১২. ধম্মিকসুত্তং

৫৪. একং সমযং ভগৰা রাজগহে ৰিহরতি গিজ্ঝকূটে পব্বতে. তেন খো পন সমযেন আযস্মা ধম্মিকো জাতিভূমিযং আৰাসিকো হোতি সব্বসো জাতিভূমিযং সত্তসু আৰাসেসু. তত্র সুদং আযস্মা ধম্মিকো আগন্তুকে ভিক্খূ অক্কোসতি পরিভাসতি ৰিহিংসতি ৰিতুদতি রোসেতি ৰাচায. তে চ আগন্তুকা ভিক্খূ আযস্মতা ধম্মিকেন অক্কোসিযমানা পরিভাসিযমানা ৰিহেসিযমানা ৰিতুদিযমানা রোসিযমানা ৰাচায পক্কমন্তি, ন সণ্ঠন্তি [ন সণ্ঠহন্তি (সী.)], রিঞ্চন্তি আৰাসং.

অথ খো জাতিভূমকানং [জাতিভূমিকানং (স্যা. পী. ক.)] উপাসকানং এতদহোসি – ‘‘মযং খো ভিক্খুসঙ্ঘং পচ্চুপট্ঠিতা চীৰরপিণ্ডপাতসেনাসনগিলানপ্পচ্চযভেসজ্জপরিক্খারেন. অথ চ পন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাসং. কো নু খো হেতু কো পচ্চযো যেন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাস’’ন্তি? অথ খো জাতিভূমকানং উপাসকানং এতদহোসি – ‘‘অযং খো আযস্মা ধম্মিকো আগন্তুকে ভিক্খূ অক্কোসতি পরিভাসতি ৰিহিংসতি ৰিতুদতি রোসেতি ৰাচায. তে চ আগন্তুকা ভিক্খূ আযস্মতা ধম্মিকেন অক্কোসিযমানা পরিভাসিযমানা ৰিহেসিযমানা ৰিতুদিযমানা রোসিযমানা ৰাচায পক্কমন্তি, ন সণ্ঠন্তি, রিঞ্চন্তি আৰাসং. যংনূন মযং আযস্মন্তং ধম্মিকং পব্বাজেয্যামা’’তি.

অথ খো জাতিভূমকা উপাসকা যেন আযস্মা ধম্মিকো তেনুপসঙ্কমিংসু; উপসঙ্কমিত্ৰা আযস্মন্তং ধম্মিকং এতদৰোচুং – ‘‘পক্কমতু, ভন্তে, আযস্মা ধম্মিকো ইমম্হা আৰাসা; অলং তে ইধ ৰাসেনা’’তি. অথ খো আযস্মা ধম্মিকো তম্হা আৰাসা অঞ্ঞং আৰাসং অগমাসি. তত্রপি সুদং আযস্মা ধম্মিকো আগন্তুকে ভিক্খূ অক্কোসতি পরিভাসতি ৰিহিংসতি ৰিতুদতি রোসেতি ৰাচায. তে চ আগন্তুকা ভিক্খূ আযস্মতা ধম্মিকেন অক্কোসিযমানা পরিভাসিযমানা ৰিহেসিযমানা ৰিতুদিযমানা রোসিযমানা ৰাচায পক্কমন্তি, ন সণ্ঠন্তি, রিঞ্চন্তি আৰাসং.

অথ খো জাতিভূমকানং উপাসকানং এতদহোসি – ‘‘মযং খো ভিক্খুসঙ্ঘং পচ্চুপট্ঠিতা চীৰরপিণ্ডপাতসেনাসনগিলানপ্পচ্চযভেসজ্জপরিক্খারেন. অথ চ পন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাসং. কো নু খো হেতু কো পচ্চযো যেন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাস’’ন্তি? অথ খো জাতিভূমকানং উপাসকানং এতদহোসি – ‘‘অযং খো আযস্মা ধম্মিকো আগন্তুকে ভিক্খূ অক্কোসতি পরিভাসতি ৰিহিংসতি ৰিতুদতি রোসেতি ৰাচায. তে চ আগন্তুকা ভিক্খূ আযস্মতা ধম্মিকেন অক্কোসিযমানা পরিভাসিযমানা ৰিহেসিযমানা ৰিতুদিযমানা রোসিযমানা ৰাচায পক্কমন্তি, ন সণ্ঠন্তি, রিঞ্চন্তি আৰাসং. যংনূন মযং আযস্মন্তং ধম্মিকং পব্বাজেয্যামা’’তি.

