৬. নকুলপিতুসুত্তং

১৬. একং সমযং ভগৰা ভগ্গেসু ৰিহরতি সুসুমারগিরে [সুংসুমারগিরে (সী. পী.), সংসুমারগিরে (কত্থচি)] ভেসকল়াৰনে মিগদাযে. তেন খো পন সমযেন নকুলপিতা গহপতি আবাধিকো হোতি দুক্খিতো বাল়্হগিলানো. অথ খো নকুলমাতা গহপতানী নকুলপিতরং গহপতিং এতদৰোচ –

‘‘মা খো ত্ৰং, গহপতি, সাপেক্খো [সাপেখো (পী. ক.)] কালমকাসি. দুক্খা, গহপতি, সাপেক্খস্স কালকিরিযা; গরহিতা চ ভগৰতা সাপেক্খস্স কালকিরিযা. সিযা খো পন তে, গহপতি, এৰমস্স – ‘ন নকুলমাতা গহপতানী মমচ্চযেন সক্খিস্সতি [ন সক্খিস্সতি (সী. স্যা. কং.), সক্কোতি (পী. ক.)] দারকে পোসেতুং, ঘরাৰাসং সন্ধরিতু’ন্তি [সন্ধরিতুন্তি (ক.), সণ্ঠরিতুং (স্যা.)]. ন খো পনেতং, গহপতি, এৰং দট্ঠব্বং. কুসলাহং, গহপতি, কপ্পাসং কন্তিতুং ৰেণিং ওলিখিতুং. সক্কোমহং, গহপতি, তৰচ্চযেন দারকে পোসেতুং, ঘরাৰাসং সন্ধরিতুং. তস্মাতিহ ত্ৰং, গহপতি, মা সাপেক্খো কালমকাসি. দুক্খা, গহপতি, সাপেক্খস্স কালকিরিযা; গরহিতা চ ভগৰতা সাপেক্খস্স কালকিরিযা.

‘‘সিযা খো পন তে, গহপতি, এৰমস্স – ‘নকুলমাতা গহপতানী মমচ্চযেন অঞ্ঞং ঘরং [ভত্তারং (স্যা. কং.), ৰীরং (সী.)] গমিস্সতী’তি. ন খো পনেতং, গহপতি, এৰং দট্ঠব্বং. ত্ৰঞ্চেৰ খো, গহপতি, জানাসি অহঞ্চ, যং নো [যদা তে (সী.), যথা (স্যা.), যথা নো (পী.)] সোল়সৰস্সানি গহট্ঠকং ব্রহ্মচরিযং সমাচিণ্ণং [সমাদিন্নং (সী.)]. তস্মাতিহ ত্ৰং, গহপতি, মা সাপেক্খো কালমকাসি. দুক্খা, গহপতি, সাপেক্খস্স কালকিরিযা; গরহিতা চ ভগৰতা সাপেক্খস্স কালকিরিযা.

‘‘সিযা খো পন তে, গহপতি, এৰমস্স – ‘নকুলমাতা গহপতানী মমচ্চযেন ন দস্সনকামা ভৰিস্সতি ভগৰতো ন দস্সনকামা ভিক্খুসঙ্ঘস্সা’তি. ন খো পনেতং, গহপতি, এৰং দট্ঠব্বং. অহঞ্হি, গহপতি, তৰচ্চযেন দস্সনকামতরা চেৰ ভৰিস্সামি ভগৰতো, দস্সনকামতরা চ ভিক্খুসঙ্ঘস্স. তস্মাতিহ ত্ৰং, গহপতি, মা সাপেক্খো কালমকাসি. দুক্খা, গহপতি, সাপেক্খস্স কালকিরিযা; গরহিতা চ ভগৰতা সাপেক্খস্স কালকিরিযা.

‘‘সিযা খো পন তে, গহপতি, এৰমস্স – ‘ন নকুলমাতা গহপতানী মমচ্চযেন সীলেসু [নকুলমাতা… ন সীলেসু (সী. পী.)] পরিপূরকারিনী’তি. ন খো পনেতং, গহপতি, এৰং দট্ঠব্বং. যাৰতা খো, গহপতি, তস্স ভগৰতো সাৰিকা গিহী ওদাতৰসনা সীলেসু পরিপূরকারিনিযো, অহং তাসং অঞ্ঞতরা. যস্স খো পনস্স কঙ্খা ৰা ৰিমতি ৰা – অযং সো ভগৰা অরহং সম্মাসম্বুদ্ধো ভগ্গেসু ৰিহরতি সুসুমারগিরে ভেসকল়াৰনে মিগদাযে – তং ভগৰন্তং উপসঙ্কমিত্ৰা পুচ্ছতু. তস্মাতিহ ত্ৰং, গহপতি, মা সাপেক্খো কালমকাসি. দুক্খা, গহপতি, সাপেক্খস্স কালকিরিযা; গরহিতা চ ভগৰতা সাপেক্খস্স কালকিরিযা.

