোজনীযং পটিযাদাপেসি. অথ খো সারিপুত্তমোগ্গল্লানপ্পমুখো ভিক্খুসঙ্ঘো অকতপাতরাসো যেন ৰেল়ুকণ্ডকো তদৰসরি. অথ খো নন্দমাতা উপাসিকা অঞ্ঞতরং পুরিসং আমন্তেসি – ‘‘এহি ত্ৰং, অম্ভো পুরিস, আরামং গন্ত্ৰা ভিক্খুসঙ্ঘস্স কালং আরোচেহি – ‘কালো, ভন্তে, অয্যায নন্দমাতুযা নিৰেসনে নিট্ঠিতং ভত্ত’’’ন্তি. ‘‘এৰং, অয্যে’’তি খো সো পুরিসো নন্দমাতায উপাসিকায পটিস্সুত্ৰা আরামং গন্ত্ৰা ভিক্খুসঙ্ঘস্স কালং আরোচেসি – ‘‘কালো, ভন্তে, অয্যায নন্দমাতুযা নিৰেসনে নিট্ঠিতং ভত্ত’’ন্তি. অথ খো সারিপুত্তমোগ্গল্লানপ্পমুখো ভিক্খুসঙ্ঘো পুব্বণ্হসমযং নিৰাসেত্ৰা পত্তচীৰরমাদায যেন নন্দমাতায উপাসিকায নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো নন্দমাতা উপাসিকা সারিপুত্তমোগ্গল্লানপ্পমুখং ভিক্খুসঙ্ঘং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি.

অথ খো নন্দমাতা উপাসিকা আযস্মন্তং সারিপুত্তং ভুত্তাৰিং ওনীতপত্তপাণিং একমন্তং নিসীদি. একমন্তং নিসিন্নং খো নন্দমাতরং উপাসিকং আযস্মা সারিপুত্তো এতদৰোচ – ‘‘কো পন তে, নন্দমাতে, ভিক্খুসঙ্ঘস্স অব্ভাগমনং আরোচেসী’’তি?

‘‘ইধাহং, ভন্তে, রত্তিযা পচ্চূসসমযং পচ্চুট্ঠায পারাযনং সরেন ভাসিত্ৰা তুণ্হী অহোসিং. অথ খো, ভন্তে, ৰেস্সৰণো মহারাজা মম কথাপরিযোসানং ৰিদিত্ৰা অব্ভানুমোদি – ‘সাধু, ভগিনি, সাধু, ভগিনী’তি! ‘কো পনেসো, ভদ্রমুখা’তি? ‘অহং তে, ভগিনি, ভাতা ৰেস্সৰণো, মহারাজা’তি. ‘সাধু, ভদ্রমুখ, তেন হি যো মে অযং ধম্মপরিযাযো ভণিতো ইদং তে হোতু আতিথেয্য’ন্তি. ‘সাধু, ভগিনি, এতঞ্চেৰ মে হোতু আতিথেয্যং. স্ৰেৰ সারিপুত্তমোগ্গল্লানপ্পমুখো ভিক্খুসঙ্ঘো অকতপাতরাসো ৰেল়ুকণ্ডকং আগমিস্সতি, তঞ্চ ভিক্খুসঙ্ঘং পরিৰিসিত্ৰা মম দক্খিণং আদিসেয্যাসি. এতঞ্চেৰ [এতঞ্চ (সী.), এৰঞ্চ (স্যা.)] মে ভৰিস্সতি আতিথেয্য’ন্তি. যদিদং [যমিদং (ম. নি. ১.৩৬৩)], ভন্তে, দানে [পুঞ্ঞং হি তং (সী.), পুঞ্ঞং পুঞ্ঞমহিতং (স্যা.), পুঞ্ঞং ৰা পুঞ্ঞমহং ৰা (পী.), পুঞ্ঞং ৰা পুঞ্ঞমহী ৰা (ক.)] পুঞ্ঞঞ্চ পুঞ্ঞমহী চ তং [পুঞ্ঞং হি তং (সী.), পুঞ্ঞং পুঞ্ঞমহিতং (স্যা.), পুঞ্ঞং ৰা পুঞ্ঞমহং ৰা (পী.), পুঞ্ঞং ৰা পুঞ্ঞমহী ৰা (ক.)] ৰেস্সৰণস্স মহারাজস্স সুখায হোতূ’’তি.

‘‘অচ্ছরিযং, নন্দমাতে, অব্ভুতং, নন্দমাতে! যত্র হি নাম ৰেস্সৰণেন মহারাজেন এৰংমহিদ্ধিকেন এৰংমহেসক্খেন দেৰপুত্তেন সম্মুখা সল্লপিস্সসী’’তি.