অথ খো জাতিভূমকা উপাসকা যেনাযস্মা ধম্মিকো তেনুপসঙ্কমিংসু; উপসঙ্কমিত্ৰা আযস্মন্তং ধম্মিকং এতদৰোচুং – ‘‘পক্কমতু, ভন্তে, আযস্মা ধম্মিকো ইমম্হাপি আৰাসা; অলং তে ইধ ৰাসেনা’’তি. অথ খো আযস্মা ধম্মিকো তম্হাপি আৰাসা অঞ্ঞং আৰাসং অগমাসি. তত্রপি সুদং আযস্মা ধম্মিকো আগন্তুকে ভিক্খূ অক্কোসতি পরিভাসতি ৰিহিংসতি ৰিতুদতি রোসেতি ৰাচায. তে চ আগন্তুকা ভিক্খূ আযস্মতা ধম্মিকেন অক্কোসিযমানা পরিভাসিযমানা ৰিহেসিযমানা ৰিতুদিযমানা রোসিযমানা ৰাচায পক্কমন্তি, ন সণ্ঠন্তি, রিঞ্চন্তি আৰাসং.

অথ খো জাতিভূমকানং উপাসকানং এতদহোসি – ‘‘মযং খো ভিক্খুসঙ্ঘং পচ্চুপট্ঠিতা চীৰরপিণ্ডপাতসেনাসনগিলানপ্পচ্চযভেসজ্জপরিক্খারেন. অথ চ পন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাসং. কো নু খো হেতু কো পচ্চযো যেন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাস’’ন্তি? অথ খো জাতিভূমকানং উপাসকানং এতদহোসি – ‘‘অযং খো আযস্মা ধম্মিকো আগন্তুকে ভিক্খূ অক্কোসতি…পে…. যংনূন মযং আযস্মন্তং ধম্মিকং পব্বাজেয্যাম সব্বসো জাতিভূমিযং সত্তহি আৰাসেহী’’তি. অথ খো জাতিভূমকা উপাসকা যেনাযস্মা ধম্মিকো তেনুপসঙ্কমিংসু; উপসঙ্কমিত্ৰা আযস্মন্তং ধম্মিকং এতদৰোচুং – ‘‘পক্কমতু, ভন্তে, আযস্মা ধম্মিকো সব্বসো জাতিভূমিযং সত্তহি আৰাসেহী’’তি. অথ খো আযস্মতো ধম্মিকস্স এতদহোসি – ‘‘পব্বাজিতো খোম্হি জাতিভূমকেহি উপাসকেহি সব্বসো জাতিভূমিযং সত্তহি আৰাসেহি. কহং নু খো দানি গচ্ছামী’’তি? অথ খো আযস্মতো ধম্মিকস্স এতদহোসি – ‘‘যংনূনাহং যেন ভগৰা তেনুপসঙ্কমেয্য’’ন্তি.

অথ খো আযস্মা ধম্মিকো পত্তচীৰরমাদায যেন রাজগহং তেন পক্কামি. অনুপুব্বেন যেন রাজগহং গিজ্ঝকূটো পব্বতো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং ধম্মিকং ভগৰা এতদৰোচ – ‘‘হন্দ কুতো নু ত্ৰং, ব্রাহ্মণ ধম্মিক, আগচ্ছসী’’তি? ‘‘পব্বাজিতো অহং, ভন্তে, জাতিভূমকেহি উপাসকেহি সব্বসো জাতিভূমিযং সত্তহি আৰাসেহী’’তি. ‘‘অলং, ব্রাহ্মণ ধম্মিক, কিং তে ইমিনা, যং তং ততো ততো পব্বাজেন্তি, সো ত্ৰং ততো ততো পব্বাজিতো মমেৰ সন্তিকে আগচ্ছসি’’.

