৭. খেমসুত্তং

৪৯. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা চ খেমো আযস্মা চ সুমনো সাৰত্থিযং ৰিহরন্তি অন্ধৰনস্মিং. অথ খো আযস্মা চ খেমো আযস্মা চ সুমনো যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্নো খো আযস্মা খেমো ভগৰন্তং এতদৰোচ –

‘‘যো সো, ভন্তে, ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো তস্স ন এৰং হোতি – ‘অত্থি মে সেয্যোতি ৰা অত্থি মে সদিসোতি ৰা অত্থি মে হীনোতি ৰা’’’তি. ইদমৰোচাযস্মা খেমো. সমনুঞ্ঞো সত্থা অহোসি. অথ খো আযস্মা খেমো ‘‘সমনুঞ্ঞো মে সত্থা’’তি উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি.

অথ খো আযস্মা সুমনো অচিরপক্কন্তে আযস্মন্তে খেমে ভগৰন্তং এতদৰোচ – ‘‘যো সো, ভন্তে, ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো তস্স ন এৰং হোতি – ‘নত্থি মে সেয্যোতি ৰা নত্থি মে সদিসোতি ৰা নত্থি মে হীনোতি ৰা’’’তি. ইদমৰোচাযস্মা সুমনো. সমনুঞ্ঞো সত্থা অহোসি. অথ খো আযস্মা সুমনো ‘‘সমনুঞ্ঞো মে সত্থা’’তি উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি.

অথ খো ভগৰা অচিরপক্কন্তেসু আযস্মন্তে চ খেমে আযস্মন্তে চ সুমনে ভিক্খূ আমন্তেসি – ‘‘এৰং খো, ভিক্খৰে, কুলপুত্তা অঞ্ঞং ব্যাকরোন্তি. অত্থো চ ৰুত্তো অত্তা চ অনুপনীতো. অথ চ পন ইধেকচ্চে মোঘপুরিসা হসমানকা [হসমানকং (ক.) মহাৰ. ২৪৫] মঞ্ঞে অঞ্ঞং ব্যাকরোন্তি. তে পচ্ছা ৰিঘাতং আপজ্জন্তী’’তি.

‘‘ন উস্সেসু ন ওমেসু, সমত্তে নোপনীযরে [নোপনিয্যরে (স্যা. পী. ক.)];

খীণা জাতি ৰুসিতং ব্রহ্মচরিযং, চরন্তি সংযোজনৰিপ্পমুত্তা’’তি. সত্তমং;