৫. দারুকম্মিকসুত্তং

৫৯. এৰং মে সুতং – একং সমযং ভগৰা নাতিকে ৰিহরতি গিঞ্জকাৰসথে. অথ খো দারুকম্মিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো দারুকম্মিকং গহপতিং ভগৰা এতদৰোচ – ‘‘অপি নু তে, গহপতি, কুলে দানং দীযতী’’তি? ‘‘দীযতি মে, ভন্তে, কুলে দানং. তঞ্চ খো যে তে ভিক্খূ আরঞ্ঞিকা পিণ্ডপাতিকা পংসুকূলিকা অরহন্তো ৰা অরহত্তমগ্গং ৰা সমাপন্না, তথারূপেসু মে, ভন্তে, ভিক্খূসু দানং দীযতী’’তি.

‘‘দুজ্জানং খো এতং, গহপতি, তযা গিহিনা কামভোগিনা পুত্তসম্বাধসযনং অজ্ঝাৰসন্তেন, কাসিকচন্দনং পচ্চনুভোন্তেন, মালাগন্ধৰিলেপনং ধারযন্তেন, জাতরূপরজতং সাদিযন্তেন ইমে ৰা অরহন্তো ইমে ৰা অরহত্তমগ্গং সমাপন্নাতি.

‘‘আরঞ্ঞিকো চেপি, গহপতি, ভিক্খু হোতি উদ্ধতো উন্নল়ো চপলো মুখরো ৰিকিণ্ণৰাচো মুট্ঠস্সতি অসম্পজানো অসমাহিতো ৰিব্ভন্তচিত্তো পাকতিন্দ্রিযো. এৰং সো তেনঙ্গেন গারয্হো. আরঞ্ঞিকো চেপি, গহপতি, ভিক্খু হোতি অনুদ্ধতো অনুন্নল়ো অচপলো অমুখরো অৰিকিণ্ণৰাচো উপট্ঠিতস্সতি সম্পজানো সমাহিতো একগ্গচিত্তো সংৰুতিন্দ্রিযো. এৰং সো তেনঙ্গেন পাসংসো.

‘‘গামন্তৰিহারী চেপি, গহপতি, ভিক্খু হোতি উদ্ধতো…পে… এৰং সো তেনঙ্গেন গারয্হো. গামন্তৰিহারী চেপি, গহপতি, ভিক্খু হোতি অনুদ্ধতো…পে… এৰং সো তেনঙ্গেন পাসংসো.

‘‘পিণ্ডপাতিকো চেপি, গহপতি, ভিক্খু হোতি উদ্ধতো…পে… এৰং সো তেনঙ্গেন গারয্হো. পিণ্ডপাতিকো চেপি, গহপতি, ভিক্খু হোতি অনুদ্ধতো…পে… এৰং সো তেনঙ্গেন পাসংসো.

‘‘নেমন্তনিকো চেপি, গহপতি, ভিক্খু হোতি উদ্ধতো…পে… এৰং সো তেনঙ্গেন গারয্হো. নেমন্তনিকো চেপি, গহপতি, ভিক্খু হোতি অনুদ্ধতো…পে… এৰং সো তেনঙ্গেন পাসংসো.

‘‘পংসুকূলিকো চেপি, গহপতি, ভিক্খু হোতি উদ্ধতো…পে… এৰং সো তেনঙ্গেন গারয্হো. পংসুকূলিকো চেপি, গহপতি, ভিক্খু হোতি অনুদ্ধতো…পে… এৰং সো তেনঙ্গেন পাসংসো.

‘‘গহপতিচীৰরধরো চেপি, গহপতি, ভিক্খু হোতি উদ্ধতো উন্নল়ো চপলো মুখরো ৰিকিণ্ণৰাচো মুট্ঠস্সতি অসম্পজানো অসমাহিতো ৰিব্ভন্তচিত্তো পাকতিন্দ্রিযো. এৰং সো তেনঙ্গেন গারয্হো. গহপতিচীৰরধরো চেপি, গহপতি, ভিক্খু হোতি অনুদ্ধতো অনুন্নল়ো অচপলো অমুখরো অৰিকিণ্ণৰাচো উপট্ঠিতস্সতি সম্পজানো সমাহিতো একগ্গচিত্তো সংৰুতিন্দ্রিযো. এৰং সো তেনঙ্গেন পাসংসো.

‘‘ইঙ্ঘ ত্ৰং, গহপতি, সঙ্ঘে দানং [দানানি (ক.)] দেহি. সঙ্ঘে তে দানং দদতো চিত্তং পসীদিস্সতি. সো ত্ৰং পসন্নচিত্তো কাযস্স ভেদা পরং মরণা সুগতিং সগ্গং লোকং উপপজ্জিস্সসী’’তি. ‘‘এসাহং, ভন্তে, অজ্জতগ্গে সঙ্ঘে দানং দস্সামী’’তি. পঞ্চমং.