‘‘ভূতপুব্বং, ব্রাহ্মণ ধম্মিক, সামুদ্দিকা ৰাণিজা তীরদস্সিং সকুণং গহেত্ৰা নাৰায সমুদ্দং অজ্ঝোগাহন্তি. তে অতীরদক্খিণিযা [অতীরদস্সনিযা (স্যা.), অতীরদস্সিযা (ক.)] নাৰায তীরদস্সিং সকুণং মুঞ্চন্তি. সো গচ্ছতেৰ পুরত্থিমং দিসং, গচ্ছতি পচ্ছিমং দিসং, গচ্ছতি উত্তরং দিসং, গচ্ছতি দক্খিণং দিসং, গচ্ছতি উদ্ধং, গচ্ছতি অনুদিসং. সচে সো সমন্তা তীরং পস্সতি, তথাগতকোৰ [তথাগতো (ক.) দী. নি. ১.৪৯৭ পস্সিতব্বং] হোতি. সচে পন সো সমন্তা তীরং ন পস্সতি তমেৰ নাৰং পচ্চাগচ্ছতি. এৰমেৰং খো, ব্রাহ্মণ ধম্মিক, যং তং ততো ততো পব্বাজেন্তি সো ত্ৰং ততো ততো পব্বাজিতো মমেৰ সন্তিকে আগচ্ছসি.

‘‘ভূতপুব্বং, ব্রাহ্মণ ধম্মিক, রঞ্ঞো কোরব্যস্স সুপ্পতিট্ঠো নাম নিগ্রোধরাজা অহোসি পঞ্চসাখো সীতচ্ছাযো মনোরমো. সুপ্পতিট্ঠস্স খো পন, ব্রাহ্মণ ধম্মিক, নিগ্রোধরাজস্স দ্ৰাদসযোজনানি অভিনিৰেসো অহোসি, পঞ্চ যোজনানি মূলসন্তানকানং. সুপ্পতিট্ঠস্স খো পন, ব্রাহ্মণ ধম্মিক, নিগ্রোধরাজস্স তাৰ মহন্তানি ফলানি অহেসুং; সেয্যথাপি নাম আল়্হকথালিকা. এৰমস্স সাদূনি ফলানি অহেসুং; সেয্যথাপি নাম খুদ্দং মধুং অনেলকং. সুপ্পতিট্ঠস্স খো পন, ব্রাহ্মণ ধম্মিক, নিগ্রোধরাজস্স একং খন্ধং রাজা পরিভুঞ্জতি সদ্ধিং ইত্থাগারেন, একং খন্ধং বলকাযো পরিভুঞ্জতি, একং খন্ধং নেগমজানপদা পরিভুঞ্জন্তি, একং খন্ধং সমণব্রাহ্মণা পরিভুঞ্জন্তি, একং খন্ধং মিগা [মিগপক্খিনো (সী. স্যা. পী.)] পরিভুঞ্জন্তি. সুপ্পতিট্ঠস্স খো পন, ব্রাহ্মণ ধম্মিক, নিগ্রোধরাজস্স ন কোচি ফলানি রক্খতি, ন চ সুদং [ন চ পুন (ক.)] অঞ্ঞমঞ্ঞস্স ফলানি হিংসন্তি.

‘‘অথ খো, ব্রাহ্মণ ধম্মিক, অঞ্ঞতরো পুরিসো সুপ্পতিট্ঠস্স নিগ্রোধরাজস্স যাৰদত্থং ফলানি ভক্খিত্ৰা সাখং ভঞ্জিত্ৰা পক্কামি. অথ খো, ব্রাহ্মণ ধম্মিক, সুপ্পতিট্ঠে নিগ্রোধরাজে অধিৰত্থায দেৰতায এতদহোসি – ‘অচ্ছরিযং ৰত, ভো, অব্ভুতং ৰত, ভো! যাৰ পাপো মনুস্সো [যাৰ পাপমনুস্সো (স্যা.), যাৰতা পাপমনুস্সো (ক.)], যত্র হি নাম সুপ্পতিট্ঠস্স নিগ্রোধরাজস্স যাৰদত্থং ফলানি ভক্খিত্ৰা সাখং ভঞ্জিত্ৰা পক্কমিস্সতি, যংনূন সুপ্পতিট্ঠো নিগ্রোধরাজা আযতিং ফলং ন দদেয্যা’তি. অথ খো, ব্রাহ্মণ ধম্মিক, সুপ্পতিট্ঠো নিগ্রোধরাজা আযতিং ফলং ন অদাসি.