‘‘সিযা খো পন তে, গহপতি, এৰমস্স – ‘ন নকুলমাতা গহপতানী লাভিনী [নকুলমাতা গহপতানী ন লাভিনী (পী.)] অজ্ঝত্তং চেতোসমথস্সা’তি. ন খো পনেতং, গহপতি, এৰং দট্ঠব্বং. যাৰতা খো, গহপতি, তস্স ভগৰতো সাৰিকা গিহী ওদাতৰসনা লাভিনিযো অজ্ঝত্তং চেতোসমথস্স, অহং তাসং অঞ্ঞতরা. যস্স খো পনস্স কঙ্খা ৰা ৰিমতি ৰা – অযং সো ভগৰা অরহং সম্মাসম্বুদ্ধো ভগ্গেসু ৰিহরতি সুসুমারগিরে ভেসকল়াৰনে মিগদাযে – তং ভগৰন্তং উপসঙ্কমিত্ৰা পুচ্ছতু. তস্মাতিহ ত্ৰং, গহপতি, মা সাপেক্খো কালমকাসি. দুক্খা, গহপতি, সাপেক্খস্স কালকিরিযা; গরহিতা চ ভগৰতা সাপেক্খস্স কালকিরিযা.

‘‘সিযা খো পন তে, গহপতি, এৰমস্স – ‘ন নকুলমাতা গহপতানী ইমস্মিং ধম্মৰিনযে ওগাধপ্পত্তা পতিগাধপ্পত্তা অস্সাসপ্পত্তা তিণ্ণৰিচিকিচ্ছা ৰিগতকথংকথা ৰেসারজ্জপ্পত্তা অপরপ্পচ্চযা সত্থুসাসনে ৰিহরতী’তি. ন খো পনেতং, গহপতি, এৰং দট্ঠব্বং. যাৰতা খো, গহপতি, তস্স ভগৰতো সাৰিকা গিহী ওদাতৰসনা ইমস্মিং ধম্মৰিনযে ওগাধপ্পত্তা পতিগাধপ্পত্তা অস্সাসপ্পত্তা তিণ্ণৰিচিকিচ্ছা ৰিগতকথংকথা ৰেসারজ্জপ্পত্তা অপরপ্পচ্চযা সত্থুসাসনে ৰিহরন্তি, অহং তাসং অঞ্ঞতরা. যস্স খো পনস্স কঙ্খা ৰা ৰিমতি ৰা – অযং সো ভগৰা অরহং সম্মাসম্বুদ্ধো ভগ্গেসু ৰিহরতি সুসুমারগিরে ভেসকল়াৰনে মিগদাযে – তং ভগৰন্তং উপসঙ্কমিত্ৰা পুচ্ছতু. তস্মাতিহ ত্ৰং, গহপতি, মা সাপেক্খো কালমকাসি. দুক্খা গহপতি সাপেক্খস্স কালকিরিযা; গরহিতা চ ভগৰতা সাপেক্খস্স কালকিরিযা’’তি.

অথ খো নকুলপিতুনো গহপতিস্স নকুলমাতরা [নকুলমাতায (সী. স্যা.), নকুলমাতুযা (ক.)] গহপতানিযা ইমিনা ওৰাদেন ওৰদিযমানস্স সো আবাধো ঠানসো পটিপ্পস্সম্ভি. ৰুট্ঠহি [ৰুট্ঠাতি (ক.)] চ নকুলপিতা গহপতি তম্হা আবাধা; তথা পহীনো চ পন নকুলপিতুনো গহপতিস্স সো আবাধো অহোসি. অথ খো নকুলপিতা গহপতি গিলানা ৰুট্ঠিতো [‘‘গিলানভাৰতো ৰুট্ঠায ঠিতো, ভাৰপ্পধানো হি অযং নিদ্দেসো’’তি টীকাসংৰণ্ণনা] অচিরৰুট্ঠিতো গেলঞ্ঞা দণ্ডমোলুব্ভ যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো নকুলপিতরং গহপতিং ভগৰা এতদৰোচ –

‘‘লাভা তে, গহপতি, সুলদ্ধং তে, গহপতি! যস্স তে নকুলমাতা গহপতানী অনুকম্পিকা অত্থকামা ওৰাদিকা অনুসাসিকা. যাৰতা খো, গহপতি, মম সাৰিকা গিহী ওদাতৰসনা সীলেসু পরিপূরকারিনিযো, নকুলমাতা গহপতানী তাসং অঞ্ঞতরা. যাৰতা খো, গহপতি, মম সাৰিকা গিহী ওদাতৰসনা লাভিনিযো অজ্ঝত্তং চেতোসমথস্স, নকুলমাতা গহপতানী তাসং অঞ্ঞতরা. যাৰতা খো, গহপতি, মম সাৰিকা গিহী ওদাতৰসনা ইমস্মিং ধম্মৰিনযে ওগাধপ্পত্তা পতিগাধপ্পত্তা অস্সাসপ্পত্তা তিণ্ণৰিচিকিচ্ছা ৰিগতকথংকথা ৰেসারজ্জপ্পত্তা অপরপ্পচ্চযা সত্থুসাসনে ৰিহরন্তি, নকুলমাতা গহপতানী তাসং অঞ্ঞতরা. লাভা তে, গহপতি, সুলদ্ধং তে, গহপতি! যস্স তে নকুলমাতা গহপতানী অনুকম্পিকা অত্থকামা ওৰাদিকা অনুসাসিকা’’তি. ছট্ঠং.