৮. পুরিসিন্দ্রিযঞাণসুত্তং

৬২. এৰং মে সুতং – একং সমযং ভগৰা কোসলেসু চারিকং চরমানো মহতা ভিক্খুসঙ্ঘেন সদ্ধিং যেন দণ্ডকপ্পকং নাম কোসলানং নিগমো তদৰসরি. অথ খো ভগৰা মগ্গা ওক্কম্ম অঞ্ঞতরস্মিং রুক্খমূলে পঞ্ঞত্তে আসনে নিসীদি. তে চ ভিক্খূ দণ্ডকপ্পকং পৰিসিংসু আৰসথং পরিযেসিতুং.

অথ খো আযস্মা আনন্দো সম্বহুলেহি ভিক্খূহি সদ্ধিং যেন অচিরৰতী নদী তেনুপসঙ্কমি গত্তানি পরিসিঞ্চিতুং. অচিরৰতিযা নদিযা গত্তানি পরিসিঞ্চিত্ৰা পচ্চুত্তরিত্ৰা একচীৰরো অট্ঠাসি গত্তানি পুব্বাপযমানো. অথ খো অঞ্ঞতরো ভিক্খু যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মন্তং আনন্দং এতদৰোচ – ‘‘কিং নু খো, আৰুসো আনন্দ, সব্বং চেতসো সমন্নাহরিত্ৰা নু খো দেৰদত্তো ভগৰতা ব্যাকতো – ‘আপাযিকো দেৰদত্তো নেরযিকো কপ্পট্ঠো অতেকিচ্ছো’তি [চূল়ৰ. ৩৪৮; অ. নি. ৮.৭ পস্সিতব্বং], উদাহু কেনচিদেৰ পরিযাযেনা’তি? ‘‘এৰং খো পনেতং, আৰুসো, ভগৰতা ব্যাকত’’ন্তি.

অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘ইধাহং, ভন্তে, সম্বহুলেহি ভিক্খূহি সদ্ধিং যেন অচিরৰতী নদী তেনুপসঙ্কমিং গত্তানি পরিসিঞ্চিতুং. অচিরৰতিযা নদিযা গত্তানি পরিসিঞ্চিত্ৰা পচ্চুত্তরিত্ৰা একচীৰরো অট্ঠাসিং গত্তানি পুব্বাপযমানো. অথ খো, ভন্তে, অঞ্ঞতরো ভিক্খু যেনাহং তেনুপসঙ্কমি; উপসঙ্কমিত্ৰা মং এতদৰোচ – ‘কিং নু খো, আৰুসো, আনন্দ সব্বং চেতসো সমন্নাহরিত্ৰা নু খো দেৰদত্তো ভগৰতা ব্যাকতো – আপাযিকো দেৰদত্তো নেরযিকো কপ্পট্ঠো অতেকিচ্ছোতি, উদাহু কেনচিদেৰ পরিযাযেনা’তি? এৰং ৰুত্তে অহং, ভন্তে, তং ভিক্খুং এতদৰোচং – ‘এৰং খো পনেতং, আৰুসো, ভগৰতা ব্যাকত’’’ন্তি.

‘‘সো ৰা [সো চ (স্যা.)] খো, আনন্দ, ভিক্খু নৰো ভৰিস্সতি অচিরপব্বজিতো, থেরো ৰা পন বালো অব্যত্তো. কথঞ্হি নাম যং মযা একংসেন ব্যাকতং তত্থ দ্ৰেজ্ঝং আপজ্জিস্সতি! নাহং, আনন্দ, অঞ্ঞং একপুগ্গলম্পি সমনুপস্সামি, যো এৰং মযা সব্বং চেতসো সমন্নাহরিত্ৰা ব্যাকতো, যথযিদং দেৰদত্তো. যাৰকীৰঞ্চাহং, আনন্দ, দেৰদত্তস্স ৰালগ্গকোটিনিত্তুদনমত্তম্পি সুক্কধম্মং অদ্দসং; নেৰ তাৰাহং দেৰদত্তং ব্যাকাসিং – ‘আপাযিকো দেৰদত্তো নেরযিকো কপ্পট্ঠো অতেকিচ্ছো’তি. যতো চ খো অহং, আনন্দ, দেৰদত্তস্স ৰালগ্গকোটিনিত্তুদনমত্তম্পি সুক্কধম্মং ন অদ্দসং; অথাহং দেৰদত্তং ব্যাকাসিং – ‘আপাযিকো দেৰদত্তো নেরযিকো কপ্পট্ঠো অতেকিচ্ছো’তি.