‘‘অথ খো, ব্রাহ্মণ ধম্মিক, রাজা কোরব্যো যেন সক্কো দেৰানমিন্দো তেনুপসঙ্কমি; উপসঙ্কমিত্ৰা সক্কং দেৰানমিন্দং এতদৰোচ – ‘যগ্ঘে, মারিস, জানেয্যাসি সুপ্পতিট্ঠো নিগ্রোধরাজা ফলং ন দেতী’তি? অথ খো, ব্রাহ্মণ ধম্মিক, সক্কো দেৰানমিন্দো তথারূপং ইদ্ধাভিসঙ্খারং অভিসঙ্খাসি [অভিসঙ্খারেসি (স্যা. ক.)], যথা ভুসা ৰাতৰুট্ঠি আগন্ত্ৰা সুপ্পতিট্ঠং নিগ্রোধরাজং পৰত্তেসি [পাতেসি (সী. পী.)] উম্মূলমকাসি. অথ খো, ব্রাহ্মণ ধম্মিক, সুপ্পতিট্ঠে নিগ্রোধরাজে অধিৰত্থা দেৰতা দুক্খী দুম্মনা অস্সুমুখী রুদমানা একমন্তং অট্ঠাসি.

‘‘অথ খো, ব্রাহ্মণ ধম্মিক, সক্কো দেৰানমিন্দো যেন সুপ্পতিট্ঠে নিগ্রোধরাজে অধিৰত্থা দেৰতা তেনুপসঙ্কমি; উপসঙ্কমিত্ৰা সুপ্পতিট্ঠে নিগ্রোধরাজে অধিৰত্থং দেৰতং এতদৰোচ – ‘কিং নু ত্ৰং, দেৰতে, দুক্খী দুম্মনা অস্সুমুখী রুদমানা একমন্তং ঠিতা’তি? ‘তথা হি পন মে, মারিস, ভুসা ৰাতৰুট্ঠি আগন্ত্ৰা ভৰনং পৰত্তেসি উম্মূলমকাসী’তি. ‘অপি নু ত্ৰং, দেৰতে, রুক্খধম্মে ঠিতায ভুসা ৰাতৰুট্ঠি আগন্ত্ৰা ভৰনং পৰত্তেসি উম্মূলমকাসী’তি? ‘কথং পন, মারিস, রুক্খো রুক্খধম্মে ঠিতো হোতী’তি? ‘ইধ, দেৰতে, রুক্খস্স মূলং মূলত্থিকা হরন্তি, তচং তচত্থিকা হরন্তি, পত্তং পত্তত্থিকা হরন্তি, পুপ্ফং পুপ্ফত্থিকা হরন্তি, ফলং ফলত্থিকা হরন্তি. ন চ তেন দেৰতায অনত্তমনতা ৰা অনভিনন্দি [অনভিরদ্ধি (সী.)] ৰা করণীযা. এৰং খো, দেৰতে, রুক্খো রুক্খধম্মে ঠিতো হোতী’তি. ‘অট্ঠিতাযেৰ খো মে, মারিস, রুক্খধম্মে ভুসা ৰাতৰুট্ঠি আগন্ত্ৰা ভৰনং পৰত্তেসি উম্মূলমকাসী’তি. ‘সচে খো ত্ৰং, দেৰতে, রুক্খধম্মে তিট্ঠেয্যাসি, সিযা [সিযাপি (সী. পী.)] তে ভৰনং যথাপুরে’তি? ‘ঠস্সামহং, [তিট্ঠেয্যামহং (স্যা.)] মারিস, রুক্খধম্মে, হোতু মে ভৰনং যথাপুরে’’’তি.

