১০. রত্তিদিৰসসুত্তং

৮৪. ‘‘ছহি, ভিক্খৰে, ধম্মেহি সমন্নাগতস্স ভিক্খুনো যা রত্তি ৰা দিৰসো ৰা আগচ্ছতি হানিযেৰ পাটিকঙ্খা কুসলেসু ধম্মেসু, নো ৰুদ্ধি. কতমেহি ছহি? ইধ, ভিক্খৰে, ভিক্খু মহিচ্ছো হোতি, ৰিঘাতৰা, অসন্তুট্ঠো, ইতরীতরচীৰরপিণ্ডপাতসেনাসনগিলানপ্পচ্চযভেসজ্জপরিক্খারেন, অস্সদ্ধো হোতি, দুস্সীলো হোতি, কুসীতো হোতি, মুট্ঠস্সতি হোতি, দুপ্পঞ্ঞো হোতি. ইমেহি খো, ভিক্খৰে, ছহি ধম্মেহি সমন্নাগতস্স ভিক্খুনো যা রত্তি ৰা দিৰসো ৰা আগচ্ছতি হানিযেৰ পাটিকঙ্খা কুসলেসু ধম্মেসু, নো ৰুদ্ধি.

‘‘ছহি, ভিক্খৰে, ধম্মেহি সমন্নাগতস্স ভিক্খুনো যা রত্তি ৰা দিৰসো ৰা আগচ্ছতি ৰুদ্ধিযেৰ পাটিকঙ্খা কুসলেসু ধম্মেসু, নো পরিহানি. কতমেহি ছহি? ইধ, ভিক্খৰে, ভিক্খু ন মহিচ্ছো হোতি, অৰিঘাতৰা, সন্তুট্ঠো, ইতরীতরচীৰরপিণ্ডপাতসেনাসনগিলানপ্পচ্চযভেসজ্জপরিক্খারেন, সদ্ধো হোতি, সীলৰা হোতি, আরদ্ধৰীরিযো হোতি, সতিমা হোতি, পঞ্ঞৰা হোতি. ইমেহি খো, ভিক্খৰে, ছহি ধম্মেহি সমন্নাগতস্স ভিক্খুনো যা রত্তি ৰা দিৰসো ৰা আগচ্ছতি ৰুদ্ধিযেৰ পাটিকঙ্খা, কুসলেসু ধম্মেসু নো পরিহানী’’তি. দসমং.

অরহত্তৰগ্গো অট্ঠমো. [ততিযো (স্যা. ক.)]