‘‘সেয্যথাপি, আনন্দ, গূথকূপো সাধিকপোরিসো পূরো গূথস্স সমতিত্তিকো. তত্র পুরিসো সসীসকো নিমুগ্গো অস্স. তস্স কোচিদেৰ পুরিসো উপ্পজ্জেয্য অত্থকামো হিতকামো যোগক্খেমকামো তম্হা গূথকূপা উদ্ধরিতুকামো. সো তং গূথকূপং সমন্তানুপরিগচ্ছন্তো নেৰ পস্সেয্য তস্স পুরিসস্স ৰালগ্গকোটিনিত্তুদনমত্তম্পি গূথেন অমক্খিতং, যত্থ তং গহেত্ৰা উদ্ধরেয্য. এৰমেৰং খো অহং, আনন্দ, যতো দেৰদত্তস্স ৰালগ্গকোটিনিত্তুদনমত্তম্পি সুক্কধম্মং ন অদ্দসং; অথাহং দেৰদত্তং ব্যাকাসিং – ‘আপাযিকো দেৰদত্তো নেরযিকো কপ্পট্ঠো অতেকিচ্ছো’তি. সচে তুম্হে, আনন্দ, সুণেয্যাথ তথাগতস্স পুরিসিন্দ্রিযঞাণানি ৰিভজিস্সামী’’তি [ৰিভজন্তস্সাতি (সী. স্যা. পী.)]?

‘‘এতস্স, ভগৰা, কালো; এতস্স, সুগত, কালো যং ভগৰা পুরিসিন্দ্রিযঞাণানি ৰিভজেয্য. ভগৰতো সুত্ৰা ভিক্খূ ধারেস্সন্তী’’তি. ‘‘তেনহানন্দ, সুণাহি, সাধুকং মনসি করোহি; ভাসিস্সামী’’তি. ‘‘এৰং, ভন্তে’’তি খো আযস্মা আনন্দো ভগৰতো পচ্চস্সোসি. ভগৰা এতদৰোচ –

‘‘ইধাহং, আনন্দ, একচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘ইমস্স খো পুগ্গলস্স কুসলা ধম্মা অন্তরহিতা, অকুসলা ধম্মা সম্মুখীভূতা. অত্থি চ খ্ৰস্স কুসলমূলং অসমুচ্ছিন্নং, তম্হা তস্স কুসলা কুসলং পাতুভৰিস্সতি. এৰমযং পুগ্গলো আযতিং অপরিহানধম্মো ভৰিস্সতী’তি. সেয্যথাপি, আনন্দ, বীজানি অখণ্ডানি অপূতীনি অৰাতাতপহতানি সারদানি সুখসযিতানি সুখেত্তে সুপরিকম্মকতায ভূমিযা নিক্খিত্তানি. জানেয্যাসি ত্ৰং, আনন্দ, ইমানি বীজানি ৰুদ্ধিং ৰিরূল়্হিং ৰেপুল্লং আপজ্জিস্সন্তী’’তি? ‘‘এৰং, ভন্তে’’. ‘‘এৰমেৰং খো অহং, আনন্দ, ইধেকচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘ইমস্স খো পুগ্গলস্স কুসলা ধম্মা অন্তরহিতা, অকুসলা ধম্মা সম্মুখীভূতা. অত্থি চ খ্ৰস্স কুসলমূলং অসমুচ্ছিন্নং, তম্হা তস্স কুসলা কুসলং পাতুভৰিস্সতি. এৰমযং পুগ্গলো আযতিং অপরিহানধম্মো ভৰিস্সতী’তি. এৰম্পি খো, আনন্দ, তথাগতস্স পুরিসপুগ্গলো চেতসা চেতো পরিচ্চ ৰিদিতো হোতি. এৰম্পি খো, আনন্দ, তথাগতস্স পুরিসিন্দ্রিযঞাণং চেতসা চেতো পরিচ্চ ৰিদিতং হোতি. এৰম্পি খো, আনন্দ, তথাগতস্স আযতিং ধম্মসমুপ্পাদো চেতসা চেতো পরিচ্চ ৰিদিতো হোতি.