‘‘অথ খো, ব্রাহ্মণ ধম্মিক, সক্কো দেৰানমিন্দো তথারূপং ইদ্ধাভিসঙ্খারং অভিসঙ্খাসি [অভিসঙ্খারি (স্যা. ক.)], যথা ভুসা ৰাতৰুট্ঠি আগন্ত্ৰা সুপ্পতিট্ঠং নিগ্রোধরাজং উস্সাপেসি, সচ্ছৰীনি মূলানি অহেসুং. এৰমেৰং খো, ব্রাহ্মণ ধম্মিক, অপি নু তং সমণধম্মে ঠিতং জাতিভূমকা উপাসকা পব্বাজেসুং সব্বসো জাতিভূমিযং সত্তহি আৰাসেহী’’তি? ‘‘কথং পন, ভন্তে, সমণো সমণধম্মে ঠিতো হোতী’’তি? ‘‘ইধ, ব্রাহ্মণ ধম্মিক, সমণো অক্কোসন্তং ন পচ্চক্কোসতি, রোসন্তং ন পটিরোসতি, ভণ্ডন্তং ন পটিভণ্ডতি. এৰং খো, ব্রাহ্মণ ধম্মিক, সমণো সমণধম্মে ঠিতো হোতী’’তি. ‘‘অট্ঠিতংযেৰ মং, ভন্তে, সমণধম্মে জাতিভূমকা উপাসকা পব্বাজেসুং সব্বসো জাতিভূমিযং সত্তহি আৰাসেহী’’তি.

[অ. নি. ৭.৬৬; ৭.৭৩] ‘‘ভূতপুব্বং, ব্রাহ্মণ ধম্মিক, সুনেত্তো নাম সত্থা অহোসি তিত্থকরো কামেসু ৰীতরাগো. সুনেত্তস্স খো পন, ব্রাহ্মণ ধম্মিক, সত্থুনো অনেকানি সাৰকসতানি অহেসুং. সুনেত্তো সত্থা সাৰকানং ব্রহ্মলোকসহব্যতায ধম্মং দেসেসি. যে খো পন, ব্রাহ্মণ ধম্মিক, সুনেত্তস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি ন পসাদেসুং তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিংসু. যে খো পন, ব্রাহ্মণ ধম্মিক, সুনেত্তস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি পসাদেসুং তে কাযস্স ভেদা পরং মরণা সুগতিং সগ্গং লোকং উপপজ্জিংসু.

‘‘ভূতপুব্বং, ব্রাহ্মণ ধম্মিক, মূগপক্খো নাম সত্থা অহোসি…পে… অরনেমি নাম সত্থা অহোসি… কুদ্দালকো নাম সত্থা অহোসি… হত্থিপালো নাম সত্থা অহোসি… জোতিপালো নাম সত্থা অহোসি তিত্থকরো কামেসু ৰীতরাগো. জোতিপালস্স খো পন, ব্রাহ্মণ ধম্মিক, সত্থুনো অনেকানি সাৰকসতানি অহেসুং. জোতিপালো সত্থা সাৰকানং ব্রহ্মলোকসহব্যতায ধম্মং দেসেসি. যে খো পন, ব্রাহ্মণ ধম্মিক, জোতিপালস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি ন পসাদেসুং তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিংসু. যে খো পন, ব্রাহ্মণ ধম্মিক, জোতিপালস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি পসাদেসুং তে কাযস্স ভেদা পরং মরণা সুগতিং সগ্গং লোকং উপপজ্জিংসু.

