৯. পহানসুত্তং

৯. ‘‘সত্তন্নং, ভিক্খৰে, সংযোজনানং পহানায সমুচ্ছেদায ব্রহ্মচরিযং ৰুস্সতি. কতমেসং সত্তন্নং? অনুনযসংযোজনস্স পহানায সমুচ্ছেদায ব্রহ্মচরিযং ৰুস্সতি, পটিঘসংযোজনস্স…পে… দিট্ঠিসংযোজনস্স… ৰিচিকিচ্ছাসংযোজনস্স… মানসংযোজনস্স… ভৰরাগসংযোজনস্স … অৰিজ্জাসংযোজনস্স পহানায সমুচ্ছেদায ব্রহ্মচরিযং ৰুস্সতি. ইমেসং খো, ভিক্খৰে, সত্তন্নং সংযোজনানং পহানায সমুচ্ছেদায ব্রহ্মচরিযং ৰুস্সতি. যতো চ খো, ভিক্খৰে, ভিক্খুনো অনুনযসংযোজনং পহীনং হোতি উচ্ছিন্নমূলং তালাৰত্থুকতং অনভাৰং কতং আযতিং অনুপ্পাদধম্মং. পটিঘসংযোজনং…পে… দিট্ঠিসংযোজনং… ৰিচিকিচ্ছাসংযোজনং… মানসংযোজনং… ভৰরাগসংযোজনং… অৰিজ্জাসংযোজনং পহীনং হোতি উচ্ছিন্নমূলং তালাৰত্থুকতং অনভাৰং কতং আযতিং অনুপ্পাদধম্মং. অযং ৰুচ্চতি, ভিক্খৰে, ভিক্খু অচ্ছেচ্ছি তণ্হং, ৰিৰত্তযি সংযোজনং, সম্মা মানাভিসমযা অন্তমকাসি দুক্খস্সা’’তি. নৰমং.