‘‘ইধ পনাহং, আনন্দ, একচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘ইমস্স খো পুগ্গলস্স অকুসলা ধম্মা অন্তরহিতা, কুসলা ধম্মা সম্মুখীভূতা. অত্থি চ খ্ৰস্স অকুসলমূলং অসমুচ্ছিন্নং, তম্হা তস্স অকুসলা অকুসলং পাতুভৰিস্সতি. এৰমযং পুগ্গলো আযতিং পরিহানধম্মো ভৰিস্সতী’তি. সেয্যথাপি, আনন্দ, বীজানি অখণ্ডানি অপূতীনি অৰাতাতপহতানি সারদানি সুখসযিতানি পুথুসিলায নিক্খিত্তানি. জানেয্যাসি ত্ৰং, আনন্দ, নযিমানি বীজানি ৰুদ্ধিং ৰিরূল়্হিং ৰেপুল্লং আপজ্জিস্সন্তী’’তি? ‘‘এৰং, ভন্তে’’. ‘‘এৰমেৰং খো অহং, আনন্দ, ইধেকচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘ইমস্স খো পুগ্গলস্স অকুসলা ধম্মা অন্তরহিতা, কুসলা ধম্মা সম্মুখীভূতা. অত্থি চ খ্ৰস্স অকুসলমূলং অসমুচ্ছিন্নং, তম্হা তস্স অকুসলা অকুসলং পাতুভৰিস্সতি. এৰমযং পুগ্গলো আযতিং পরিহানধম্মো ভৰিস্সতী’তি. এৰম্পি খো, আনন্দ, তথাগতস্স পুরিসপুগ্গলো চেতসা চেতো পরিচ্চ ৰিদিতো হোতি. এৰম্পি খো, আনন্দ, তথাগতস্স পুরিসিন্দ্রিযঞাণং চেতসা চেতো পরিচ্চ ৰিদিতং হোতি. এৰম্পি খো, আনন্দ, তথাগতস্স আযতিং ধম্মসমুপ্পাদো চেতসা চেতো পরিচ্চ ৰিদিতো হোতি.

‘‘ইধ পনাহং, আনন্দ, একচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘নত্থি ইমস্স পুগ্গলস্স ৰালগ্গকোটিনিত্তুদনমত্তোপি সুক্কো ধম্মো, সমন্নাগতোযং পুগ্গলো একন্তকাল়কেহি অকুসলেহি ধম্মেহি, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিস্সতী’তি. সেয্যথাপি, আনন্দ, বীজানি খণ্ডানি পূতীনি ৰাতাতপহতানি সুখেত্তে সুপরিকম্মকতায ভূমিযা নিক্খিত্তানি. জানেয্যাসি ত্ৰং, আনন্দ, নযিমানি বীজানি ৰুদ্ধিং ৰিরূল়্হিং ৰেপুল্লং আপজ্জিস্সন্তী’’তি? ‘‘এৰং, ভন্তে’’. ‘‘এৰমেৰং খো অহং, আনন্দ, ইধেকচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘নত্থি ইমস্স পুগ্গলস্স ৰালগ্গকোটিনিত্তুদনমত্তোপি সুক্কো ধম্মো, সমন্নাগতোযং পুগ্গলো একন্তকাল়কেহি অকুসলেহি ধম্মেহি, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিস্সতী’তি. এৰম্পি খো, আনন্দ, তথাগতস্স পুরিসপুগ্গলো চেতসা চেতো পরিচ্চ ৰিদিতো হোতি. এৰম্পি খো, আনন্দ, তথাগতস্স পুরিসিন্দ্রিযঞাণং চেতসা চেতো পরিচ্চ ৰিদিতং হোতি. এৰম্পি খো, আনন্দ, তথাগতস্স আযতিং ধম্মসমুপ্পাদো চেতসা চেতো পরিচ্চ ৰিদিতো হোতী’’তি.