‘‘তং কিং মঞ্ঞসি, ব্রাহ্মণ ধম্মিক, যো ইমে ছ সত্থারে তিত্থকরে কামেসু ৰীতরাগে, অনেকসতপরিৰারে সসাৰকসঙ্ঘে পদুট্ঠচিত্তো অক্কোসেয্য পরিভাসেয্য, বহুং সো অপুঞ্ঞং পসৰেয্যা’’তি? ‘‘এৰং, ভন্তে’’. ‘‘যো খো, ব্রাহ্মণ ধম্মিক, ইমে ছ সত্থারে তিত্থকরে কামেসু ৰীতরাগে অনেকসতপরিৰারে সসাৰকসঙ্ঘে পদুট্ঠচিত্তো অক্কোসেয্য পরিভাসেয্য, বহুং সো অপুঞ্ঞং পসৰেয্য. যো একং দিট্ঠিসম্পন্নং পুগ্গলং পদুট্ঠচিত্তো অক্কোসতি পরিভাসতি, অযং ততো বহুতরং অপুঞ্ঞং পসৰতি. তং কিস্স হেতু? নাহং, ব্রাহ্মণ ধম্মিক, ইতো বহিদ্ধা এৰরূপিং খন্তিং [এৰরূপং খন্তং (স্যা.)] ৰদামি, যথামং সব্রহ্মচারীসু. তস্মাতিহ, ব্রাহ্মণ ধম্মিক, এৰং সিক্খিতব্বং – ‘ন নো সমসব্রহ্মচারীসু [ন নো আমসব্রহ্মচারীসু (স্যা.), ন নো সব্রহ্মচারীসু (সী. পী.)] চিত্তানি পদুট্ঠানি ভৰিস্সন্তী’’’তি. এৰঞ্হি তে, ব্রাহ্মণ ধম্মিক, সিক্খিতব্বন্তি.

‘‘সুনেত্তো মূগপক্খো চ, অরনেমি চ ব্রাহ্মণো;

কুদ্দালকো অহু সত্থা, হত্থিপালো চ মাণৰো.

‘‘জোতিপালো চ গোৰিন্দো, অহু সত্তপুরোহিতো;

অহিংসকা [অভিসেকা (স্যা.)] অতীতংসে, ছ সত্থারো যসস্সিনো.

‘‘নিরামগন্ধা করুণেধিমুত্তা [ৰিমুত্তা (সী. স্যা. পী.)], কামসংযোজনাতিগা [কামসংযোজনাতিতা (স্যা.)];

কামরাগং ৰিরাজেত্ৰা, ব্রহ্মলোকূপগা অহুং [অহু (বহূসু), অহূ (ক. সী.)].

‘‘অহেসুং সাৰকা তেসং, অনেকানি সতানিপি;

নিরামগন্ধা করুণেধিমুত্তা, কামসংযোজনাতিগা;

কামরাগং ৰিরাজেত্ৰা, ব্রহ্মলোকূপগা অহুং [অহু (বহূসু), অহূ (ক. সী.)].

‘‘যেতে ইসী বাহিরকে, ৰীতরাগে সমাহিতে;

পদুট্ঠমনসঙ্কপ্পো, যো নরো পরিভাসতি;

বহুঞ্চ সো পসৰতি, অপুঞ্ঞং তাদিসো নরো.

‘‘যো চেকং দিট্ঠিসম্পন্নং, ভিক্খুং বুদ্ধস্স সাৰকং;

পদুট্ঠমনসঙ্কপ্পো, যো নরো পরিভাসতি;

অযং ততো বহুতরং, অপুঞ্ঞং পসৰে নরো.

‘‘ন সাধুরূপং আসীদে, দিট্ঠিট্ঠানপ্পহাযিনং;

সত্তমো পুগ্গলো এসো, অরিযসঙ্ঘস্স ৰুচ্চতি.

‘‘অৰীতরাগো কামেসু, যস্স পঞ্চিন্দ্রিযা মুদূ;

সদ্ধা সতি চ ৰীরিযং, সমথো চ ৰিপস্সনা.

‘‘তাদিসং ভিক্খুমাসজ্জ, পুব্বেৰ উপহঞ্ঞতি;

অত্তানং উপহন্ত্ৰান, পচ্ছা অঞ্ঞং ৰিহিংসতি.

‘‘যো চ রক্খতি অত্তানং, রক্খিতো তস্স বাহিরো;

তস্মা রক্খেয্য অত্তানং, অক্খতো পণ্ডিতো সদা’’তি. দ্ৰাদসমং;

ধম্মিকৰগ্গো পঞ্চমো.