৭. সোপ্পসুত্তং

১৭. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো ভগৰা সাযন্হসমযং পটিসল্লানা ৰুট্ঠিতো যেনুপট্ঠানসালা তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. আযস্মাপি খো সারিপুত্তো সাযন্হসমযং পটিসল্লানা ৰুট্ঠিতো যেনুপট্ঠানসালা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. আযস্মাপি খো মহামোগ্গল্লানো…পে… আযস্মাপি খো মহাকস্সপো… আযস্মাপি খো মহাকচ্চাযনো… আযস্মাপি খো মহাকোট্ঠিকো [মহাকোট্ঠিতো (সী. পী.)] … আযস্মাপি খো মহাচুন্দো… আযস্মাপি খো মহাকপ্পিনো… আযস্মাপি খো অনুরুদ্ধো… আযস্মাপি খো রেৰতো… আযস্মাপি খো আনন্দো সাযন্হসমযং পটিসল্লানা ৰুট্ঠিতো যেনুপট্ঠানসালা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. অথ খো ভগৰা বহুদেৰ রত্তিং নিসজ্জায ৰীতিনামেত্ৰা উট্ঠাযাসনা ৰিহারং পাৰিসি. তেপি খো আযস্মন্তো অচিরপক্কন্তস্স ভগৰতো উট্ঠাযাসনা যথাৰিহারং অগমংসু. যে পন তত্থ ভিক্খূ নৰা অচিরপব্বজিতা অধুনাগতা ইমং ধম্মৰিনযং তে যাৰ সূরিযুগ্গমনা কাকচ্ছমানা সুপিংসু. অদ্দসা খো ভগৰা দিব্বেন চক্খুনা ৰিসুদ্ধেন অতিক্কন্তমানুসকেন তে ভিক্খূ যাৰ সূরিযুগ্গমনা কাকচ্ছমানে সুপন্তে. দিস্ৰা যেনুপট্ঠানসালা তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. নিসজ্জ খো ভগৰা ভিক্খূ আমন্তেসি –

‘‘কহং নু খো, ভিক্খৰে, সারিপুত্তো? কহং মহামোগ্গল্লানো? কহং মহাকস্সপো? কহং মহাকচ্চাযনো? কহং মহাকোট্ঠিকো? কহং মহাচুন্দো? কহং মহাকপ্পিনো? কহং অনুরুদ্ধো? কহং রেৰতো? কহং আনন্দো? কহং নু খো তে, ভিক্খৰে, থেরা সাৰকা গতা’’তি? ‘‘তেপি খো, ভন্তে, আযস্মন্তো অচিরপক্কন্তস্স ভগৰতো উট্ঠাযাসনা যথাৰিহারং অগমংসূ’’তি. ‘‘কেন নো [কেন নো (ক.), কে নু (কত্থচি)] তুম্হে, ভিক্খৰে, থেরা ভিক্খূ নাগতাতি [ভিক্খূ নৰা (সী. স্যা. কং. পী.), ভিক্খূ গতাতি (?)] যাৰ সূরিযুগ্গমনা কাকচ্ছমানা সুপথ? তং কিং মঞ্ঞথ, ভিক্খৰে, অপি নু তুম্হেহি দিট্ঠং ৰা সুতং ৰা – ‘রাজা খত্তিযো মুদ্ধাভিসিত্তো [মুদ্ধাভিসিত্তো (ক.)] যাৰদত্থং সেয্যসুখং পস্সসুখং মিদ্ধসুখং অনুযুত্তো ৰিহরন্তো যাৰজীৰং রজ্জং কারেন্তো জনপদস্স ৰা পিযো মনাপো’’’তি? ‘‘নো হেতং, ভন্তে’’. ‘‘সাধু, ভিক্খৰে! মযাপি খো এতং, ভিক্খৰে, নেৰ দিট্ঠং ন সুতং – ‘রাজা খত্তিযো মুদ্ধাভিসিত্তো যাৰদত্থং সেয্যসুখং পস্সসুখং মিদ্ধসুখং অনুযুত্তো ৰিহরন্তো যাৰজীৰং রজ্জং কারেন্তো জনপদস্স ৰা পিযো মনাপো’’’তি.

‘‘তং কিং মঞ্ঞথ, ভিক্খৰে, অপি নু তুম্হেহি দিট্ঠং ৰা সুতং ৰা – ‘রট্ঠিকো…পে… পেত্তণিকো… সেনাপতিকো… গামগামণিকো [গামগামিকো (সী. পী.)] … পূগগামণিকো যাৰদত্থং সেয্যসুখং পস্সসুখং মিদ্ধসুখং অনুযুত্তো ৰিহরন্তো যাৰজীৰং পূগগামণিকত্তং কারেন্তো পূগস্স ৰা পিযো মনাপো’’’তি? ‘‘নো হেতং, ভন্তে’’. ‘‘সাধু, ভিক্খৰে! মযাপি খো এতং, ভিক্খৰে, নেৰ দিট্ঠং ন সুতং – ‘পূগগামণিকো যাৰদত্থং সেয্যসুখং পস্সসুখং মিদ্ধসুখং অনুযুত্তো ৰিহরন্তো যাৰজীৰং পূগগামণিকত্তং ৰা কারেন্তো পূগস্স ৰা পিযো মনাপো’’’তি.

‘‘তং কিং মঞ্ঞথ, ভিক্খৰে, অপি নু তুম্হেহি দিট্ঠং ৰা সুতং ৰা – ‘সমণো ৰা ব্রাহ্মণো ৰা যাৰদত্থং সেয্যসুখং পস্সসুখং মিদ্ধসুখং অনুযুত্তো ইন্দ্রিযেসু অগুত্তদ্ৰারো ভোজনে অমত্তঞ্ঞূ জাগরিযং অননুযুত্তো অৰিপস্সকো কুসলানং ধম্মানং পুব্বরত্তাপররত্তং বোধিপক্খিযানং [বোধপক্খিযানং (সী.), বোধপক্খিকানং (পী.)] ধম্মানং ভাৰনানুযোগং অননুযুত্তো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তো’’’তি? ‘‘নো হেতং, ভন্তে’’. ‘‘সাধু, ভিক্খৰে! মযাপি খো এতং, ভিক্খৰে, নেৰ দিট্ঠং ন সুতং – ‘সমণো ৰা ব্রাহ্মণো ৰা যাৰদত্থং সেয্যসুখং পস্সসুখং মিদ্ধসুখং অনুযুত্তো ইন্দ্রিযেসু অগুত্তদ্ৰারো ভোজনে অমত্তঞ্ঞূ জাগরিযং অননুযুত্তো অৰিপস্সকো কুসলানং ধম্মানং পুব্বরত্তাপররত্তং বোধিপক্খিযানং ধম্মানং ভাৰনানুযোগং অননুযুত্তো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তো’’’তি.

‘‘তস্মাতিহ, ভিক্খৰে, এৰং সিক্খিতব্বং – ‘ইন্দ্রিযেসু গুত্তদ্ৰারা ভৰিস্সাম, ভোজনে মত্তঞ্ঞুনো, জাগরিযং অনুযুত্তা, ৰিপস্সকা কুসলানং ধম্মানং, পুব্বরত্তাপররত্তং বোধিপক্খিযানং ধম্মানং, ভাৰনানুযোগমনুযুত্তা ৰিহরিস্সামা’তি. এৰঞ্হি ৰো, ভিক্খৰে, সিক্খিতব্ব’’ন্তি. সত্তমং.