৬. দুতিযসন্দিট্ঠিকসুত্তং

৪৮. অথ খো অঞ্ঞতরো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো সো ব্রাহ্মণো ভগৰন্তং এতদৰোচ – ‘‘‘সন্দিট্ঠিকো ধম্মো, সন্দিট্ঠিকো ধম্মো’তি, ভো গোতম, ৰুচ্চতি. কিত্তাৰতা নু খো, ভো গোতম, সন্দিট্ঠিকো ধম্মো হোতি অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি?

‘‘তেন হি, ব্রাহ্মণ, তঞ্ঞেৰেত্থ পটিপুচ্ছিস্সামি. যথা তে খমেয্য তথা নং ব্যাকরেয্যাসি. তং কিং মঞ্ঞসি, ব্রাহ্মণ, সন্তং ৰা অজ্ঝত্তং রাগং ‘অত্থি মে অজ্ঝত্তং রাগো’তি পজানাসি, অসন্তং ৰা অজ্ঝত্তং রাগং ‘নত্থি মে অজ্ঝত্তং রাগো’তি পজানাসী’’তি? ‘‘এৰং, ভো’’. ‘‘যং খো ত্ৰং, ব্রাহ্মণ, সন্তং ৰা অজ্ঝত্তং রাগং ‘অত্থি মে অজ্ঝত্তং রাগো’তি পজানাসি, অসন্তং ৰা অজ্ঝত্তং রাগং ‘নত্থি মে অজ্ঝত্তং রাগো’তি পজানাসি – এৰম্পি খো, ব্রাহ্মণ, সন্দিট্ঠিকো ধম্মো হোতি…পে….

‘‘তং কিং মঞ্ঞসি, ব্রাহ্মণ, সন্তং ৰা অজ্ঝত্তং দোসং…পে… সন্তং ৰা অজ্ঝত্তং মোহং…পে… সন্তং ৰা অজ্ঝত্তং কাযসন্দোসং…পে… সন্তং ৰা অজ্ঝত্তং ৰচীসন্দোসং…পে… সন্তং ৰা অজ্ঝত্তং মনোসন্দোসং ‘অত্থি মে অজ্ঝত্তং মনোসন্দোসো’তি পজানাসি, অসন্তং ৰা অজ্ঝত্তং মনোসন্দোসং ‘নত্থি মে অজ্ঝত্তং মনোসন্দোসো’তি পজানাসী’’তি? ‘‘এৰং, ভো’’. ‘‘যং খো ত্ৰং, ব্রাহ্মণ, সন্তং ৰা অজ্ঝত্তং মনোসন্দোসং ‘অত্থি মে অজ্ঝত্তং মনোসন্দোসো’তি পজানাসি, অসন্তং ৰা অজ্ঝত্তং মনোসন্দোসং ‘নত্থি মে অজ্ঝত্তং মনোসন্দোসো’তি পজানাসি – এৰং খো, ব্রাহ্মণ, সন্দিট্ঠিকো ধম্মো হোতি অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি.

‘‘অভিক্কন্তং, ভো গোতম, অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি. ছট্ঠং.