‘‘ন খো মে, ভন্তে, এসেৰ অচ্ছরিযো অব্ভুতো ধম্মো. অত্থি মে অঞ্ঞোপি অচ্ছরিযো অব্ভুতো ধম্মো. ইধ মে, ভন্তে, নন্দো নাম একপুত্তকো পিযো মনাপো. তং রাজানো কিস্মিঞ্চিদেৰ পকরণে ওকস্স পসয্হ জীৰিতা ৰোরোপেসুং. তস্মিং খো পনাহং, ভন্তে, দারকে গহিতে ৰা গয্হমানে ৰা ৰধে ৰা ৰজ্ঝমানে ৰা হতে ৰা হঞ্ঞমানে ৰা নাভিজানামি চিত্তস্স অঞ্ঞথত্ত’’ন্তি. ‘‘অচ্ছরিযং, নন্দমাতে, অব্ভুতং নন্দমাতে! যত্র হি নাম চিত্তুপ্পাদম্পি [চিত্তুপ্পাদমত্তম্পি (স্যা.)] পরিসোধেস্সসী’’তি.

‘‘ন খো মে, ভন্তে, এসেৰ অচ্ছরিযো অব্ভুতো ধম্মো. অত্থি মে অঞ্ঞোপি অচ্ছরিযো অব্ভুতো ধম্মো. ইধ মে, ভন্তে, সামিকো কালঙ্কতো অঞ্ঞতরং যক্খযোনিং উপপন্নো. সো মে তেনেৰ পুরিমেন অত্তভাৰেন উদ্দস্সেসি. ন খো পনাহং, ভন্তে, অভিজানামি ততোনিদানং চিত্তস্স অঞ্ঞথত্ত’’ন্তি. ‘‘অচ্ছরিযং, নন্দমাতে, অব্ভুতং, নন্দমাতে! যত্র হি নাম চিত্তুপ্পাদম্পি পরিসোধেস্সসী’’তি.

‘‘ন খো মে, ভন্তে, এসেৰ অচ্ছরিযো অব্ভুতো ধম্মো. অত্থি মে অঞ্ঞোপি অচ্ছরিযো অব্ভুতো ধম্মো. যতোহং, ভন্তে, সামিকস্স দহরস্সেৰ দহরা আনীতা নাভিজানামি সামিকং মনসাপি অতিচরিতা [অতিচরিতুং (স্যা.), অতিচারিত্তং (ক.)], কুতো পন কাযেনা’’তি! ‘‘অচ্ছরিযং, নন্দমাতে, অব্ভুতং, নন্দমাতে! যত্র হি নাম চিত্তুপ্পাদম্পি পরিসোধেস্সসী’’তি.

‘‘ন খো মে, ভন্তে, এসেৰ অচ্ছরিযো অব্ভুতো ধম্মো. অত্থি মে অঞ্ঞোপি অচ্ছরিযো অব্ভুতো ধম্মো. যদাহং, ভন্তে, উপাসিকা পটিদেসিতা নাভিজানামি কিঞ্চি সিক্খাপদং সঞ্চিচ্চ ৰীতিক্কমিতা’’তি. ‘‘অচ্ছরিযং, নন্দমাতে, অব্ভুতং, নন্দমাতে’’তি!

‘‘ন খো মে, ভন্তে, এসেৰ অচ্ছরিযো অব্ভুতো ধম্মো. অত্থি মে অঞ্ঞোপি অচ্ছরিযো অব্ভুতো ধম্মো. ইধাহং, ভন্তে, যাৰদেৰ [যাৰদেৰ (সী. স্যা.) সং. নি. ২.১৫২ পাল়ি চ অট্ঠকথাটীকা চ পস্সিতব্বা] আকঙ্খামি ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরামি. ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং ৰিৰেকজং পীতিসুখং দুতিযং ঝানং উপসম্পজ্জ ৰিহরামি. পীতিযা চ ৰিরাগা উপেক্খিকা চ ৰিহরামি সতা চ সম্পজানা সুখঞ্চ কাযে পটিসংৰেদেমি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরামি. সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরামী’’তি. ‘‘অচ্ছরিযং, নন্দমাতে, অব্ভুতং, নন্দমাতে’’তি!

‘‘ন খো মে, ভন্তে, এসেৰ অচ্ছরিযো অব্ভুতো ধম্মো. অত্থি মে অঞ্ঞোপি অচ্ছরিযো অব্ভুতো ধম্মো. যানিমানি, ভন্তে, ভগৰতা দেসিতানি পঞ্চোরম্ভাগিযানি সংযোজনানি নাহং তেসং কিঞ্চি অত্তনি অপ্পহীনং সমনুপস্সামী’’তি. ‘‘অচ্ছরিযং, নন্দমাতে, অব্ভুতং, নন্দমাতে’’তি!

অথ খো আযস্মা সারিপুত্তো নন্দমাতরং উপাসিকং ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা উট্ঠাযাসনা পক্কামীতি. দসমং.

মহাযঞ্ঞৰগ্গো পঞ্চমো.