এৰং ৰুত্তে আযস্মা আনন্দো ভগৰন্তং এতদৰোচ – ‘‘সক্কা নু খো, ভন্তে, ইমেসং তিণ্ণং পুগ্গলানং অপরেপি তযো পুগ্গলা সপ্পটিভাগা পঞ্ঞাপেতু’’ন্তি? ‘‘সক্কা, আনন্দা’’তি ভগৰা অৰোচ – ‘‘ইধাহং, আনন্দ, একচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘ইমস্স খো পুগ্গলস্স কুসলা ধম্মা অন্তরহিতা, অকুসলা ধম্মা সম্মুখীভূতা. অত্থি চ খ্ৰস্স কুসলমূলং অসমুচ্ছিন্নং, তম্পি সব্বেন সব্বং সমুগ্ঘাতং গচ্ছতি. এৰমযং পুগ্গলো আযতিং পরিহানধম্মো ভৰিস্সতী’তি. সেয্যথাপি, আনন্দ, অঙ্গারানি আদিত্তানি সম্পজ্জলিতানি সজোতিভূতানি পুথুসিলায নিক্খিত্তানি. জানেয্যাসি ত্ৰং, আনন্দ, নযিমানি অঙ্গারানি ৰুদ্ধিং ৰিরূল়্হিং ৰেপুল্লং আপজ্জিস্সন্তী’’তি? ‘‘এৰং, ভন্তে’’. ‘‘সেয্যথাপি ৰা পন, আনন্দ, সাযন্হসমযং [সাযন্হসমযে (স্যা. ক.)] সূরিযে ওগচ্ছন্তে, জানেয্যাসি ত্ৰং, আনন্দ, আলোকো অন্তরধাযিস্সতি অন্ধকারো পাতুভৰিস্সতী’’তি? ‘‘এৰং, ভন্তে’’. ‘‘সেয্যথাপি ৰা, পনানন্দ, অভিদো অদ্ধরত্তং ভত্তকালসমযে, জানেয্যাসি ত্ৰং, আনন্দ, আলোকো অন্তরহিতো অন্ধকারো পাতুভূতো’’তি? ‘‘এৰং, ভন্তে’’. ‘‘এৰমেৰং খো অহং, আনন্দ, ইধেকচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘ইমস্স খো পুগ্গলস্স কুসলা ধম্মা অন্তরহিতা, অকুসলা ধম্মা সম্মুখীভূতা. অত্থি চ খ্ৰস্স কুসলমূলং অসমুচ্ছিন্নং, তম্পি সব্বেন সব্বং সমুগ্ঘাতং গচ্ছতি. এৰমযং পুগ্গলো আযতিং পরিহানধম্মো ভৰিস্সতী’তি. এৰম্পি খো, আনন্দ, তথাগতস্স পুরিসপুগ্গলো চেতসা চেতো পরিচ্চ ৰিদিতো হোতি. এৰম্পি খো, আনন্দ, তথাগতস্স পুরিসিন্দ্রিযঞাণং চেতসা চেতো পরিচ্চ ৰিদিতং হোতি. এৰম্পি খো, আনন্দ, তথাগতস্স আযতিং ধম্মসমুপ্পাদো চেতসা চেতো পরিচ্চ ৰিদিতো হোতি.

‘‘ইধ পনাহং, আনন্দ, একচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘ইমস্স খো পুগ্গলস্স অকুসলা ধম্মা অন্তরহিতা, কুসলা ধম্মা সম্মুখীভূতা. অত্থি চ খ্ৰস্স অকুসলমূলং অসমুচ্ছিন্নং, তম্পি সব্বেন সব্বং সমুগ্ঘাতং গচ্ছতি. এৰমযং পুগ্গলো আযতিং অপরিহানধম্মো ভৰিস্সতী’তি. সেয্যথাপি, আনন্দ, অঙ্গারানি আদিত্তানি সম্পজ্জলিতানি সজোতিভূতানি সুক্খে তিণপুঞ্জে ৰা কট্ঠপুঞ্জে ৰা নিক্খিত্তানি. জানেয্যাসি ত্ৰং, আনন্দ, ইমানি অঙ্গারানি ৰুড্ঢিং ৰিরূল়্হিং ৰেপুল্লং আপজ্জিস্সন্তী’’তি? ‘‘এৰং, ভন্তে’’. ‘‘সেয্যথাপি ৰা পনানন্দ, রত্তিযা পচ্চূসসমযং [রত্তিপচ্চূসসমযে (ক.)] সূরিযে উগ্গচ্ছন্তে, জানেয্যাসি ত্ৰং, আনন্দ, অন্ধকারো অন্তরধাযিস্সতি, আলোকো পাতুভৰিস্সতী’’তি? ‘‘এৰং, ভন্তে’’. ‘‘সেয্যথাপি ৰা পনানন্দ, অভিদো মজ্ঝন্হিকে ভত্তকালসমযে, জানেয্যাসি ত্ৰং, আনন্দ, অন্ধকারো অন্তরহিতো আলোকো পাতুভূতো’’তি? ‘‘এৰং, ভন্তে’’. ‘‘এৰমেৰং খো অহং, আনন্দ, ইধেকচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘ইমস্স খো পুগ্গলস্স অকুসলা ধম্মা অন্তরহিতা, কুসলা ধম্মা সম্মুখীভূতা. অত্থি চ খ্ৰস্স অকুসলমূলং অসমুচ্ছিন্নং, তম্পি সব্বেন সব্বং সমুগ্ঘাতং গচ্ছতি. এৰমযং পুগ্গলো আযতিং অপরিহানধম্মো ভৰিস্সতী’তি. এৰম্পি খো, আনন্দ, তথাগতস্স পুরিসপুগ্গলো চেতসা চেতো পরিচ্চ ৰিদিতো হোতি. এৰম্পি খো, আনন্দ, তথাগতস্স পুরিসিন্দ্রিযঞাণং চেতসা চেতো পরিচ্চ ৰিদিতং হোতি. এৰম্পি খো, আনন্দ, তথাগতস্স আযতিং ধম্মসমুপ্পাদো চেতসা চেতো পরিচ্চ ৰিদিতো হোতি.

‘‘ইধ পনাহং, আনন্দ, একচ্চং পুগ্গলং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘নত্থি ইমস্স পুগ্গলস্স ৰালগ্গকোটিনিত্তুদনমত্তোপি অকুসলো ধম্মো, সমন্নাগতোযং পুগ্গলো একন্তসুক্কেহি অনৰজ্জেহি ধম্মেহি, দিট্ঠেৰ ধম্মে পরিনিব্বাযিস্সতী’তি. সেয্যথাপি, আনন্দ, অঙ্গারানি সীতানি নিব্বুতানি সুক্খে তিণপুঞ্জে ৰা কট্ঠপুঞ্জে ৰা নিক্খিত্তানি. জানেয্যাসি ত্ৰং, আনন্দ, নযিমানি অঙ্গারানি ৰুড্ঢিং ৰিরূল়্হিং ৰেপুল্লং আপজ্জিস্সন্তী’’তি? ‘‘এৰং, ভন্তে’’. ‘‘এৰমেৰং খো অহং, আনন্দ, ইধেকচ্চং পুগ্গলং এৰং চেতসা চেতো পরিচ্চ পজানামি – ‘ইমস্স খো পুগ্গলস্স ৰিজ্জমানা কুসলাপি ধম্মা অকুসলাপি ধম্মা’তি. তমেনং অপরেন সমযেন এৰং চেতসা চেতো পরিচ্চ পজানামি – ‘নত্থি ইমস্স পুগ্গলস্স ৰালগ্গকোটিনিত্তুদনমত্তোপি অকুসলো ধম্মো, সমন্নাগতোযং পুগ্গলো একন্তসুক্কেহি অনৰজ্জেহি ধম্মেহি, দিট্ঠেৰ ধম্মে পরিনিব্বাযিস্সতী’তি. এৰম্পি খো, আনন্দ, তথাগতস্স পুরিসপুগ্গলো চেতসা চেতো পরিচ্চ ৰিদিতো হোতি. এৰম্পি খো, আনন্দ, তথাগতস্স পুরিসিন্দ্রিযঞাণং চেতসা চেতো পরিচ্চ ৰিদিতং হোতি. এৰম্পি খো, আনন্দ, তথাগতস্স আযতিং ধম্মসমুপ্পাদো চেতসা চেতো পরিচ্চ ৰিদিতো হোতি.

‘‘তত্রানন্দ, যে তে পুরিমা তযো পুগ্গলা তেসং তিণ্ণং পুগ্গলানং একো অপরিহানধম্মো, একো পরিহানধম্মো, একো আপাযিকো নেরযিকো. তত্রানন্দ, যেমে পচ্ছিমা তযো পুগ্গলা ইমেসং তিণ্ণং পুগ্গলানং একো পরিহানধম্মো, একো অপরিহানধম্মো, একো পরিনিব্বানধম্মো’’তি. অট্ঠমং.